Loi Me Ngazo: Tro Së a Isa Waipengön

Ame la epuni a mekune troa ngenu ngöne la ketre götrane hnei epun hna thatre, tro epuni lai a kuci nemen?

1. 1. Epuni a xome la ketre gojeny laka, ame koi epun ka loi hi.

2. 2. Epuni a xötrethenge menune la itre atr.

3. 3. Epuni a goeë GPS, maine ketre carte, maine epuni pena ce tro memine la ketre sinee ka atre hnyawa la gojeny.

Maine tro sa xötrethenge la lue pane mekun, tro lai a trosai së menu kowe la ketre götran. Ngo e tro sa xötrethenge la hnaakönine mekun, tro së lai a traqa kowe la götran hne së hna ajane troa traqa kow.

Ame la mele së, ke ka ceitu memine la easa tro troa ihamë ngöne la ketre nöj. Nge ame la pun, ke tro sa traqa kowe la mele ka loi elany. Hapeu, tro kö së lai a traqa kowe la hne së hna ajan troa traqa kow? Tro së lai a traqa e cili, e hne së hna iëne hnyawane la ka troa troxom trongë së.

Ngacama ame la itre xaa mekun hne së hna axeciën, ke ka tha nyipiewekë kö, ngo hetre itre xan kö, ka troa saze la mele së. Ame la easa axeciëne la ketre mekune ka tru, ke ijine cili hi la troa mama koi itre xan, la aqane waipengöne së la loi me ngazo. Canga tro hi lai a hetre thangan koi së me kowe la itre sinee së. Tro lai a hetre pun ka loi maine pun ka ngazo. Hane hi la itre mekun hne së hna troa axeciën:

• Ce meköl trefën maine mele ne lue trefën

• Troa huliwa meköt, huliwa i maseta me mani

• Aqane hiane la itre nekönatr

• Aqane troa ujë kowe la itre xan

Nemene la ka amamane ka hape, ame la aqane axecië mekun i epun kowe la itre ewekë celë, ke ka tro hi lai a xatua epun me fami epun, troa hetre mele ka loi elany?

Hane hi la ketre hnying ka nyipiewekë koi së isa ala cas: Nemene la ka troa nyitrepene la itre mekun ka tru nyine tro ni a xom?

Tro la zonale celë a amamane la kepine matre, loi e tro sa xötrethenge la hna qaja hnei Tusi Hmitrötr la easa axecië mekun, me aqane tro ej a xatua së troa hetre mele ka loi elany.