Loi Me Ngazo: Isa Qanyi Së Kö Iën
Maine aja së troa madrine enehila me elany, loi e tro sa iëne hnyawa la itre trepene meköt hne së hna troa trongën. Atre hnyawa hi lai hnei Iehova, matre aja i Nyidrë tro sa trongën la itre trepene meköti Nyidrë.
Aja i Iehova tro sa tingeting me madrin.
“Dei la hna ulatine hnei Iehova, ate itö mele i ’ö, Kahmitöte i Isaraela, Ini Iehova Akötesi ’ö, ate ini ’ö troa hete thangan, ate e eö ngöne la gojenyi tro eö a trongën. Watipë hë ma dengeju hi eö la ite wathebong, mate tune la hneopegejë la tingetinge i ’ö, nge tune la ite hoke ne gejë la thina ka meköti ’ö.”—Isaia 48:17, 18.
Pine laka, Akötresie la Atre Xupi së, atre kö Nyidrë la nyine tro sa kuca matre troa hetre mele ka loi. Matre Nyidrëti a ithuecatre koi së troa trongëne la itre eamo i Nyidrë, ke nyine loi koi së. Ame la easa axecië mekun thenge la itre trepene meköti Nyidrë, tha luelue kö së laka, tro lai a hetre thangan ka loi. Eje hi, tro së lai a axecië mekun ka loi, nge celë hi ka troa hamë tingeting me madrine koi së.
Tha Iehova kö a upi së troa kuca la hne së hna thatreine.
“Ame la wathebo hnenge hna ahnithe koi eö enehila, ke, tha ka hace kö eje koi eö, nge tha ka nanyi kö ej.”—Dreuteronomi 30:11, NWT.
E tro sa trongën la itre trepene meköti Akötresie, tro së lai a amekötin la itre xaa aqane mekun me aqane ujë së. Ngo, tha tro kö Iehova lai a upi së troa kuca la hne së hna thatrein. Nyidrë la Atre Xupi së, matre atre hnyawa hi Nyidrë la hne së hna thatreine kuca. Ketre, ame la easa atre Iehova hnyawa, easa öhne laka, “tha ka hace kö” la itre hna amekötin hnei Nyidrë.—1 Ioane 5:3.
Tro kö Iehova a xatuane la itre ka metrötrëne la itre trepene meköti Nyidrë.
“Ini Iehova Akötesi ’ö, ate ea la ime maca i ’ö, ate qaja koi ’ö, ka hape, The qou kö, tro ni a xatua eö.”—Isaia 41:13.
Tro Akötresie a xatua së troa trongëne la itre trepene meköti Nyidrë, matre tha jole kö koi së troa trongën. Nyidrëti a xatua së jëne la Tusi Hmitrötr. Ej a ithuecatr me hamë mejiune koi së.
Itre milio lao atr ka öhne laka, hetre eloine la troa trongëne la itre trepene meköt qa hnine la Tusi Hmitrötr. Aja i epuni kö troa atre la itre xaa eamo qa hnine la Tusi Hmitrötr ka troa xatuan la itre atr? Pane wange ju la boroshür Gojenyi Kowe La Nyipi Mel! ngöne jw.org. Tro la boroshür cili a ithanatane la itre mekun e cahu:
Nemene La Eloine La Tusi Hmitrötr?
Tusi Hmitrötr a Thingehnaean La Mel Elany
Ijije Kö Tro Sa Lapaun Kowe La Tusi Hmitrötr?
Ame la epuni a inin la Tusi Hmitrötr, tro epuni a öhne laka, hetre ini nyine tro palahi sa kapa enehila. Eje hi, ‘ka nyipici pala hi ej, enehila nge uti hë epine palua.’ (Salamo 111:8) Tro sa hetre mele ka loi, e tro sa metrötrëne la itre trepene meköt qa hnine la Tusi Hmitrötr. Ngo tha Akötresieti kö a musinë së. (Dreuteronomi 30:19, 20; Iosua 24:15) Isa qanyi së kö iën troa trongën maine tha trongën.