Itre Joxu Ka Icilekeu Ngöne La Ijine La Pun
Ame la itre hna perofetan ngöne la iatr, tre, kola qaja la itre ewekë ka traqa ngöne la itre macatre. Itre ej a amamane hnyawa laka, easa melëne la “ijine la pun.”—Dan. 12:4.
Xötr Hna ama. 11:7; 12:13, 17; 13:1-8, 12
Hna perofetan Itre thauzane la itre macatre ne musinëne la fen hnene la “öni ka ses.” Troa eatr la hnaasevenene he ne ej ngöne la ijine la pun. Ngo troa loi hmaca la eatr ne ej, nge tro la “fene hnengödrai asë” a xötrethenge ej. Jëne la öni ka ses cili, Satana a “isi memine la munëne” la itre hna iën.
Aqane eatr Thupene la Iwë Atraqatr, hna acile la itre musi atr; itre ej a icilekeu me Iehova. Itre thauzane lao macatre thupen, ngöne lo Pane Isi Ka Tru, hna patre trootro la trengecatre ne la musi Agele. Ngo eje hmaca a hetre trengecatr ke, hna ce xöle me Etazini. Ame ngöne la ijine la pun, Satana a nyijëne la musi cili matre troa icilekeu memine la itre hlue i Akötresie.
Xötr Dan. 11:25-45
Hna perofetan Ame ngöne la ijine la pun, tro la joxu ne kolopi me joxu ne kolojë a isi me ithepe mus.
Aqane eatr Kola icilekeu hnei musi Alema me musi Agele me Amerika. Ame lo 1945, musi URSS me itre xöle ne ej la joxu ne kolopi. Ame lo 1991, kola patre la musi URSS, nge musi Russie me itre xöle ne eje pena la joxu ne kolopi.
Xötr Is. 61:1; Mal. 3:1; Luka 4:18
Hna perofetan Iehova a upe la “atre tro fë maca” matre troa “nyihnyawane la gojeny” qëmekene troa acile la Baselaia i Akötresie. Hnene la itre atrene la gurupe cili hna “cainöjëne la maca ka loi koi itre ka pë ewekë.”
Aqane eatr Qane lo itre macatre 1870, hnei Charles Russell me itre sine huliwa i nyidrë hna qaja la nyipici qa hnine la Tusi Hmitrötr. Ame lo 1881, hnei angatr hna amamane kowe la itre hlue i Akötresie, la enyipiewekën troa catre cainöj. Hnei angatr hna fejane la itre itus, tune la hna hape, “Kola thele la 1 000 lao ka cainöj” me “Hna iëne troa cainöj.”
Xötr Mat. 13:24-30, 36-43
Hna perofetan Hnene la ithupëjia hna jume la zizania ngöne la hlapa qitr. Kola nue la zizania troa cia hnyawa, nge kola juetrëne la qitr. Ame hë la kola menu, kola isa ijene la zizania me qitr.
Aqane eatr Qane lo itre macatre 1800, kolo ha mama la itre nyipi Keresiano qa ngöne la itre Keresiano thoi. Ame ngöne la ijine la pun, troa pena isa amë la itre nyipi Keresiano memine la itre Keresiano thoi, nge troa acasi angatr.
Xötr Dan. 2:31-33, 41-43
Hna perofetan Nyimu ewekë hna xom matre troa xup la hnasaatr. Hna kuca la lue waca hnei fao hna ithuenyikön me dro ka fedr.
Aqane eatr Ame la dro ka fedr, tre, kola nyihatrene la itre hna kuca hnene la itre atr ka mel fene la Musi Agele me Amerika. Angatr a icilekeu matre kola apujene la ecatrene la musi cili.
Xötr Mat. 13:30; 24:14, 45; 28:19, 20
Hna perofetan Hna hlem “la qitr” me xawan e hnine la “uma.” Ketre, hna acile la “hlue ka nyipici me ka inamacan” “hune la itre atrene la hnalapa.” Kola nyiqaane cainöjëne “la maca ka loi ne la Baselaia e cailo fen.”
Aqane eatr Ame lo 1919, hna acile la hlue ka nyipici hune la nöje i Akötresie. Qane lo ijine cili, hnene la Itretre Ini Tusi Hmitrötr hna akökötrene la huliwa ne cainöj. Ame hë enehila, itre Temoë Iehova a cainöj ngöne la 200 nge hetre munën lao nöj, nge angatr a fejane la itre itus ngöne la 1 000 lao qene hlapa.
Xötr Dan. 12:11; Hna ama. 13:11, 14, 15
Hna perofetan Öni ka ses ka lue jon a amenun la itre atr me upi angatr troa kuca “la hnasaatr ne lo öni ka ses.” Ej a “hamë mano ne mel kowe la hnasaatr.”
Aqane eatr Musi Agele me Amerika a acile la Société des Nations. Hna sajuëne la organizasio cili hnene la itre xaa nöj. Hnene fe la joxu ne kolopi hna hane sajuën ej qaane hi lo macatre 1926 koi 1933. Hna qaja aloine la Société des Nations hna hën enehila ka hape, ONU. Ngo Baselaia i Akötresie hmekuje hi la nyine troa qaja aloin.
Xötr Dan. 8:23, 24
Hna perofetan Ketre joxu ka calogitr nge “kete pengöne kö la aqane iapatenyi angeic.”
Aqane eatr Alanyimu la itre atr hna humuthe hnene la musi Agele me Amerika, nge hetre itre xaa ewekë ka ngazo hna kuca. Ame ngöne lo Hnaaluene Isi Ka Tru, hnei Etazini hna kuiën la lue boob atomik kowe la nöj ithupëjia memine la musi Agele me Amerika. Nge hetre ethane catre la jiane isi cili.
Xötr Dan. 11:31; Hna ama. 17:3, 7-11
Hna perofetan Ame la öni ka ses ka treen lao jon “ka madra palulu” tre, kola fetra me mejë qa hnine la hnaop ka jui. Eje a nyihatrene la hnaaeitrene joxu. Kola aceitunëne la joxu cili ngöne la tusi Daniela memine la “ewekë ka sisi ate angazon.”
Aqane eatr Ame ngöne lo Hnaaluene Isi Ka Tru tre, kola patre la Société des Nations. Thupene lai isi, kola “acile” la ONU. Nge tune lo Société des Nations ekö, kola qaja aloin ej ngo thatraqane pe la Baselaia i Akötresie. Tro fe ej a lepetrije la hmi.
Xötr 1 Thes. 5:3; Hna ama. 17:16
Hna perofetan Itre nöj a sue me qaja ka hape, “Tingetinge hë nge pë hë hna mecin,” nge tro la “treene lao jian” memine la “öni ka ses” a lep apatrene “la föe ne gojeny.” Thupene lai, tro ha patre la itre nöj.
Aqane eatr Kola sue madrin hnene la itre nöj, ka hape, hnei angatr matre tingetinge hë nge pëhë hna mecin e cailo fen. Thupene lai, tro la itre nöj ka sine la ONU a apatrene la itre hmi ka thoi. Celë hi lai ka troa nyihatrene la kola nyiqane la akötr atraqatr. Nge tro lai a nyipun ngöne la kola traqa hnei Iesu troa lep apatrene hnyawa la fene hna musinëne hnei Satana e Amagedro.
Xötr Ezek. 38:11, 14-17; Mat. 24:31
Hna perofetan Tro Gog a thele troa lep la nöje i Akötresie. Nge tro la itre angela a “acasine la itre hna iën.”
Aqane eatr Tro la joxu ne kolopi memine la itre xaa mus a isi me lep la nöje i Akötresie. Ngo thupene la kola nyiqaane la isi cili, troa elë hnengödrai eë hnene la itre xaa hna iën.
Xötr Ezek. 38:18-23; Dan. 2:34, 35, 44, 45; Hna ama. 6:2; 16:14, 16; 17:14; 19:20
Hna perofetan ‘Ame la atre tithe la hos ka wië’ tre, angeic a “ngaane la itre ithupëjia me angeic,” me lepi Gog memine la trongene isi angeic. Nge ame la “öni ka ses” ke, hna kuiëne “kowe la hneopegejë eë.” Eje hi, hnene la neköi etë hna thëtrije la hnasaatr ka tru.
Aqane eatr Iesu la Joxu ne la Baselaia i Akötresie, nge nyidrëti a traqa troa amelene la itre hlue i Akötresie. Tro nyidrëti memine la ala 144 000 ka ce musi me nyidrë memine la trongene isi nyidrë itre angela, a lep apatrene la itre nöj hna acasin nge ka icilekeu memine la nöje i Akötresie. Celë hi lai ka nyipun la musi Satana.