Kola Sa La Itre Hnyinge i Nyipunie

◼ Nemene la nyine troa inine kowe la itre nekönatr, matre tro nyudreni a hane macaj ngöne la götrane la u?

Tha mano kö la itre keme me thin Keresiano hiane la itre nekö i angatr “ngöne la ini me ihaji Iehova.” (Efe. 6:4) Angatr a hlë ngöne la nöjei drai me ce e me itre nekö i angatr la topik. Ame ngöne lo ijine hmi ne la hnepe lapa me itre xa ijine ju kö, angatr a ce goeë video, me ce ithanatane la hna goeën, maine pena angatr a ce ithanatane la itre mekune ne lo hna hape, Les jeunes s’interrogent e hnine lo itre zonal, angatr a elone la itre edromë qa hnine la Tusi Hmitrötr, maine inine cainöj pena. Ngo ame la ka troa aijijëne la nekönatr troa macaje ngöne la götrane u, tre ene la troa kapa la itre ini ka jui qa hnine la Tusi Hmitrötr.—Heb. 6:1.

Pane mekune jë së la itre ini hne së hna ce ithanatane memine la itre atr hne së hna cainöje kow. Ame la easa xötrei iöhnyi memine la ketre atr, maine xötrei iwai hmaca, hne së hna lapaa huliwane lo itus Nemene La Nyipi Ini Hna Hamën Hnei Tusi Hmitrötr?. Ame la kola ase la itus cili, easë pena a huliwane lo itus “Thupë Nyipunieti Ju Kö Ngöne La Ihnimi Akötesie.” Nemene la kepin? Ame la itus Ini Tusi Hmitrötr, tre eje hi a amamane la itre xa ini hne së hna öhne e hnine la Tusi Hmitrötr. Ngo ame la itus “Ihnimi Akötesie,” tre ej a ini së la aqane tro sa trongëne la itre trepene meköt ne la Tusi Hmitrötr ngöne la nöjei drai. Celë hi lue itusi lai ka “acatene ngöne la lapaun” la itre atr ka xötrei lö kowe la nyipici, me aijijë angatr troa “nyi wane” thei Keriso. (Kol. 2:6, 7) Ka loi fe la lue itus cili kowe la itre nekö së. Nyipi ewekë tro nyudren a atre la pengöne la thupene mel, memine lo Baselaia, memine la pengöne la itre atr ka mec. Nyipi ewekë tro nyudreni a atre la kepin matre Akötresieti a nue la itre akötr, memine la kepine matre easa qaja ka hape, easa melëne la itre drai hnapin. Loi e troa xeci koi nyudren ka hape, thei Itretre Anyipici Iehova la nyipici. Nyipi ewekë tro fe la itre nekönatr a trotrohnine la itre trepene meköti ne la Tusi Hmitrötr, me inine troa “huliwane la hni troa wangate hmekun.” (Heb. 5:14) Nyipici laka, isa pengöne kö la hna atreine trotrohnine hnene la itre nekönatr. Ngo ame pe, ala nyimu la itre nekönatr ka atreine trotrohnine la itre ini ka jui qa hnine la Tusi Hmitrötr, ngacama easa mekune ka hape, co petre kö.—Luka 2:42, 46, 47.