Aqane Troa Maca Ngöne La Hna Cainöj—Itre Pane Ithanata

Enyipiewekën: Maine pëkö aliene la itre pane ithanata hne së hna qaja kowe la atrene la hnalapa, tro angeice lai a canga upi së hmaca, nge tha ase pe së pane cainöje koi angeic. Haawe, nyipi ewekë la itre pane ithanata hne së hna troa qaja. Ngacama hetre itre xa mekune hna sija e hnine lo Huliwa Ne Baselaia, me e hnine lo itus Comment raisonner, ngo tha hna amë asë kö la nyine troa qaja. Maine asesë hë amë la nyine troa qaja, ngo qanyine kö lai ka cainöje iën; maine troa qaja ketrepengönëne la itre mekune hna fejane hë, maine troa hnëkëne la itre xa ithanata pena, nyine troa nyiqaane qaja. Pëkö thangane koi së ngöne la hna cainöj, e qaja menune pi hi së la ketre mekun, ngöne la easa cile ngöne la qene qëhnelö ne la ketre atr; nyipi ewekë troa hnëkë hnyawa.—Ite edomë 15:28.

Aqane Troa Kuca:

Iëne jë la hna troa porotrikën. Loi e troa ihmeku memine la itre mekune ka mama hnine la itus hna tro fë, nge hna pi ithanatane hnene la itre atrene la nöj.
Hnëkëne hnyawane jë la itre pane ithanata nyine tro nyipunieti a qaja, thupene la hna ibozu memine lai atr. Ma ka loi troa qaja ka hape: “Eni a troa wai epuni ke . . . ,” maine pena, “Kola hnehengazo enehila la itre atr ke. . . ,” maine pena, “Ma drenge fe hë epuni la . . . , ngo eni a pi atre la mekuna i epun,” me itre xane ju kö. Tha nyipi ewekë kö troa aqean menun; loi hi la ka hmaloi troa trotrohnin. Qanyi së pë hë e pi tro sa e gufane la itre pane mekune nyine troa qaja.
Hnëkëne jë la ketre hnying ka troa up lai atr troa hane qaja la mekuna i angeic. (Mat. 17:25) Tha tro kö sa hnëkëne la itre hnying ka jole troa sa, maine ka troa ahmahmane lai atr, ke ma traqa pë hë së, nge hetre jole hë hnei angeice hna lapa mekun.

Tupathe Ju Ngöne La Treu Celë:

Ame ngöne lai ijine ne hmi ne la hnepe lapa, wange ju la itre pane mekune nyine troa pane qaja, nge nyiqaane hnëkë jë.
Ame hë ngöne la hna cainöj, hane ju qaja kowe la itre xa ka cainöj la hnei nyipunieti hna hnëkën. (Ite edomë 27:17) Maine nyipunieti a öhne laka, loi e troa saze la aqane nyiqaane ithanata, sazene pi.