Hnëqa Ne La Sinatro
1. Tune kaa la aqane tro sa ce huliwa memine la itre trejine me easë, tui Paulo aposetolo ekö?
1 Öni Paulo aposetolo ekö ka hape, ame la itre ijine kola itronyi hnei angeice memine la itre trejine me angeic, tre ijine kola troa “ce akeukawanyi” angeice me angatr. (Rom. 1:12) Ame la nyipunieti a ce cainöje memine la ketre trejin, nyipunieti kö a xatua angeice me hane hamë ithuecatre koi angeice ngöne la ijine cili? Tha tro kö sa nango lapa thaup ngöne la ijine cili, ngo loi e tro pe sa iqajakeune la itre mekune ka xatua së troa atreine cainöje hnyawa.
2. Nemene la nyine tro sa kuca matre tha tro kö a xou la sine tronge së, nge nemene la enyipiewekën?
2 Kuca Jë Matre Tha Tro Kö a Xou: Hetrenyi la itre xa ka cainöje hë, ngo ka xou, nge canga mama hi lai koi së, jëne la ialameke i angatr, me hnenyinawa i angatr. Ijije troa patr la xou thei qaathei angatr jëne la itre trenge ithanata ka iakeukawany nge ka nyipici. Nemene la itre xa nyine tro sa qaja? Ame la ketre atre thupëne la sirkoskripsio, angeic a qaja kowe la hnei angeice hna ce cainöje memin la itre ewekë hnei angeice hna xouen, memine la aqane thithi lapa hnei angeic matre atreine troa elë hune la xou i angeic. Ame pena la ketre trejin, tre ketre ewekë kö la hnei angeice hna kuca, matre patre pi la xou qaathene la sine tronge i angeic; öni angeic: “Nyipi ewekë troa dredrehnyima. Ame ngöne la itre xa ijin, eje hi lai hnenge hna sipone ngöne la thith, matre troa hnyimahnyima la ialamekeng.” Hetre ewekë kö ka xatua nyipunie matre tha tro kö nyipunie a xou ngöne la hna cainöj? Hane ju qaja kowe la sine tronge i nyipunie.
3. Nemene la itre mekune nyine troa ce thawa memine la sine tronge së, matre xatua angeice fe troa maca ngöne la huliwa ne cainöj?
3 Hane Ju Qaja La Itre Aqane Huliwa: Tro nyipunie a hnyinge tune kaa kowe la ketre atr, matre aijijë nyipunie troa ce ithanatane me angeice la ewekë ka traqa ngöne la nöje i nyipunie? Hapeu, hetre thangane ka loi kö hnei nyipunie hna kapa qa ngöne la hna huliwane la itre mekune ne lo Huliwa Ne Baselaia, göi troa nyiqaane porotrike memine la itre atr? Hane ju qaja kowe la hnei nyipunieti hna ce cainöje memin. (Ite edomë 27:17) Ame la nyipunieti a tro troa wange hmaca la ketre atr, qaja jë la hnei nyipunie hna troa kuca, memine la aqane hnëkë nyipunie matre aejëne la mekuna i nyipunie. Thupene la hnei nyipunieti hna ini Tusi memine la ketre atr, hane ju qaja kowe la sine tronge i nyipunie la kepine matre nyipunieti a iëne lo lai mekune maine xötr hna ce ithanatan, maine ketre aqane hamë ini pena.
4. Nemene la enyipiewekëne la troa xatuane la itre ka ce cainöje me easë?
4 Tha hnene kö lo itre pane Keresiano hna mekune hmekuje hi la itre atr ka tha ce hmi kö me angatr. Wangatrehmekune fe hi angatre la enyipiewekëne la troa itö ithuecatrekeu. (Ite hu. 11:23; 15:32) Hnei Paulo aposetolo ekö hna ini Timoteo, me ithuecatre koi angeice troa hane qaja koi itre xan la itre hnei angeice hna inin. (2 Tim. 2:2) Maine tha hne së kö hna thëthëhmine troa kuca la loi kowe la itre trejine me easë ngöne la huliwa ne cainöj, tro ha atraqatre la madrine së, nge tro hë sa maca ngöne la huliwa së, me amadrinëne la Tretretro së.—Heb. 13:15, 16.