Madrine Jë La Loi Ne La Itre Huliwa i Nyipunie
1. Nemene la ka troa ananazijë së troa catre cainöje ngöne la itre xa ijin?
1 Hna xupe la atr matre tro angeic a “madine . . . la loi ne la ite huliwa” i angeic. (Ate Cai. 2:24) Celë hi matre, ame la easa goeëne laka, kösë lo pëkö thangane la hne së hna cainöj, tre ketre kucakuca pi hi së; nge celë hi lai ka thapa la madrine së, me ananazijë së. Nemene la ka troa xatua së tro pala hi a hetrenyi la aqane waiewekë ka loi?
2. Pine nemene matre loi e tro sa hetrenyi la aqane waiewekë ka loi göne la aqane tro la itre atr a kapa la maca hne së hna tro fë?
2 Loi e Troa Hetrenyi La Aqane Waiewekë Ka Loi: Pane meku Iesu ju hi së, laka, ngacama ala xalaithe hi la itre atr ka kapa la maca hnei nyidrëti hna tro fë, ngo ame pe, lolo catre la aqane huliwa i nyidrë. (Ioane 17:4) Hnei Iesu fe hna amamane jëne lo ceitune i nyidrë ka qaja lo atre tra feja, ka hape, tha nöjei atre kö la ka troa kapa la maca ne la Baselaia. (Mat. 13:3-8, 18-22) Ngo ame pe, tha ka pë thangane kö la huliwa hne së hna tro fë.
3. Troa mama tune kaa the së ka hape, “hete wen,” ngacama tha ala nyimu kö la itre ka kapa la maca hne së hna tro fë?
3 Aliene La Kola Hape, Tro Sa Wa Wen: Öni Iesu ka hape, ame la itre ka troa kapa la maca, tre tro angatr a “hete wen.” (Mat. 13:23) Nge nyipici hi, ke ame la qitr a ham, tre tha eje kö a hamë nekö i qitr ka cia ha, ngo ej a hamë i fini wen. Ame la Keresiano ka wa finifin, tre tha ene kö la Keresiano ka öhnyi atr hna troa ce ini tusi memin, ngo ene pe lo Keresiano ka tha mano kö troa tro fë la maca ne la Baselaia. Nge celë hi “loi” hne së hna kuca, nge ka ithue madrine koi së, ngacama tha kapa kö hnei itre atr la maca hne së hna tro fë. Easa huliwa, göne la troa ahmitrötrëne la ëje i Iehova. (Is. 43:10-12; Mat. 6:9) Nge easa madrine laka, easë la itretre ce huliwa me Akötresie. (1 Kor. 3:9) Celë hi “wene la ite ukeineqe” së ka amadrinë Iehova.—Heb. 13:15, 16.
4. Nemene e itre xa ijine la thangane la hne së hna huliwa, ngacama thatre kö së la aqane trongen?
4 Ame e itre xa ijin, tha mama kö koi së la thangane la hne së hna huliwa. Ame lo itre xa ka drenge la maca i Iesu ekö, tre ase ju kö nyidrëti cainöj e celë fen, nge tha hane kö angatre xötrethenge nyidrë. Ceitune hi lai memine la itre atr hne së hna tro fë kow la maca ne la Baselaia enehila; maine jë tha hna canga ketr kö la hni angatr. Ngo e thupene hë, cia jë hi, nge kola mama la thangane ngöne la angatr a hane lö kowe la nyipici. Haawe, tha luzi kö la hne së hna catre cainöj. Qa ngöne lai, catre jë së “wa atrun,” me amamane ka hape, itretre drei Iesu së.—Ioane 15:8.