AQANE TROA THIPETRIJE LA IMETHINË

1 | Tha Tro Kö A Ië Hna Hnim

Öni Tusi Hmitrötr:

“Tha ka ië hna hnime kö Akötresie, ngo nyidrëti a kapa la nöjei atr qa ngöne la nöjei nöj, e ka xoue nyidrë me thiina ka meköt angatr.”—ITRE HULIWA 10:34, 35.

Aliene La Xötr:

Ame Iehovaa Akötresie ke, tha Nyidrëti kö a ameköti së thenge la nöje së, me han ne ngönetrei së, me aqane mele së. Nyidrëti pe a goeëne la aliene hni së. Eje hi, “tha goeëne kö Iehova tune la at; ke ame la at’ a wange la ka mama, ngo Iehova a wange la hni.”—1 Samuela 16:7.

Nyine Tro Sa Kuca:

Nyipici laka, tha öhne kö së la aliene hni ne la itre atr tui Akötresie. Ngo ijije hi tro sa nyitipu Nyidrë. Tha tro kö sa ië hna hnim ke, itre atr hi lai ka ceitu me easë. Maine easa öhne laka, easa methinëne la itre xan pine la han ne ngönetrei maine nöje i angatr, loi e tro sa canga thith me sipo Akötresie matre xatua së troa xometrije la itre mekun cili. (Salamo 139:23, 24) Maine tro sa sipo trengecatr koi Iehova matre tha tro kö sa ië hna hnim, tro hë Nyidrëti a dreng me sa la thithi së.—1 Peteru 3:12.

a Iehova la sipu ëje i Akötresie.—Salamo 83:18.

“Maine eni ju ekö, tro palahi ni a thele iwesitrë me isi me angeic. Ngo eni hë ngöne la lapa ne la itre trejin e cailo fen.”—TITUS

Hna Melën Hnei—TITUS

Hna Atreine Thipetrije La Imethinë

Ame Titus ke, hnei nyidrëti ekö hna sine la ketre gurup ka isi nge ka icilekeu memine la itre wathebo hna kuca kowe la itre ka wetrewetr. Öni Titus: “Eahuni a tro kowe la itre götran hna wathebone kowe la itre ka wetrewetr, tune la itre hnë meköl (hôtel) me itre hnë iji kahaitr (bar), matre troa thele isi.” Atre hi Titus laka, ka imethinë nyidrë. Öni nyidrë: “Maine kola iwesitrë, eni la ka pane uti troa isi, ngacama trahmanyi ju hë maine föe.”

Ngo hnei Titus hna saze ngöne lo nyidrë a nyiqane ini Tusi Hmitrötr memine la itre Temoë Iehova. Hnei nyidrë hna e la Tusi Hmitrötr, nge hna ketri nyidrë hnene la hnei Iehova hna thingehnaean göne la fene ka hnyipixe laka “pë hmaca kö mec, me hleuhleu, me treij, me akötr.”—Hna Amaman 21:3, 4.

Ame lo xötrei, hnei Titus hna nue trengecatr matre troa thipetrije la imethinë. Öni nyidrë: “Jole catre koi ni troa saze la itre mekun me aqane ujëng ka ngazo.” Ngo hna xatua nyidrë hnene la hna qaja ngöne Itre Huliwa 10:34, 35 ka hape, tha ka ië hna hnime kö Akötresie.

Nemene hë la thangan? Öni Titus: “Xecie hnyawa koi ni laka, thene la itre Temoë Iehova la nyipi hmi. Eni a öhne laka, ngacama isa nöje i angatre kö me han ne ngönetrei, ngo tru la ihnimi angatr. Qëmekene tro ni a xomi bapataiso, hnene la ketre trejin kamadra hna hë ni troa xen ngöne la hnalapa i angeic. Eni a sesëkötr la ka traqa. Maine eni ju ekö, tro palahi ni a thele iwesitrë me isi me angeic. Ngo eni hë ngöne la lapa ne la itre trejin e cailo fen.”