Troa Ixatua Ngöne La Itre Ijine Jol

1. Nemene la aqane sa Iehova la itre thith ne la itre hlue i Nyidrë?

IJIJE hi tro Iehova a sa la thith ne la ketre trejin jëne easë. Maine ketre qatre thup ju hë së, maine atre ixatua, maine pionie, maine ketre trejine hi, ngo tro Iehova lai a upi easë troa hamë ixatua. Ijiji epun troa ixatua, ngacama ka jeune epun, maine qatr, maine epun la ketre trejin föe maine trahmany. Ame la ketre hlue i Iehova a sipo ixatua koi Nyidrë, ke Nyidrëti a upe la itre qatre thup maine ketre trejin troa “akeukawanyi” angeic. (Kol. 4:11) Ketre madrine ka tru la troa nyihlue i Iehova me xatuane la itre trejin tune lai! Ijije hi tro sa xatuane la itre trejin ngöne la kola traqa la itre mec ka ixötrekeu, maine itre hulö, memine la iaxösisi.

TROA IXATUA LA KOLA TRAQA LA ITRE MEC KA IXÖTREKEU

2. Pine nemene matre jol troa xatua itre xan la kola traqa la itre mec ka ixötrekeu?

² Ame la kola traqa la itre mec ka ixötrekeu, ke jole koi së troa itö ixatua. Maine jë, easa pi iöhnyi memine la itre sinee së, ngo tha ijije kö tro sa itrokeu. Easë fe a ajan troa hën la itre trejin ka hetre jol göi mani matre ce xen me easë, ngo tha ijije kö. Ketre, easa pi xatua itre xan, ngo hetre ka wezipo fe ngöne la hnalapa së. Iehova a madrin la Nyidrëti a öhne laka, easa kuca la hne së hna atrein matre troa xatuane la itre trejin. (Ite edomë 3:27; 19:17) Nemene la nyine tro sa kuca?

3. Nemene la tulu hna amamane hnene la itre qatre thup ne la ekalesia i Desi? (Ieremia 23:4)

³ Nemene la nyine troa kuca hnene la itre qatre thup? Maine ketre qatre thup epun, atrepengöne hnyawa jë la itre mamoe. (E jë la Ieremia 23:4.) Öni Desi, lo ketre trejin föe hna qaja ngöne la ketre tane mekun ka hape, “Hnene palahi la itre qatre thup ne la gurup i eahun hna ce cainöj me eahun, me kuca la itre xaa huliwa ju kö.”b Celë hi ka aijijëne la itre qatre thup cili troa xatua Desi ngöne la kola mec la itre xaa atrene la fami angeic hnene la COVID-19.

4. Nemene la ka aijijëne la itre qatre thup troa xatua Desi, nge nemene la ini kowe la itre qatre thup?

⁴ Öni Desi, “Pine laka, ka imajemikeu hnyawa ni memine la itre qatre thup, matre hmaloi hi koi ni troa qaja koi angatr la aliene hning, memine la itre jol ka traqa koi ni.” Nemene la ini kowe la itre qatre thup? Loi e tro la itre trejin a epe koi epun qëmekene troa traqa la itre akötr. Nyisinee i angatre jë. Maine tha ijiji epuni kö troa wang la itre trejin hnene la mec ka ixötrekeu, thele jë la itre xaa aqane troa xatua angatr. Öni Desi, “Ame ngöne la ca drai, nyimu qatre thup la ka hë ni maine iupifë message. Hna ketri ni hnene la itre xötr hnei angatr hna iupifë koi ni, ngacama atre hi ni la itre xötre cili.”

5. Tune kaa la aqane tro la itre qatre thup a atre la hna ajan hnene la itre trejin, me xatua angatr?

⁵ Loi e tro la itre qatre thup a hnyingëne kowe la itre trejin la hnei angatr hna ajan. (Ite edomë 20:5) Loi e troa hnyingëne ka hape, hetre a i angatre kö, me drösinöe maine itre xaa ewekë ju kö? Hapeu, tro kö a pë huliwa i angatr, maine upi angatr qa ngöne la hnalapa i angatr? Angatre kö a aja ixatua matre nyialiene la itre pepa ne sipo koi mus? Hnene la itre xaa trejin hna hamë ewekë koi Desi. Ngo ame la ka xatua angeic troa cile catr qëmekene la itre jol, ke ene la ixatua qaathene la itre qatre thup. Öni angeic: “Hnene la itre qatre thup hna ce thithi me ni. Ngacama thëthëhmine hë ni la itre hnei angatr hna qaja, ngo mekune palahi ni la thangan la itre thithi angatr koi ni. Kösë Iehova a qaja koi ni ka hape, ‘Tha eö casi kö.’ ”​—Is. 41:10, 13.

6. Nemene la aqane tro la itre atrene la ekalesia a xatua itre xan? (Goeëne ju la iatr.)

⁶ Nemene la nyine tro sa kuca? Nyipici, hnëqa ne la itre qatre thup troa pane xatua itre xan. Ngo aja i Iehova tro asë hi së a ithuecatr me itö ixatua. (Gal. 6:10) Ngacama ame koi easë, co hi la hne së hna kuca kowe la ketre trejin ka wezipo, ngo ame koi angeic, ka tru catr. Ijije hi tro la ketre nekönatr a hamë tus maine desë kowe la ketre trejin. Ijije fe tro la ketre nekötrahmanyi a komisio kowe la ketre trejin föe. Ijiji epuni kö troa kuci xen kowe la ketre trejin ka wezipo me amë qëmekene la hnalapa i angeic? Nyipici, e hetre mec ka ixötrekeu, ke ekalesia asë la ka aja ixatua. Loi e troa lapa aqeanyi ngöne Zoom maine ngöne la Uma Ne Baselaia thupene la itre icasikeu. Ketre, loi e tro fe sa ithuecatr kowe la itre qatre thup. Hnene la itre xaa trejin hna cinyanyi tus matre olene koi itre qatre thup, ke tru catr la itre huliwa i angatr ngöne la itre ijine cili. Mingöminge catr la easa isine troa “ithuecatrekeu me itö ixatua”!​—1 Thes. 5:11.

TROA IXATUA LA KOLA TRAQA LA HULÖ

7. Nemene la ka traqa thupene la ketre hulö?

⁷ Ame la kola traqa la ketre hulö, kola aca tro saze la mele ne la atr. Ame itre xaa ijin, kola thapa la itre ewekë i angatr, me itre uma i angatr, me itre sinee hna hnim. Tro fe a hane traqa lai kowe la itre xaa trejin. Nemene la aqane tro sa xatua angatr?

8. Nemene la nyine troa kuca hnene la itre qatre thup me itre hene fami qëmekene troa traqa la ketre hulö?

⁸ Nemene la nyine troa kuca hnene la itre qatre thup? Itre qatre thup, xatuane jë la itre trejin troa hnëkë qëmekene troa traqa la ketre hulö. Loi e tro la itre atrene la ekalesia a atre la nyine troa kuca, me xom la numero ne la itre qatre thup. Öni Margaret, lo hna qaja ngöne la tane mekun ka ase hë ka hape: “Hnene la itre qatre thup hna hmekë eahun jëne la itre ihaji ne la ekalesia ka hape, tha fenesi palakö la itre ijine mane ka tru. Öni angatr, e qaja jë la itre mus ka hape, troa fek ke, hetre man ka tru, the cile kö, canga kötre jë!” Hna traqa ijij la ithuemacanyi cili, ke thupene la 5 lao wiik, hna traqa la ketre man ka tru. Ame ngöne la ijine hmi ne la fami, loi e tro la itre hene fami a hnëkëne la fami angatr. Maine ka hnëkë hë epun memine la fami epun, ke tha tro kö epuni a nyape hmohmo la kola traqa la ketre hulö.

9. Nemene la nyine tro la itre qatre thup a kuca qëmekene me e thupen la ketre hulö?

⁹ Maine epun la ketre trejin ka elemeken la ketre gurup ne cainöj, the treqene kö troa traqa la ketre hulö matre xom la numero ne la itre trejin ne la gurupe i epun. Nge mekune kö xom hmaca, e traqa ju angatr saze numero. Celë hi ka troa aijijë epuni troa canga hë angatr thupene la hulö matre atre la itre hnei angatr hna ajan. Thupene lai, thuemacanyine jë la kordinatör ne la lapa ne la itre qatre thup, nge tro pë hë nyidrë a qaja kowe la atre thupëne la sirkoskripsio. Ame la kola ce huliwa la itre trejin ka elemeken, ke hetre thangan ka loi kowe la itre xaa trejin. Thupene la man ka tru, hnene la atre thupëne la sirkoskripsio ne la ekalesia i Margaret hna hlë koi 36 lao hawa matre xatuane la itre qatre thup troa hëne la ala 450 lao trejin ka kötremel. (2 Kor. 11:27) Matre hna öhnyi hnalapa koi angatr asë.

10. Pine nemene matre itre qatre thup a wangatrune la hnëqa i angatr? (Ioane 21:15)

¹⁰ Hnëqa ne la itre qatre thup troa xatuane la itre trejin troa easenyi koi Iehova, me akeukawanyi angatr. (1 Pet. 5:2) Nge e traqa ju la ketre hulö, loi e tro la itre qatre thup a wang la itre trejin me atre ka hape, hetre nyine xeni angatre kö, me iheetr, me uma. Ngo thupene la hulö, loi e tro palahi angatr a akeukawan, me acatrene la imelekeu ne la itre trejin me Iehova. (E jë la Ioane 21:15.) Hnei Harold, ketre atrene la Filial, hna iöhnyi memine la itre xaa trejin hna lepe hnei hulö. Öni nyidrë, “Kaloi troa pane nue ijin koi angatr. Nyipici laka, tro kö angatr a mejë hmaca thupene la hulö. Ame pe, angatr palahi a mekun la itre sinee i angatr ka mec, me ewekë i angatr ka patr, maine lo ijin xönë hi angatr troa mec. Aqane kö lai! Ngo the mekune pi kö ka hape, pëkö lapaune i angatr.”

11. Nemene la ixatua ne la itre qatre thup kowe la itre fami?

¹¹ Loi e tro la itre qatre thup a trongëne la eamo celë, “ce treije jë memine la itre ka treij.” (Rom. 12:15) Aja ne la itre trejin hna lep hnei hulö tro sa qaja koi angatr ka hape, tru la ihnimi Iehova me itre trejin koi angatr. Loi e tro la itre qatre thup a xatuane la itre fami tro palahi a thith, me ini Tusi Hmitrötr, me sine la itre icasikeu, me cainöje trootro. Loi e tro fe la itre qatre thup a ithuecatr kowe la itre keme me thine troa xatuane la itre nekö i angatr matre troa mekun catrën la itre ewekë ka tha tro kö a patr. Itre keme me thine fe, qaja lapane jë kowe la itre nekö i epun ka hape, tha tro jë kö Iehova a nuetriji nyudren, ke Nyidrë la sipu Sinee i nyudren. Nge the cile kö troa qaja koi nyudren ka hape, nyudreni a nyiatrene la lapa ne la itre trejin e cailo fen, nge tro kö angatr a xatua nyudren.​—1 Pet. 2:17.

12. Nemene la nyine tro sa kuca matre xatuane la itre trejin hna lepe hnei hulö? (Goeëne ju la iatr.)

¹² Nemene la nyine tro sa kuca? E hna lep hnei hulö la ketre götrane ne la nöje i epun, hnyingëne jë kowe la itre qatre thup la nyine tro epuni a kuca. Maine ijiji epun, fe pi la hnalapa i epun kowe la itre trejin hna lep hnei hulö, maine kowe la itre ka saen troa ixatua. Ijiji epuni fe troa tro fë xen, me itre ewekë kowe la itre trejin ka aja ixatua. Maine hna lep la ketre nöj gaa nany, ijiji epuni fe troa hane ixatua. Troa tune kaa? Thithi jë thatraqane la itre hna lep hnei hulö. (2 Kor. 1:8-11) Nge kuië ahnahna jë thatraqane la huliwa ne cainöj e cailo fen. (2 Kor. 8:2-5) Maine ijiji epun troa ixatua ngöne la götran hna lep hnei hulö, qaja jë kowe la itre qatre thup ka hape, epuni fe a hane pi saen. Maine hna nue epun troa hane saen, troa pane hamë formasio koi epun matre hnëkë epun troa huliwa hnyawa ngöne la götran hna upi epuni kow.

TROA IXATUA LA KOLA IAXÖSISI

13. Nemene la itre jol hna cile kow hnene la itre trejin ka mele ngöne la itre nöj hna wathebone la hmi së?

¹³ Ame ngöne la itre nöje laka, hna wathebone la hmi së, ke catrehnine catre la icilekeu, nge jole catr la mel. Itre trejin a pë mani, me wezipo, nge kola mec la itre sinee i angatr. Ngo pine laka hna wathebone la hmi së, jole kowe la itre qatre thup troa wai angatr matre akeukawanyi angatr. Celë hi hna melëne hnei Andrei, lo trejine trahmany hna qaja ngöne lo ini së hnapan. Hna pë mani la ketre trejine föe ne la gurup ne cainöje i angeic. Nge hnei eahlo hna aksida memine la loto i eahlo. Matre tha ase kö eahlo huliwa, ke hnei eahlo hna pane lapa pital. Ngacama hetre wathebo lo göi Covid, ngo tha cile pi kö la itre trejine troa xatua eahlo.

14. Tune kaa la aqane tro la itre qatre thup a amamai tulu göi troa mejiune koi Iehova?

¹⁴ Nemene la nyine troa kuca hnene la itre qatre thup? Hnei Andrei hna thith me kuca asë la hnei angeic hna atrein. Tune kaa la aqane xatua angeic hnei Iehova? Hnei Iehova hna upe la itre trejin ka ijije troa ixatua. Matre hnene la itre xaa trejin hna itrothei, me ce tro memine la trejin föe troa wai droketre. Nge itre xan a li mani koi eahlo. Hnei Iehova hna uku angatr troa ixatua, nge hnei Nyidrë hna amanathithine la itre trengecatre i angatr. (Heb. 13:16) Matre, e hna nyi ifegone hi la hna atreine kuca hnene la itre qatre thup, haawe, angatr a sipone kowe la itre xaa trejin troa ixatua. (Iere. 36:5, 6) Eje hi, loi e tro sa mejiune koi Iehova. Tro Nyidrëti a huliwa së, matre tro sa xatuane la itre trejin.

15. Nemene la aqane tro sa acatrene la casi së hnine la iaxösisi?

¹⁵ Nemene la nyine tro sa kuca? Ame ngöne la itre ijine iaxösisi, ke tha easë hmaca kö a icasikeu tune enehila, ngo ngöne la itre neköi gurup. Matre ijine hi la tro sa isine troa ce mele tingeting me cas. Ame la ithupëjia me easë ke, Satana, ngo tha itre trejine kö. The goëene kö la itre tria i angatr. Ngo e hetre iwesitrë i epun, canga iloi jë. (Ite edomë 19:11; Efe. 4:26) Thele jë troa xatua angatr. (Tito 3:14) Tru la madrin hna kapa hnene la gurupe i Andrei thupene la angatr a xatuane lo trejin föe. Celë hi lai ka acatrene la casi angatr, kösë ketre fami hë angatr.​—Sal. 133:1.

16. Thenge la Kolose 4:3, 18, nemene la aqane tro sa xatuane la itre trejin hna axösisin?

¹⁶ Itre thauzane lao trejin ka catre nyihlue i Iehova, ngacama hna wathebone la hmi së ngöne la nöje i angatr. Ame la itre xan, ke hna akalabusin pine la lapaune i angatr. Loi e tro sa thithi sai angatr me itre fami angatr. Loi e tro fe sa thithi fë la itre trejin ka nue mel matre tro fë ewekë koi angatr, me isigöli angatr ngöne la itre hnakootr.c (E jë la Kolose 4:3, 18.) The mekune kö ka hape, tha ka nyipiewekë kö la itre thithi epun!​—2 Thes. 3:1, 2; 1 Tim. 2:1, 2.

17. Tro epuni a hnëkë tune kaa kowe la iaxösisi?

¹⁷ Hnëkëne jë la fami epun troa cil kowe la iaxösisi. (Itre hu. 14:22) The mekun atrune kö la itre akötre ka troa traqa koi epun elany. Ngo acatrene jë pe la imelekeu i epun me Iehova, nge xatuane jë fe la itre nekö i epun troa hane tun. Ame la epuni a seseu ke, thithi jë koi Iehova. (Sal. 62:7, 8) Ce ithanatane jë memine la fami epun la itre kepin matre loi e troa lapaune koi Iehova.d Ame hë la kola traqa la hulö, ke tro hë la itre nekö i epun a catr me tingeting, ke ase hë epun hnëkë nyudren me acatrene la mejiune i nyudren koi Iehova.

18. Nemene la manathith nyine tro sa kapa elany?

¹⁸ Tro la tingetinge i Akötresie a thupëne la hni së. (Fil. 4:6, 7) Jëne la tingetinge cili, Iehova a xatua së ngacama kola tithi së hnei mec, kola traqa la itre hulö, me axösisi së enehila. Nyidrëti a upe la itre qatre thup troa xatua së. Nge aja i Nyidrë tro sa itö ixatua. Tro la tingetinge i Nyidrë a hnëkë së troa cil kowe la itre itupath ka tru elany, tune la “akötr atraqatr.” (Mat. 24:21) Ame e cili, nyipiewekë tro sa thele tingeting, me xatua itre xan troa hane tun. Thupene lai, troa patr la itre ewekë ka akötrë së me axouenyi së. Tro hë sa kapa la nyipi tingeting ka epine palua, lo hnei Iehova hna ajan koi së ngöne la qaan.​—Is. 26:3, 4.