Thaa Tro Pi Kö Sa Thëthëhmine Lo Itre Trejine Ka Nanazij
1. Pine nemen matre nyipi ewekë tro sa thele troa hane xatuane la itre trejine me easë ka nanazij?
1 Hapeu, hetre trejine kö hnei epuni hna atre hnyawa ka nanazij ngöne la götrane la ua? Maine jë thaa hane hmaca kö angeic ce icasikeu memine la ekalesia, ase hë uthi angeic. Maine jë hnei epuni hna iöhnyi memine la atre cili ngöne la hnei epuni hna cainöj ngöne itre hnalapa trootro. Loi e tro pala hi sa mekune hnyawa laka, maine ka nanazije la trejin ngo ame pe tre, ketre trejine me easë pala hi ngöne la götrane la ua. Loi e tro sa thele troa amamane la ihnimi së koi angeic me xatua angeic troa bëeke hmaca kowe le ekalesia me kowe la ‘Ate thupëne me Pisope ne la itre u së.’—1 Pet. 2:25.
2. Nemene la aqane tro sa ithuecatre kowe la ketre atr ka nanazij?
2 Loi e Tro Sa Wanga Atrunyi Angatr: Maine jë tro hi a pane telefon maine iwai; itre ewekë lai ka troa amamane kowe la ka nanazij ka hape, thaa ase kö së thëthëhmi angeic. Nemene la nyine tro sa qaja? Maine jë tro sa ithuecatr me kuca matre tro la ka nanazij a atre laka easa meku angeic. Loi e troa nyipi lolo la aqane porotrike së me ithuecatrekeu. (Fil. 4:8) Maine jë tro sa qaja la ketre mekun hne së hna kapa madrine jëne la ketre icasikeu. Ijije mina fe tro sa hë angeic troa hane sine la icasikeu ka troa xulu maine asabele pena, me canga ami göhnë i angeic maine itrothei pena.
3. Tune kaa la aqane aegöcatrene hmaca la ketre trejine föe ka nanazij?
3 Hna öhne ngöne la teritoare la ketre trejine föe ka nanazij, 20 hë lao macatre. Ngacama thaa ajane kö eahlo troa inine la Tusi Hmitrötr, ngo hnene la trejine föe ka öhnyi eahlo hna lapaa traqa troa wai eahlo me amë pe la itre zonal hna xötrei kapa. Thupene la kovasio ne distrik, hnene lai ka cainöj hna qaja la itre mekune ka tru ne la asabele kowe la trejine föe ka nanazij, ene pe hna nyiqaane egöcatre hmaca hnei eahlo ngöne la ua.
4. Tro sa ujë tune kaa kowe la ketre trejine ka nanazij ka nyiqaane hane sine hmaca la itre icasikeu?
4 Ngöne La Kola Bëeke Hmaca La Ketre Atr: Nemene la aqane tro sa ujë kowe la ketre trejine ka nanazij, ka bëeke hmaca kowe la itre icasikeu? Tune kaa la aqane ujë i Iesu kowe la itretre drei nyidrë, thupene lo hnei angatr hna pane nuetriji nyidrë? Hnei nyidrëti hna qeje angatr cememine la hni ka keukawa, ka hape “itre trejine” me nyidrë, nge hnei nyidrëti hna mejiune koi angatr. Hnei nyidrëti fe hna hamë angatr la ketre hnëqa ka nyipi ewekë catr. (Mat. 28:10, 18, 19) Ame ju fe kö thupene lai, “tha mano kö angat” troa tro fë la maca ka loi.—Ite hu. 5:42.
5. Qaja jë la itre ewekë ka upi së troa wange la itre qatre thup, e traqa ju së iöhnyi memine la ketre trejine ka nanazij.
5 Qëmekene troa inine la Tusi Hmitrötr memine la ketre trejine ka nanazij maine qëmekene troa hëne la ketre trejine ka ekö hë thaa cainöje troa hane ce tro me easë ngöne la hna cainöj, loi e tro sa thele ixatua thene la itre qatre thup. Maine tro sa iöhnyi memine la ketre trejine ka nanazij ngöne la easa cainöje trootro ngöne la teritoare së, haawe, loi e tro sa thuemacane la itre qatre thup matre tro angatr a hamën la ixatua ka ijij.
6. Nemene la madrine hne së hna troa kapa qa ngöne la hne së hna hane xatuane la itre trejine ka nanazij?
6 Tune la hna amamane hnyawa hnene la Tusi Hmitrötr, troa mele hmekuje elanyi la itre ka cile huti uti hë la pun. (Mat. 24:13) Qa ngöne lai, hane ju mekune lo itre ka tria maine itre ka nanazije pena. Maine tro sa xomihni ahoeanyi me xötrethenge la tulu ne ihnimi Iehova hnene la hna wanga atrune la itre atr ka tune lai, haawe, tro hë së a hetrenyi la madrin troa hane öhnyi angatr ce xejë hmaca me easë la huliwa ka hmitrötr.—Luka 15:4-10.