Itre Jeune Fe​—Catre Jë Huliwa i Iehova Thupene La Bapataiso

1. Nemene la mekun hna eatrëne hë hnene la itre jeune? Nge tune kaa la aqane kuca i angatr, matre troa eatrëne lai?

AME e nöjei macatre, alanyimu catre la itre jeune ka xomi bapataiso. Eö fe hi la ketre? Maine eje hi, madrine catre la itre trejin, me Iehova koi eö! (Ite edomë 27:11) Pane mekune jë la itre trengecatr hnei eö hna nu, matre troa eatrëne lai. Hnei eö hna ini Tusi Hmitrötr ma ije macatre, matre xecie koi eö laka, Tusi Hmitrötr la Trengewekë i Akötresie. Ngo ame la ka nyipiewekë catre kö, ke atre hë eö la Atrekë Ewekëne la itus cili, me hnimi Nyidrë. Tru catre la ihnimi eö koi Iehova, ke ame enehila ase hë eö nue la mele i eö koi Nyidrë, me xomi bapataiso. Ketre manathith ka tru lai!

2. Nemene la hne së hna troa ce wang ngöne la tane mekune celë?

² Qëmekene tro eö a xomi bapataiso, hnei eö hna ixelë me nöjei pengöne jol ka tupath la lapaun i eö. Nge ame la eö a tru trootro, tro eö lai a cile kowe la itre xaa jol. Satana a thel matre tha tro hmaca kö eö a hnimi Iehova, me nyihlue i Nyidrë. (Efe. 4:14) The nue angeic pi kö troa kuca tune lai. Nemene la ka troa xatua eö troa mele nyipici koi Iehova, me metrötrëne la hnei eö hna sisiny? Loi e tro eö a catre huliwa koi Iehova, ene la troa “isine troa macaj.” (Heb. 6:1) Ngo troa kuca tune kaa? Celë hi hne së hna troa ce wang ngöne la tane mekune celë.

TUNE KAA LA AQANE TRO EÖ A MACAJ?

3. Nemene la hna troa kuca hnene la itre keresiano thupene la bapataiso?

³ Thupene la bapataiso, loi e tro la itre keresiano a trongëne la eamo hnei Paulo aposetolo hna hamëne kowe la itre trejin ne Efeso. Hnei nyidrë hna ithuecatr koi angatr troa “tune la itre ka tru.” (Efe. 4:13) Kösë nyidrëti a qaja koi angatr ka hape, ‘Troa maca ngöne la huliwa i Iehova.’ Nyidrëti a aceitunëne la aqane kökötr la keresiano, memine la aqane tru trootro la nekönatr. Madrine catr la kem me thin la kola medreng la nekö i nyidro. Ngo tha tro kö nyëne lai a medreng palua. Nge ame la angeic a tru, tro hë angeice lai a trij “la qene nekönatr.” (1 Kor. 13:11) Ceitune hi lai memine la itre keresiano. Thupene la hne së hna xomi bapataiso, loi e tro palahi sa kökötr ngöne la huliwa i Iehova. Tro sa ce wange la itre ka troa xatua së.

4. Nemene la thiina ka troa xatua eö troa kökötr ngöne la huliwa i Iehova? Qejepengöne jë. (Filipi 1:9)

⁴ Acatrene jë la ihnimi eö koi Iehova. Tru catre la ihnimi eö koi Iehova. Ngo ijiji eö hi troa acatrene catrën hmaca kö. Tune kaa? Ame ngöne Filipi 1:9 (E jë), tro sa öhne la ketre aqane troa acatren ej. Hnei Paulo hna thithi fë la angetre Filipi, matre tro la ihnimi angatr “a kökötre trootro.” Kolo hi lai a hape, ijije hi tro la ihnimi së a kökötr. Tro lai a ej, e hetreny the së “la nyipi inamacan, me atrehmekun.” Maine tro sa thel troa atre Iehova hnyawa, tro hë së lai a hnimi Nyidrë, me wangatrune la itre thiina, me itre huliwa i Nyidrë. Celë hi ka troa uku së tro palahi a amadrinë Nyidrë, me sisine la itre ewekë hnei Nyidrëti hna sisin. Ketre, easa nue trengecatr matre atrehmekun la aja i Nyidrë me trongën ej.

5-6. Tune kaa la aqane tro eö a acatrene la ihnimi eö koi Iehova? Qejepengöne jë.

⁵ Iesu la hnaiji Akötresie, matre e aja së troa akökötrene la ihnimi së koi Iehova loi e tro sa atrepengöi Iesu hnyawa. (Heb. 1:3) Ame la ketre aqane troa atrepengöi Iesu, ke ene la troa e me lapa mekun la foa lao Evangelia. Maine tha majemine kö eö e Tusi Hmitrötr e nöjei drai, ke nyiqane jë enehila. Ame la eö a e la itre hna melëne hnei Iesu, thele jë la itre thiina i nyidrë. Nyidrëti la ketre atr ka ihnim me wangatrune la itre xan. Ame lo ketre ijine, hnei nyidrë hna xome la itre nekönatr me haluthi nyudren. (Mar 10:13-16) Ketre tha xouene kö la itretre dreng troa fe la aliene hni angatr. (Mat. 16:22) Maine Iesu hi a nyitipune la Kem i nyidrë, haawe, ketre ka hmaloi hi troa easenyi Iehova. Ijije hi tro sa easenyi Nyidrë jëne la thith. Ame la easa thith, loi e tro sa fe la hni së, ke tha Nyidrëti kö a ameköti së. Nyidrëti pe a meku së me hnimi së.​—1 Pet. 5:7.

⁶ Iesu a utipine la itre atr. Öni Mataio aposetolo: “Ame la Iesu a öhne la itre atr, nyidrëti a utipi angatre ju, ke ceitu i angatr me itre mamoe ka pë atre thupën.” (Mat. 9:36) Ame Iehova ke? Nyidrëti kö a utipin la itre atr? Öni Iesu: “Tha aja i Kakati kö e hnengödrai troa paatre la ketre ka co celë.” (Mat. 18:14) Itre mekune la, ka akeukawanyi së! E tro sa atrepengöi Iesu hnyawa, tro ha kökötr la ihnimi së koi Iehova.

7. Nemene la itre eloin hnei eö hna troa kapa e tro eö a ce tro memine la itre trejin ka macaj?

⁷ Tro fe a akökötrene la ihnimi eö koi Iehova, e tro eö a ce tro memine la itre trejin ka macaj ne la ekalesia. Tro eö lai a öhne laka, ka madrine palahi angatr troa nyihlue i Iehova. Hnyingë angatre jë la itre hnei angatr hna melën ngöne la huliwa i Iehova. Nge sipo ixatua jë thei angatr ngöne la eö a troa axecië mekun. Mekune hnyawa ju laka, ‘e ala nyimu la ka hamë eamo, troa eatr la itre mekun.’​—Ite edomë 11:14.

8. Nemene la nyine troa kuca, e eö a nyiqane luelu göne la hna qaja hnei Tusi Hmitrötr?

⁸ Nuetrije pi la luelu. Tune la hne së hna ce wang ngöne la paragaraf 2, tro Satana lai a sewe eö troa huliwa catr koi Iehova. Tro angeice lai a aciane thei eö la luelu, matre tha tro hmaca kö eö a mejiun kowe la itre ini qa hnine la Tusi Hmitrötr. Maine jë, ame elany tro eö a dreng la ketre ini ka thaipië Akötresie, ene la ini évolution. Ma tha hnei eö kö hna hane dreng ngöne lo eö a co, ngo ame enehila, ke eö fe hë dreng la ini cili ngöne uma ne ini. Maine jë tro eö a mekun ka hape, ka nyipici hi la ini cili. Hapeu, hnene kö la itre porofesör hna pane ithel ka hape, hetre Atr Xup? Mekune kö la trepene meköt ngöne Ite Edomë 18:17, MN: “Maine jë ka meköt la mekun ne la atr ka pane ithanata, ngo traqa pi ketre a qaja troa jelenyipicin.” The kapa menune kö la itre ini hna hamëne koi eö, ngo pane ithele jë e hnine la Trengewekë i Akötresie, ene la Tusi Hmitrötr. Ithele jë fe e hnine la itre itusi së. Xomi ijine jë troa ce ithanata memine la itre trejin ka mejiun ekö kowe la ini évolution. Nge hnyingë angatre jë la kepin matre angatre hë a mejiun laka, hetre Atre Xup ka hnimi së. Eje hi, kola akeukawanyi së la easë a ce ithanatane la itre hatren ka anyipicine laka, hetre Akötresie.

9. Nemene la ini hnei eö hna xom qa ngöne la hna melëne hnei Melissa?

⁹ Hnei Melissa ketre trejin föe hna kepe thangan qa ngöne la hnei angeic hna ithel göne la itre hna xup.b Öni angeic: “Ame ngöne la hna ini, kola jelenyipicine la ini évolution. Ame lo xötrei tha pi ithele kö ni, wanga tro fe ni a hane mejiun kowe la ini cili, me nuetrij la itre ini qa hnine la Tusi Hmitrötr. Ngo ame la aja i Iehova, ke tro së a ithel matre acatrene la lapaune së. Nge celë hi hnenge hna kuca. Hnenge hna e la itus Y a-t-il un Créateur qui se soucie de vous ? memine lo lue boroshür hna hape, La vie a-t-elle été créée ? me Cinq questions à se poser sur l’origine de la vie. Madrine catre ni thupene la hnenge hna ithel. Ame la eni hmaca a mekun, ka loi ekö la tro ni a canga kuca.”

10-11. Nemene la ka troa xatua eö troa wië qëmeke i Iehova? (1 Thesalonika 4:3, 4)

¹⁰ Kötrene pi la kuci ngazo. Ame la easa jeune catrehnine catr la aja troa ce meköl. Maine jë tro la itre xaa jeune a uku eö troa kuci ngazo. Nge kolo hi lo aja i Satana lai. Nemene la ka troa xatua eö troa wië qëmeke i Iehova? (E jë la 1 Thesalonika 4:3, 4.) Ame la eö a thith koi Iehova, qaja asë jë koi Nyidrë la itre aliene hni eö. Nge sipo Nyidrëti jë troa xatua eö troa cile catr qëmekene la itre itupath. (Mat. 6:13) Tha aja i Nyidrëti kö troa ameköti eö, ngo tro pe a xatua eö. (Sal. 103:13, 14) Ketre, ijije fe hi tro la Tusi Hmitrötr a xatua eö troa cile catr. Tui Melissa hne së hë hna qaja e kula, hnei angeice fe hna isi memine la itre mekun ka ngazo. Öni angeic: “Ame la ka xatua ni troa lepetrij la itre mekun ka ngazo, ke hnenge hna e la Tusi Hmitrötr e nöjei drai. Celë hi lai ka amekunë ni ka hape, ase hë ni nue la meleng koi Iehova, matre ewekë i Nyidrëti pë hë ni.”​—Sal. 119:9.

¹¹ The thele pi kö troa nyinyine casine lai jol. Ce ithanatane jë me kaka me nenë. Ngacama tha ka hmaloi kö troa ithanatan la itre ewekë cili, ngo ka nyipiewekë. Öni Melissa: “Hnenge hna pane sipo ixatua koi Iehova, matre tro ni a atreine ithanata koi kaka. Nge thupene lai, uqa pi hi ni. Atre hi ni laka, madrine catr Iehova koi ni.”

12. Nemene la ka troa xatua eö troa axecië mekun hnyawa?

¹² Trongëne jë la itre trepene meköt. Ame hë la eö a nyiqane tru trootro, tro hë la kem me thine i eö a nue eö troa ketre axecië mekun. Ngo tha kolo kö lai a hape, atre asë hë eö la pengöne la mel. Nemene la aqane tro eö a neëne la ketre jol, matre tha tro kö a angazone la aqane imelekeu i eö me Iehova? (Ite edomë 22:3) Hnene la ketre trejin föe Kari, hna qaja la ka xatua angeic troa axecië mekune hnyawa. Atre hi angeic laka, tha ka nyipiewekë kö la troa hetre wathebo göne la nöjei ewekë. Matre öni angeic: “Loi e tro ni a pane atrepengöne la itre trepene meköt, ngo tha eje kö la troa trongëne hi la ketre wathebo.” Ame la eö a e la Tusi Hmitrötr, hnyinge jë ka hape: ‘Nemene la mekuna i Iehova ngöne la itre xötre celë? Hetre trepene meköt kö e celë, ka xatua ni troa amadrinë Iehova? Maine tro hna trongëne itre ej, nemene la itre thangane ka loi hnenge hna troa kapa?’ (Sal. 19:7; Is. 48:17, 18) E jë la Tusi Hmitrötr, nge lapa mekune ju la itre trepene meköt. Celë hi ka troa xatua eö troa axecië mekun ka amadrinë Iehova. Ame la eö a macaj trootro, tro hë eö lai a öhn laka, tha ka nyipiewekë kö troa hetre wathebo göne la nöjei pengöne ewekë, ke atre hë eö la mekuna i Iehova.

13. Nemene la thangane koi eö troa hetre sinatro ka loi? (Ite Edomë 13:20)

¹³ Iëne jë la itre sinatro ka hnimi Iehova. Tune la hne së hna öhne ngöne la paragarafe 7, hetre thangane catr la itre sinatro i eö kowe la aqane imelekeu i eö me Iehova. (E jë la Ite Edomë 13:20.) Hna patr la madrine i Sara ketre trejin föe. Ngo hetre ewekë ka saze la mele i angeic, öni angeic: “Hna traqa ijije la itre sinatro ka loi. Ame e nöjei wiik, eni a hnëkë Ita Ne Thup memine la ketre trejine föe. Nge jëne la ixatua ne la ketre trejin föe, eni ha hamë mekun ngöne la itre icasikeu. Hnene la itre sinatro ka loi hna thue aja koi ni troa ini Tusi cas me catre thith. Celë hi ka acatrene la aqane imelekeung me Iehova me thue madrine koi ni.”

14. Tune kaa la aqane iëne Julien la itre sinatro ka lolo?

¹⁴ Tune kaa la aqane tro eö a öhne la itre sinatro ka loi? Öni Julien, ketre qatre thup hë enehila ka hape: “Ame lo eni a jeune, hnenge hna iëne troa nyisineene la itre trejin ka ce cainöj me eni. Itre ka catre cainöj angatr matre hnenge hna öhne laka, ka hamë madrin la huliwa ne cainöj. Nge, celë hi ka thue aja koi eni troa xome la huliwa ne pionie. Maine hnenge ju hi hna iën la itre sine xötreng, ke triane pë hë ni la itre xaa aqane mel ka mingöming. Hetre sineenge fe hë ngöne Bethela. Hnene la tulu i angatr hna xatua ni troa iëne hnyawane la itre nyine iamadrinë. Nge celë hi ka easenyi ni koi Iehova.”

15. Nemene la eamo hnei Paulo hna hamëne koi Timoteo? (2 Timoteo 2:20-22)

¹⁵ Nemene la nyine tro eö a kuca, e tha sinatro ka lolo kö la ketre atren la ekalesia? Atre hi Paulo laka, hetreny e hnine la ekalesia, ngöne lo ijine ne itre pane keresiano, la itre sinatro ka tha loi kö. Celë hi matre hnei angeic hna hmekë Timoteo, troa iananyi me angatr. (E jë la 2 Timoteo 2:20-22.) Ka nyipiewekë catr la aqane imelekeu së me Iehova. Hnei easë hna nue trengecatr matre acatrene la aqane imelekeu së me Nyidrë. Haawe, the nue pi kö la ketre atr troa angazone lai.​—Sal. 26:4.

THELE JË LA ITRE MEKUN NYINE TROA EATRËN MATRE MACAJ

16. Nemene la itre mekun nyine tro eö a eatrën?

¹⁶ Thele jë la itre mekun nyine troa eatrën. Iëne jë la itre mekun nyine troa eatrëne ka troa acatrene la lapaune i eö, me xatua eö troa macaj. (Efe. 3:16) Tune la troa catre ini Tusi cas me e Tusi Hmitrötr e nöjei drai. (Sal. 1:2, 3) Ketre, loi e tro eö a thithi lapa, me fe la hni eö koi Iehova. Maine pena, troa iëne hnyawane la itre nyine iamadrinë me huliwane hnyawan la traem i eö. (Efe. 5:15, 16) Madrine catr Iehova la eö a nue trengecatr troa macaj.

17. Nemene la itre manathith hnei eö hna troa kapa, e tro eö a xatua itre xan?

¹⁷ Maine eö a ajane troa macaj, nyipiewekë tro eö a xatua itre xan. Öni Iesu: “Sisitria catre kö la madrine ne la atre ham, hune la atre kapa.” (Itre hu. 20:35) Tro eö lai a kapa la itre manathith ka tru, e tro eö a nue la traem me trengecatre i eö troa xatua itre xan. Thele jë troa xatuane la itre trejin ne la ekalesia, ka qatre hë maine ka adikape. Hnyinge jë ka hape, ajane kö angatr troa komisio i angatr? Maine amamane pena la aqane huliwane la tablet me mobilis. Maine eö la ketre trejin trahmany, thele jë troa hane atre ixatua, celë hi ketre aqane tro eö lai a xatuan la itre trejin. (Fil. 2:4) Ketre, tro eö a amamane la ihnimi eö kowe la itre atr, ngöne la eö a cainöjëne la maca ka loi ne la Baselaia. (Mat. 9:36, 37) Nge e ijij, xome jë la huliwa ne pionie.

18. Pine nemene matre tro sa macaj e tro sa huliwa i Iehova drai ka pexej?

¹⁸ Ame la troa huliwa i Iehova drai ka pexej, ke celë hi ka troa xatua eö troa macaj. Nge ketre, tro fe lai a aijijë eö troa hane sine la Ini Koi Itre Ka Cainöj, me huliwa ngöne la Bethela, maine pena troa xupi Uma Ne Baselaia. Öni Kaitlyn ketre trejin föe ka pionie: “Ame la ka xatua ni troa macaj thupene la hnenge hna xomi bapataiso, ke ene la troa ce cainöj memine la itre trejin ka macaj. Hnei angatr hna thue aja koi ni, troa catre inine la Tusi Hmitrötr me atreine hamë ini.”

19. Nemene la itre manathith hnei eö hna troa kapa, e tro eö a catre huliwa i Iehova?

¹⁹ Maine tro eö a catre huliwa i Iehova, tro hë eö lai a kapa la itre manathith. Tha tro kö eö a aluzin la mele i eö, me trengecatre i eö kowe la itre ewekë ka pë alien. (1 Ioane 2:17) Ketre, tro lai a trianyi eö hnene la itre akötr ka traqa qa ngöne la aqane axecië mekun ka ngazo. Eje hi, tro ha tro loi la mele i eö me madrin. (Ite edomë 16:3) Tro la tulu i eö ka lolo a xatuane la itre trejin ka co maine ka qatre hë. (1 Tim. 4:12) Nge, ame la ka sisitria, ke tro ha tingeting la hni eö me madrin. Ketre, atre hi eö laka, madrine catre Iehova koi eö, nge lue treme sineene hë epon.​—Ite edomë 23:15, 16.