Nyiqaane Porotrike Jë Jëne La Itus “Aliene La Wesi Ula i Akötresie”
1. Nemene la ketre jia ne huliwa ka hnyipixe kowe la huliwa ne cainöj?
1 Ame ngöne lo ijine easa sin lo asabele ka tru, hne së hna kapa lo sine itus “Aliene La Wesi Ula i Akötresie.” Nemene la eloine la sine itus celë ngöne la easa hnëkë ne tro koi hna cainöje trootro? Kola xatua së troa atre la itre pane ithanata nyine troa qaja, ke e ca tane porotrik, nyimu xötr hna fejan. Kola ceitu memine lo itus Comment raisonner.
2. Tro sa huliwane tune kaa la sine itus “Aliene la Wesi Ula i Akötresie” ngöne la hna cainöj?
2 Maine easa ajane troa porotrikëne lai hnying 8, ijije tro sa qaja ka hape: “Eahuni a ajane troa ithanatane memine la itre atr la mekune celë, kola hape, ‘Hapeu, zöi Akötresie la itre akötr?’ [Amamane jë lai hnying e öhne hi epuni ka hape, ka hetre thangan.] Nemene fe la mekuna i epun? [Nue pi troa sa.] Eahuni a madrine la aqane sa hnei Tusi Hmitrötr lai hnying.” Fe pi hë la Tusi Hmitrötr matre troa e me ithanatane lai casi maine nyimu xötr. Maine kola pi porotrik hnene la atrene la hnalapa, amamai angeice ju lo 20 lae hnying ngöne la qaan, nge hnyingë angeice jë la mekune hnei angeic hna ajane troa ithanatan ngöne la epuni a troa bëeke hmaca. Maine pena, hamëne pi koi angeic la ketre itus ka qeje pengöne hnyawa lai mekune hnei epun hna ce ithanatan.
3. Nemene la aqane tro sa huliwane la sine itus “Aliene La Wesi Ula i Akötresie,” la easa porotrik kowe la itre atr ka tha lapaune kö koi Iesu?
3 Ka loi hnyawa la hnying 4, me 13 koi 17 kowe la itre atr ka hmi, angetre tha lapaune kö koi Iesu. Ma ka loi troa ithanatane la itre mekune ne la hnying 17, me qaja ka hape: “Eahuni a ajane troa ithanata memine la itre atr ka wang atrune la pengöne la fami. Ma öhne jë hë epuni ka hape, tru catr la itre jol hna cile kow hnene la itre hnepe lapa enehila? [Nue pi troa sa.] Hna xatuane la itre xa trefën hnene la ithanata ka qaja ka hape: “Ame la föe kete troa metötëne la trahmany.” [Tha nyipi ewekë kö troa qaja ka hape, hna fejane lai mekune cili ngöne Efeso 5:33. Maine föe la hnei epuni hna ithanata kow, qaja jë hi lo itre mekune ne la tusi Efeso 5:28.] Ame koi epun ke, tro kö lai a tro loi la faipoipo e troa trongëne la itre ithanata celë?”
4. Nemene la aqane tro sa nyipune la porotrike së memine la atr ka hmi, ngo tha ka lapaune kö koi Iesu?
4 Ame hë la epuni a nyipun, isa pui ju memine lai atr göi troa bëeke hmaca e ketre drai, matre troa sisedrëne la porotrik. Qaja jë ka hape, tro epuni a ithanatane pena ha la ketre xötr, ngöne pala hi lai ca hnying hna ithanatan. E öhne hë epun ka hape ijine hë, qaja ju kowe lai atr ka hape, ame lo itre hnei epun hna qaja, tre itre mekun qa hnine la Tusi Hmitrötr. Liine pi hë la ketre sine itus hnei angeic hna pi e ka ihmeku memine lo itre mekune hna porotrikëne hë.—Wange ju lo götrane la Huliwa Ne Baselaia ne Diseba 2013, hna ati ëjen ka hape, “Xatuane Jë La Itre Ka Thipëne La Itus Ini Tusi Hmitrötr.”