TANE MEKUN 51
Ka Xecie Koi Së La Mejiune Së
“Xecie hë koi së la mejiune cili.”—ROM. 5:5.
NYIMA 142 Xölehuje Ju Së La Mejiune Hna Amë Qëmeke Së
MEKUN KA TRUa
1. Pine nemene matre ka catr la mejiune i Aberahama laka, tro angeic a hetre matran?
HNEI Iehova hna sisinyi koi Aberahama laka, jëne la matra i angeic, troa amanathithine la nöjei nöj e cailo fen. (Gen. 15:5; 22:18) Xecie koi Aberahama laka, tro kö a eatr la hna thingehnaean cili ke, ka catre la lapaune i angeic koi Akötresie. Traqa ha koi 100 lao macatre i Aberahama, nge 90 lao macatre ne la föi angeic, nge pë palakö nekö i nyidro. (Gen. 21:1-7) Ngo, öni Tusi Hmitrötr: “Hnei Aberahama hna mejiun me lapaun laka, tro kö nyidrëti a keme ne la itre nöj, ngacama ewekë lai hna thatreine mekun. Hnei nyidrëti hna mejiune kowe lo hna thingehnaeane.” (Rom. 4:18) Atre hi easë laka, eatre ju kö la hna mejiune kow hnei Aberahama. Hna hnaho Isaaka, lo matran hna lapa treqen. Nemene la ka nyitrepene la lapaune i Aberahama?
2. Pine nemene matre xecie koi Aberahama laka, tro kö a eatr la hnei Iehova hna thingehnaean?
2 Pine laka, ka catr la imelekeu i Aberahama me Iehova, matre “xecie hnyawa koi Aberahama laka, ame la nöjei ewekë hnei Akötresieti hna thingehnaean, tro kö nyidrëti a eatrën.” (Rom. 4:21) Hna kepe angeic hnei Iehova, me jelemeköti angeic pine la lapaune i angeic. (Iako. 2:23) Tune la hna qaja ngöne Roma 4:18, ka ce tro hi la lapaun me mejiune i Aberahama. Tro sa ce wang la hna qaja hnei Paulo aposetolo göne la mejiune së, ngöne la itre pane xötr ne la tusi Roma mekene 5.
3. Nemene la hnei Paulo hna troa amamane koi së göne la mejiune së?
3 Hnei Paulo hna qaja la kepin matre ka “xecie” la mejiune së. (Rom. 5:5) Hnei angeice fe hna qaja la aqane troa acatrene la mejiune së. Ame la easa ce wang la hna qaja hnei Paulo ngöne Roma 5:1-5, ke mekune jë la hnei epun hna isa melën. Tro epuni a öhn e cili laka, ka catre kö la mejiune i epun enehila hun ekö. Tro la ini celë a amamane koi së la aqane tro sa acatrene catrëne la mejiune së. Tro sa pane ce wang la mejiune ka mingöming hnei Paulo hna qaja ka hape, ka “xecie” koi së.
KA MINGÖMING LA MEJIUNE SË
4. Nemene la hna qaja hnei Roma 5:1, 2?
4 E jë la Roma 5:1, 2. Hnei Paulo hna cinyanyine lai kowe la ekalesia ne Roma. Hnene la itre trejin cili hna atre Iehova me Iesu, me lapaune koi nyidro, me hane xom la hmi keresiano. Ame hnei Akötresie hna “jelemeköti [angatr] pine la lapaun,” me ië angatr hnei uati hmitrötr. Ame e cili, hnei angatr hna kapa la ketre mejiun ka mingöming, nge ka cilehut.
5. Nemene la mejiun ne la itre keresiano hna iën?
5 E thupen, hnei Paulo hna qaja kowe la itre keresiano hna iën ne Efeso, göne la mejiune i angatr ka hape, “trengamo ka tru hna hnëkën thatraqai ange ka hmitrötr.” (Efe. 1:18) Nge ame kowe la itre keresiano ne Kolose, öni Paulo, tro kö a eatr la mejiune i angatr, nge “hna hnëkën e hnengödrai.” (Kol. 1:4, 5) Haawe, ame la mejiun ne la itre keresiano hna iën, ke ene la troa amele angatr troa mele palua e hnengödrai, me ce musi me Keriso.—1 Thes. 4:13-17; Hna ama. 20:6.
Trejin F. Franz a qaja amamane laka, ka xecie kowe la itre hna iën la mejiune i angatr (Wange ju la paragarafe 6)
6. Nemene la hna qaja hnene la ketre trejin hna iën göne la mejiune i nyidrë?
6 Ka tru kowe la itre hna iën la mejiune i angatr. Hnei Trejin Frederick Franz, ketre trejin hna iën, hna qaja la aliene hni nyidrë. Öni nyidrë: “Ka xecie koi hun la mejiune hun. Nge tha nyine qaja kö la aqane tro ej a eatr elany koi eahun isa ala cas, itre ka nyiatrene la ala 144 000.” Öni Trejin Franz lo 1991, thupene la itre macatre ne nyihlue i Iehova ka hape: “Ka nyipiewekë palahi koi [eahun] la mejiune hun. . . . E tro palahi eahuni a itreqe, ke tro palahi ej a nyipiewekë catr koi hun. Tha ka gufa kö la troa lapa treqene ej, ngacama itre milio lao macatre ne itreqe. Ame koi ni, pëkö ewekë ka sisitria hune la mejiuneng.”
7-8. Nemene la mejiun ne la itre xaa hlue i Iehova? (Roma 8:20, 21)
7 Ame la itre xaa hlue i Iehova enehila, ke hetre ketre mejiune i angatre kö. Casi hi la mejiune i angatr me Aberahama laka, troa mele palua hune la ihnadro, fene la musi ne la Baselaia i AKötresie. (Heb. 11:8-10, 13) Hnei Paulo fe hna hane qaja la itre manathith hnei angatr hna troa kapa. (E jë la Roma 8:20, 21.) Ame lo epun a xötrei dreng la itre hna thingehnaean hnei Tusi Hmitrötr, nemene la ka ketri epun? Ma kolo ini ka qaja ka hape, tro la itre atr a pexej, nge pëhë ngazo i angatr? Maine pena, lo kola qaja koi epun ka hape, troa amelene hmaca la itre sinee i epun ka mec, nge tro epun a ce mel ngöne la ihnadro hna aparadraison. Ame e cili, “mama pi la mejiun” laka, easenyi hë troa traqa la itre ewekë ka mingöming.
8 Mejiune ju hë së troa mel epine palua e hnengödrai, maine e celë fen, ngo ka mingöming la lue mejiune cili, nge ka hamë madrine koi së. Ketre, kolo fe a catre trootro la mejiune së. Hnei Paulo hna qaja la aqane troa acatrene la mejiune së. Tro sa ce wang la hnei angeic hna qaja. E cili, tro ha xecie koi së laka, tro kö a eatr la mejiune së.
AQANE TROA ACATRENE LA MEJIUNE SË
Tro asë hi la itre keresiano a cil kowe la itre itupath (Wange ju la paragarafe 9-10)
9-10. Tune la hna melën hnei Paulo, nemene la ka traqa kowe la itre hlue i Iehova? (Roma 5:3) (Goeëne ju fe la itre iatr.)
9 E jë la Roma 5:3. Öni Paulo, ame la easa cil kowe la ketre itupath, ke kola acatrene la mejiune së. Pine nemene matre qaja jë së lai? Eje hi, tro asë hi la itretre drei Keriso a cil kowe la itre itupath. Pane mekune jë la hna melën hnei Paulo. Öni angeic kowe la itre keresiano ne Thesalonika: “Ame lo ce eahuni me nyipunie, hne huni hna majemine canga thuemacanyi nyipunie ka hape, tro hë së a melëne la itre itupath.” (1 Thes. 3:4) Nge öni angeic kowe la angetre Korinito: “Ange trejin, tha ajane kö huni tro nyipunie a thatre la jole ka traqa koi huni . . . tha nyipi mama kö koi huni ka hape, tro jë kö huni a mel maine mec.”—2 Kor. 1:8; 11:23-27.
10 Ame enehila mina fe, itre hlue i Iehova a cil kowe la itre itupath. (2 Tim. 3:12) Hna hane kö icilekeu me epun, ke epuni a lapaun koi Iesu, me hane atre drei nyidrë? Maine jë, hna hnyimasai epun hnene la itre sinee i epun, me itre fami epun. Ma hnei angatre jë fe hna akötrë epun. Kolo kö a xele ma wai epun ngöne la hnë huliwa, pine epun huliwa nyipici? (Heb. 13:18) Maine pena, kola icilekeu hnei mus pine epun catre cainöj? Öni Paulo, traqa ju hë la nöjei jol, ngo loi e tro sa madrin. Pine nemen?
11. Pine nemene matre nyipiewekë tro sa cile hut qëmekene la nöjei pengöne itupath?
11 Madrine jë së la easa cil kowe la itre itupath, ke kola xatua së troa huliwane la ketre thiina ka loi. Tune la hna qaja ngöne Roma 5:3 ka hape, “Ame la thangane la itre itupath, tre cile hut.” Itre keresiano asë a cil kowe la itre itupath, matre loi e tro së a isa atreine cile hut. Loi e tro sa isine troa cile hut qëmekene la nöjei pengöne itupath. Matre tro sa hane öhn elanyi la kola eatrëne la mejiune së. Tha ajane kö së troa tune la itre atr hnei Iesu hna aceitunën me itre itine feja ka mala hune la dro ka tëtë. Angatr a canga kapa madrin la maca, ngo ame la “kola traqa la itupath me iaxösisi,” ke angatr a kei. (Mat. 13:5, 6, 20, 21) Nyipici laka, tha ka hmaloi kö troa cil kowe la itre itupath me iaxösisi, ngo e tro sa cile hut, tro sa kapa la itre manathith. Nemene manathith?
12. Nemene la eloin e tro sa cilehut?
12 Hnei Iakobo hna qaja la itre eloin, e tro sa cilehut qëmekene la itre itupath. Öni angeic: “Nue pi tro la thiina cili, ene la xomihni [maine cilehut], a apexejene la huliwan ej, matre pexeje pi nyipunie, me pë engazon ngöne la nöjei götran asë, nge matre tha tro kö a pë la ketre ewekë thei nyipunie.” (Iako. 1:2-4) Iakobo a qaja e celë ka hape, ka hetre huliwan maine hnëqan la cilehut. Nemene la huliwa ne la cilehut? Ame la easa cilehut, ke easë fe a huliwane la itre xaa thiina tune la atreine itreqe, me lapaun, me mejiune koi Akötresie. Ngo hetre ketre eloine kö hne së hna kapa.
13-14. Nemene la thangane la cile hut, nge nemene la thangane lai kowe la mejiune së? (Roma 5:4)
13 E jë la Roma 5:4. Ame ngöne la xötre celë, Paulo a qaja ka hape, ame la easa cilehut, “easë fe a itre atr hna kapa hnei Akötresie.” Pine laka, eö a cilehut matre kola kepe eö hnei Iehova. Tha kolo kö lai a qaja ka hape, Iehova a madrin la eö a cil kowe la itre itupath me itre jol. Nyidrëti pe a madrin koi eö. Ame la eö a cilehut ngöne la itupath, ke Nyidrëti a kepe eö. Drei la ketre manathith ka tru!—Sal. 5:12.
14 Mekune jë la tulu i Aberahama, hnei angeic hna cilehut, ame hna kepe angeic hnei Akötresie. Hnei Iehova hna nyisinee i angeic, me jelemeköti angeic. (Gen. 15:6; Rom. 4:13, 22) Ijije fe tro së a hane tui Aberahama. Tha hnene kö laka, tru la itre huliwa hne së hna kuca koi Iehova, nge hetre hnëqa së ngöne la organizasio, matre Nyidrëti a kepe së. Waea! Nyidrëti a kepe së, ke easa cilehut ngöne la itupath. Qatre ju hë së maine jeunes, maine isa aqane mele së pena, me hne së hna atrein, ngo ijiji së asë troa cilehut. Eö kö a cile kowe la ketre itupath enehila? Maine eje hi, madrine catre Iehova kowe la aqane cilehuti eö. The thëthëhmine kö laka, ame la easa atre ka hape, Iehova a kepe së, ke kola acatrene la mejiune së.
KA KÖKÖTR LA MEJIUN
15. Thenge la hna qaja hnei Paulo, nemene la thangan la hna kepe së hnei Iehova, nge hnauën la kola sesëkötr la itre xan?
15 Tune la hna qaja hnei Paulo, ame la easa cilehut ngöne la itupath, ke kola kepe së hnei Iehova. Ngo öni angeic e thupen: “Pine laka, kola kepe së hnei nyidrë, hetrenyi jë hi the së la mejiun. Nge xecie hë koi së la mejiune cili.” (Rom. 5:4, 5) Tro la itre xane lai a sesëkötr. Pine nemen? Pine laka, ase hë Paulo qaja kowe la itre keresiano ne Roma ngöne Roma 5:2 ka hape, hetre mejiune i angatre hë, ene “la mejiune qaathei Akötresie laka, tro sa lapane la itre göhnë ka draië.” Matre tro itre xan a hnying ka hape, ‘E hetre mejiune i angatre hë, hnauëne la kolo hmaca a qeje mejiun?’
Qaane lo epuni a atre Iehova, kola catrecatre trootro la mejiune i epun (Wange ju la paragarafe 16-17)
16. Kola kökötr tune kaa la mejiune së? (Goeëne ju fe la itre iatr.)
16 Maine easa ajan troa trotrohnine la hnei Paulo hna qaja, ke tha tro kö sa thëthëhmin ka hape, kola kökötr la mejiune së. Tro sa xom la ketre ceitun: Mekun palahi eö lo ijin eö a xötrei atre la itre hna thingehnaean hnei Tusi Hmitrötr? Ma jol koi eö troa mekun ka hape, tro sa mele palua elanyi ngöne la paradraiso e celë fen. Ngo, hnei eö hna atrepengöi Iehova, me sine thel la itre hna thingehnaean, matre xecie hë koi eö enehila laka, tro kö a eatr la itre hna thingehnaean cili.
17. Kola kökötr tune kaa la mejiune së thupene la bapataiso?
17 Thupene la bapataiso, hnei eö hna catre inin la Tusi Hmitrötr me akökötrene la ihnimi eö koi Iehova. Matre ame hë enehila, catrecatre hë la mejiune i eö. (Heb. 5:13–6:1) Hnei eö hna melën la hna qaja ngöne Roma 5:2-4. Hna traqa koi eö la itre itupath, ngo hnei eö hna cilehut, matre hnei Iehova hna amamane ka hape, Nyidrëti a kepe eö. Ame enehila, xecie koi eö laka, Iehova a kepe eö, nge celë hi ka xatua eö troa lapa treqen la itre hna thingehnaean. Ame enehila, ka catre kö la mejiune i eö hune ekö, nge mama hi ej koi eö. Nge ka hetre thangan la mejiun ngöne la mele i eö. Ej a amekötin la aqane ujë i eö kowe la fami eö, aqane axecië mekune i eö, me aqane huliwan eö la traem.
18. Nemene la hnei Iehova hna anyipicine koi së jëne Paulo?
18 Paulo a qaja la ketre ini ka tru göne la mejiun ka xulu qa ngöne la hna kepe së hnei Akötresie. Angeic a qaja ka hape, tro kö a eatr la mejiune së. Pine nemene matre ka xecie lai koi së? Jëne Paulo, Iehova a anyipicine kowe la itre keresiano ka hape: “Xecie hë koi së la mejiune cili, ke Akötresieti a huliwane la uati hmitrötr hnei nyidrëti hna hamëne koi së, matre amamane ka hape, nyidrëti a hnimi së.” (Rom. 5:5) Matre the luelue kö laka, tro kö a eatr la mejiune i eö.
19. Nemene la ka xecie koi së?
19 Pane mekune jë la tulu i Aberahama. Hetre hnei Iehova hna thingehnaean koi angeic, nge hnei Nyidrë hna kepe angeic me nyisinee i angeic. Eje hi, hna eatr la mejiune i Aberahama. Öni Tusi Hmitrötr: “Thupene la hnei Aberahama hna pane xomihni, angeic a kapa jë lo ewekë hna thingehnaean.” (Heb. 6:15; 11:9, 18; Rom. 4:20-22) Hnei Aberahama hna kapa la hnei angeic hna lapa treqen. Tui eö fe, maine tro eö a mele nyipici, tro fe eö lai a kapa la itre hna thingehnaean. Madrine jë ke, tro kö a eatr la mejiune i eö! (Rom. 12:12) Öni Paulo: “Epi tro Akötresie, atre hamë mejiune a atiqane la itre hni nyipunie hnei madrine me tingeting, ke nyipunie a mejiune koi nyidrë. Qa ngöne lai, tro ha catrecatre la mejiune i nyipunie hnene la emene ne la uati hmitrötr.”—Rom. 15:13.
NYIMA 139 Mekune Jë La Mele i ’ö Ngöne La Fene Ka Hnyipixe
a Ame ngöne la tane mekune celë, tro sa ce ithanatane la mejiune së, memine la kepin matre xecie koi së laka, tro kö ej a eatr. Tro la tusi Roma mekene 5 a xatua së troa trotrohnine la kepine matre tha ceitu kö la mejiune së enehila, memine la mejiune së ekö lo easa xötrei atre Iehova.