“Lapa Loi Ju Me Nöjei Ate Asë”
1. Maine traqa pi së a öhne la atr ka elëhni ngöne la götrane hne së hna cainöje ngön, nemene la eamo qa hnine la Tusi Hmitrötr hne së hna troa trongën?
1 Itre ka hnine la tingetinge la itre hlue i Iehova, nge ame la huliwa hnei angatre hna tro fë, tre huliwa ka sajuëne la tingeting. (Is. 52:7) Ngazo pe, ame itre xa ijin, tre traqa ju hi së a öhne la itre atr ka elëhni, ngöne la götrane hne së hna cainöje ngön. Nemene la nyine tro sa kuca, matre tro pala hi a tingetinge la hni së?—Rom. 12:18.
2. Pine nemene matre nyipi ewekë troa trotrohnine la itre atr?
2 Trotrohni Angatre Ju: Ame la itre xa atr ka elëhni koi së, tre itre ka icilekeu angatr memine la nyipici, ngo ame itre xan, hetre itre xa ewekë kö hnei angatr a elëhni pin, ngo traqa ijije ju hi së la angatr a elëhni. Maine jë angatr a wesitr, ke hetre jole hnei angatre hna cile kow. Nge maine troa elëhni lai atr pine easë tro fë maca koi angeic, tha tro pi kö sa thëthëhmine laka, ala nyimu la itre atr ka thatre hnyawa kö la pengö së. (2 Kor. 4:4) Maine tro sa thele troa trotrohnine la itre atr, tha tro kö sa canga elëhni, nge ketre tha tro kö sa mekune ka hape, kola xele ma wai së hnei angatr.—Ite edomë 19:11.
3. Tro sa amamane tune kaa ka hape, easa metrötrëne la atr hne së hna cainöje kow?
3 Metrötrë Angatre Ju: Ala nyimu la itre atrene la itre götrane hne së hna cainöje ngön ka lapaune kowe la itre ini hnei angatre hna kapa ha qaane ekö. (2 Kor. 10:4) Nge isa qanyi angatre kö iëne ka hape, tro kö angatr a drei së maine tha drei së pena. Ngo tha tro pi kö sa kuci ketre ewekë matre tro lai atr a mekune ka hape, easa hnyima fë la itre ini hnei angeice hna kapa, me pi mama fë ka hape, atre ju kö së la hna qaja hnei Tusi Hmitrötr, hui angeic. Maine öni angeic ka hape tro sa tro, haawe, drei angeice ju, nge tro jë.
4. Troa mama tune kaa the së, ka hape, atreine së troa ithanata amenyikeny kowe la itre atr?
4 Tro Sa Ithanata Amenyikeny: Maine troa ithanata akökötrenyi koi së hnene la ketre atr, loi e tro pala hi sa catre ithanata amenyikeny, me hamëne la itre ithanata cememine la ihnim. (Kol. 4:6; 1 Pet. 2:23) Tha tro kö sa isi ithanata, ngo tro pe sa thele la itre mekune hna pi porotrikëne hnene lai atr. Maine ijij, tro sa hnyingëne kowe lai atr la kepine matre angeic a qeje jol, ngöne la easa tro fë la maca koi angeic. Ngo maine easa öhne ka hape, tha pi porotrike kö lai atr me easë, haawe nue angeice pi pe, wanga elëhni jë angeic.—Ite edomë 9:7; 17:14.
5. Nemene la itre eloine la tro pala hi sa thele troa mele tingetinge memine la itre atr ngöne la hna cainöje trootro?
5 Maine hne së pala hi hna thele tingetinge ngöne la easa ithanata memine la itre atr, tha tro pi kö angatr a thëthëhmine la aqane ujë së; nge e traqa pena ha la ketre trejine koi angatr, tre canga tro hi angatr a drei angeic. (Rom. 12:20, 21) Ame la itre xan, tre kösë lo catrehnine la aqane icilekeu i angatre me easë, ngo thatre kö së lai elany, maine jë tro fe angatre a hane ce hmi me easë. (Gal. 1:13, 14) Maine tha kapa pala hi angatre la nyipici, ngo ame la ka troa sisitria koi së, tre ene la troa atrunyi Iehova, me qaja aloine la maca hne së hna tro fë, pine la hne së hna xomi hni, me thele troa mele tingetinge pala hi memine la itre atr.—2 Kor. 6:3.