Itre Hna Melën Ngöne La Hna Cainöj

Utipine Jë La Nöjei Atr

Ame lo ketre drai, hnene la ketre trejin föe qa Nouvelle-Zélande hna goeëne la video “Soucions-nous les uns des autres,” ka amamane laka, tha Iehova hmekuje kö a utipine la itre atr, ngo Nyidrëti fe a xatua angatr. (Is. 63:​7-9) Matre hnei angeic hna mekun troa trongëne la hnei angeic hna inin, me xatuane la ketre atr. Ame e thupen, hnei angeic hna tro troa komisio. Iöhnyi ju hi angeic memine la ketre föe ka sipo pies. Hnei angeic hna mekun troa itö xen koi eahlo. Ame hë la angeic a traqa fë la xen, ke hnei angeic hna cainöj kowe la föe jëne la tarak Tro Kö a Patre Elanyi La Akötr?

Treije ju hi lai föe. Öni eahlo, hna hetru eahlo ngöne la nyipici, ngo itre macatre hnei eahlo hna pane tro e kuhu trön. Ngo eahlo palahi a thithi koi Iehova troa xatua eahlo troa bëeke hmaca koi Nyidrë. Hnene la trejin föe hna hamë Tusi Hmitrötr koi eahlo, me nyiqane ini Tus.a

Tui Iehova, loi e tro sa utipine la itre xan, tune la itre sinee së me itre trejin ne la ekalesia. Ame la ketre aqane tro sa utipi angatr, ke ene la troa qeje Iehova koi angatr.