Ijije Hi Tro Sa Hane Ithuecatre Kowe La Ketre Keresiano Ka Nanazij

Ame ngöne la Drai ne Amekunën e Draiangedic 11 Eiperem, troa nyimutre la itre trejine Keresiano ka nanazij ka troa hane traqa. Hnei nyudreni hna nyiqane nyenyape ngöne la gojenyi ne tro kowe la mel. Ngo hetrenyi la itre kepine matre nyudreni a nango ewë. Haawe, thatraqai nyudreni hi la boroshüre hna hape, Bëeke Jë Koi Iehova. (Heberu 12:1) Ka sisitria pala hi nyudreni xajawa i Iehova, ke, hnei Nyidrëti lo hna itö nyudreni hnene la madra ne la Hupuna i Nyidrë. (Ite Huliwa 20:28; 1 Peteru 1:18, 19) Nemene la aqane tro sa xatua angatr troa bëeke hmaca kowe la ekalesia?

Kola catre thele hnene la itre qatre thup la itre Keresiano ka nanazij, me xatua nyudren. Ceitune la itre qatre thup memine la itre ka thupë mamoe, laka kola thele hnyawa la itre mamoe ka ananyine la hna axö mamoe. (Luka 15:4-7) Aqane ujë i Iehova hi lai, kola mama hnene la aqane hnimi Nyidrëti la itre mamoe. (Ieremia 23:3, 4) Tha itre qatre thup hmekuje kö la ka ijij troa ithuecatre kowe la itre xan, easë asë hi. Iehova a madrine la easa amamane la ihnimi së memine la aqane sikusikune së la itre trejine me easë, nge tro kö Nyidrëti a amanathithine la aqane ujë cili. (Ite Edomë 19:17; Ite Huliwa 20:35) Celë hi matre, pane mekune jë së la ketre atr hne së hna ajane troa xatuan, nge saqe jë troa wai angeic!

GOEËNE JË LA VIDEO HNA HAPE, ENCOURAGER LES INACTIFS, NGE THUPENE LAI, SA JË LA ITRE HNYINGE CELË:

• Nemene la hna canga kuca hnei Abbey ngöne la angeic a iöhnyi memine la ketre Atre Anyipici Iehova hnei angeic hna thatre?

• Pine nemene matre loi e tro sa easenyine la itre qatre thup ngöne la easa mekune troa hane xatuane la ketre trejine ka nanazij?

• Nemene la aqane hnëkë Abbey ngöne la angeic a troa wai Laura hmaca?

• Nemene la aqane catre Abbey, me xomihni ahoean me ihnimi angeic ngöne la angeic a thele troa ithuecatre koi Laura?

• Nemene la ini hne së hna xom qa ngöne la ceitune hna hamëne hnei Iesu ngöne Luka 15:8-10?

• Nemene la itre manathithi hna kapa qa ngöne la hna catre xatua Laura?