Nyine Troa Kuca La Easa Saze Ekalesia

Hnei Nicolas me Céline hna cile kowe la ketre jol. Hnene la Bethela ne France hna upi nyidro kowe la ketre ekalesia, nge madrine catre nyidro. Öni nyidro: “Canga patre hi la madrine i nyio ke, tru catr la hnei nyio hna mekune la itre sinee i nyio ngöne lo ekalesia hnapan. Tha ka majemi hnyawa palakö nyio memine la itre trejin ne la ekalesia i nyio ka hnyipixe.”a Qëmekene la itre jol, tune kaa la aqane tro sa öhnyi madrine ngöne la ekalesia i easë ka hnyipixe? Nemene la aqane tro la itre trejin ne la ekalesia ka hnyipixe a xatua së? Nge tune kaa la aqane tro sa itöithuecatr?

FOA LAO EAMO KA TROA XATUA SË NGÖNE LA EKALESIA KA HNYIPIXE

1. Qale jë koi Iehova. (Sal. 37:5) Ame la kola upe la föi Kazumi troa huliwa ngöne la ketre götran, hnei angeic hna saze ekalesia, nge 20 lao macatre ne lapa angeic ngöne lo ekalesia hnapan. Nemene la hnei angeic hna kuca matre troa ‘nue Iehova troa köja gojenyi angeic’? Öni angeic: “Tru catre la xoung, nge eni a seseu, ke kösë eni casi pe hi. Ngo hnenge palahi hna qaja koi Iehova la itre aliene hning, nge hnei Nyidrëti palahi hna xatua ni.”

Tune kaa la aqane tro eö a acatrene la mejiune i eö koi Iehova? Ceitune hi la lapaune së memine la ketre feja. Nyipiewekë troa fi lapane lai feja, me thuane la dro. Ketre tune mina fe, nyipiewekë troa thuane la lapaune së. Öni Nicolas, ketre trejin hna qaja ha e caha ka hape, ame la angeic a lapa mekun la tulu i Aberahama, me Iesu, me Paulo, itre trahmanyi ka nue mel troa kuca la aja i Akötresie, ke kola acatrene la mejiune i angeic koi Iehova laka, tro fe Nyidrëti a xatua angeic. Maine tro eö a kuca la ketre porogaram ne ini Tusi Hmitrötr, tro eö lai a madrin ngöne la ekalesia i eö ka hnyipixe, nge tro fe eö a hetrenyi la itre thiina ka lolo, ka troa xatuan la itre trejin ngöne la ekalesia cili.

2. The aceitunëne kö la ekalesia i eö hnapan, memine la ekalesia ka hnyipixe. (A. Cai. 7:​10) Hnei Jules, ka mel e Bénin, nge ka fek a tro Etazini hna öhne laka, isapengöne catr la aqane mel la itre atr ngöne la lue nöje cili. Öni angeic: “Ame la eni a iöhnyi memine la ketre atr, kösë tro palahi ni a qejepengöne la meleng.” Pine laka, tha majemine kö angeic kuca lai e Bénin, matre xele hë angeic ma ce tro memine la itre trejin. Ngo eloine pe, hnei angeic hna thel troa atre hnyawa la itre trejin, matre hna saze la aqane waiewekë i angeic. Öni angeic: “Ame koi ni, ngacama easë ngöne la ketre götrane la fen, ngo ceitun asë hi la itre atr. Isapengöne kö la aqane ujë me ithanata i angatr. Ngo nyipiewekë tro sa hnim la itre atr, ngacama isapengöne kö angatr me easë.” Matre the aceitunëne kö la ekalesia i eö hnapan, memine la ekalesia ka hnyipixe. Öni Anne-Lise, ketre pionie: “Ame la eni a tro, eni a ajan troa atre la itre ewekë ka hnyipixe. Tha eni kö a ajan troa ceitu memine la ekalesiang hnapan.”

Ame la ka nyipiewekë mina fe, tha tro kö la itre qatre thup a aceitunëne la ekalesia i angatr hnapan, memine la ekalesia ka hnyipixe. Tha hnene kö laka, tha ceitu kö la aqane huliwa ngöne la ketre ekalesia, matre tha loi kö la aqane huliwa cili. Loi e tro angatr a pane atre la aqane mel ne la itre atr e cili, qëmekene troa mekun troa saze la ketre ewekë. (A. Cai. 3:​1, 7b) Loi kö la troa amamai tulu, hune la troa imusinë.​—2 Kor. 1:24.

3. Catre jë huliwa ngöne la ekalesia. (Fil. 1:​27) Nyipici laka, tru la traem me trengecatr hna nu, la kola fek kowe la ketre götran. Ngo nyipiewekë troa canga sine la itre icasikeu ngöne la Uma Ne Baselaia. Nyipici laka, e tha öhnyi easë kö hnene la itre trejin ne la ekalesia ka hnyipixe, tro angatre lai a xatua së tune kaa? Hnei Lucinda, memine la lue nekö i angeic jajinyi hna fek kowe la ketre traon ka tru e Afrique du Sud. Öni angeic: “Hna ithuecatre koi ni troa huliwa catr ngöne la ekalesia, me cainöj memine la itre trejin, me hamë mekun ngöne la itre icasikeu. Nge hnenge fe hna hamën la uma i eahun, matre troa kuca la itre icasikeu ne cainöj.”

Ame la easë a ce huliwa memine la itre trejin ne la ekalesia ka hnyipixe, easë hi lai a “isigöline la lapaun göne la maca ka loi.” Hnene la itre qatre thup ne la ekalesia i Anne-Lise, hna ithuecatre koi angeic troa cainöj memine asë hi la trejin ne la ekalesia. Nemene la thangane lai? Öni angeic, “Eni a trotrohnin laka, ketre aqane tro hi ni lai a canga imajem memine la itre trejin.” Ketre, ame la eö a saen troa nyidrawan, me nyihnyawane la Uma Ne Baselaia ne la ekalesia ka hnyipixe, eö hi lai a amamane ka hape, ekalesia i eö hë. Maine tro eö a huliwa catr kowe la ekalesia, tro la itre trejin a canga majem koi eö, nge tro fe eö a madrin troa ce me angatr.

4. Nyisineene jë la itre trejin. (2 Kor. 6:​11-​13) Maine tro eö a thel troa atrepengöne hnyawa la itre xan, tro hë angatre lai a hane pi nyisinee i eö. Matre xomi ijine jë, qëmeken me e thupen la itre icasikeu, troa atrepengöne hnyawa la itre trejin. Nge the thëthëhmine kö la itre ëje i angatr. Maine tro eö atre la itre ëje i angatr, me loi thiina koi angatr, tro hë angatre lai a hane pi atre eö, nge tro hë epuni a itre sinee.

The thele kö troa saze la pengöi eö, matre troa hnimi eö hnene la itre trejin. Amamai angatre jë pe la nyipi pengöi eö. Ijije fe tro eö a tui Lucinda. Öni angeic, “Hetre sineenge hë enehila ngöne la ekalesia, ke hnenge hna majemin hë angatr kowe la hnalapang.”

“LOI E TRO NYIPUNIETI A ITÖ IKEP”

Ame itre xan, xou i angatr troa lö kowe la ketre Uma Ne Baselaia, nge pëkö atr hnei angatr hna atre. Tune kaa la aqane tro sa kapa la itre ka hnyipi traqa? Paulo aposetolo a ithuecatre koi së ka hape, “Loi e tro nyipunieti a itö ikep, tune lo aqane kepe nyipunie hnei Keriso.” (Roma 15:7) Itre qatre thup a nyitipu Keriso, la angatr a kapa la itre ka hnyipi traqa ngöne la ekalesia. (Wange ju la hna eköhagen “Nyine Troa Kuca La Eö a Saze Ekalesia.”) Ijiji easë asë hi, memine la itre nekönatr, troa nyisineene la itre ka hnyipi traqa.

Ame la easa kapa la ketre atr, ke easa hë angeic kowe la hnalapa i easë, maine xatua angeic. Hnene la ketre trejin föe hna xomi ijin troa xatuane la ketre trejin föe ka hnyipi traqa. Hnei eahlo hna trosai angeic troa vizitëne la traon, me amamai angeic la aqane troa xomi kar. Hna ketr la trejin ka hnyipi traqa hnene la hna kuca hnene la trejin föe, ke celë hi ka xatua angeic troa atre hnyawa la traon.

KETRE AQANE TROA ACATRENE LA IMELEKEU I EÖ ME IEHOVA

Ame lo xötrei, kola xou hnene la itre nekö i waco, troa sesë qa ngöne la trengene waco. Ngo ame hë la angatr a nyiqane sesë, ke pëhë ka atreine sewe angatr troa sesë draië. Ka tui easë, la easa saze ekalesia. Ame lo xötrei, xou i easë troa tro kowe la itre xaa trejin, ngo ame hë la easa nyiqane atre angatr, pëhë ka atreine sewe easë troa huliwa catr koi Iehova. Celë hi hna qaja hnei Nicolas me Céline ka hape, “Ame la easa saze ekalesia, ke ketre formasio ka lolo catr. Ame la easa inin troa ce mel memine la itre xaa atr, me inin la ketre aqane mel, ke celë hi ka xatua së troa hetrenyi la itre xaa thiina ka lolo.” Öni Jean-Charles, lo hna qaja ha e caha ka hape: “Ame la eahuni a saze ekalesia, ke celë hi ka hamë madrin kowe la lue nekö i nyio. Itre treu thupen, hna nyiqane kuci sujet hnene la nekö i nyio jajiny, nge hna nyiqane cainöj hnene la nekö i nyio trahmany.”

Ngo nemene la nyine tro eö a kuca e tha ijiji eö kö troa hane fek kowe la ketre götran ka aja ixatua? Ijiji eö hi troa xatuane la ekalesia i eö, e tro eö a xötrethenge la hna qaja ngöne la tane mekun celë. Catre jë mejiun koi Iehova, me huliwa catr kowe la ekalesia. Thele jë troa cainöj memine la itre trejin, matre troa iatre hnyawa me itre xan, me acatrene la imelekeu i eö me itre xan. Hapeu, ijiji eö kö troa kapa la itre trejin ka hnyipi traqa, maine xatuan la itre trejin ka aja ixatua? Pine laka, kola wangatrehmekunyi easë hnene la ihnim, ame la eö a kuca lai ewekë cili, ke eö hi lai a acatrene la imelekeu i eö me Iehova. (Ioa. 13:35) The thëthëhmine kö laka, “Akötresieti a madrine kowe la itre huuje cili.”​—Heb. 13:​16.

Ngacama tru la itre jol hnei angatr hna ixelë memin, ngo alanyim la itre trejin ka madrin la angatr a traqa kowe la ketre ekalesia ka hnyipixe. Matre ijiji eö fe hi! Öni Anne-Lise, “Ame la eni a saze ekalesia ke, celë hi ka aijijë ni troa atre la itre xaa trejin.” Xecie koi Kazumi laka, ame la angeic a saze ekalesia, hnei angeic hna öhne la ketre aqane xatua angeic hnei Iehova. Nge nemene fe la mekuna i Jules? Öni angeic: “Pine laka, hnenge hna nyisineene la itre xaa trejin, matre tha eni casi hë ngöne la nöje trenyiwa. Ame enehila, lolo catre la meleng ngöne la ekalesia, matre troa jol koi ni elany, troa tro hmaca qa cili.”