ISA TUPATHE JË NGÖNE LA HNA CAINÖJ | AKÖKÖTRENE JË LA MADRINE I EÖ TROA CAINÖJ
Xatuane Jë La Itre Ka Ini Tus Troa Nuetrije La Itre Sinatro Ka Jol
Loi e tro la itre ka ini Tus a iëne hnyawane la itre sinee i angatr matre troa lolo la aqane imelekeu i angatr me Iehova. (Sa 15:1, 4) Tro angatre lai a kepe thangane ka loi qa ngön.—Ed 13:20; lff mekene 48.
Thele jë troa trotrohnine la ka ini Tus. Ma ka jol koi angeic troa nuetrije la itre sinee i angeic ka tha hmi kö. Celë hi matre, loi e tro eö a wangatrunyi angeic ngöne fe la itre ijin tha epone kö a ini Tus. Iupi fë sms jë, hë angeice jë, maine tro jë troa wai angeic. Ame la angeic a kökötre ngöne la nyipici, hë angeice jë troa hane ce madrine memine la itre xaa hlue i Iehova. Tro angeic a öhne laka, tru catre kö la hnei angeic hna kapa, hune la itre hnei angeic hna nuetrij. (Mrk 10:29, 30) Nge tro fe eö a madrin laka, kola kökötre trootro la lapa i Iehova.
GOEËNE JË LA VIDEO HNA HAPE, XATUANE JË LA ITRE KA INI TUS TROA NUETRIJE LA ITRE SINATRO KA JOL, NGE SA JË CAHU ITRE HNYING:
Drei la itre sinatro ka ngazo?—1Ko 15:33
Ame koi Jade ka tune kaa la aqane madrine la itre keresiano?
Nemene la aqane kuca Neeta matre tro Jade a nuetrij la itre sinatro ka ngazo?