Mejiune Jë Koi Iehova Matre Mel!
“Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.”—ITE EDOMË 3:5.
1. Pine nemene matre easë asë hi a aja ixatua?
EASË asë hi a aja ixatua. Maine jë, tru catre palaha la itre jole së, me itre hne së hna hnehengazon. Maine jë, easa akötr ke, hna tithi së hnei mec maine easa uti ipië trootro, maine pena hna mecitriji së hnene la ketre sinee së. Hetre itre xan hna qanangazon. Ketre, ka isi me iakötrë la itre atr enehila. Hnene la itre “ijine ka aköte” celë hna anyipicine laka, easa melëne la “ite drai hnapin,” nge easenyi catre hë la fene ka hnyipixe. (2 Timoteo 3:1) Maine jë, ekö hë së treqene la ijine troa eatr la itre hna thingehnaean hnei Iehova, nge tru catre pena la itre jol hne së melën. Nemene la ka troa akeukawane la itre hni së?
2, 3. (a) Nemene la hne së hna atre göi Habakuka? (b) Pine nemene matre easa troa ce wange la tusi Habakuka?
2 Tro sa ce wang la tusi Habakuka, matre sa la hnyinge celë. Eje hi laka, tha hnei Tusi Hmitrötre kö hna qejepengöne la mele i Habakuka, ngo tru catre kö la ixatua hna hamën ngöne la tusi angeic. Ame la aliene la ëje i Habakuka, tre, “Ka Tru Ihnimin.” Kola qaja la aqane akeukawanyi së hnei Iehova. Maine jë, kola qaja la aqane tro sa qale koi Nyidrë. Hnei Habakuka hna ithanata koi Akötresie me hnying koi Nyidrë. Nge hnei Iehova hna upi Habakuka troa cinyihane la itre hnei nyidroti hna ce ithanatane ke, ka troa hetre eloine koi së.—Habakuka 2:2.
3 Celë hi la ithuemacany hnei Tusi Hmitrötr hna hamën göi Habakuka, ngöne lo ijine angeic a akötr. Ngo hna amë la tusi angeic ngöne “la nöjei ewekë hna cinyihan’ ekö” e hnine la Wesi Ula i Akötresie, “mate hete mejiune shë hnene la xomi hni me keukawa qa ngöne la ite hna cinyihan.” (Roma 15:4) Nemene la aqane troa xatua së hnene la tusi Habakuka, easë isa ala caas? Kola troa xatua së troa mejiune koi Iehova. Kolo fe a akeukawane la hni së laka, ngacama nyimutre la itre jol, ngo ijije hi troa tingeting la itre mekuna së.
THITHI JË KOI IEHOVA
4. Pine nemene matre kucakuca catre Habakuka?
4 E jë la Habakuka 1:2, 3. Jole catre la mel ngöne lo hneijine i Habakuka. Ame la itre atr ekö, tre, itre ka iakötrë me ka ngazo thiina. Celë hi matre angeic a kucakuca. Öhne palahi angeic la angetre Isaraela kola iqanangazo me akötrë itre xan. Öni Habakuka e hnying ka hape: ‘Eu la ijine troa apatrene la ngazo? Hnauëne laka, hmitre Iehova troa kuca la ketre ewekë?’ Kösë ame koi angeic, hna nuaxöji angeice hnei Iehova. Celë hi matre, xëwe jë angeic koi Iehova. Maine jë, hnei Habakuka hna mekun ka hape, tha semesinene hë Iehova la nöje i Nyidrë, nge pëkö hnei Nyidrëti hna troa kuca. Hapeu, hane kö epuni mekune tui angeic?
Tha tro pi kö sa xou troa qaja koi Iehova la itre jole ka eje the së
5. Nemene la ini hne së hna xom qa ngöne la tusi Habakuka? (Wange ju la pane iatr.)
5 Hapeu, tha lapaune hë Habakuka koi Iehova me kowe la itre hnei Nyidrëti hna thingehnaean? Ohea! Hnei Habakuka hna sipo ixatua koi Iehova ke, hace catre angeic. Kolo lai a amamane laka, ka mejiune palahi angeic koi Nyidrë. Habakuka a xou ke, tha trotrohnine kö angeic la kepin matre Iehova a nue angeic troa akötr, nge pë palakö hnei Nyidrëti hna kuca. Eje hi, hnei Iehova hna upi Habakuka troa cinyihane la itre aliene hni angeic. Nemene la ini koi së? Tha tro pi kö sa xou troa fe la itre aliene hni së koi Iehova. Nyidrëti a upi së troa thithi koi Nyidrë. (Salamo 50:15; 62:8) Kola ithuecatre së ngöne Ite Edomë 3:5 ka hape: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.” Hnei Habakuka hna melëne la xötre celë.
6. Pine nemene matre ka nyipiewekë troa thith?
6 Ka mejiune Habakuka koi Iehova, Enehmu i angeic me Tretretro. Hnei angeic hna thele troa acatrene la aqane imelekeu i angeic me Nyidrë. Tha hnei Habakuka kö hna hnehengazo menu me thele troa ketre sipu nyinyine la jol. Hnei angeice pe hna thith. Ketre tulu lai koi së. Iehova, lo Atre drenge la thith, a upi së troa fe la aliene hni së. Celë hi aqane tro sa amamane ka hape, easa mejiune koi Nyidrë. (Salamo 65:2) E cili, tro hë sa öhne la aqane sa Iehova la itre thithi së me aqane tro Nyidrëti a akeukawanyi së me eatrongë së. (Salamo 73:23, 24) Ketre, tro kö Iehova a xatua së troa trotrohnine la mekuna i Nyidrë, ngacama tru catre la itre jole me itre akötre së. Ame la easa thithi koi Iehova, tre, easë hi lai a amamane laka, easa mejiune koi Nyidrë.
DRENGETHENGE IEHOVA JË
7. Nemene la aqane ujë i Iehova ngöne la Habakuka a fe la hni angeic koi Nyidrë?
7 E jë la Habakuka 1:5-7. Thupene la Habakuka a fe la hni angeic koi Iehova, maine jë, hnei angeic hna hnyingëne thele la aqane tro Iehova a sa. Iehova la Keme ka ihnim. Trotrohnine hi Nyidrëti laka, Habakuka a sipo ixatua ke, tru la akötre i angeic. Tha hnei Iehova kö hna ameköti Habakuka. Hnei Nyidrëti pe hna qaja la hnei Nyidrëti hna troa kuca kowe la angetre Iuda ka tha mele nyipici. Maine jë, Habakuka hi la hnei Iehova hna pane qaja kow, ka hape, easenyi hë tro Nyidrëti a ameköti angatr.
8. Pine nemene matre tha trotrohnine kö Habakuka la mekuna i Iehova?
8 Hnei Iehova hna qaja koi Habakuka ka hape, tro Nyidrëti a lepi angetre Iuda, itre ka ngazo me ka iakötrë. Öni Iehova, troa traqa lai “ngöne la itre drai nyipunie.” Kolo lai a hape, tro Habakuka me angetre Isaraela a öhne la itre ewekë cili. Tha celë kö la hna mekun hnei Habakuka. Ka calogitr la angetre Babulona. Nge ka iakötrë catre kö angatr hui angetre Isaraela, itre ka atre la itre hna amekötin hnei Iehova. Pine nemene matre Iehova a troa nyijëne la ketre nöj ka calogitr me ka hmi koi itre haze, troa amekötin la nöje i Nyidrë? Troa tru la akötre ne la angetre Iuda.a (Wange ju la ithuemacany.) Maine epuni ju Habakuka, nemene la hnei epuni hna troa mekun?
9. Nemene la itre xaa hnyinge i Habakuka?
9 E jë la Habakuka 1:12-14, 17. Ngacama trotrohnine hë Habakuka laka, Iehova a troa upe la angetre Babulona matre troa apatrene la itre atr ka ngazo, ngo tha paatre kö la xou thei angeic. Ame pe, hnei angeic hna hni ka ipië, nge aja i angeic troa catre mejiune koi Iehova. Öni angeic ka hape, Iehova palahi la “Giti” angeic. (Deuteronomi 32:4; Isaia 26:4) Xecie koi Habakuka laka, ka ihnim me thiina ka menyike Akötresie, matre tha xoue i angeice kö troa hnying koi Iehova, ka hape: Pine nemene matre Iehova a nue troa elë la ngazo me akötre ne la angetre Iuda? Pine nemene matre tha canga kuca kö Nyidrëti la ketre ewekë? Pine nemene matre kola “lapa thaupu” hnene la Kapucatinasë, me nue la ngazo? “Ka Hmitrötre” Iehova, nge ‘ka wië catre la lue xajawa i Nyidrë matre thatreine kö Nyidrëti troa goeëne la ngazo.’
10. Pine nemene matre easa mekun tui Habakuka e itre xaa ijin?
10 Ame itre xaa ijin, easa mekun tui Habakuka. Easa drei Iehova. Easa mejiune koi Nyidrë me e me inine la Wesi Ula i Nyidrë, nge celë hi ka acatrene la mejiune së. Ketre, easa kapa la itre ini hna hamën hnene la organizasio i Nyidrë, me itre hnei Nyidrëti hna thingehnaean. Ngo easa isa hnying, ka hape, ‘Eu la ijine troa paatre la akötr?’ Hetre ini hne së hna troa xom qa ngöne la aqane ujë i Habakuka.
TREQE IEHOVA JU
11. Nemene la hnei Habakuka hna kuca?
11 E jë la Habakuka 2:1. Kola tingeting la mekuna i Habakuka ngöne la angeic a ce ithanata me Iehova. Kola ithuecatre koi angeic troa treqe Iehova. Öni Habakuka: “Loi pe tro ni a mano ngöne la drai ne aköt.” (Habakuka 3:16) Hetrenyi palahi la itre xaa hlue i Akötresie ka treqene troa kuca hnei Iehova la ketre ewekë. Kola xatua së hnene la tulu i angatr ke, ijiji së fe troa hane tui angatr.—Mika 7:7; Iakobo 5:7, 8.
Loi e tro sa treqene la hnei Iehova hna troa kuca me mejiune laka, tro kö Nyidrëti a axapone la akötre së
12. Nemene la hne së hna inin qa ngöne la tulu i Habakuka?
12 Nemene la ini hne së hna xom qa ngöne la tulu i Habakuka? Ame la hnapan, tre, ngacama tru catre la itre jole ka traqa koi së, ngo tha tro kö sa cil troa thithi koi Iehova. Ame la hnaaluen, loi e tro sa drei Nyidrëti ithanata jëne la Wesi Ula i Nyidrë me organizasio i Nyidrë. Nge ame la hnaakönin, loi e tro sa treqene la hnei Iehova hna troa kuca me mejiune laka, tro kö Nyidrëti a axapone la akötre së. Maine tro sa nyitipu Habakuka, tro ha tingeting la mekuna së, nge tro hë sa atreine xomihni. Tro la mejiune së a xatua së troa xomihni me madrin ngacama kola traqa la itre jol. Xecie hnyawa koi së laka, tro kö la Keme së e koho hnengödrai a xatua së.—Roma 12:12.
13. Nemene la aqane akeukawanyi Habakuka hnei Iehova?
13 E jë la Habakuka 2:3. Xecie koi së laka, ka madrine Iehova la Habakuka a treqene la hnei Nyidrëti hna troa kuca. Atre hi Nyidrëti la akötre i Habakuka, matre hnei Nyidrëti hna akeukawanyi angeic, ka hape, tro kö Nyidrëti a sa la itre hnyinge i angeic. Easenyi hë matre troa aupune la hni Habakuka. Kösë Iehova a qaja koi angeic, ka hape: “Xomihnine jë nge mejiune jë koi ni. Eni a troa sa la thithi hmunë, ngacama hmitr.” Hnei Iehova hna amexeje koi Habakuka laka, ase hë Nyidrëti axeciëne la ijine tro Nyidrëti a eatrëne la itre hna thingehnaean. Hnei Nyidrëti hna thuecatre koi Habakuka troa treqen. Tro kö Iehova a mama elany kowe la perofeta i Nyidrë.
Pine nemene matre nyipiewekë tro sa catre kuca asë la huliwa i Iehova? (Wange ju la paragarafe 14)
14. Nemene la nyine tro sa kuca ngöne la kola traqa la itre jol?
14 Loi e tro fe sa treqe Iehova me drengethenge Nyidrëti hnyawa. E cili, ngacama tru catre la itre jole së, ngo troa tingeting la mekuna së ke, easa mejiun koi Nyidrë. Hnei Iesu hna ithuecatre koi së troa lapa mekune “la nöjei drai me nöjei macate” hnei Akötresieti hna qaja koi së. (Ite Huliwa 1:7) Loi e tro sa mejiun laka, atre kö Iehova la ijine troa kuca la ketre ewekë. Haawe, tha tro kö sa hmacahmaca, ngo loi e tro pe sa hni ka ipië me xomihni me lapaune koi Akötresie. Nge ame la easa itreqe, loi e tro sa huliwane inamacanëne la traeme së, matre catre nyihlue i Iehova.—Mareko 13:35-37; Galatia 6:9.
IEHOVA A AMELENE LA ITRE KA MEJIUNE KOI NYIDRË
15, 16. (a) Nemene la itre hna thingehnaean hna cinyihane ngöne la tusi Habakuka? (b) Nemene la ini hne së hna xom qa ngöne itre ej?
15 Hnei Iehova hna thingehnaean, ka hape: “Tro ha mele la ate thina ka meköti hnene la lapaune i angeic,” nge “troa tiqa la fene hnengödrai hnene la ate hmekune la lolo i Iehova.” (Habakuka 2:4, 14) Eje hi, hnei Iehova hna thingehnaean troa hamëne la mel ka tha ase palua kö, kowe la itre ka xomihni me ka mejiun koi Nyidrë.
16 Ka nyipiewekë catre la hna thingehnaean ngöne Habakuka 2:4. Celë hi matre, hnei Paulo aposetolo hna akönia qaja lai ngöne la itre tusi angeic! (Roma 1:17; Galatia 3:11; Heberu 10:38) Eje hi laka, tru catre la itre jole së. Ngo maine ka mejiune së koi Iehova, haawe, tro hë sa öhne la Nyidrëti a eatrëne la itre hna thingehnaean. Iehova a ajane tro sa lapa mekune la mele së elany.
17. Nemene la hnei Iehova hna troa kuca, e tro sa mejiune koi Nyidrë?
17 Hetre ini ka lolo hne së hna troa xom qa ngöne la tusi Habakuka ke, easa melëne la itre drai hnapin. Hnei Iehova hna thingehnaean, ka hape, tro la itre ka meköt me ka mejiune koi Nyidrë a hetrenyi la mel ka tha ase palua kö. Celë hi matre, loi e tro sa thele tro palahi a acatrene la mejiune së koi Akötresie, ngacama tru catre ju hë la itre jol. Kola akeukawane la itre hni së hnene la hnei Iehova hna qaja koi Habakuka laka, tro kö Nyidrëti a xatua së me amele së. Nyidrëti a sipo së troa mejiune koi Nyidrë, me treqene la ijine tro la Baselaia i Nyidrëti a musinëne la fen. Tro ha madrine me tingetinge la nöjei atr e cailo fen, itre ka nyihlue i Iehova.—Mataio 5:5; Heberu 10:36-39.
KA MADRINE LA ITRE KA MEJIUNE KOI IEHOVA
18. Nemene la thangane koi Habakuka la hna qaja hnei Iehova?
18 E jë la Habakuka 3:16-19. Hetre thangane koi Habakuka la hnei Iehova hna qaja koi angeic. Hnei Habakuka hna lapa mekune la itre hnei Iehova hna kuca, thatraqane la nöje i Nyidrëti ekö. Catrecatre hë la mejiune i angeic koi Iehova. Xecie hnyawa koi angeic laka, tha hmitre kö tro Iehova a kuca la ketre ewekë! Celë hi ka akeukawanyi angeic, ngacama atre hi angeic laka, tro palakö a traqa la itre akötr. Tha luelue hë Habakuka. Xecie koi angeic laka, tro kö Iehova a amele angeic. Hnei angeic hna amamane la mejiune i angeic koi Iehova, ngöne la xötre 18. Önine la itre ka inamacan, ka hape: “Tro pala kö ni a aciaci Iehova, me madi Akötesie ate amele ni.” Drei la ketre ini ka tru koi së! Iehova a thingehnaeane la itre ewekë ka mingöming koi së elany, ngo Nyidrëti fe a akeukawanyi së laka, easenyi hë matre tro Nyidrëti a eatrëne la itre hna thingehnaeane cili.
19. Nemene la aqane tro Iehova a akeukawane la itre hni së, tui Habakuka?
19 Ame la ini ka tru hne së hna xom qa ngöne la tusi Habakuka, tre, ene la troa catre mejiune koi Iehova. (Habakuka 2:4) Maine easa ajane troa mejiune koi Iehova, nyipiewekë tro sa acatrene la aqane imelekeu së me Nyidrë. Hanawang la itre nyine tro sa kuca. (1) Troa catre thithi me fe la hni së koi Iehova. (2) Tro sa drengethenge la hnei Iehova hna qaja e hnine la Wesi Ula i Nyidrë, me xötrethenge la itre hna amekötin hnene la organizasio i Nyidrë. (3) Tro fe sa mele nyipici koi Iehova me xomihni ahoean, utihë la tro Nyidrëti a eatrën elany la itre hnei Nyidrëti hna thingehnaean. Celë hi hna kuca hnei Habakuka. Eje hi, tru catre la hnei angeic hna hnehengazo ngöne la angeic a ithanata me Iehova. Ngo ame hë e thupen, hna ithuecatre koi angeic matre tru la madrine i angeic! Maine tro sa nyitipu Habakuka, tro hë lai a akeukawane la itre hni së hnei Iehova, Keme së e koho hnengödrai. Nemene la ka troa akeukawane la itre hni së, ngöne la fene celë ka ngazo?
a Ame ngöne Habakuka 1:5, hna qaja la hnaewekë hna hape, “nyipunie,” kola qaja la ka alanyim. Kola amamane laka, troa amekötine la nöjei atr e Iuda.