Kola Sa La Itre Hnyinge i Nyipunie

◼ Hapeu, loi pala kö e troa inine la Tusi Hmitrötre kowe la ketre trejine föe maine trahmanyi ka thaa cainöje hmaca kö, thenge la hna amekötine hnene la caa atrene la Kometr ne huliwa ne cainöje ne la ekalesia?

Thaa hnëqane hmekuje kö la itre qatre thupe troa thupëne la ekalesia, ngo memine mina fe la itre xaa atrene eje ka thaa cainöje hmaca kö. Angatre a wange hmaca la itre atr celë, me atrehmekune hnyawa la ixatua hna ajane hnei nyudren. Maine ijij, haawe, atreine hi troa etid memine la ketre ka thaa cainöje hmaca kö. Kola qaja hnene la itus, Organisés pour bien remplir notre ministère, götrane 103, ka hape, tro la Kometr ne huliwa ne cainöje ne la ekalesia a axeciën, maine ijije troa etidi kowe la trejin, maine thaa ijie kö tro angeice a hane kapa la ixatua cili.

Tro la atre thupëne la huliwa ne cainöje a thele hnyawa la trejine ka ijije troa hamëne la ixatua ka sisitria, me itre mekune ka tru hna troa ini ngön, ketre tune mina fe la itusi ka troa hamëne la ixatua ka lolo. Maine jë ka loi kö tro la trejine ka etidi ekö memine lai atr, maine ketre atr pena hnei angeice hna atre a xome lai hnëqa cili, pine laka, ma troa atreine troa hamëne hnyawa la ixatua ka ijij. Ijije hi troa sipone kowe la ketre trejine föe ka macaje nge ka atreine troa xatuane lai söre ka thaa cainöje hmaca kö. Ame ngöne la itre xaa ijin, thaa nyipi ewekë kö troa ce tro memine la ka xomiujine la etid, hnene la ketre trejin. Qaane la kola amekötine kowe la trejine troa kuca lai etid, kolo fe a nyiqaane e cili troa e la etrune la traem, me itre iwai hmaca, me etrune la hna ini tusi ngöne la treu.​—Wange ju la Huliwa ne Baselaia ne Nofeba 1987, götrane 1-2.

Pine laka, hna bapataisone hë lai hnainin, haawe, thaa tro kö a aqeane menune me sisedrëne pala ha la etidi angeic. Ame la nyipi ewekë ke, ene la tro lai atr ka thaa cainöje hmaca kö, a hane sine hmaca la nöjei icasikeu asë ne la ekalesia, me hane nyiqaane tro fë pala hi la maca ka loi. Tro la atre thupëne la huliwa ne cainöje a sisedrëne me goeëne hnyawa la aqane trongene lai itre etidi cili. Ame hë la thangane la ixatua cili hna hamëne thenge la ihnim, ke, ene laka, tro la itre trejine föe me trahmanyi a ketre isa thue la itre ehnefe i angatr, me isa xome hnëqa qëmeke i Iehova me hane “hete iwane me tepene” ngöne la nyipici.​—Efe. 3:​17; Gal. 6:5.