Ka Hnëkë Hë Eö Troa ‘Mel Ngöne La Nöj’ Ka Hnyipixe?
EASË pe hi a lapa treqene matre eatre jë lo hna thingehnaeane hnei Iesu, ka hape: “Madrine la itre ka hni ka menyik, ke ewekë i angatr elanyi la ihnadro.” (Mat. 5:5) Ame la itre hna iën, ke ewekë i angatr la ihnadro, pine laka, tro angatr elany a ce mus me Iesu e hnengödrai. (Hna ama. 5:10; 20:6) Ame la itre xaa keresiano, ke tro fe angatr a hetrenyi la ihnadro ngöne la angatr a mele palua ngöne ej, nge pëhë ngazo, nge lolo me tingeting la mel. Ngo hetre nyine tro angatr a kuca. Matre tro sa ce wange la köni ewekë nyine tro angatr a kuca: Troa musinëne la ihnadro, troa xatuane la itre hna troa amelene hmaca, nge troa ini angatr. Haawe, tro sa ce wang ka hape, ka hnëkë kö së.
KA HNËKË KÖ EÖ TROA MUSINËNE LA IHNADRO?
Ame lo Iehova a up la itre atr troa “nyialiene la ihnadro me musinën,” ke Nyidrëti hi lai a upi angatr troa aparadraison la fene hnengödrai. (Gen. 1:28) Celë hi hnëqa ne la itre atr elanyi ka troa mele pe ngöne la ihnadro. Tha kolo kö lai a hape, tro hi angatr a aparadraison la ketre neköi hnapet! Patre tro hë lo Edrena ekö. Matre, ame elanyi la angatr a lö ngöne la fene ka hnyipixe, tro angatr a nyidrawane lo itre götrane hna angazone hnene la itre atr. Tha fene huliwa kö la ka treqe së elany!
Easë hmaca mekun lo huliwa hna kuca hnene la angetre Isaraela lo angatr a bëeke qa Babulona. Traqa koi 70 lao macatre ne tha lapane la traon e Ierusalema. Ame pe, ase hë Isaia perofetane ka hape, jëne la manathithi Iehova, tro hmaca a xupe la traon. Öni Isaia: “Tro nyidëti a celohmëne la hnapapa ne eje mate tune Edena, tune la hlapa i Iehova.” (Is. 51:3) Celë hi hna kuca hnene la angetre Isaraela. Ketre tun, jëne la manathith qaathei Iehova, tro la itre atr ka troa lapane la ihnadro a musinëne ej. Loi e tro eö a amamane enehila ka hape, aja i eö fe troa hane kuca la huliwa cili elany.
Isine jë troa aporopëne la hnalapa i eö e kuhu hnin me e kuhu trön, ngacama tha celë kö hna kuca hnene la itre atr ka lapa ezi eö. Nyihnyawane jë la itre Uma Ne Baselaia me asabele. Maine ijiji eö, saene jë troa ixatua ngöne la kola lepe la nöje i eö hnei hulö. Matre, e kolo mina aja ixatua, canga tro hi la itre trejin a hë eö. Isa hnyinge jë ka hape: ‘Eni kö a inine la itre xaa aqane huliwa, matre ixatua ngöne la fene ka hnyipixe elany?’
KA HNËKË KÖ EÖ TROA XATUANE LA ITRE HNA AMELENE HMACA?
Thupene la hna amelene hmaca la nekö i Iairo jajiny, hnei Iesu hna iup troa thua i nyën. (Mar. 5:42, 43) Ka hmaloi hi la troa thuane la nekönatr ka 12 lao macatre. Ngo, pane mekune jë la huliwa elany, thupene la Iesu a eatrëne la hna thingehnaeane ka hape, “tro la itre ka meköl hnine la itre hua ne amekunën, a drenge la aqane ewekë i angeic me lö pi.” (Ioane 5:28, 29) Pëkö hna qaja hnei Tusi Hmitrötr, ngo nyipiewekë tro sa thuane la itre ka mele hmaca, me thele hnalapa i angatr, me heetrë angatr. Amamane jë enehila ka hape, eö fe a pi ixatua. Pane lapa mekune jë la itre hnying e cahu.
Nemene la ka amamane ka hape, ka hnëkë hë eö troa mele elanyi ngöne la ihnadro?
Ame lo itre ijine iwai ne la atre thupëne la sirkoskripsio, hnei eö kö hna hane hë nyidrë troa xen? Ame la kola upe la ketre trejine ne la Bethela kowe la ketre teritoar, hnei eö kö hna xatua angeic troa öhnyi hnalapa? Nge tune kaa fe kowe la atre thupëne la sirkoskripsio ka saze hnëqa? Ijije kö tro eö a hane ixatua qëmekene me thupene la asabele katru maine asabele ka ketrepengön? Nge tune kaa matre tro fe eö a hane kapa la itre trejine ka traqa qa ngöne la itre xaa nöj?
KA HNËKË KÖ EÖ TROA ININE LA ITRE HNA TROA AMELENE HMACA?
Thenge la Itre Huliwa 24:15, nyimutre catr elany la itre atr hna troa amelene hmaca. Ame la itre xan, ke thatre Iehova kö angatr qëmekene tro angatr a mec.a Matre nyipiewekë tro sa ini angatr. Celë hi huliwa nyine troa kuca hnene la itre hlue i Akötresie ka mele nyipici. (Is. 11:9) Hnei Charlotte hna cainöj e Europe, e Amérique du Sud, me Afrique. Matre ka hnëkë hnyawa angeic. Öni angeic: “Eni pe hi a lapa treqene la ijin tro ni a inine la itre atr hna amelene hmaca. Ame la eni a e la hna melëne hnene la ketre atr ka meci hë, öning: ‘Epi a atre Iehova ju hnei angeic.’ Tru la ajang troa qeje Iehova kowe la itre hna troa amelene hmaca elany.”
Tro fe sa inine la itre hlue i Iehova ka mel qëmekene lo Iesu a traqa. Pane mekune jë la etrune la madrine së elany troa ini Daniela la aqane eatr la itre hnei angeic hna perofetan. (Dan. 12:8) Nge ketre madrine ka tru fe la troa qaja koi Rutha me Naomi laka, nyidroti la lue xötrapane ne la Mesia. Ame elany, patre hë la itre akötr, nge pëhë ewekë ka troa ajolë së troa huliwa koi Iehova. Tro sa madrine elanyi troa sine la porogaram ne hamë ini ngöne la fene asë!
Nemene la aqane tro eö a amamane enehila la trenge aja i eö troa sine la huliwa cili? Isine jë troa maca ngöne la aqane hamë ini, me catre cainöj. (Mat. 24:14) Ngacama qatre ju hë eö, maine hetre ketre jole pena, catre jë cainöj, aqane tro hi eö lai a amamane ka hape, ka hnëkë hë eö troa inine la itre atr hna troa amele hmaca.
Eö kö a hane pi mel ngöne la fen ka hnyipixe? Aja i eö kö troa hane musinëne la fene elany, me xatuane la itre hna troa amelene hmaca me ini angatr? Ka nyipiewekë catr la itre hnyinge celë. Amamane jë ka hape, ka hnëkë hë eö. Enehila hi la ijine troa kuca la itre huliwa hnei eö hna troa kuca elany ngöne la fene ka hnyipixe!
a Wange ju la Ita Ne Thup ne Semitrepa 2022, ngöne lai hna hape, “Troa Eatrongëne ‘La Ka Ala Nyimu Kowe La Thina Ka Meköt’.”