Troa Xome La Ita Ne Thup Celë e 06 Diseba Me Wiike Cili
Nyima 40 Me 22
Pane Thele Jë Nyipunie La “Thina Ka Meköti Anganyidë”
“Ngo pane thelejë nyipunie la baselaia i Akötesie, me thina ka meköti anganyidë ; nge troa hamëne fe koi nyipunie la nöjei ewekë cili.”—MAT. 6:33.
1, 2. Nemene la thiina ka meköti Akötresie, nge nemene la trepene ej?
“PANE thelejë nyipunie la baselaia i Akötesie.” (Mat. 6:33) Atre hnyawa hi la Itretre Anyipicine i Iehova enehila, la eamo celë hnei Iesu Keriso hna hamëne ngöne lo Cainöje i nyidrë hune la Wetr. Ame ngöne la nöjei götrane la mele së, easa catre amamane laka, aja së tro la Baselaia cili a mus, nge easë mina fe a ajane troa mele nyipici kowe ej. Ngo nyipi ewekë fe tro sa mekune hnyawa la hnaaluene götrane ne la trenge ithanata cili, kola hape, “me thina ka meköti anganyidë.” Nemene la thiina ka meköti Akötresie, nge kola hapeue la troa thele panëne ej?
2 Pine laka Iehova la Atre Xupi Ewekë, haawe, Nyidrëti hmekuje hi la ka ijij troa acile la itre trepene meköt göi troa atrehmekune la loi me ngazo, memine fe la itre ewekë ka meköt maine ka thaa meköti pena. (Hna ama. 4:11) Ngo thaa tru menu kö maine catrehnin pena la itre wathebo ka nyitrepene la thiina ka meköti Akötresie. Ka ce tro pe la thiina ka meköti Iehova memine la itre xaa thiina ka tru thei Nyidrë, ene la ihnimi me inamacan, me men. Ka ce tro mina fe la thiina ka meköti Akötresie memine la aja me mekuana i Nyidrë. Kolo hi lai a qaja la itre ewekë hnei Nyidrëti hna thele thene la itre atr ka ajane troa nyihlue i Nyidrë.
3. (a) Kola hapeue la troa thele panëne la thiina ka meköti Akötresie? (b) Pine nemene matre loi e tro sa sajuëne la itre trepene meköti Iehova?
3 Kola hapeue la troa thele panëne la thiina ka meköti Akötresie? Kolo hi lai a qaja, ka hape, loi e tro sa kuca la aja i Akötresie matre troa amadrinë Nyidrë. Maine hetre aja the së troa thele la thiina ka meköti Nyidrë, nyipi ewekë tro sa catre mele thenge la itre trepene meköt ka sisitria me ka pexeje i Nyidrë, ngo thaa thenge kö la itre sipu mekune së. (E jë la Roma 12:2.) Eje hi, nyipi ewekë catre troa hetre aqane imelekeu ka lolo me Iehova. Thaa kolo kö a hape, tro hi a drengethenge la itre wathebo i Nyidrë, me xouene troa haji së pena hnei Nyidrë. Ohea, tro pe sa nue la ihnimi së koi Akötresie troa upi së troa amadrinë Nyidrë, hnene la hna sajuëne la itre trepene meköti Nyidrë, ngo thaa ene kö lo itre trepene meköti hne së hna ketre sipu acil. Easa wanga atrehmekune laka, celë hi la ewekë ka meköti nyine tro sa kuca, nge hna xupe ekö la atr thatraqane lai. Tui Iesu Keriso lo Joxu ne la Baselaia i Akötresie, nyipi ewekë tro sa hnine la thiina ka meköt.—Heb. 1:8, 9.
4. Pine nemene matre nyipi ewekë tro sa thele panëne la thiina ka meköti Akötresie?
4 Nemene la enyipiewekëne la troa thele panëne la thiina ka meköti Iehova? Pane mekune jë së lo pane itupathi ekö e Edena: hna nyi jëne la itupathi cili matre troa wang maine tro jë kö Adamu me Eva a kapa maine thipetrije pena la mekun, ene laka, meköti tro Iehova a eköthe thatraqai nyidro la itre trepene meköt. (Gen. 2:17; 3:5) Hnene laka hnei nyidroti hna thixötr, ene pe xulu jë hi la akötr me mec kowe la itre matra i nyidro. (Rom. 5:12) Ngo ame pe, kola qaja hnene la Wesi Ula i Akötresie, ka hape: “Ame la ate xöte thenge la meköti me ihnim, te, tro angeic’ a öhne la mel, me meköt, me atrun.” (Ite edomë 21:21) Nyipici, maine tro sa thele panëne la thiina ka meköti Akötresie, tro ha lolo hnyawa la aqane imelekeu së me Iehova, nge tro hë lai a ee së kowe la mel.—Rom. 3:23, 24.
Ethanyin La Troa Pi Nyi Ka Meköt
5. Nemene la thiina nyine tro sa neën?
5 Ame ngöne la tusi Paulo aposetolo kowe lo itre Keresiano ne Roma, hnei nyidrëti hna amamane hnyawa la ketre thiina nyine tro sa neën, wanga sewe së jë troa thele panëne hnyawa la thiina ka meköti Akötresie. Öni Paulo a qaja la angetre Iudra ka ce hmi me nyidrë, ka hape: “Ini a wai hatenyi angate laka itete cate troa huliwa koi Akötesie, ngo tha thenge la inamacan. Ke tha ’te kö angate la thina ka meköti Akötesie, ngo angat’ a thele troa acile hutine la thina ka meköti angate kö, nge tha hna denge thenge kö la thina ka meköti Akötesie.” (Rom. 10:2, 3) Paulo a qaja, ka hape, thatre pengöne hnyawa kö hnene la itre sine ce hmi me nyidrë la thiina ka meköti Akötresie, pine laka sipu thiina ka meköti angatre kö la hnei angatr hna pane thel.a
6. Nemene la aqane ujë nyine tro sa thipetrij, nge pine nemen?
6 Ame la ketre hnö koi së, tre, ene la troa pi draië ngöne la aqane huliwa së koi Akötresie, me thele troa inyitipu. Tro la aqane ujë cili a uku së troa mekun, ka hape, ka inamacane catre kö së nge ka meköti pala hi la aqane ujë së. Ngo eje hi laka, maine tro sa ujë tune lai, tro hë sa thëthëhmine la thiina ka meköti Iehova. (Gal. 6:3, 4) Loi e tro sa amamane la ihnimi së koi Iehova lo Atre upi së troa kuca la ewekë ka loi. Maine easa thele troa jele meköti së kö, thaa easë kö lai a amamane laka, easa hnimi Nyidrë.—E jë la Luka 16:15.
7. Hnei Iesu hna amamane tune kaa la engazone la troa pi nyi ka meköt?
7 Hnei Iesu hna hnehengazone lo itre atr ka “lapa qale koi angate kö, hape, angate la ite ka meköt, nge kola methinëne la ite xan.” Hnei nyidrëti hna amamane la engazone la thiina cili jëne la ceitune celë, kola hape: “Ala lue la lue ate hna tro kowe la ēnē troa thith, Faresaio la kete, nge telona la kete. Nge Faresaio a cile me thithi angeice kö tune la, ka hape, ‘Akötesieti fe, ini a ole koi cilie qa ngöne laka tha cei tunge kö memine la telona cili. Isa lu’ a tha xeni ni ngöne la ite drai ka luengemen, nge ini a hamëne la ite hnaaluepine la ite ewekëng’ asëjëihë.’ Nge telona a cile ananyin, nge tha pi galajë kö hnengödrai ’ë, ngo angeic’ a xe la imano i angeic, kola hape, ‘Akötesieti fe, fetesi nie la haetrati ka jifelö.’ ” Nge hnei Iesu hna nyipun, ka hape: “Ini a qaja koi nyipunie, hna tropi la ate celë kowe la uma i angeice nge hna jele mekötine hune la kete; ke tro ha acone la ate atrunyi angeice kö, nge tro ha atrune la ate aconyi angeice kö.”—Luka 18:9-14.
Ketre Engazone La Troa “Thina Ka Meköti Cat”
8, 9. Kola hapeue la troa “thina ka meköti cat,” nge nemene la ethanyine lai?
8 Ame la ketre thiina nyine tro sa neën, tre, eje ngöne la tusi Ate Cainöj 7:16, kola hape: “The thina ka meköti cat, nge the atrune catëne la inamacane i ’ö. Ngöne nemene tro eö a meci hnei ’ö kö?” Kola sisedrëne hnene la atre cinyihane la tusi cili, me amamane ngöne la xötre 20 la ketre kepine matre loi e troa neëne la aqane ujë cili, kola hape: “Ke pëkö ate ka meköti e celë fen, ate kuca la loi nge pë fe kö ngazo.” Ame la atr ka “thina ka meköti cat,” tre, angeice a ketre sipu acile la itre trepene meköti angeice kö, me thele troa amekötine la itre xan thenge la itre trepene meköti angeic. Nge thaa tro hë angeic a wanga atrehmekun, laka, angeic a pi tru fë la itre trepene meköti angeic me wanga acone pena la itre trepene meköti Akötresie. Nge qa ngöne lai, thaa meköti hë angeice xajawa i Akötresie.
9 Maine tro sa “thina ka meköti cat,” ijije hi tro sa luelue fë la aqane nyinyine Iehova la itre jol. Qa ngöne lai nyipi ewekë tro sa thupën, ke, ame la easa hnyingëne thele maine ka meköti kö la aqane axecië mekune i Iehova, tre, easë hi lai a nyiqaane wanga acone la itre trepene meköti Nyidrë, me wanga atrune hmaca pena la itre trepene meköti së kö. Kösë easë pena ha tupathi Iehova me ameköti Nyidrë thenge la itre sipu trepene meköti së. Ngo Iehova hmekuje hi la ka ijij troa eköthe amë la itre trepene meköt, göi troa atre la ewekë ka meköt maine ka thaa meköti pena kö, ngo thaa qanyi easë kö!—Rom. 14:10.
10. Tui Iobu, nemene la ewekë ka troa upi së troa ameköti Akötresie?
10 Ngacama thaa aja së kö troa ameköti Akötresie, ngo hnene laka thaa itre atr ka pexeje kö së, matre ijije hi tro sa xome la aqane ujë cili. Canga xome ju hi së lai thiina cili ngöne la easa öhne la ketre ewekë ka thaa meköti kö, maine ngöne la kola akötrë së pena. Hnei Iobu, ketre atr ka mele nyipici hi, hna thixötr ngöne la götrane cili. Ame ngöne lo qaan, hna pane qeje Iobu ceitu me ketre atr ka “nyipi loi thina me meköt . . . , nge ate qoue Akötesie, me iananyine memine la ngazo.” (Iobu 1:1) Ngo thupene lai, hnei Iobu hna cile kowe la itre itupathi ka nyimutre, nge eje hi laka, ame koi angeic, tre, thaa itre ewekë ka meköti kö lai. Celë hi kepin matre hnei Iobu “hna jele meköti [angeice] kö hui Akötesie.” (Iobu 32:1, 2) Ngo nyipi ewekë troa amekötine hmaca la aqane waiewekë i angeic. Haawe, thaa tro kö sa sesëkötr e itre xaa ijin, laka, easa hane jele meköti së kö. Maine troa traqa koi së la ewekë cili, nemene la ka troa xatua së troa amekötine la aqane waiewekë së?
Thatre pengöne Hnyawa Kö Së La Nöjei Ithuemacanyi Asë
11, 12. (a) Maine hetre hne së hna eetre pin, nemene la nyine tro sa mekune hnyawa? (b) Pine nemen matre ijije hi tro sa mekun, laka, thaa meköti kö la aqane ujë ne la maseta kowe lo itre ka huliwa ngöne la hnënge vine i nyidrë?
11 Ame la pane ewekë nyine tro sa mekun, tre, ene laka thatre pengöne hnyawa kö së la nöjei ithuemacanyi asë. Easa jele nyipicine lai ngöne la easa goeëne la pengö i Iobu. Thatre kö angeic laka, hna icasikeu e koho hnengödrai hnene la nöjei angela asë, itre nekö i Akötresie, nge ame e cili, hnei Satana hna jele ngazo angeic. (Iobu 1:7-12; 2:1-6) Thaa trotrohnine kö Iobu laka, Satana la qaane la itre jol ka traqa koi angeic. Thaa nyipi mama kö koi së, maine atre Satana jë kö hnei Iobu! Hna upezö Akötresie menu hnei angeic, me mekune menune ka hape, Nyidrëti hi la qaane la itre jole ka eje thei angeic. Eje hi laka, canga atreine hi së jele ngazon la ketre atr, ngo thatre pengöne hnyawa pe së la nöjei ithuemacanyi asë.
12 Drei la ketre ceitun hnei Iesu hna hamën, ka qaja la itretre huliwa ngöne la hnënge vin. (E jë la Mataio 20:8-16.) Iesu a qejepengöne la aqane nyithupe i angatr hnene la maseta i angatr laka, caasi hi la etrune la thupene hna hamëne koi angatr asë, itre ka huliwa ju hë angatr ngöne la drai ka pexej, maine pena itre ka huliwa koi caa hawa hi. Nemene fe la mekuna i nyipunie? Hapeu, ka meköti jë kö lai aqane ujë cili? Maine jë tro nyipunieti a utipine la itre ka huliwa ngöne la drai ka pexej, ke, meci hë angatre hna huliwa e kuhu gaa jö! Nge öni nyipunieti jë hi ka hape, loi e troa atrune la thupe i angatr! Ngo maine tro sa mekune tune lai, tro hë sa goeëne lai maseta ceitu me ketre atr ka pë ihnimin nge ka ngazo thiina. Ketre, maine troa eetr hnene la itre ka huliwa ngöne la drai ka pexej nge hetre hnei maseta hna troa qaja, tre, tro hë angatr a dreng akötrëne la itre trenge ewekë i nyidrë, me goeë nyidrë ceitu me ketre atr ka ithahluë. Ngo hapeu, eje kö lai?
13. Nemene la ketre aqane tro sa goeëne la ceitune i Iesu, ka qaja la itretre huliwa ngöne la hnënge vin?
13 Loi e tro hmaca së a ce goeëne lo ceitune ngo ngöne la ketre aqane waiewekë pena. Atre hnyawa hi lo maseta laka, kola isa aja mani hnene lo itretre huliwa koi nyidrë, ke nyine thupene xen kowe la itre hnepe lapa i angatr. Ame ngöne lo hneijine i Iesu, tre, hna majemine nyithupene la itre ka huliwa ngöne la nöjei drai. Celë hi kepin matre, ame la itre thupe i angatr hna kapa ngöne la nöjei drai, tre, celë hi emelen la hnepe lapa i angatre lai. Pane mekune jë së lo itre atr hnei maseta hna troa iöhnyi memin pë hë e hnaipajö, nge ka troa huliwa koi caa hawa hmekuje hi. Nyipici laka, maine hna nyi thupe i angatre ju hi thenge la etrune la itre hawa ne angatr a huliwa, tre, eje hi laka, thaa ijije kö la thupe i angatr troa ithuane la itre hnepe lapa i angatr; ngo ame pe, aja i angatre hi troa huliwa, nge hnei angatre hna itreqe hnyawa ngöne la drai ka pexej, uti hë la kola xomi angatr troa huliwa. (Mat. 20:1-7) Thaa zö i angatre kö la angatr a thaa huliwa ngöne la drai ka pexej.Thaa hna qaja kö koi së laka, hnei angatre hna ketre sipu thë matre thaa tro kö angatr a hane huliwa. Pane mekune jë nyipunie, laka, nyipunieti a troa itreqe ngöne la drai ka pexej, ke, hetrenyi la itre xan ka troa kepe thangane la hnei nyipunieti hna pane itreqe. Drei la hni ne ole i nyipunie ngöne la kola thue huliwa i nyipunie, nge drei fe la madrine i nyipunie la nyipunieti a öhne laka, hna hamëne koi nyipunie la manie ka ijij matre troa ithuane la hnepe lapa i nyipunie!
14. Nemene la ini ka sisitria hne së hna kapa qa ngöne la ceitun ka qaja la itre ka huliwa ngöne la hnënge vin?
14 Tro pena së enehila a wai pengöne la maseta. Pëkö ketre atre huliwa, laka, hna acone pëhë la thupe i angeic hnei nyidrë. Caasi hi la aqane goeëne nyidrëti la nöjei ka huliwa asë, laka, itre atr angatr ka ijij troa kepe thupen la huliwa hnei angatr hna kuca. Maine ju, ijije hi tro nyidrëti a acone la thupe i itre xan, pine laka ala nyimu catre la itre ka huliwa; ngo thaa hnei nyidrëti kö hna ujë tune lai. Ame lo itre ka huliwa, tre, isa bëeke hmaca jë hi angatre hnalapa eë, fë la thupene xeni ka ijij kowe la itre hnepe lapa i angatr. Maine atrehmekune hë së la itre hnepe ithuemacanyi celë, tro ha saze la aqane goeëne së la thiina ne la maseta. Kola mama ngöne la aqane xomi mekune nyidrë, laka, ketre atr ka ihnimi nyidrë nge thaa ka ithahluë kö nyidrë. Nemene la ini koi së? Maine tro hmekuje hi sa wanga atrune la itre xaa hnepe ithuemacany, canga tro hi sa mekune menune koilo. Kola amamane hnyawa hnene la ceitune celë la edraiëne la thiina ka meköti Akötresie, laka, thaa hna nyitrepene kö hnene la itre wathebo me itre mekuna i atr.
Ijije Hi Troa Tria Maine Troa Hetre Ifegone Pena La Aqane Waiewekë Së
15. Pine nemene matre ijije hi troa tria maine hetre ifego ne pena la aqane waiewekë së göne la thiina ka meköt?
15 Ame la hnaaluene ewekë nyine tro sa mekune hnyawa ngöne la easa cile kowe la ketre jol ka thaa meköti kö, tre, ene laka ijije hi troa tria maine troa hetre ifegone pena la aqane waiewekë së. Nyipici, itre atr ka thaa pexeje kö së, nge ka iwangatrehmekunyi atre fe, nge isa aqane mele së kö. Ketre, hna nyi ifegone hi la aqane waiewekë së hnene laka thatreine kö së wanga atrehmekune la nyipi aliene la hni ne la itre atr. Ngo ame pe Iehova me Iesu, tre, pëkö ifego koi nyidro.—Ite edomë 24:12; Mat. 9:4; Luka 5:22.
16, 17. Pine nemene matre thaa hnei Iehova kö hna trongëne la hna amekötine hnene lo wathebo i Nyidrë göne lo lue atr ka nyixetë, ene Davita me Batheseba?
16 Loi e tro sa pane ce wange la pengö i Davita ngöne lo nyidrëti a ce nyixetë me Batheseba. (2 Sam. 11:2-5) Maine hna trongëne ju lo hna qaja hnene la Wathebo i Mose, tre, tro ha ce humuthi nyidro. (Lev. 20:10; Deu. 22:22) Ngacama hnei Iehova hna ameköti nyidro, ngo thaa hnei Nyidrëti kö hna trongëne la hna qaja ngöne la trenge wathebo i Nyidrë. Hapeu, ka meköti kö la hnei Iehova hna kuca? Nyidrëti kö a ië hna hnim ngöne la aqane ujë i Nyidrë koi Davita, me ena la itre sipu trepene meköti Nyidrë? Celë hi aqane mekuna ne la itre xaa atr ka e la Tusi Hmitrötr.
17 Ngo ame lai wathebo göi nyixetë, tre, hnei Iehova hna hamëne kowe la itretre amekötin ka thaa pexeje kö, itre atr ka thatre kö la aliene hni ne la itre xaa atr. Ngacama hna nyi ifegone hi la hnei angatr hna atreine kuca, ngo ame pe, kola aijijë angatre hnene la wathebo cili troa amekötine hnyawa la ketre atr. Ame ngöne la ketre götran, atre hi Iehova la itre ewekë ka eje e kuhu itre hni së. (Gen. 18:25; 1 A. l. ite jo. 29:17) Haawe, thaa tro kö sa mekune laka tro pala hi Iehova a ujë thenge la ketre wathebo hnei Nyidrëti hna hamëne kowe la itretre amekötin ka thaa pexeje kö. Maine ka ujë ju Nyidrëti tune lai, tre, kösë Nyidrëti pena ha tune la ketre atr ka öhne hnyawa koilo, nge hna upe ielene pena hnene la ketre atr troa amë la lue thulu hna kuca hmekuje hi thatraqane la itre atr ka thaa öhne hnyawa kö koilo. Öhne hi Iehova la ewekë ka eje e kuhu hni Davita me Batheseba, laka, ka nyipi ietra nyidro. Hnei Nyidrëti hna ameköti nyidro thenge la ewekë cili, cememine la ihnim me ihnimi ipitö.
Catre Jë Së Troa Thele La Thiina Ka Meköti Iehova
18, 19. Nemene la ka troa sewe së troa ameköti Iehova thenge la itre sipu trepene meköti së?
18 Maine tro sa e la ketre edromë qa hnine la Tusi Hmitrötr e ketre ijin, maine melëne pena la ketre ewekë ka akötr, me mekun ka hape, ma ka thaa meköti kö la aqane ujë i Iehova, tre, loi e thaa tro kö sa canga thele troa ameköti Akötresie thenge la itre sipu trepene meköti së. Loi e tro pe sa wanga atrehmekune laka thatrepengöne hnyawa kö së la nöjei ithuemacanyi asë, nge ketre, ijije hi troa tria maine troa hetre ifegone pena la aqane waiewekë së. Thaa tro pi kö sa thëthëhmin laka “tha nyine aciane kö la thina ka meköti Akötesie la tenge elëhni ate.” (Iako. 1:19, 20) Haawe, thaa tro pi kö la hni së “a elëhni koi Iehova.”—Ite edomë 19:3.
19 Tui Iesu, loi e tro pala hi sa atrehmekune laka, Iehova hmekuje hi la ka ijij troa acile la itre trepene meköt, göne la itre ewekë ka meköt me ka loi. (Mar. 10:17, 18) Catre pi së troa kapa “la inamacan” me trotrohnine hnyawa la itre trepene meköti Nyidrë. (Rom. 10:2; 2 Tim. 3:7) Maine aqane ujë së hi lai nge easë mina fe a thele troa mele thenge la aja i Iehova, haawe, tro hë sa amamane laka easa thele panëne la “thina ka meköti anganyidë.”—Mat. 6:33.
[Ithueamacany]
a Kola qeje pengöne hnene la ketre atr ka inamacan, la qaane la hnëewekë hna hape, “troa acile hutin;” caasi hi la mekun memine la troa qaja, ka hape, ‘troa xupi uma.’ Eje hi laka, kösë hetre hna xup hnene la angetre Iudra, ngo thaa thatraqai Akötresieti kö; angatre pe a ketre sipu atrunyi angatre kö.
Hapeu, Mekune Pala Kö Nyipunie?
• Pine nemen matre nyipi ewekë tro sa thele la thiina ka meköti Iehova?
• Nemene la lue thiina ka ngazo nyine tro sa neën?
• Tro sa amamane tune kaa laka, easa thele panëne la thiina ka meköti Akötresie?