AQANE TROA THIPETRIJE LA IMETHINË

2 | Tha Tro Kö A Itëkeun

Öni Tusi Hmitrötr:

“The iatëkeune kö la ngazo. . . . Isa isine jë troa mele tingetinge memine la itre atr. The të kö la ngazo hna kuca koi nyipunie, . . . ke hna cinyihane ka hape: ‘Qange troa të la ngazo, nge tro kö ni a nyithupen, öni Iehova.’ ”—ROMA 12:17-19.

Aliene La Xötr:

Ijije hi tro sa elëhni ngöne la kola qanangazo së. Ngo xele kö Akötresieti tro sa të la ngazo hna kuca. Nyidrëti pe a upi së troa xomihni aqean ke, calemi hë la ijine tro Nyidrëti a apatrene la nöjei huliwa ka tha meköti kö.—Salamo 37:7, 10.

Nyine Tro Sa Kuca:

Ame la easa thele troa të la ngazo ke, easë hi lai a akökötrene la imethinë. Celë hi matre, maine kola akötrë së, tha tro pi kö sa itëkeun. Loi e tro pe sa catre xomihni me thele tingeting. Nge maine ijij, loi e tro sa nue la ngazo. (Ite Edomë 19:11) Ngo ame itre xaa ijin, loi e troa canga nyinyine la jol. Eje hi, maine hna kuca koi së la ketre ewekë hna wathebon hnei mus, loi e tro sa thuemacanyine la itre polis maine iutisai kowe la itre ka huliwa i mus.

Troa hetre ethane koi së e tro sa itëkeun

Ngo tune kaa e thatreine kö së troa nyinyine la jol ngöne la tingeting? Tune kaa e ase hë së kuca la hne së hna atrein, ngo pë pe thangan? Tha tro kö sa të la ngazo hna kuca, wanga troa hetre ethan koi së me kowe lai atr. Loi e tro pe sa thipetrije la imethinë, me mejiune koi Akötresie me kowe la aqane nyinyine Nyidrëti la itre jol. Öni Tusi Hmitrötr: “Lapaunejë koi nyidë, nge tro nyidëti a kuca.”—Salamo 37:3-5.

Hna Melën Hnei—ADRIÁN

Hna Thipetrije La Aja i Angeic Troa Itëkeun

Ame lo Adrián a nekötrahmany, ka imethinë catre angeic. Angeic palahi a thele troa isi memine la itre ka akötrë angeic. Öni Adrián: “Hnenge hna hane ikuqanyi nge anyimua eatre ni. Maine ju, meci hë ni enehila.”

Ame la kola 16 lao macatre i Adrián, hnei angeic hna nyiqane ini Tusi Hmitrötr. Öni angeic: “Trotrohnine hë ni laka, nyipiewekë tro ni a saze la aqane ujëng.” Eje hi, nyipiewekë tro angeic a thipetrije la imethinë, nge tha tro hmaca kö a isi. Hna ketri la hni Adrián hnene la hna qaja ngöne Roma 12:17-19 ka hape, tha tro kö a itëkeun. Öni angeic: “Atre hë ni laka, tro kö Iehova a amekötin la itre ewekë ka ngazo elany, thenge la mekuna i Nyidrë me ngöne la nyipi ijin. Kola saze trootro la meleng, nge tha pi isi hë ni.”

Ame la ketre hej, Adrián a bëeke kowe la hnalapa i angeic. Hna ce uti koi angeic hnene la itre trahmany. Hnene la ka elemeke i angatr hna lepi Adrián me sue ka hape: “Amamane jë ka hape, trahmanyi eö!” Öni Adrián: “Eni a pi lepi angeic.” Ngo hnei Adrián hna xomihni. Hnei angeic hna thithi koi Iehova me tro qa cili.

Öni Adrián hmaca jë hi: “Ame e thupen, hnenge hna iöhnyi hmaca memine lo lai trahmanyi ka lepi ni, nge angeic caasi hi. Eni a elëhni me pi lepi angeic. Ngo hnenge pe hna catre thithi koi Iehova matre xatua ni troa xomihni. Sesëkötre ju hi ni la angeic a qaja ka hape: ‘Menu hë ni. Eni a hane pi tui ‘ö. Eni a pi ini Tusi Hmitrötr.’ Thatreine kö ni troa qaja la madrineng ke, atreine hë ni xomehnöthe la elëhning! Ame hë e cili, hnenge hna nyiqane ini Tusi Hmitrötr me angeic.”