Nyitipune Jë Së La Nöjei Perofeta—Habakuka
1. Pine nemene matre tro fe sa hane mekun tui Habakuka?
1 Hnene laka kola kökötre la ngazo e cailo fen, matre epune fe a hane mekune tui Habakuka, lo nyidrëti a hnyinge koi Iehova ka hape: “Ngöne nemene enëtilai a amamane koi ni la ngazo me ötetëtine la aköt?” (Hab. 1:3; 2 Tim. 3:1, 13) Maine tro sa lapa mekune la maca i Habakuka memine la aqane catre nyipici angeic, haawe, tro hë lai a xatua së troa treqen hnyawa la drai ne ihnyingë i Iehova.—2 Pet. 3:7.
2. Nemene la aqane tro sa amamane laka easa mele nyipici enehila?
2 Troa Lapaun: Hnei Habakuka pala hi hna hmek me catre xome la huliwa i Iehova ngo tha hnei nyidrëti kö hna nue la itre jole troa ajojezi nyidrë. (Hab. 2:1) Hnei Iehova pe hna ithuecatre kowe la perofeta ka hape, troa eatr la hnei Nyidrëti hna qaja ngöne la nyipi ijine nge “tro ha mele la ate thina ka meköti hnene la lapaune i angeic.” (Hab. 2:2-4)Nemene la aliene kowe la itre Keresiano ka mele ngöne la itre drai hnapin? Ame la ka sisistria catr, tre, tha ene kö la troa atre laka eu la ijine troa traqa la pun, ngo ene pe la troa atre hnyawa laka tro ej a traqa. Haawe, tro la lapaune së a xatua së troa hmek me amë panëne la huliwa ne cainöj.—Heb. 10:38, 39.
3. Pine nemene matre tro pala hi sa catre nyihlue Iehova cememine la madrin?
3 Troa Madrin Thei Iehova: Ame la kola ujë hnei Gog atre Magog elany kowe la nöje i Iehova, troa mama hnyawa e cili laka, ka catre la lapaune së. (Ezek. 38:2, 10-12) Ame ngöne la nöjei isi, tre, akötr asë hi la itre atr, goi akötre fe hnene la itre ka hune ngöne la isi. Haawe, ame ngöne la ijine akötr elany, tro fe sa hane akötr. Maine jë, tro fe sa mecijin, nge tro fe a luzi la itre ewekë hne së hna hetreny. Ngo nemene la hne së hna troa kuca e ixelë ju së memine la itre jole cili? Atre hnyawa hi Habakuka la itre jole ka troa traqa koi nyidrë, ngo hnei nyidrëti palahi hna catre nyihlue Iehova cememine la madrin. (Hab. 3:16-19) Ame la “madine qa thei Iehova” tre, eje hi lai ka troa xatua së troa cile catre kowe la itre jole ngöne la itre drai ka calemi.—Neh. 8:10; Heb. 12:2.
4. Nemene madrine ka ej the së enehila me ngöne la itre drai elany?
4 Ame la itre atr hna troa thupëne hnei Iehova, ngöne lo ijine drai ne ihnyingë i Nyidrë, tre, lo itre atr ka catre trongëne la gojenyi ne mel qa thei Akötresie. (Hab. 2:14) Ketre, tro fe a amelene hmaca la itre atr, nge tro fe angatr a hane inine troa atrepengöi Iehova hnyawa. Haawe enehila mina fe, nyipiewekë tro sa hane xomi ijine troa qeje Iehova me itre huliwa i Nyidrë ka mingöming!—Sal. 34:1; 71:17.