Catre Pi Së Troa Inine La Itre Atr?
1. Nemene la nyine troa kuca matre troa mele la itre atr?
1 Kola mama ngöne la rapor ne la macatre 2014, la aqane catre ne la itre hlue i Akötresie troa cainöjëne la maca ka loi ne la Baselaia. (Mat. 24:14) Jëne la huliwa ne cainöj ngöne itre hnalapa trootro, hna pane xome la huliwa ne tro fë tarak me itre pepa ne ihë, nge hna thele fe troa cainöj kowe la nöjei atr, matre troa hane ce thawa me angatr la maca qa hnine la Tusi Hmitrötr. Atraqatr la huliwa, tha hna tune kö ekö ngöne la itre macatre ka ase hë. Ngo eje hi laka, maine easa ajane tro la itre atr a hane mel, nyipiewekë troa inine la Tusi Hmitrötr me angatr, matre tro fe angatr a hane itretre drei Iesu.—1 Tim. 2:4.
2. Nemene la itre hnying nyine tro sa isa xom matre troa xatua së troa akötrehnine la itre atr ka ini tus?
2 Akötrehnine Jë Troa Ini Tusi Hmitrötr: Ame ngöne la kola drei së hnene la ketre atr, easë kö a thele la aqane troa iöhnyi hmaca me angeic me mekune troa canga hë angeic göi troa nyiqane inine la Tusi Hmitrötr? Eue lo ijine epuni a amamane la aqane troa nyiqane ini tus ngöne la epuni a xötrei cainöj kowe la ketre atr? Eue la epuni a ini tus memine la ketre atr hnei epuni hna lapa tro fë zonale kow? Hane kö epuni amamane la itre video, tune lo hna hape, Hnauëne La Troa Inine La Tusi Hmitrötr? me Nemene La Aqane Trongene La Ini Tusi Epun? kowe la itre sine huliwa i epun, me itre sine ini, itre atr ka lapa ezi epun, me itre sinee, me itre hnei epuni hna atre? Ame la epuni a cainöje fë présentoir, akötrehnine kö epuni troa thuemacane la itre atr ka xome la itre itus nyine inin, ka hape, ijiji angatre fe troa hane inine la Tusi Hmitrötr?
3. Maine easa ajane troa hetre thangane la easa inine la nyipici, nemene la hna thele the së?
3 Ixatua Qaathei Iehova Me Iesu: Ame la Iesu a amekötine me qaja ka hape, troa “inine la itre atr” nge nyidrëti a qaja fe ka hape “trojë”, nyidrëti hi lai a amamane la enyipiewekëne la tro sa isa catr me amamane laka hetre hni ne aja së. Tha hna nue axöji së kö hnei nyidrë ngo hnei nyidrëti pe hna ahnithe ka hape, tro kö nyidrëti a ce me easë. (Mat. 28:19, 20) Ketre, hnei Iehova hna hamëne koi së la Uati Hmitrötr memine la itre jiane huliwa me itre ini, matre atreine së troa inine la itre atr troa atre la nyipici. (Zaka. 4:6; 2 Kor. 4:7) Loi e tro sa thithi matre tro sa “ajane me kuca la aja i nyidë”, ene la troa hane xome la huliwa ka sisitria celë.—Fil. 2:13.
4. Pine nemene matre tro pala hi sa amë panën la mekun, laka, troa catre inine la itre atr?
4 Troa atraqatr la madrine së e hne së hna cainöjëne la maca ka loi. Ngo tro kö a kökötre catre la madrine së ngöne la easa inine la itre atr la nyipici me xatua angatr troa ce xötrëne me easë “la gojenyi ne tro kowe la mel.” (Mat. 7:14; 1 Thes. 2:19, 20) Nge ame la ka nyipiewekë catr, tre, ene la troa amë panëne pala hi la mekune laka, troa catre inine la itre atr. Celë hi ka amadrinë Iehova lai, ke, ‘tha ajane kö Nyidrë troa hnëjine la itre atr, loi pe tro angat’ asëjëihë a ietra.’—2 Pet. 3:9.