Nemene La Hnei Iehova Hna Öhne Theng?
1. Hnauëne laka, kola qaja ka hape, ceitune la Tusi Hmitrötr me ithulu?
1 A ija thulu epun ngöne la drai? Ame ngöne la nöjei drai, easë pala hi a xödra, göi troa wange la nyine troa saze, maine amekötine pena. Ceitune hi la Tusi Hmitrötr memine la thulu. Ke ame la easa e la Wesi Ula i Akötresie, tre mama pi hi koi së la ewekë hnei Iehova hna öhne the së, ene la pengö së ka sihngödr. (1 Sam. 16:7; Iako. 1:22-24) Ame la Wesi Ula i Akötresie, tre “ate amekötine la ite mekune me ite aja ne la hni.” (Heb. 4:12) Nemene la thangan, ngöne la huliwa ne cainöj, e tro sa e me lapa mekune la itre mekene la Tusi Hmitrötr hne së hna e?—Sal. 1:1-3.
2. Kola xatua së tune kaa hnene la Tusi Hmitrötr?
2 Ithulu la Tusi Hmitrötr: Kola ini së hnene la Tusi Hmitrötr la itre thiina ka loi hna wang atrune hnei Iehova. Ka tune la troa cilëgöline la ëje i Nyidrë, nge ka mama ekö thei Davita. (1 Sam. 17:45, 46) Ame Isaia, tre hnei angeice hna canga saene troa cainöj kowe la ketre nöje ka jol. (Is. 6:8, 9) Ame Iesu, tre hnei nyidrëti hna goeëne la huliwa ne cainöj ceitu me ketre jëne madrin, ngo tha ehnefe kö; ke hnene la ejuine la ihnimi nyidrë kowe la Tretretro i nyidrë. (Ioane 4:34) Nge ame lo itre pane Keresiano, tre itre ka catre cainöje angatr ekö, ke itre ka mejiune angatre koi Iehova. (Ite hu. 5:41, 42; 2 Kor. 4:1; 2 Tim. 4:17) Maine tro sa lapa mekune la itre tulu celë, tro hë së lai a hetre aja troa saze, matre lolo la aqane nyihlue i Iehova hne së.
3. Hnauëne laka, tha tro kö sa hunyiny?
3 Itre Nyine Troa Saze: Pëkö thangane ka loi koi së e tro sa xödra, me öhne la ketre ewekë nyine saze the së, ngo pëkö hna kuca. Ijije hi tro Iehova a xatua së troa atre la nyipi pengö së ka sihngödr, me saze, maine ameköti së pena. (Sal. 139:23, 24; Luka 11:13) Easa melëne la itre drai ne la pun, nge hetre itre atr nyine troa amelen. Tha ijine tro kö së la a hunyiny.—1 Kor. 7:29; 1 Tim. 4:16.
4. Nemene la thangan, e tro la atr a trongëne la hnei angeice hna thuluëne e hnine la Wesi Ula i Akötresie?
4 Ame la ka tru koi Iehova, tre tha ene kö la pengö së ka mama, ngo ka sihngödri pe. (1 Pet. 3:3, 4) Nemene hë la thangan, e tro la atr a trongëne la hnei angeice hna thuluëne e hnine la Wesi Ula i Akötresie? Pine laka “tha ate denge thëthëhmine kö, ngo ate kuca la huliwa, tro ha manathithi [madrine] la ate celë ngöne la huliwa i angeic.” (Iako. 1:25) Haawe, tro së lai a madrine me maca ngöne la hna cainöj, ke troa mama the së “la lolo ne la Joxu [Iehova], kösë ngöne thulu.”—2 Kor. 3:18.