Tro Fe Kö Nyipunieti a Hane Sine Lai Huliwa Cili?
Ijine Tro Sa Amamane La Hni Ne Ole Së
1. Nemene la nyine tro sa kuca ngöne la ijine easa hnëkë göi Drai Ne Amekunën?
1 Ame e drai 14 Eiperem, Drai Ne Amekunëne la meci Iesu, tre ijine tro hi së lai a akökötrene me amamane la etrune la hni ne ole së koi Iehova. Kola amamane koi së hnene la tus i Luka 17:11-18, ka hape, ka tru koi Iehova me Iesu la troa hetre hni ne ole. Ngazo pe, ala treene lo ka lepera, ngo casi hi la ka hane olene koi nyidro. Ame ngöne la itre drai hnapin, pë hmaca kö sine mec, ngo tro pe sa mele palua, pine laka, ase hë hamëne koi së la thupene mel! Nge e cili, tro pala pë hë së lai a olene koi Iehova e nöjei drai, la hnei Nyidrëti hna hamëne koi së la itre manathithi cili. Ngo tro sa amamane tune kaa la hni ne ole së ngöne la hneijine celë?
2. Nemene la nyine tro sa kuca matre kökötre jë la hni ne ole së kowe la thupene mele hna hamën?
2 Inine Jë: Tha ka xulu xane kö la hni ne ole. Tro hë së lai a olene la hna hamëne la thupene mel, e tro sa e la itre mekene Tusi hna amekötine koi së troa e, ngöne la ijine easa hnëkë göi Drai Ne Amekunën. Hetrenyi e hnine lo Tusi Hmitrötr Traduction du monde nouveau qene papale hna hnyipi fejan, appendix B12, memine lo idrai, me topik qene Wiwi. Tro fe a amë qëmekene la Drai Ne Amekunën la porogarame ne e Tusi Hmitrötr, ngöne lo sit jw.org. Mekune kö ce ithanatane memine la itre atrene la hnepe lapa i nyipunie. Tro ha kökötre e kuhu hni së la hni ne ole kowe la thupene mele hna hamën. Nge tro ha hetre thangane ka loi koi së.—2 Kor. 5:14, 15; 1 Ioane 4:11.
3. Nemene la itre xa aqane troa amamane la hni ne ole së, ngöne lai ijine kola hnëkë göi Drai Ne Amekunën?
3 Amamane Jë: Mama kö la atr ka hetre hni ne ole. (Kol. 3:15) Ame lo atr ka lepera ka hetre hni ne ole, tre hnei angeice hna tro troa ixelë me Iesu, matre troa olene koi nyidrë. Hnei angeice fe hna qaja koi itre xa atr la kepine matre loi hmaca jë la ngönetrei angeic. (Luka 6:45) Hapeu, tro jë kö së lai elany a amamane la hni ne ole së kowe lo thupene mel, la easa hëne la itre atr troa hane sine la Drai Ne Amekunën? Ame la ketre aqan, tre ene la tro sa hane pionie ka ixatua, maine pena tro sa cainöj atruny ngöne lai ijine kola hnëkë göi Drai Ne Amekunën. Ame hë ngöne lai heji ne la Drai Ne Amekunën, easa amamane mina fe la hni ne ole së la easa kapa la itre atr ka traqa, me sa la itre hnyinge i angatr.
4. Nemene la nyine tro sa kuca ngöne la ijine hnëkë göi Drai Ne Amekunën, matre pëkö ewekë hne së hna troa hace hnin elany?
4 Thatre kö së ka hape, Drai Ne Amekunëne tixenuë pe hi la hne së hna troa sin? (1 Kor. 11:26) Ngo casi hi laka, maine eje pe hi lai, tre, pë hmaca kö ketre ijine ka tune lai ne tro sa amamane la hni ne ole së. Celë hi matre, hapeu, tro kö sa hane sine la huliwa cili? Epi tro la itre hne së hna qaja, memine la itre aliene hni së a amadrinë Iehova, Atre Hamëne la thupene mel.—Sal. 19:14.