Thatraqai Drei La Zonale Celë?
1. Ame la easa isa e la Ita Ne Thup maine Réveillez-vous !, nemene la hne së hna troa mekun, nge pine nemen?
1 Ame la kola hnëkëne la Ita Ne Thup me Réveillez-vous !, tre kola mekune la nöjei atr asë e cailo. Celë hi kepine matre, kola amë ngöne la lue zonale cili, la itre tane mekune ka isapengön. Ame la easa isa e zonal, loi e tro sa mekune ka hape, drei pengöne atr la ka ajane troa e la zonale cili.
2. Nemene la itre tane mekune hna ajane troa e hnene la itre atr?
2 Hetre mekune kö e hnine la Ita Ne Thup hne së hna hnyipi kapa, nge ka qejepengöne lo mekune hne së hna ce ithanatane memine la ketre sine huliwa së? Kolo jë kö a qejepengöne la aqane troa mele madrine hnene la itre hnepe lapa, matre tro sa hane hamëne kowe la itre sinee së? Hapeu, hetre atre kö hne së hna atre, nge ka troa tro kowe la ketre nöje hna qejepengöne hnene la Réveillez-vous !? Hapeu, hetre tane mekune kö ngöne la itre zonal, hna troa pi e hnene la itre ka huliwa ngöne la hnë salem, maine ka huliwa koi musi pena? Maine hetre ketre zonale ka qejepengöne la itre jole hna cile kow hnene la itre qatr, tre ma troa pi e lai zonale cili hnene la itre atr ka huliwa ngöne lo itre uma hna alapane la itre qatr. Maine hetre zonale ka qaja la itre atr ka eni wathebo, tre ma tro hi a hane e hnene la itre polis.
3. Qejepengöne jë la hna kuca hnene la itre xa trefën, nge ka amamane la enyipiewekëne troa hamëne koi itre atr la itre zonale ka qejepengöne la itre tane mekune hnei angatr hna pi e.
3 Thangan: Ame lo Réveillez-vous ! ne Okotropa 2011, tre ej a qejepengöne la aqane tro la itre keme me thin a hiane la itre nekönatr, matre tro nyudreni a nyipi atr. Thupene jë hi la hna kapa la zonale celë hnene la lue xa trefëne ne Afrique du Sud, nyidroti pë hë a telefone jë kowe la 25 lao uma ne ini ne la götrane hnei nyidroti hna cainöje ngön. Ala 22 e angatr ka sipone lai zonal, nge hna isa hamë zonalen la itre ka ini. Hna hane kuca tune lai hnene la lue xa trefëne ne lai nöje cili. Goi xome fe hnene la ketre uma ne ini lai zonal, matre troa e kowe la ha nekönatr. Ame hë e thupen, nyidroti pë hë a qaja jë kowe la atre thupëne la sirkoskripsio, la hnei nyidroti hna kuca. Nyidrëti pë hë a thuecatre jë kowe la itre atrene la sirkoskripsio i nyidrë, troa mekune la itre uma ne ini ne la götrane hnei angatre hna cainöje ngön. Ame hë la pun, nyipi ewekë tro la hnalapa ne thewe huliwa ne la nöje cili a fejan atrune hmaca lo lai zonal, ke tru la itre atr ka sipone lai zonal!
4. Pine nemene laka, loi e tro sa catre tro fë la itre zonale së?
4 Kola xatuane la itre atr hnene la itre zonale së troa trotrohnine la aliene la itre ewekë ka traqa koi së enehila, me qeje Tusi Hmitrötr, me qaja la Baselaia i Akötresie. Itre zonale celë hi e cailo fene la ka “amamane la iamele.” (Is. 52:7) Qa ngöne lai, catre pi së tro fë la itre zonale së. Ngo loi e tro sa pane atre ka hape, ‘Thatraqai drei la zonale celë?’