Huliwane Jë La Itus Gojenyi Kowe La Nyipi Mel! Ngöne La Hna Cainöj

Tru la madrine së kapa la ketre boroshür me itus ka hnyipixe nyine inine la itre atr! Epi tro Iehova a amanathithine la itre trengecatr hne së hna nu matre inine la itre atr. (Ma 28:18-20; 1Ko 3:6-9) Tro sa huliwane tune kaa la lue jia ne huliwa celë?

Kola saze la aqane hamë ini ngöne la boroshür maine itus Gojenyi Kowe La Nyipi Mel! Hane hi la aqane hnëkën me trongene la ini Tus.a

• E jë la itre paragaraf, nge ce ithanatane jë la itre hnying

• E jë la itre xötr hna amekötin troa e, nge xatuane jë la ka ini Tus troa xomi ini qa ngön

• Goeëne jë la itre video, nge ce ithanatane jë. Maine hetre hnying, ke, ce wange jë

• Ame la epuni a ini Tus, loi e troa kuca apexejene la ca mekene tus

Ame ngöne la hna cainöj, e hetre aja thene la atr troa porotrik, troa pane hamëne la boroshür. (Wange ju la hna eköhagen, “Aqane Troa Tro Fë La Boroshür Gojenyi Kowe La Nyipi Mel! Ngöne La Kola Xötrei Iöhny.”) Maine ase hë epun la boroshür, nge kola pi sisedrëne la ini Tus hnene la atr, hamëne pi la itus, nge nyiqane jë memine la mekene 4. Maine ase hë epun nyiqane ini Tus jëne la itus Ini Së maine Ihnimi Akötresie maine ketre itusi pena, ke, tro jë kowe la itus Gojenyi Kowe La Nyipi Mel! Nge iëne jë la meken hna troa nyiqane goeën.

GOEËNE JË LA VIDEO HNA HAPE HANE HI LA AQANE INI TUSI HMITRÖTR, NGE SA JË CAHU ITRE HNYING:

• Nemene la ewekë ka hnyipixe hna troa kuca hnene la ka ini Tus?

• Pine nemene matre troa amamane la video celë kowe la ketre ka nyiqane ini Tus?

• Nemene la itre mekun hna troa eatrëne hnene la itre ka ini Tus me epun?—Wange ju la itablo “Aliene Me Nyine Troa Kuca Ngöne La Isa Götranen.”