Kola Sa La Itre Hnyinge i Nyipunie
◼ Troa xatuane tune kaa la ketre trejine ka qe hna thaa cainöje hë, matre ijije hmaca tro angeice a hane tro fë la maca ka loi?
Atraqatre la madrine së ngöne la kola amamane hnene la ketre atr ka thaa cainöje hë, ka hape hetre hni ne ajane i angeice troa nyihlue i Iehova. (Luka 15:4-6) Ketre, maine jë thaa inine hmaca kö la Tusi Hmitrötr, me sine la itre icasikeu, me cainöjëne la maca ka loi, hnene laka, hetre icilekeu, maine pena catrehnine la itre ejolene la mel. Nemene la aqane troa xatua angeic, matre tro angeice a kökötre ngöne la götrane la ua?
Loi e tro asë hi së a isa sipu amamane koi angeice laka, atraqatre la ihnimi së koi angeic. Tro mina fe la itre qatre thupe a canga wange la nyine troa kuca, matre troa hamëne la ka ijije ngöne la götrane la ua. (Iako. 5:14, 15) Maine itre hnepe ijine kolo hi a nango nanazije hnene la trejin, haawe, maine jë tro hi la ketre trejine ka maca troa cainöje a xatua angeice troa hetrenyi hmaca la ajane troa tro fë la maca ka loi. Ngo maine ka hekö hë la trejine thaa hane ce huliwa memine la ekalesia, haawe, maine jë nyipi ewekë troa hamë ixatua ka tru koi angeic. Eje hi la laka, maine kola ajane troa eköthe la lapaune memine la madrine thei angeic, nyipi ewekë tro angeice a ketre sipu inine la Tusi Hmitrötre jëne la ketre itusi ka ihmeku memine la aja i angeic. Celë hi matre, tro la atre thupëne la huliwa ne cainöje a wange la ketre trejine ka maca troa cainöj, matre tro angeice a xomiujine la etid. (Heb. 5:12-14; wange ju la Kola Sa La Itre Hnyinge i Nyipunie, hnine la Huliwa Ne Baselaia ne Nofeba 1998.) Maine hetre trejine hne së hna atre ka nanazije tune lai, thuemacane ju la atre thupëne la huliwa ne cainöj.
Qëmekene troa hëne la ketre trejine ka nanazije troa cainöje hmaca, loi e troa pane ithahnata me angeice hnene la lue qatre thup, matre troa wange maine pëkö ejolene tro hmaca angeice a nyiqaane cainöj. Tro nyidroti a kuca ceitune me ketre icasikeu hna ce kuca memine la ketre atr ka ajane troa hane nyiqaane tro fë la maca ka loi. (Wange ju La Tour de Garde ne 15 Nofeba 1988, götrane 17.) Loi e troa hetre aja ne lai trejine ka nanazij, troa ce tro fë memine la itre xane la maca ka loi. Nyipi ewekë mina fe troa trongëne hnei angeice la itre trepene mele hna hamëne ngöne la itus, Notre ministère, götrane 98-9, me hane catre sine la itre icasikeu.
Maine tro angeice a majemine thupëne la mele i angeice ngöne la götrane la ua, tro ha xatua angeice troa acatrene me acile hutine la aqane imelekeu i angeice me Iehova, me catre trongëne pala hi la gojenyi kowe la mele ka thaa ase palua kö. (Mat. 7:14; Heb. 10:23-25) Maine tro angeice a “nyipi catr” me eëne la itre thiina ne Keresiano ka cile hut, eje hi lai laka, tro ha xatua angeice matre thaa tro hmaca kö angeice a ceitu me ketre hlue Keresiano ka “hminyaje, me ka tha wa kö.”—2 Pet. 1:5-8.