Isa Drenge Hnyawa Ju Matre Isa Xomi Ini
1. Pine nemene matre nyipi ewekë tro sa catr, matre atreine së troa drenge hnyawa la itre hna troa qaja ngöne la hna asabele ne distrik, me kepe ini qa ngön?
1 Easenyi hë matre sine jë së lo asabele ne distrik ne la macatre 2013, nge easa madrine laka, asabele ka ketrepengöne la hne së hna troa sin e celë e Kaledoni ngöne la treu Okotropa. Kola e la 400 lao atr hna hane könëne qa Faras, me Canada, me Amerika, me Tahiti. Ketre huliwa ka tru la hna kuca, matre hnëkëne la itre cainöje ka troa amamane la aqane trongene la huliwa ne cainöj e cailo, memine fe la nyine tro sa kuca. Hapeu, hetre hnei nyipunieti kö hna kuca ha, matre ijije tro fe nyipunieti a hane sine lai asabele? Ame ngöne la itre ijine asabele ka tru ka tune la, tre kola enije la iatr, celë hi kepine matre nyipi ewekë tro sa isa catre lapa mekune pe la itre ini hne së hna troa kapa ngöne la hna asabele. Ketre, pine laka ka tru kö la itre hawa ne asabele hune la itre hawa ne icasikeu ngöne la isa ekalesia së, haawe, itre hawa ne tro së lai a pane lapa me drenge la itre cainöj. Ketre, tro fe sa hane kucakuca ke nanyi la itre gojeny, maine hnei itre xa ewekë ju kö. Ngo nemene la ka troa xatua së matre tro sa atreine drenge hnyawane la itre hna troa qaja, me kepe ini qa ngön?—Deu. 31:12.
2. Tro sa hnëkëne tune kaa la hni së thatraqane la asabele?
2 Qëmekene La Ijine Asabele: Hetrenyi ngöne la sit Ëternete së, ene www.jw.org, la porogaram ne asabele ka amamane koi së la itre tane la itre cainöj, cememine la cas maine lue mekene Tus. Maine ijije hi tro sa tro kowe la Ëternet, me goeëne la itre ithuemacanyi cili, tro hë sa hnëkëne la hni së troa kapa la itre mekune hna troa hamëne koi së. (Ezera 7:10) Ame ngöne la heji ne Hmi Ne La Hnepe Lapa, xomi ijine jë troa pane ce wange lai porogaram, matre hetre madrine i nyipunie troa lapa treqene la itre mekune hna troa hamën.
3. Nemene la nyine tro sa kuca matre atreine së troa drenge hnyawa la itre cainöj?
3 E Koilo Ngöne La Hna Asabele: Kola sipone matre maine ijij, tre troa canga tro koi gaa co qëmekene troa nyiqaane la asabele. Ketre maine ijij, kola sipone tro sa apine la itre mobilisi së, matre tha tro kö sa ajolëne la itre xan, hnene la hna ihë maine icinyanyikeu pena. Maine nyipunieti a ajane laka, tro kö a mele la mobilis i nyipunie, kola sipone troa kuca matre tha tro kö la mobilis a ho ngöne la hna asabele. Maine nyipunieti a huliwane lo hna hape, tablet, kola sipone troa kuca matre tha tro kö a hane ajolëne la itre xa ka sine la asabele. Kola sipone matre tha tro kö sa hane xeni maine iji ngöne la hna asabele. (Ate cai. 3:1) Qatixenyëne ju pe së la hna qaja hnene la atre cile fë la cainöj. Maine kola fe Tusi Hmitrötr göi troa e, hane ju goeëne ngöne la sipu Tusi Hmitrötre i nyipunie, me fejane la itre mekune ka ketri nyipunie.
4. Tro la itre keme me thin a xatuane tune kaa la itre nekö i angatr troa drenge hnyawa?
4 Ame la aja së, tre ene la troa hane drenge me xomi ini hnene la ha nekö së. Kola qaja ngöne Ite Edomë 29:15 ka hape: “Ame la nekönate hna nue, te, troa ahmahmane la thine i nyën.” Celë hi matre ka loi tro kö la itre nekönatr a ce lapa me keme me thin, matre tha tro kö nyudreni a icinyanyikeu jëne mobilis, me lapaa lö pi me lö jë qa ngöne la icasikeu, ngo tro pe nyudreni a hane drenge hnyawa. Nge ame göi itre nekönatre ka co catr, ngacama tha trotrohnin asë kö nyudreni la hna qaja, ngo ijine tro hi nyudreni lai a hane inine troa goe, me lapa hnyawa.
5. Pine nemene matre nyine loi koi së la troa wange hmaca la itre ini hne së hna kapa, nge tro sa kuca tune kaa?
5 Thupene La Drai Ne Asabele: Loi e troa canga lö koi hnalapa, matre mano hnyawa me egöcatre göne elanyi hmaca. Mekune hmaca jë la itre ini hnei nyipunieti hna drenge ngöne la hna asabele matre lapa huti itre ej ngöne la mekune i nyipunie. Maine nyipunieti a tro me itre xa trejine troa xeni ngöne la restaurant, xome trongëne ju fe la itre mekune hnei nyipunieti hna fejane matre troa ce ithanatane me angatr. Ame hë la nyipunieti a bëeke qa hna asabele, ka loi fe troa ce ithanatane ngöne la ijine Hmi Ne La Hnepe Lapa la aqane tro nyipunieti a trongëne la itre ini hnei nyipunieti hna kapa. Nge maine hetre itre itus hna hnyipi kapa, mekune ju troa xomi ijine ngöne la wiik, göi troa ithanatane la itre itus cili.
6. Hapeu eje hi lai la tro sa sine la asabele? Qeje pengöne jë.
6 Maine kola hë së kowe la ketre pui ne xen, ngo tha xeni kö së, maine tha trotro lapa kö la hne së hna xen, tre eje hi laka, pëkö thangane lai kowe la ngönetrei së. Ceitune hi lai göne la pui ne xeni ngöne la götrane la ua, ene la asabele hne së hna troa sin. Tro ha hetre thangane koi së, e tro sa traqa troa hane sin, me drenge hnyawa la itre ini hna hamën, me trongën.