Loi Me Ngazo: Aqane Axecië Mekune Itre Xan

Kola mekune hnene la ka alanyim ka hape, hetre huliwa ka loi nge hetre huliwa ka ngazo. Ame koi së asë hi, ka ngazo la ihumuth maine troa angazone la itre föe maine itre nekönatr. Nge easa wangatrune la itre atr ka meköt, ka loi thiina me ka imeku. Ngo ame göi huliwa nyipici, aqane troa hiane la itre nekönatr maine ce meköl, alanyimu la ka mekune ka hape, isa qanyi së kö iën. Ame koi angatr, ame asë hi la itre mekun hnei angatr hna axeciën, ke ka loi asë hi. Itre atr a axecië mekun thenge la aqane waiewekë i angatr maine thenge la aqane waiewekë ne la itre sinee i angatr. Hapeu ka loi kö lai?

AQANE WAIEWEKË SË

Ame itre xa ijin, easë a axecië mekun thenge la aqane waiewekë së, ene la ka loi koi së maine ka ngazo. Hane hi la huliwa ne la mekuthetheu. (Roma 2:​14, 15) Ame la nekönatr, ngacama co palakö nyën, ngo atre hë nyën laka, ewekë ka meköti la, nge ewekë ka tha meköti kö la. Nge e ka ngazo la hnei nyën hna kuca, drenge fe nyën. Itre macatre a tro, nge kolo fe a inine la mekuthetheu së hnene la fami së, me itre sinee ini së, me itre porofesör, me itre ka lapa easenyi së, me hmi së me qenenöje së. Ame la easa axecië mekun, tro la mekuthetheu së a qaja ka hape, ame la mekun hne së hna xom ke, ka ihmeku hi memine la hna ini së.

Tro la hne së hna mekune göi loi me ngazo a xatua së troa meku itre xan, me troa hetre hni ne ole, me troa meköt me iutipi. Ketre, tro lai a sewe së troa kuca la itre huliwa ka troa akötrëne la itre sinee së, me ka troa ahmahmanyi së, maine thaipië së, maine nyizö së pena.

Hapeu, tro kö së a sipu mejiun kowe la aqane waiewekë së? Ame lo Garrick a nekötrahmany, angeic a sipu mele thenge la aqane waiewekë i angeic. Ngo ame hë e thupen, angeic ha öhne ka hape, tha ka loi kö la itre mekun hnei angeic hna xom. Hnei angeic hna nyiqane kuca la itre ewekë ka sis, ene la troa kuca la nöjei pengöne aqane kuci ngazo, me xomi dorog, me iji gorok me isi.

AQANE WAIEWEKË ITRE XAN

Ketre easë fe a drenge la aqane qeje easë hnei itre xan. Aqane tro hi së lai a kepe eloin qa ngöne la hnei angatr hna melën me inamacan i angatr. Ame la easa kuca la hna qaja hnene la fami së, me itre sinee së maine itre atr ka atre easë, ke tro hë angatre lai a metrötrë së.

Hapeu, tro kö së a mejiun kowe la aqane waiewekë itre xan? Ame lo Priscila a neköjajiny, hnei angeic hna nyitipun la aqane ujë ne la itre sinee i angeic. Hnei angeic hna nyiqane ce meköle me trahmany, nge tha ka faipoipo pe. Ngacama ka loi lai koi itre xan, ngo hnei angeic hna öhne e thupen ka hape, pëkö madrine i angeic qa ngön. Öni angeic: “Pëkö eloine la troa imothenge. Eni lo a huliwa menu, matre xönë hi tro ni a eatr.”

MATRE NEMENE LA KA LOI?

Nyipici laka, ijije hi troa xatua së troa axecië mekun hnene la aqane goeëne së me aqane goeëne itre xan la loi me ngazo. (Itre Edromë 14:12) Ngo tha ijije kö lue ej troa xatua së troa axecië mekune ka loi. Pine laka, ka hetre ifegone la aqane waiewekë së, matre ame itre xaa ijin, tha canga mama kö la itre thangane ka ngazo koi së me kowe la itre xan. Ketre thatre kö së ka hape, ame la aqane waiewekë së maine aqane waiewekë ne la itre sinee së, ke ka loi jë kö. Nge ma tro fe lai a hane saze elany. Ketre ame la itre xaa thiina ka ngazo ekö, ke kolo ha kapa enehila. Nge ame la itre xaa thiina hna kapa ekö, ke xele hë la itre atr ma wange enehila.

Matre drei la ka troa qajaqaja koi së ka hape, ka loi lai nge ka ngazo la? Hetre trepene meköti kö ka loi koi së enehila, nge utihë epine palua?

Ame la eloin, hetre trepene meköt ka loi thatraqane la nöjei atr, ngacama angatr a isa mele ngöne la nöjei götran ne la fen. Tro sa ce wange ngöne la tane mekune e thupen, la ka troa xatua së troa atre la ka loi me ngazo.