Angatr a Catr Ngo Ka Tingetinge Pala Hi
1 Nyimutre la itre atr hne së hna cainöje kow ka qaja amamane hnyawa la itre ini hnei angatr hna mejiun kow, a ka isazikeu memine la nyipici e hnine la Tusi Hmitrötr. Maine eje hi laka tro sa catre cainöjëne la nyipici, ngo loi e tro fe sa thele troa “lapa loi . . . me nöjei ate asë” me neën troa isi ithanata. (Rom. 12:18; Ite hu. 4:29) Matre tro sa catre tune kaa me thele pala hi la loi memine la tingeting, ngöne la easë a troa tro fë la maca ne Baselaia?
2 Thele Jë Troa Itrotrohni: Ame la atr ka thele tingeting, tre, angeic a neëne troa isi mekun. Thaa nyipi ewekë kö troa thele troa sa hmekune la itre ini hna catre fë hnei angeic, wanga thaa hane pi angeice kapa la maca hne së hna tro fë. Maine tria kö la itre hnei angeic hna qaja, maine jë tro sa thele me hamëne hnyawa la ketre mekune hnei angeic hna kapa. Maine tro sa ithanatane hnyawa la itre mekune hne së hna ce mejiune kow, haawe, atreine hi tro sa xomehnöthe la itre aliene hni ka ngazo me thele troa ketr la hni angeic.
3 Maine tro sa pane nue la aqane waiewekë ka ngazo ne la ketre atr, hapeu, easë kö lai a kapa la mekuna i angeic, maine wanga acone pena la nyipici? Ohea. Ame la hnëqa së itre hlue Keresiano, tre, thaa ene kö la troa thipetrije la nöjei aqane mekune ka ngazo, ngo ene pe la troa cainöjëne la maca ka loi ne la Baselaia i Akötresie. (Mat. 24:14) Thaa tro pi kö sa canga sesë troa isi memine la itre mekune ka isazikeu kö memine la nyipici hna qaja hnene la itre atr, ngo tro pe sa trotrohnine laka ketre jëne tro hi së lai a atrehmekune hnyawa la mekunane la atr.—Ite edomë 16:23.
4 Lapa Metrötre Ju: Hetre itre ijine tro sa catre me hetrenyi la trenge catr matre troa thipetrije la itre ini ka ngazo. Pine laka itre atr ka thele tingetinge së, thaa tro pi kö sa thaipiën la itre atr hnene la hna qaja la itre trenge ewekë ka ahleuhleune la mele i angeic me qejepengöne la itre ka mejiune me hamëne la itre ini ka thoi. Pëkö atr ka pi drenge la itre ka pi draië, ngo troa fe la mekuna ne la itre ka ajane la nyipici, e hne së hna thiina ka ipië me ka menyik. Ame la aqane troa wanga atrune la itre atr hne së hna cainöje kow, tre, ene la troa metrötrë angatr memine la itre ini hnei angatr hna mejiune kow. Qa ngöne lai, tro lai a hmaloi koi angatr troa kapa la maca së.
5 Hnei Paulo aposetolo hna wanga atrune la itre ini hna mejiune kow hnene la itre atr hnei nyidrëti hna cainöje kow. Ketre, ame la nyidrëti a tro fë la maca ka loi, hnei nyidrëti hna thele troa ketr la itre hni angatr. (Ite hu. 17:22-31) Qa ngöne la hnei nyidrëti hna xome la “nöjei pengön’ asë thatraqane la nöjei ate asë,” ene pe ijije hë troa hane “amele ite xan.” (1 Kor. 9:22) Ijije hi tro sa hane kuca tune lai, e hne së hna thele tingeting ngöne la aqane tro sa catre cainöjëne la maca ka loi.