Troa Tingeting Ngöne La Itre Ijine Jol

1. Nemene “la tingetinge i Akötresie,” nge nemene la itre eloine koi së? (Filipi 4:6, 7)

HETRE ketre tingeting hna thatre hnene la itre atre ne fen. Kolo “tingetinge i Akötresie,” hne së hna kapa ke, ka catr la imelekeu së memine la Keme së e hnengödrai. Nge celë hi lai ka thupëne la mele së. (E jë la Filipi 4:6, 7.) Ketre, easa madrin troa nyisineene la itre atr ka hnimi Nyidrë, me nyisineene la “Akötresie ne tingeting.” (1 Thes. 5:23) Matre, e traqa ju hë la itre jol, ka tingetinge la hni së, ke atre hnyawa hi së la pengöi Nyidrë, nge easa mejiune me drengethenge Nyidrë.

2. Nemene la ka anyipicine ka hape, ijije hi tro sa kapa la tingetinge i Akötresie?

² Ijije kö tro sa kapa la tingetinge i Akötresie la kola traqa la itre jol, tune la mec ka ixötrekeu, itre hulö me itre icilekeu? Ame la kola traqa la itre ewekë cili, canga tro hi sa xou. Ame pe, öni Iesu kowe la itretre drei nyidrë: “The nue pi kö troa angazone me axouene la itre hni nyipunie.” (Ioane 14:27) Hna traqa la itre jol ka tru kowe la itre xaa trejin, nge hnei angatr hna trongëne la eamo i Iesu. Nge jëne la ixatua Iehova, tingetinge la hni angatr, ngacama tru la itre jol.

NGÖNE LA IJINE MEC KA IXÖTREKEU

3. Tune kaa la aqane tro la ketre mec ka ixötrekeu a thapa la tingetinge së?

³ Canga tro hi a saze la mele së la kola traqa la ketre meci ka ixötrekeu. Pane mekune jë la thangane la COVID-19 kowe lo itre atr. Önine la itre ka ithel ka hape, ame ngöne lo ijine cili, tha meköle hnyawa kö la itre xan. Tru la itre ka stress, me ka dépression, me ka iji gorok, me xomi dorog, me isi, me hnöjua. E traqa ju ngöne la nöje i epun la ketre meci ka ixötrekeu, nemene la nyine tro epuni a kuca matre tha tro kö a seseu menu? Tro epuni a kapa tune kaa la tingetinge i Akötresie?

4. Pine nemene matre kola tingeting la hni së la easa atre la hna perofetane hnei Iesu?

⁴ Ekö hë Iesu qaja ka hape, ame ngöne la itre drai ne la pun, troa hetre meci ka ixötrekeu “ngöne la ketre götran me ketre götran.” (Luka 21:11) Hapeu, tha ka tingetinge kö la hni epun troa atre lai? Nyipici, ke tha sesëkötre kö së la kola traqa la itre ewekë cili. Kola eatr lo itre hnei Iesu hna qaja. Celë hi lai ka upi së troa trongëne la eamo i nyidrë koi së enehila, lo kola hape: “The xou kö”!​—Mat. 24:6.

5. (a) Thenge la Filipi 4:8, 9, nemene la nyine tro sa sipone ngöne la itre thithi së? (b) Nemene la eloin e tro sa dreng la itre enregistrements audio ne la Tusi Hmitrötr?

⁵ Canga tro hi sa hnehengazo me xou la kola traqa la ketre mec ka ixötrekeu. Celë hi ka traqa koi Desi,b ketre trejine föe. Meci hë la ketre xa i angeic, me hmihmi angeic, me droketre i angeic hnene la COVID-19. Xou i angeic troa hane tithi angeic hnei COVID, nge tro pena a xötr kowe la thine i angeice ka qatre hë. Ketre, xou i angeic troa pë huliwa hnei COVID, nge pëhë nyine nyithupe i xen me uma. Matre, tha meköle hnyawa ha Desi e jidr. Ngo, tingetinge hmaca ju hi la hni angeic e thupen. Hnei nemen? Ke hnei angeic hna fe la hni angeic koi Iehova, me sipo Nyidrë la tingeting matre xatua angeic troa mekune la itre ewekë ka lolo. (E jë la Filipi 4:8, 9.) Ketre, hnei angeic fe hna “dreng” la Iehova a ithanata, jëne la itre enregistrements audio ne la Tusi Hmitrötr. Öni Desi: “Tingetinge la hning la eni a lapa dreng la itre ka e Tusi Hmitrötr ngöne la site së, nge kola amekunë ni ka hape, Iehova hnimi ni.”​—Sal. 94:19.

6. Nemene la thangane koi së e tro sa ini Tusi cas, me sine la itre icasikeu?

⁶ Ame la kola traqa la ketre mec ka ixötrekeu, ke kola saze la aqane mele së. Ngo, the nue pi kö la ini Tusi casi epun, memine la itre icasikeu. Hetrenyi e hnine la itre itusi së me itre video la tulu ne la itre trejin ka mele nyipici koi Iehova, ngacama angatr a cile kowe la itre jol. Tro la tulu i angatr a xatua së. (1 Pet. 5:9) Ame la easa sine la itre icasikeu, easa kapa la itre mekune ka lolo qa hnine la Tusi Hmitrötr. Ketre, itre ijine lai tro sa itö ithuecatr. (Rom. 1:11, 12) Ame la easa lapa mekune la aqane xatuane Iehova la itre trejin ka wezipo, me ka xou, me ka umë, ke kola acatrene la lapaune së. Nge xecie koi së laka, tro kö Iehova a xatua së.

7. Nemene la ini hne së hna xom qaathei Ioane aposetolo?

⁷ Tha tro kö sa thëthëhmine la itre trejin. Ame la kola traqa la ketre meci ka ixötrekeu, easa cil ananyine la itre xan, ngo memine fe la itre trejine me easë. Ame ngöne la ijine cili, ceitu easë me Ioane aposetolo. Aja i angeic troa iöhnyi me Gaio, sinee i angeic. (3 Ioane 13, 14) Atre hi Ioane ka hape, tha ijije palakö tro angeic a ithanata iqëmekë me Gaio. Ngo hnei angeic hna kuca la hnei angeic hna atrein, ene la troa cinyanyi koi Gaio. Haawe, e tha ijije palakö tro sa iöhny memine la itre trejin, isine jë troa hë angatr ngöne telefon, maine jëne visioconférence, maine tro pena a iupi fë message koi angatr. E tro palahi sa hnyingë pengön la itre trejin, tha tro kö sa seseu menu, nge tro ha tingetinge la hni së. Ngo e ka hape, tru palaha la hnei epuni hna seseu, sipo ixatua jë thene la itre qatre thup, nge kapa ju la itre ithuecatre i angatr.​—Is. 32:1, 2.

NGÖNE LA KOLA TRAQA LA ITRE HULÖ

8. Tune kaa la aqane tro la itre hulö a thapa la tingetinge së?

⁸ Hna hane fe kö lepe la nöje i epun hnene la di atraqatr, me sa, maine ketre man ka tru pena? Ngacama ekö hë traqa lai koi epun, ngo epuni palakö a hnehengazo. Nge the qaja palaha, e hetre mo i epun ka paatr, maine itre sinee i epun ka mec. Ma epuni palakö a akötr me treij, maine elëhni. Ngo the mekune pi kö hape, epuni a hnimi mo, nge pëkö lapaune i epun. Maine ka ngazo la aqane ujë i epun la kola traqa la ketre jol ka tru ke, aqane kö lai! (Iobu 1:11) Ngacama itre ijine lai ka akötr catr, ngo ijije hi tro epuni a tingeting. Troa tune kaa?

9. Nemene la aqane hnëkë së hnei Iesu matre cile kowe la itre hulö?

⁹ Pane mekune hmaca jë lo hnei Iesu hna perofetan. Itre xan a mekune ka hape, tha tro fe kö a hane ketri angatr hnei itre hulö. Ame pe easë itre keresiano, ke atre hi së laka, troa traqa la itre hulö. Eje hi, hnei Iesu lo hna qaja kowe la itretre dreng ka hape, qëmekene tro nyidrëti a traqa, troa “hetre sa atraqatr” me itre xaa hulö ju kö. (Luka 21:11) Ketre, hnei Iesu hna perofetane ka hape, troa “elë catre la iangazo,” me itre isi, me itre terorist. (Mat. 24:12) Tha hnei Iesu kö hna qaja ka hape, tro hi a ketr la itre atr ka ngazo. Waea! Tro fe lai a traqa kowe la itre hlue i Iehova ka mele nyipici. (Is. 57:1; 2 Kor. 11:25) Nyipici laka, tha tro kö Iehova a thepe së qa ngöne la itre hulö. Ngo, tro pe Nyidrëti a xatua së matre tha tro kö sa seseu menu, me hamë së la tingeting.

10. Hapeu, ka pë lapaune la atr ka canga hnëkë kowe la ketre hulö? (Ite Edomë 22:3)

¹⁰ E tro sa canga hnëkë qëmekene troa traqa la ketre hulö, tha tro kö së lai a seseu menu. Ngo hapeu, ka pë lapaune la atr ka canga hnëkë kowe la ketre hulö? Waea! Easë pe a amamane ka hape, easa lapaune kowe la atreine i Akötresie troa thupëne la mele së. Pine nemen matre easa qaja tun? Pine laka Trengewekë i Akötresie a upi së troa canga hnëkë qëmekene troa traqa la ketre hulö. (E jë la Ite Edomë 22:3.) Ketre, jëne la itre zonal, me itre icasikeu, me itre ithuemacany, organizasio i Iehova a upi së troa hnëkë qëmekene troa traqa la itre hulö.c Hapeu, ka mejiune kö së koi Iehova? Maine eje hi, enehila hi la ijin troa trongëne la itre hna amekötine celë, qëmekene troa traqa la ketre hulö.

11. Nemene la hna ini së hnei Margaret?

¹¹ Pane mekune jë la ka traqa koi Margaret. Hna traqa la ketre man ka tru, matre hna upi eahlo troa trotrije la hnalapa i eahlo. Pine laka, nyimutre la itre ka kötre mel, matre ka tiqa la gojenyi hnei loto. Tru la haj, nge miti hnyawa ha koilo. Matre ije hawa ne lapa Margaret e hnine la loto. Eloine pe, ka hnëkë hnyawa eahlo. Ame e hnine la sine watrenge i eahlo, hetre carte ka troa xatua eahlo troa xome la ketre gojeny. Nge qëmekene troa traqa la hulö, hnei Margaret hna pane nyapëne la gojeny nyine tro eahlo a xom. Matre, mele ju kö eahlo, ke hnei eahlo hna canga hnëkë.

12. Hnauëne la tro sa trongëne la itre hna amekötin?

¹² Loi e tro sa trongëne la itre hna amekötine qaathei mus tune la couvre-feu, maine ngöne la kola upi së troa trotrije la itre hnalapa së, maine itre xaa hna amekötine pena. Ame itre xan, xele kö angatr ma dreng, maine hmiitre troa dreng, ke hnime palaha angatr la itre mo i angatr. Ngo tune kaa fe easë, itre keresiano? Öni Tusi Hmitrötr: “Pine la Joxu, drengethenge ju la nöjei hna acil hnei atr: maine jë, ketre joxu ke ka draië angeic, maine itre gavena hna acil hnei joxu.” (1 Pet. 2:13, 14) Ketre, organizasio i Iehova a hamë së la itre hna amekötine matre thupëne la mele së. Aija qaja ha ka hape, troa hamën kowe la itre qatre thup la itre numero ne telefon, me itre aderesi së, matre e traqa ju la ketre hulö, tro angatr a canga hë së. Ase kö epun hamën? Tro fe easë a kapa la itre hna amekötine göi confinement, me aqane troa kötre mel, me aqane troa hetre xen, maine aqane tro sa saene matre ixatua. E tha trongëne kö së la itre hna amekötine cili, tro hë sa eatr, nge tro fe la itre qatre thup a xeni pun la hne së hna tha idrei. The thëthëhmine kö laka, hnëqa i angatre troa thupëne la mele së. (Heb. 13:17) Öni Margaret: “Mele ju kö ni, ke hnenge hna trongëne la itre hna amekötine qaathene la itre qatre thup, memine la organizasio i Iehova.”

13. Nemene la hna kuca hnene la itre ka kötre mel, matre tro palahi angatr a madrine me tingeting?

¹³ Nyimutre la itre trejin ka nuetrije la itre uma i angatr thupene la itre isi, me itre hulö. Ngo angatr palahi a catre huliwa i Iehova. Tune lo itre pane keresiano ka kötre mel pine la iaxösisi, angatr palahi a catre “tro fë trongëne la trengewekë i Akötresie.” (Itre hu. 8:4) Celë hi lai ka xatua angatr troa goeëne catrëne la Baselaia, hune la itre jole ka traqa koi angatr. Matre ka madrine me tingetinge palahi angatr.

NGÖNE LA KOLA IAXÖSISI

14. Tune kaa la aqane tro la iaxösisi a thapa la tingetinge së?

¹⁴ Ijije hi troa thapa la madrine së la kola axösisi së. Ame ngöne la itre ijine loi, easa madrine troa cainöj me sine la itre icasikeu. Ngo ame hë la kola wathebone la hmi së, easa seseu me xou ke, thatre kö së la ka troa traqa e thupen. Nge aqane kö lai! Ame pe, hnei Iesu hna hmekë së ka hape, ijije hi tro sa kei la easa qëmek kowe la iaxösisi. (Ioane 16:1, 2) Tune kaa la aqane tro palahi sa tingetinge la kola icilekeu?

15. Hnauëne laka, tha tro kö sa xou e traqa ju la iaxösisi? (Ioane 15:20; 16:33)

¹⁵ Öni Tusi Hmitrötr: “Ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr.” (2 Tim. 3:12) Jole catr koi Andrei, lo kola xötrei wathebone la hmi së ngöne la nöje i angeic. Öni angeic: ‘Alanyimu palaha la itre Temoë Iehova, matre thatreine kö troa othi eahun asë hnei polis.’ Maine ju, ke troa tingeting la hni angeic, ngo kolo jë pe ka hape, jole catre jë. Ame pena la itre xaa trejin, angatr a mejiune koi Iehova, nge tha xou i angatre kö troa othi angatr e ketre ijin. Matre, tha seseu kö angatr tui Andrei. Celë hi ka upi Andrei troa nyitipu angatr, me mejiune koi Iehova. Tingetinge hë angeic enehila. Ngacama hetre jole palahi, ngo ka madrine angeic. Hetre ini nyine tro sa xom. Eje hi, loi e tro sa lapa atre ka hape, tro fe a hane axösisi së e ketre ijin. Ngo öni Iesu, ijije hi tro sa mele nyipici.​—E jë la Ioane 15:20; 16:33.

16. E traqa ju iaxösisi, nemene la itre hna amekötine nyine tro sa trongën?

¹⁶ Ame la kola wathebone la hmi së, ke tro sa kapa la itre hna amekötine qaathene la filial, me itre qatre thup. Itre hna amekötine lai, ka troa thupëne la mele së, me xatua së tro palahi a kapa la itre itusi së, me cainöjëne la maca ka loi. Haawe, trongëne jë la itre hna amekötine cili, ngacama tha nyipi trotrohnine kö së. (Iako. 3:17) Ketre, the hamëne pi kö kowe la itre atr hne së hna thatre, la itre ithuemacany göne la itre trejin, me itre huliwa ne la ekalesia.​—Ate cai. 3:7.

17. Tune la itre aposetolo, nemene la nyine tro sa kuca?

¹⁷ Ame la ketre kepin matre Satana a icilekeu memine la itre hlue i Iehova, ke angatr a “anyipici Iesu.” (Hna ama. 12:17) The xoue Satana pi kö memine la fene i angeic. Ame la easa cainöjëne la maca ka loi ngöne la itre ijine ngazo, ke hetre tingetinge së me madrin. Ame ngöne lo hneijin ne la itre pane keresiano, hnene la itre musi angetre Iudra hna wathebone la itre aposetolo troa cainöj. Ngo hnei angatr hna drengethenge Akötresie. Hnei angatr hna catre cainöj, nge madrine catr angatr. (Itre hu. 5:27-29, 41, 42) Ngo loi e tro palahi sa hmek, e hna wathebone la hmi së. (Mat. 10:16) Maine tro sa isine troa kuca la itre huliwa i Iehova, tro hë sa kapa la tingeting, ke easa amadrinë Nyidrë, nge easë fe a amelene la itre atr.

‘TRO HË LA AKÖTRESIE NE TINGETING A CE ME SË’

18. Qaathei drei la tingetinge ka xatua së troa cile kowe la itre jol?

¹⁸ Loi e troa xecie koi së laka, ijije hi tro sa tingeting, ngacama traqa ju hë la itre jol. The thëthëhmine kö laka, tingetinge i Akötresie hmekuje hi la ka troa xatua së. Nge Nyidrëti hi la ka ijije troa hamë së la tingetinge cili. Catre jë mejiune koi Iehova, e traqa ju la ketre mec ka ixötrekeu, maine ketre hulö, maine iaxösisi pena. Qale catre jë kowe la organizasio i Nyidrë. Nge lapa mekune jë la itre drai elanyi ka mingöming. E cili, “tro hë la Akötresie ne tingeting a ce me [së].” (Fil. 4:9) Ame ngöne la tane mekun ka troa xulu, tro sa ce wang la aqane tro sa xatuane la itre trejin ka cile kowe la itre jol, matre tro fe angatr a hane kapa la tingetinge i Akötresie.