Acatrene Jë Së La Mejiune Së

1. Nemene la mejiun hnei Iehova hna hamë së?

HNEI Iehova hna hamë së la mejiun troa mel epine palua. Hetre itre ka troa mel epine palua e hnengödrai. (1 Kor. 15:50, 53) Nge ame la itre xan, tro angatr a mele palua me pexej e celë fen. (Hna ama. 21:3, 4) Ngacama easa mejiune troa mel e celë fen, maine e koho hnengödrai, ngo ka sisitria la mejiune së.

2. Hapeu, pune jidri kö la mejiune së, nge pine nemen?

² Ame la “mejiune” ngöne la Tusi Hmitrötr, ke kola qaja “la itre ewekë ka lolo hne së hna lapa treqen.” Tha luelue kö së laka, tro kö a eatr la mejiune së ke, qaathei Iehova. (Rom. 15:13) Atre hi easë laka, hetre hnei Nyidrëti hna thingehnaean, nge tha tro kö Nyidrëti a thoi. (Num. 23:19) Xecie koi së laka, aja i Iehova troa eatrëne la hnei Nyidrëti hna qaja, nge hetre mene i Nyidrë troa eatrën. Matre ame la mejiune së, tha pu ne jidri kö, ngo ka nyipici hi, ke hetre nyipi trepen.

3. Nemene la hne së hna troa ce wang ngöne la tane mekune celë? (Salamo 27:14)

³ Tru la ihnimi Iehova koi së, nge aja i Nyidrë tro sa mejiune koi Nyidrë. (E jë la Salamo 27:14.) Maine ka catr la mejiune së koi Iehova, atreine hi së elëhune la itre jol ka traqa koi së ngöne la madrin. Tro sa ce wang la aqane tro la mejiune së a thupë së. Celë hi matre, tro sa pane ce wang la kepine matre kola aceitunëne la mejiune së me iuhni me itrapetr. Thupene lai, tro sa ce wang la aqane tro sa acatrene la mejiune së.

CEITU ME IUHNI LA MEJIUNE SË

4. Pine nemene matre ceitune hi la mejiune së memine la iuhni? (Heberu 6:19)

⁴ Ame ngöne la tusi Heberu, Paulo aposetolo a aceitunëne la mejiune së memine la ketre iuhni. (E jë la Heberu 6:19.) Pine laka, ame Paulo ka majemine ti he, atre hi angeic laka, iuhni la ka troa xom cilëne la he. Ame la ketre ijin angeic hune la ketre he, hna aca mejë la enyi ka catr. Hnene la itre ka huliwa ngöne la he hna kuiëne la itre iuhni matre tha tro kö la he a të hune la hnënge etë. (Itre hu. 27:29, 39-41) Ame la easa ixelë me itre jol, ceitune hi la mejiune së memine la iuhni. Ej a xatua së matre tha tro kö sa iananyi me Iehova. Eje fe xatua së troa cile catr ngöne la itre ijine jol ke, atre hi së laka, tro kö sa hetre mel ka loi e thupen. Nge ase hë Iesu qaja ka hape, tro kö a axösisi së. (Ioane 15:20) Celë hi matre, ame la easa lapa mekune la mejiune së koi elany, ke kola xatua së troa catr trongëne la gojenyi ne mel.

5. Hnene la mejiune i Iesu hna xatua nyidrë tune kaa ngöne la nyidrëti a qëmeke kowe la mec?

⁵ Hnene la mejiun hna xatua Iesu troa mele nyipici, ngacama troa humuthi nyidrë. Ame lo Penetekos macatre 33 M.K., hnei Peteru aposetolo hna amexeje la ketre hna perofetane ngöne la tusi Salamo ka amamane la mejiune i Iesu ngöne la ijine cili. Kola hape: “Tro ni a lapa hnine la mejiun. Ke tha tro kö nyipëti a nue ni ngöne la Hua, nge tha tro pi kö nyipëti a nue la atre mele nyipici troa öhne la hnyiqetr. . . . troa atraqatre la madrineng troa öhnyi nyipë.” (Itre hu. 2:25-28; Sal. 16:8-11) Atre hi Iesu ka hape, easenyi hë tro nyidrëti a mec, ngo ka catre la mejiune i nyidrë laka, tro kö Akötresie a amele nyidrëti hmaca, nge tro nyidro a iöhnyi e hnengödrai.—Heb. 12:2, 3.

6. Nemene la hna qaja hnene la ketre trejin göne la mejiun?

⁶ Hnene la mejiune së hna xatuane la itre trejin troa xomihnine la itre akötr. Tro sa ce wang la tulu i Leonard Chinn, ketre trejin ka mele nyipici e Agele. Ame ngöne lo Pane Isi Katru, hna akalabusi angeic pine xele ma sooc. Lue treu ne pane umë angeic, nge ame hë e thupen hna folosa angeic. Öni angeic, “Eni ha trotrohnine enehila ka hape, ka nyipiewekë la mejiune së matre troa xomihnine la itre akötr. Kolo fe a xatua së hnene la tulu i Iesu, me itre aposetolo, me itre perofeta, memine fe kö la itre hna thingehnaean hnei Tusi Hmitrötr. Itre ewekë lai ka acatrene la mejiune së, me xatua së tro palahi a catr.” Ketre iuhni la mejiune koi Leonard, nge ijije fe troa ketre iuhni koi së.

7. Nemene la aqane acatrene la mejiune së hnene la itre itupath? (Roma 5:3-5; Iakobo 1:12)

⁷ Kola acatrene la mejiune së la easa melëne la itre itupath, me öhne la aqane xatua së hnei Iehova. (E jë la Roma 5:3-5; Iakobo 1:12.) Matre ka catre kö la mejiune së enehila hune lo easa xötrei kapa la maca ka loi. Aja i Satana tro la itre itupath a akeinyi së, ngo jëne la ixatua i Iehova ijije hi tro sa elëhune itre ej.

CEITU ME ITRAPETR LA MEJIUNE SË

8. Pine nemene matre kola aceitunëne la mejiune së me itrapetr? (1 Thesalonika 5:8)

⁸ Tusi Hmitrötr fe a aceitunëne la mejiune së memine la itrapetr. (E jë la 1 Thesalonika 5:8.) Tro la itre sooc a ami itrapetr matre tha tro kö la itre ithupëjia a lepe la he i angatr. Ketre tune mina fe, loi e tro sa thupëne la itre mekuna së ke, Satana a thel troa ajojezi së jëne la itre itupath me itre mekun ka ngazo. Tune la aqane thupëne la he ne la sooc hnene la itrapetr, tro la mejiune së a thupëne la itre mekuna së matre tro palahi sa mele nyipici koi Iehova.

9. Nemene la aqane ujë la itre atr ka pë mejiun?

⁹ Tro la mejiune së kowe la mele ka pë pun a xatua së troa inamacan me wangatrehmekun. Ngo, e tha hmeke kö së, tro hë së lai a nue la itre aja ne ngönetrei troa löthi së, nge tro ha patre trootro la mejiune së kowe la mele ka pë pun. Celë hi ka traqa kowe la itre keresiano ne Korinito ekö. Tha mejiune hë angatr kowe la ketre hna thingehnean hnei Iehova, ene la melehmaca. (1 Kor. 15:12) Öni Paulo koi angatr ka hape, ame la itre ka pë mejiun ke, angatre hi a mele menu. (1 Kor. 15:32) Ame enehila, alanyimu la itre atr ka tha mejiune kowe la itre hna thingehnaean hnei Akötresie, matre ame la ka tru ngöne la mele i angatr ke, kuci madrin. Ngo ame easë, easa mejiune kowe la itre hna thingehnean hnei Akötresie. Celë hi matre ceitune hi la mejiune së memine la itrapetr, ke ej a thupëne la itre mekuna së, me sewe së troa kuca la itre huliwa ka ngazo ka troa ananyi së me Iehova.—1 Kor. 15:33, 34.

10. Tune kaa la aqane tro la mejiune a thupë së qa ngöne la itre mekun ka thoi?

¹⁰ Tro la itrapetr, ene la mejiune së a thupë së qa ngöne la itre mekun ka thoi tune la kola hape, tha nyipiewekë kö troa amadrinë Iehova. Maine jë, tro itre xan a mekune ka hape: ‘Tha ijijinge fe kö troa hane kapa la mele ka pë pun. Ke tha atr ka loi fe kö ni. Drei ni matre tro ni a hane nyihlue i Akötresie?’ Celë hi hna qaja hnene la ketre sinee i Iobu ka iaö, ene Elifaza. Öni angeic: “Ka ue la ate mate wië nyën?” Ketre öni angeic göi Akötresie: “Hana wang, tha qale kö anganyidë kowe la ite ka hmitöte i nyidë, nge tha wië kö la hnengödrai xajawa i nyidë.” (Iobu 15:14, 15) Itre trengathoi lai! The thëthëhmine kö laka, aja i Satana hi lai tro sa mekune tun. Atre hi angeic laka, e tro epuni a mekun tun, ke tro ha patre la mejiune i epun. Haawe, thipetrije pi la itre trengathoi cili, nge mejiune jë kowe la itre hna thingehnean hnei Iehova. The luelue kö laka, aja i Nyidrë tro epuni a kapa la mele ka pë pun, nge tro kö Nyidrëti a xatua epun.—1 Tim. 2:3, 4.

ACATRENE JË LA MEJIUNE I EPUN

11. Pine nemen matre loi e tro sa lapa treqen la ijin tro Iehova a eatrëne la aja i Nyidrë?

¹¹ Tha ka hmaloi kö tro palahi a acatrene la mejiune së. Ijije hi tro sa hnehengazo la easa lapa treqene la ijine tro Akötresie a eatrëne la itre hna thingehnaean. Ngo, pine laka ka epine palua Iehova matre tha ceitu kö me easë la aqane goeëne Nyidrë la traem. (2 Pet. 3:8, 9) Tro kö Iehova a eatrëne la aja i Nyidrë ngöne la nyipi ijin, nge maine jë, tha ngöne kö la ijin hne së hna mekun. Nemene la ka troa xatua së troa acatrene la mejiune së, me lapa treqen la ijin tro Iehova a eatrëne la itre hnei Nyidrë hna thingehnean?—Iako. 5:7, 8.

12. Thenge la tusi Heberu 11:1, 6, kola ce tro tune kaa la mejiun memine la lapaun?

¹² Troa catre la mejiune së, e tro sa lapa qale koi Iehova, Atre eatrëne la aja i Nyidrë. Tusi Hmitrötr a amamane laka, ka ce tro la mejiune memine la lapaune koi Iehova. Troa catr la mejiune së, e tro sa lapaune laka, ka mele Iehova, nge Nyidrë a “nyithupen kowe la itre ka thele nyidrë.” (E jë la Heberu 11:1, 6.) E tro sa easenyi catr koi Iehova, tro ha catr la mejiune së kowe la itre hna thingehnean. Haawe, tro sa ce wang la aqane tro sa acatrene la imelekeu së me Iehova, memine la mejiune së.

13. Tro sa easenyi Akötresie tune kaa?

¹³ Thithi jë koi Iehova, nge e jë la Tusi Hmitrötr. Ngacama tha öhnyi Iehova kö hne së, ngo ijije hi tro sa easenyi Nyidrë. Ame la easa thithi koi Nyidrë, xecie koi së laka, Nyidrëti a drei së. (Iere. 29:11, 12) Nge easa drei Nyidrë la easa e la Tusi Hmitrötr, me lapa mekun. Ame la easa e la aqane thupëne Iehova la itre hlue i Nyidrëti ekö, kola catrecatr la mejiune së. Ame asë hi la itre hna qaja e hnine la Tusi Hmitrötr, ke “hna cinyihan göi troa ini së. Matre, jëne la hne së hna cile huti memine la iakeukawanyi qa hnine la itre hna cinyihan, hetre mejiune së hë.”—Rom. 15:4.

14. Pine nemene matre loi e tro sa mekun la hnei Iehova hna kuca kowe la itre hlue i Nyidrëti ekö?

¹⁴ Tro sa lapa mekun la aqane eatrëne Iehova la itre hna thingehnaean. Tro sa ce wang la hnei Iehova hna kuca koi Aberahama me Sara. Lue qatre hë nyidro, matre tha ijiji nyidroti hë troa hnaho. Ngo hnei Akötresie hna thingehnaean ka hape, troa hetre nekö i nyidro. (Gen. 18:10) Tune kaa la aqane ujë i Aberahama göne la hna thingehnaeane cili? Öni Tusi Hmitrötr: “Hnei Aberahama hna mejiun me lapaun laka, tro kö nyidrëti a keme ne la itre nöj.” (Rom. 4:18) Ngacama thatre kö Aberahama la aqane tro Iehova a eatrëne lai, ngo xecie koi angeic laka, tro kö Iehova eatrëne la hnei Nyidrëti hna qaja. Nge tha tria ju kö la hna qaja hnei Iehova. (Rom. 4:19-21) Kola amamane hnene la hna melëne celë laka, tro kö Iehova a eatrëne la hnei Nyidrëti hna qaja, ngacama jol kowe la atr troa mekun.

15. Pine nemene matre loi e tro sa lapa mekun la hnei Akötresieti hna kuca koi së?

¹⁵ Lapa mekune jë la hnei Iehova hna kuca koi epun. Pane mekune jë epun la aqane eatr la itre hna thingehnaean e hnine la Tusi Hmitrötr. Öni Iesu lo, tro kö Iehova a hamë së la ka nyipiewekë kowe la mel. (Mat. 6:32, 33) Nge, tro fe Iehova a hamë së la uati hmitrötr, e tro sa sipon. (Luka 11:13) Celë hi hna kuca hnei Iehova. Maine jë hetre xaa ewekë hnei Iehova hna kuca koi epun. Tune la troa nue la itre ngazo së, me akeukawanyi epun, me hamë epun la xen ka troa easenyi epun koi Nyidrë. (Mat. 6:14; 24:45; 2 Kor. 1:3) Haawe, ame la easa lapa mekun la hnei Akötresieti hna kuca koi së, kola acatrene la mejiune së kowe la itre hnei Nyidrëti hna troa kuca elany.

MADRINE JË NGÖNE LA MEJIUN

16. Pine nemene matre ketre ahnahna qaathei Akötresieti la mejiun?

¹⁶ Ame la mejiune së kowe la mel ka pë pun, ke ketre ahnahna qaathei Akötresie. Easa lapa treqen la ketre mel ka mingöming ka troa traqa elany. Ka ceitune hi lai memine la iuhni, ke ej a xatua së troa xomihnine la itre jol, me cil kow la iaxösisi memine la mec. Ceitune fe ej memine la itrapetr, ke ej a xatua së troa nuetrij la itre mekun ka ngazo, me lapa mekun la itre ewekë ka loi. Tro la mejiune së qa hnine la Tusi Hmitrötr a easenyi së koi Akötresie, me amamane la ejuine la ihnimi Nyidrëti koi së. Tru catr la itre thangan hne së hna troa kapa e tro sa acatrene palahi la mejiune së.

17. Pine nemene matre tro la mejiun a hamë madrine koi së?

¹⁷ Öni Paulo ngöne la tusi angeic koi angetre Roma, “Madrine jë ngöne la mejiun.” (Rom. 12:12) Paulo a madrin ke, atre hi angeic laka, e tro angeic a mele nyipici, tro hë angeic a kapa la mele ka pë pun e hnengödrai. Ketre tu së fe, easa madrin kowe la mejiune së ke, xecie koi së laka, tro kö Iehova a eatrëne la hnei Nyidrëti hna qaja. Önine la atre cinyihane la Salamo ka hape: ‘Manathithi la atr . . . lapa treqe Iehova Akötresi angeic; . . . atre nyipici epine palua.’—Sal. 146:5, 6.