Ketre Pengöne Hë La Itre Tarak!
1. Nemene la ketre jia ne huliwa ka mingöming hne së hna kapa?
1 Faifi lo tarak hna isa hamë së ngöne lo ijine asabele ne Distrik 2013, lo hna hape, “Wesi Ula i Akötresieti La Nyipici!” Hna hamë së fe lo Itre Ithuemacanyi Ne La Baselaia Na. 38; drei la tan, “Tro Kö a Mele Hmaca La Itre Ka Mec?”. Mingöminge pi hë la itre tarak cili. Hnauëne laka, kola saze la aqane kuca la itre tarak? Ame la easa tro fë la itre tarak ngöne la itre hnalapa, nemene la aqane tro sa huliwane itre ej?
2. Hnauëne laka, saze hë la aqane kuca la itre tarak?
2 Ketre Pengöne Hë: Foa lao ewekë nyine tro sa kuca, matre ijije tro sa porotrike hnyawa memine la atrene la ketre hnalapa; kola qaja la: (1) Troa hnying, matre tro sa nyiqaane porotrike me angeic. (2) Troa amamane la ketre mekune qa hnine la Tusi Hmitrötr. (3) Troa hamë sine itus kowe la atrene hnalapa. (4) Troa hnying, me sipone troa bëeke hmaca e ketre ijin, göi troa sa lai hnying. Kola aijijë së hnene lo itre tarak troa trongëne caha foa lao hnëqa së.
3. Nemene la aqane tro sa tro fë lo itre tarak ka hnyipixe?
3 Aqane Troa Huliwan: (1) Thupene la hna ibozu memine lai atr, amamai angeice jë lo köni hnying ka mama ngöne la qaane la tarak, nge hnyingëne jë la mekuna i angeic. (2) Fe pi lai tarak, nge ce wange ju lo hna hape “Hanawange la Hna Qaja Hnene La Tusi Hmitrötr.” E jë la xötr e hnine la Tusi Hmitrötr, e ijij. Maine ijije la traeme ne la atrekë hnalapan, ithanatane jë lo hna hape “Hane Hi La Aliene Kowe La Mele Së.” (3) Liine pi lai tarak, nge qaja ju kowe lai atr, ka hape, e ju pë hë angeic la munën. (4) Qëmekene la troa isa ije, amamane jë kowe lai atr lo hnying, ngöne la tröne lai tarak, lo hna hape “Tune Kaa La Mekuna i Epun,” nge sipone ju troa bëeke hmaca göi troa ithanatane la aqane sa hnei Tusi Hmitrötr la hnyinge cili.
4. Nemene la nyine troa qaja, la easa bëeke troa wange hmaca la ketre atr?
4 Pëkö ejolene la troa iwai hmaca. Xome hmaca jë lo itre mekene Tus ka mama e cili tröne lai tarak, göi troa sa lo hnyinge hna hnyingëne ngöne lo nyipunie a xötrei iöhnyi memine lai atr. Qëmekene troa inue memine lai atr, köjane ju lo boroshür Maca Ka Lolo, nge fe pi koi angeice la ini ka ithanatane la mekune ne lai tarak, nge nue pi hë koi angeice lai boroshür. Maine angeic a kapa, sipone jë koi angeice troa bëeke hmaca matre tro nyipunieti a ithanatane lai boroshür. Ca atr hë lai hnei nyipunieti hna ini Tusi memin! Maine tha easë kö a hamë boroshür, liine ju pena la ketre tarak, nge sipone jë kowe lai atrene la hnalapa troa bëeke hmaca, göi troa ithanatane lai.
5. Nemene la enyipiewekëne la itre tarak ngöne la hna cainöj?
5 Traqa ha koi 130 lao macatre ne easa tro fë tarak ngöne la hna cainöje trootro. Ketre pengöne ju hë la aqane kuca la itre tarak, ngo ketre jia ne huliwa ka lolo catre itre ej. Epi tro sa nyipiewekëne la itre tarak ka hnyipixe matre tro pala hi a haöthe la fene hnengödrai hnene la maca qa hnine la Tusi Hmitrötr.—Ite edomë 15:7a.