Itre Hlue i Iehova a Hniin La Thiina Ka Meköt

1. Nemene la itupath ka tru hna qëmeke kow hnei Iosefa? Nge tune kaa la aqane ujë i angeic?

HNEI Iosefa nekö i Iakobo hna qëmek kowe la ketre itupath ka tru. Hnene la ketre föe hna pii angeic. Öni eahlo, “Ce meköle ju me eni.” Kolo föi Potifara, maseta i angeic. Ngo hnei Iosefa palahi hna thipëne la sipo i eahlo. Maine jë tro sa hnyinge ka hape, ‘Hnauëne laka, tha kapa kö angeic la sipo i eahlo?’ Patre kö Potifara. Nge, ketre hlu lae Iosefa, e tro angeic a thipën la sipo i eahlo, ke tro eahlo lai a akötrë angeic. Ngacama eahlo palahi a sipo, ngo tha ase pi kö Iosefa kapa. Pine nemen? Öni angeic: “Hnauëne laka, tro ni a kuca la ngazo cili koi Akötresie?”​—Gen. 39:7-12.

2. Hnei Iosefa hna atre tune kaa laka, ketre ngazo ka tru qëmeke i Akötresie la troa nyixetë?

² Hnei Iosefa hna atre tune kaa laka, ketre “ngazo ka tru” qëmeke i Akötresie la troa nyixetë? Ame lo Wathebo i Mose, hna hape, “The nyixetë kö,” ke hna hamëne pë hë kowe la angetre Isaraela, 200 lao macatre thupen. (Eso. 20:14) Ame pe, atre hnyawa hi Iosefa la mekuna i Iehova göne la kuci ngazo. Atre hi angeic laka, ame la faipoipo, ke kola iothekeune la ca trahmany me ca föe. Ketre, hnei angeice fe hna dreng la aqane thupë Sara qaqaa i angeic hnei Iehova, ngöne lo kola alua thel troa angazo eahlo. Nge e thupen, hnei Iehova fe hna ujë tun, koi Rebeka föi Isaaka. (Gen. 2:24; 12:14-20; 20:2-7; 26:6-11) Jëne la hnei Iosefa hna lapa mekun la itre ewekë ka traqa, atre hë angeic la ka loi me ngazo qëmeke i Akötresie. Pine laka, tru catre la ihnimi angeic koi Akötresie, angeic a hniin la itre trepene meköti Nyidrë me trongëne itre ej.

3. Nemene la hne së hna troa ce wang ngöne la tane mekun celë?

³ Ka hniine kö epun la meköt? Ö, ngo pine laka, itre atr ka tha pexeje kö së, loi e tro sa thupën wanga tro sa xome la aqane mekuna i fen göne la meköt. (Is. 5:20; Rom. 12:2) Celë hi matre ame ngöne la tane mekun celë, tro sa ce wange la aliene la meköt, memine la itre thangan ka loi hne së hna troa kapa, e tro sa hniine la thiina cili. Tro fe sa ce wang la köni ewekë nyine tro sa kuca, matre acatrene la ihnimi së kowe la itre trepene meköti Iehova.

ALIENE LA TROA MEKÖT

4. Nemen la aqane goeëne itre xan la meköt, ngo ka tria pe?

⁴ Ame la itre xan, angatr a mekun ka hape, ka meköt angatr, ngazo pe, itre ka pi tru, ka ixöjetrij, nge ka pi draië. Itre thiina lai, hna methinën hnei Iehova. Ame lo Iesu e celë fen, hnei nyidrëti hna ejin la itre hene ne hmi, pine angatr acile la sipu emeköti angatr. (Ate cai. 7:16; Luka 16:15) Ame la atr ka sipu jele meköti angeice kö, ke tha atr ka meköti kö lai.

5. Thenge la Tusi Hmitrötr, nemene la aliene la troa meköt? Qaja jë la aqane ujë ne la atr ka meköt qëmeke i Akötresie.

⁵ Ame la meköt, ke ketre thiina ka lolo. Tusi Hmitrötr a amaman la aliene la “meköt,” ene la troa kuca la loi qëmeke i Iehova. Ame la aliene la hnaewekë cili ngöne qene Heberu me Geres, ke kola qaja la troa mele thenge la itre trepene meköt ka draië i Iehova. Ame ekö, hnei Iehova hna amekötine kowe la angetre Isaraela ka salem troa huliwan la ketre “tulu ka  . . .  meköt.” (Deu. 25:15) Ame la keresiano ka ajane troa meköt qëmeke i Akötresie, ke angeic a huliwa nyipici ngöne la angeic a salem. Ketre ame la atr ka hniine la meköt, xele angeic ma wange la kola qanangazon la ketre atr, ngo pë pe nyipi kepin. Nge, maine angeic a ajane troa amadrinë Iehova, loi e tro angeic a wangatrun la mekuna i Nyidrë ngöne la kola axecië mekun.​—Kol. 1:10.

6. Hnauëne laka, ijije hi tro sa mejiun kowe la itre trepene meköt hna acil hnei Iehova, göi loi me ngazo? (Isaia 55:8, 9)

⁶ Öni Tusi Hmitrötr ka hape, Iehova la Qaane la meköt. Celë hi matre kola qaja ka hape, Nyidrëti “la hne ne la meköt.” (Iere. 50:7) Pine laka, Nyidrëti la Atre Xup, Nyidrëti hmekuje hi la ka ijije troa acile la itre trepene meköt göi loi me ngazo. Nge hnene laka, ka pexeje Nyidrë, matre sisitria kö la aqane goeëne Nyidrë la loi me ngazo hui easë, itre atr ka ngazo. (Ite edomë 14:12; e jë la Isaia 55:8, 9.) Ame pe hna xupi së hnaiji Akötresie, matre ijije hi tro sa mele thenge la itre trepene meköti Nyidrë. (Gen. 1:27) Nge madrine catre së troa trongëne itre ej. Tru la ihnimi së kowe la Keme së, matre easa isin troa nyitipu Nyidrë.​—Efe. 5:1.

7. Hnauëne laka, nyipiewekë tro sa mejiun kowe la itre trepene meköti Akötresie? Qaja jë la ketre ceitun.

⁷ Ame la easa trongëne la itre trepene meköti Iehova göi loi me ngazo, ke easa kapa la itre thangan ka lolo. Pine nemen? Pane mekune jë laka, itre baak a isa athip la etrune la mani thenge la sipu meköti angatr, maine pena tro la itre entreprise ne xupi uma, a isa athip la aqane troa tuluth la itre ewekë thenge la isa meköti angatr. Tro lai a hetre ethan koi së. Nge maine tro la itre droketre a isa kuci mekun, me tha trongëne la itre hna amekötin göne la aqane troa inyië, ke tro hë lai a mec la itre xaa ka wezipo. Nyipici, ame la itre hna amekötine cili, ke itre nyine thupë së. Ketre, kolo fe a thupë së hnene la itre trepene meköt hnei Akötresie hna acil.

8. Nemene la itre manathith hna troa kapa hnene la itre ka hniine la loi?

⁸ Iehova a amanathithine la itre atr ka isin troa mele thenge la itre trepene meköti Nyidrë. Öni Nyidrë: “Tro ha la ange ka meköti a hetenyi la nöj, me lapa palua kö ngön’ ej.” (Sal. 37:29) Pane mekune jë la cas, me tingeting me madrine hna troa kapa hnene la itre atr, e tro asë hi sa trongëne la itre trepene meköti Iehova. Aja i Nyidrë tro epuni a melëne la mele cili ka mingöming. Celë hi matre nyipiewekë tro së asë a hniine la meköt! Tro sa ce wang la köni ewekë nyine tro sa kuca, matre acatrene la ihnimi së kowe la thiina cili.

ACATRENE JË LA IHNIMI EPUN KOWE LA ITRE TREPENE MEKÖTI IEHOVA

9. Nemene la ka troa thue aja koi epun troa hniin la meköt?

⁹ Ame la hnapan, loi e troa hnime la Atre acile la itre trepene meköt. Maine easa ajan troa hniin la meköt, loi e tro sa acatrene la ihnimi së kowe la Atre acile la itre trepene meköt göi loi me ngazo. Tro la ihnimi së koi Iehova a thue aja koi së troa trongëne la itre trepene meköti Nyidrë. Maine ka hnimi Iehova ju hnei Adramu me Eva, ke tro hi nyidroti a drengethenge Nyidrë.​—Gen. 3:1-6, 16-19.

10. Hnei Aberahama hna atre Iehova hnyawa tune kaa?

¹⁰ Tha aja së kö troa tui Adramu me Eva. Celë hi matre, nyipiewekë tro sa xomi ijine troa atre Iehova hnyawa, me wangatrun la itre thiina i Nyidrë, me thele troa trotrohnin la mekuna i Nyidrë. Nge e cili, tro ha kökötr la ihnimi së koi Nyidrë. Tro sa ce wang la tulu i Aberahama. Tru catre la ihnimi angeic koi Iehova. Ngacama tha trotrohnine kö angeic la aqane axecië mekune i Iehova, ngo tha wesitre kö angeic koi Nyidrë. Hnei angeic pe hna thel troa atre Iehova hnyawa. Ame lo Aberahama a dreng laka, Iehova a troa apatrene Sodroma me Gomora, hnei angeic hna pane xou. Xou i angeic tro “la Atre Iameköti e cailo fen” a apatrene la itre ka meköt tune la itre ka ngazo. Ketre mekune lai ka ahleuhleunyi angeic, matre hnei angeic hna anyimua hnying koi Iehova. Nge hnei Nyidrëti hna xomi ijine troa sa koi angeic. Ame hë la pun, trotrohnine hnyawa ha Aberahama laka, atre Iehova la isa aliene hni ne la itre atr, nge Nyidrëti hi a apatrene la itre atr ka ngazo.​—Gen. 18:20-32.

11. Tune kaa la aqane amamane Aberahama la ihnim me mejiune i angeic koi Iehova?

¹¹ Hna ketri Aberahama hnene lo porotrike i angeic me Iehova göi Sodroma me Gomora. Celë hi ka acatrene la ihnim, me metrötre i angeic koi Iehova. Nge kola mama lai ngöne la itre macatre thupen, lo kola tupath la lapaune i angeic. Hnei Iehova hna sipo angeic troa huujë Isaaka, nekö hnimina i angeic. Ngo hnene laka, atrepengö i Iehova hnyawa ha hnei Aberahama, tha hnei angeic kö hna hnying. Hnei angeice pe hna kuca la hna amekötin hnei Iehova. Pane mekune jë la akötre i Aberahama ngöne la angeic a hnëkëne la itre nyine troa kuca! Hnei angeic hna lapa mekun la itre hnei angeic hna inine göi Iehova. Nge atre hi angeic laka, ka kuca palahi Nyidrëti la meköt. Öni Paulo aposetolo ka hape, xecie koi Aberahama laka, tro kö Iehova a amelene hmaca la nekö i angeic. (Heb. 11:17-19) Ketre hnei Iehova lo hna thingehnaean ka hape, troa xulu la matra i angeic qaathei Isaaka. Nge ame ngöne la ijine cili, pë palakö nekö i Isaaka. Pine laka, tru la ihnimi Aberahama koi Iehova, mejiune hi angeic laka, tro kö Nyidrëti a kuca la meköt. Ngacama tha ka hmaloi kö, ngo hnei angeic hna drengethenge Iehova.​—Gen. 22:1-12.

12. Tune kaa la aqane tro sa nyitipu Aberahama? (Salamo 73:28)

¹² Tune kaa la aqane tro sa nyitipu Aberahama? Loi e tro palahi sa isine troa atrepengöi Iehova hnyawa. Tro hë së lai a easenyi catr koi Nyidrë me hnimi Nyidrë. (E jë la Salamo 73:28.) Nge tro la mekuthetheu së a uku së troa wangatrun la mekuna i Iehova. (Heb. 5:14) Matre, ame la ketre atr a uku së troa kuca la ngazo, ke tha tro kö sa kei thenge angeic. Xele së troa akötrëne la Keme së, me troa angazone la imelekeu së me Nyidrë. Nemene la ketre aqane tro sa amaman laka, easa hniin la meköt?

13. Tune kaa la aqane tro sa trongëne la meköt? (Ite Edomë 15:9)

¹³ Ame la hnaaluen, loi e troa akökötren la ihnimi epun kowe la meköt e nöjei drai. Ame la easa akökötrene la ihnimi së kowe la itre trepene meköti Iehova, ke ceitune hi memine la easa kuci sport lapa, matre acatren la itre ijöne i easë. Tro lai a hmaloi e hne së hna kuca e nöjei drai. Ame Iehova, ke ka atreine tulu ewekë, nge tha tro kö Nyidrëti a upi së troa kuca la ketre ewekë hne së hna thatreine kuca. (Sal. 103:14) Nyidrëti a “hnime la ate trongëne la meköt.” (E jë la Ite Edomë 15:9.) Maine hetre mekun hne së hna ajan troa kuca ngöne la huliwa i Iehova, ke tro së lai a isine troa eatrën. Ceitune hi lai memine la easa trongëne la meköt. Nge tro kö Iehova a xatua së troa akökötrene la ihnimi së kowe la thiina cili.​—Sal. 84:5, 7.

14. Nemene “la imano ne la meköt,” nge pine nemen matre ka nyipiewekë ej koi së?

¹⁴ Iehova a amexeje koi së laka, tha ka hace kö la itre trepene meköti Nyidrë. (1 Ioane 5:3) Itre eje pe a thupë së. Nge ka nyipiewekë tro sa trongëne itre ej e nöjei drai. Ma mekune hi epun lo hnaheetr ne isi hna qaja hnei Paulo. (Efe. 6:14-18) Nemene la igötranen la hnaheetr ne isi ka thupën la hni ne la keresiano? Kola qaja la “imano ne la meköt,” ka nyihatrene la itre trepene meköti Iehova. Tune la imano ka thupëne la wenethëhmi, tro la itre trepene meköti Iehova a thupëne la hni së, ene la sipu pengö së. Celë hi matre, loi e tro sa thupën, tha tro kö a patr la imano qaa ngöne la hna heetr ne isi easë!​—Ite edomë 4:23.

15. Kola hapeue la troa heetrëne la imano ne la meköt?

¹⁵ Kola hapeue la troa heetrëne la imano ne la meköt? Maine easa ajane troa heetrëne ej, loi e tro sa wangatrun la itre trepene meköti Iehova, ngöne la easa axecië mekun e nöjei drai. Qëmekene tro sa ithanatane la ketre mekun, maine drei miuzik, maine goeë tele me tro koi Ëternet, maine pena e la ketre itus, loi e tro sa isa hnying ka hape: ‘Nemene jë la itre ewekë ka troa nyialiene la mekunang me hning? Ka loi kö la nyine iamadrinë celë koi Iehova? Maine kolo pena uku së troa kuca la itre ewekë ka tha meköti kö koi Iehova, tune la troa kuci ngazo, me isi, me xeni cipa, me sipu meku së hi.’ (Fil. 4:8) Maine tro palahi sa axecië mekun thenge la aja i Iehova, ke tro ha thupëne la hni së.

16-17. Thenge la tusi Isaia 48:18 hnauën laka, ijije hi tro sa trongëne la itre trepene meköti Iehova?

¹⁶ Hapeu, xou i epuni kö troa thatreine trongëne la itre trepene meköti Iehova e nöjei drai, me ngöne la itre macatre? Goeëne la ceitune hnei Iehova hna hamëne ngöne la tusi Isaia 48:18. (E jë.) Öni Nyidrë, troa “tune la ite hoke ne gejë” la thiina ka meköti epun. Pane mekune jë la epun ngöne la hnangöni, nge epuni a goeën la kola kaca la itre hoke ne gejë. Hapeu, tro kö epuni lai a xou laka, troa patre la itre hoke ne gejë? Waea! Atre hi epuni laka, itre macatre ne kola kaca la itre hoke ne gejë, nge tha tro kö lai a saze.

¹⁷ Ceitune hi la thiina ka meköti epun memine la itre hoke ne gejë! Pine nemen? Ame la epuni a axecië mekun, pane hnyinge jë ka hape, nemene la aja i Iehova? Nge e thupene lai, kuca jë. Maine jë, tha ka hmaloi kö troa kuca. Ngo, tro kö la Keme i epun ka tru ihnimin a xatua epun, me hamëne la trengecatr ka ijij matre melëne la itre trepene meköti Nyidrë e nöjei drai.​—Is. 40:29-31.

18. Pine nemene matre tha tro kö sa ameköti itre xan thenge la sipu meköti së?

¹⁸ Ame la hnaakönin, loi e troa nue Iehova troa ameköti itre xan. Maine easa ajane troa trongëne la itre trepene meköti Iehova, ke loi e tro sa hmekën matre tha tro kö sa ameköti itre xan. Ketre, tha tro kö sa mekune ka hape, ka meköti kö së hui angatr. Tha qanyi së kö troa methinën me ameköti itre xan thenge la sipu meköti së. The thëthëhmine kö së laka, Iehova hmekuje hi “la Atre Iameköti e cailo fen.” (Gen. 18:25) Tha hnei Iehova kö hna nue së troa ameköti itre xan. Nge celë fe hi mekuna i Iesu, lo nyidrëti a hape: “Ea loi ju hë hna iwaigele, matre tha tro kö Akötresieti a hane waigele nyipunie.”​—Mat. 7:1.b

19. Tune kaa la aqane amamane Iosefa la mejiun angeic kowe la aqane iameköti Iehova?

¹⁹ Tro hmaca së a wange la tulu i Iosefa, ketre atr ka meköt. Xele angeic troa ameköti itre xan, uti fe hë lo itre ka qanangazo angeic. Hnene lo itre sipu trejin me angeic hna akötrë angeic, me salemë angeic, me thoi kowe la keme i angatr ka hape, meci hë angeic. Itre macatre thupen, hnei Iosefa hna iöhnyi hmaca memine la fami angeic. Ame ngöne la ijine cili, angeic la hen ka tru ne la nöj. Maine ju, tro hi angeic a amekötin me thel troa të la ngazo hna kuca hnene la itre trejin me angeic. Nge celë hi hnei angatr hna xouen, ngacama ase hë angatr nyipi ietrane la itre ngazo i angatr. Ngo hnei Iosefa hna akeukawanyi angatr me hape: “The xou kö, Akötresieti ni matre troa ameköti epun?” (Gen. 37:18-20, 27, 28, 31-35; 50:15-21) Hnei Iosefa hna nue Iehova troa amekötine la ewekë ka traqa.

20-21. Tune kaa la aqane tro sa neën, matre tha tro kö sa pi nyi ka meköt?

²⁰ Tui Iosefa, tro kö sa nue Iehova troa ameköti itre xan. Tha tro pi kö sa pi atre la kepin, matre itre trejin a kuca la ketre ewekë. Thatreine kö së e la aliene hni ne la ketre atr. Iehova hmekuje hi la ka ‘öhne la hni angeic.’ (Ite edomë 16:2) Nyidrëti a hnim la nöjei atr, ngacama isa nöje i angatre kö me isa aqane mele i angatre kö. Nge Iehova a ithuecatre koi së troa ‘fe hnyawane la itre hni së.’ (2 Kor. 6:13) Loi e tro sa hnim la nöjei trejin me easë, me cil troa ameköti angatr.

²¹ Ame la troa tha ameköti itre xan, ke kolo fe hi lai a hape, tha tro kö sa amekötine la itre atr ka tha nyihlue i Iehova kö. (1 Tim. 2:3, 4) Tro kö epun a qaja göne la ketre atrene la fami epun, ka tha hmi kö ka hape, “Tha tro jë fe kö angeice lai a hane atre Iehova”? Waea, ka pi tru la aqane mekune cili, nge kösë epuni lai a pi nyi ka meköt. Iehova a ajane tro “la nöjei atr” a ietra. (Itre hu. 17:30) The thëthëhmine kö së laka, Iehova a goeën la itre atr ka pi nyi ka meköt ceitu me itre ka tha meköti kö.

22. Hnauëne la epuni a isine troa hniine la meköt?

²² E tro sa hniin la itre trepene meköti Iehova, ke tro së lai a madrin. Nge jëne la tulu së ka lolo, tro lai a thue aja koi itre xan troa easenyi së me Iehova. Epi tro sa “ajane catrëne la thiina ka meköt.” (Mat. 5:6) Loi e xecie koi së laka, öhne hi Iehova la itre trengecatre së, nge madrine catre Nyidrë la easa thele troa kuca la meköt. Nyipici laka, ngazo catr la fene celë. Ngo catre pi së! The thëthëhmine kö së laka, “Iehova a hnime la ange ka meköt.”​—Sal. 146:8.