Itre Nyine Dreng—Aqane Huliwane La Itre Nyine Dreng
1. Nemene la itre hna kuca ka lolo ka nyixane la itre itus?
1 Nyimutre la itre atr ka madrine troa tro kowe la site jw.org, matre troa e la trengewekë ka nyipici nge ka nyipi lolo. (Ate Cai. 12:10) Ngo tune ka epun, hane kö epuni huliwane la itre nyine dreng? Ijije hi troa hane dreng la itre ithuemacanyi ka nyimutre hnine la site jw.org. Nemene la thangane ka loi koi së, e tro sa drenge la itre nyine drenge cili?
2. Tro sa xome tune kaa la itre nyine dreng thatraqane la sipu ini së me hnepe lapa së?
2 Koi Sipu Ini Së Me Hnepe Lapa Së: Maine tro sa xome la itre nyine dreng, maine kola e la Tusi Hmitrötr, me itre zonal, maine ketre itusi pena, ngöne la easa tro kowe la ketre götran maine ngöne la easa kuca la itre jole së, haawe, tro ha xatua së troa huliwane hnyawa la traeme së. (Efe. 5:15, 16) Maine tro sa drenge la kola e la ketre itus nge easë fe a goeëne la itusi cili, ijije hi tro sa saze la aqane tro sa eköthe la itre nyine troa kuca ngöne la hmi ne hnepe lapa së. Ketre, maine tro sa xome la itre nyine dreng ngöne la easa isa ini tus, tro ha xatua së troa maca troa e maine troa inine la ketre qene hlapa.
3. Drei ngöne la teritoare së la ka troa kepe thangane ka loi qa ngöne la itre nyine dreng?
3 Thatraqane La Huliwa Ne Cainöj: Ame ngöne la götrane hne së hna mele ngön, hetrenyi la itre atr ka qaja ka hape jol tro angatr a hane e tus. Maine jë ka loi pe hi koi angatr troa xome la itre nyine dreng ngöne site jw.org. Hetrenyi fe la itre atr hne së hna iöhnyi memin ka qaja la ketre qene hlapa. Angatr a ajane troa ithanata me easë, ke, hnene la hnei angatr hna dreng la maca ne Baselaia ngöne la “sipu qene zi” angatr. (Ite Huliwa 2:6-8) Ame ngöne la itre xa götran, nyipiewekë catr troa dreng. Drei la ketre ceitun, ame ngöne la aqane mele ne la itre atr hna hëne ka hape Hmong, ke, hnei angatr hna majemine troa qaja la itre hnei angatr hna melën kowe la itre xötre ka co, nge kola drenge hnyawa hnene la itre xötre ka co la itre ithuemacany me thupën itre ej. Ame e Afrik, ka madrine angatr nge mele i angatr la troa ifejicatre.
4. Nemene la itre hnying nyine tro sa isa xom matre troa xatuane la itre atr ne la teritoare së?
4 Ame ngöne la götrane hnei epuni hna mele ngön, ka loi kö troa ahone la itre nyine dreng ngöne la qene hlapa ne la atr? Hetre thangane kö hna troa kapa hnene la ketre atr, hne së hna iupi fë nyine drenge kow jëne ëternet? Ijije kö tro sa fejan ngöne CD la ketre tusi hna e me hamëne kowe la atr matre tro angeic a dreng, nge angeice fe a goeëne trongëne hnine la ipepa? Ame ngöne la nöjei easa hamëne ngöne la hna cainöj kowe la itre atr la itre nyine dreng, maine itus me boroshür, zonal, maine tarak, tro pala hi sa e fe itre ej ngöne la etrune itus hne së hna hamën. Hna hnëkëne thatraqai së la itre nyine dreng, matre troa sa xome ngöne la easa isa ini tus me troa tran la itre itine la maca ka loi ne la Baselaia.—1 Kor. 3:6.