Aqane Tro Angatr a Hnim Me Utipin La Itre Ka Kuca La Ngazo

1. Nemene la ewekë ka traqa kowe la ketre trejin ka kuca la ngazo ka tru?

AME ngöne la tane mekun ka ase hë, hne së hna ce wange la aqane nyinyine Paulo la ketre jole ka traqa ngöne la ekalesia ne Korinito. Tha ka ietra kö la trejin ka kuca la ngazo, matre hna upi angeic qa ngöne la ekalesia. Ngo tune la hna qaja ngöne la xötr ka nyitrepene la tane mekun celë, ijije hi tro Iehova a troxom la atre ka kuca la ngazo troa ietra. (Roma 2:4) Tune kaa la aqane tro la itre qatre thup a xatua angeic troa ietra?

2-3. Nemene la nyine tro sa kuca e atre hi easë ka hape, hna kuca la ngazo hnene la ketre trejin, nge pine nemen?

² Tro la itre qatre thup a atreine hamë ixatua, e atre hi angatre la jole ka traqa. Matre, nemene la nyine tro sa kuca e atre hi easë ka hape, hnene la ketre trejin hna kuca la ngazo ka tru, nge ijije hi troa upi angeic qa ngöne la ekalesia? Loi e tro sa ithuecatre koi angeic troa thele ixatua thene la itre qatre thup.​—Isa. 1:​18; It. Hu. 20:28; 1 Pet. 5:2.

³ Tune kaa e xele kö la trejin ka kuca la ngazo ma wange la itre qatre thup? Qanyi easë wange la itre qatre thup, matre tro angatr a xatuane la trejin cili. Easë hi lai a hnimi angeic, ke atre hi easë laka, tro la itre qatre thup a xatua angeic. E tro la trejin a catre kuca la ngazo, tro angeice lai a thë la aqane imelekeu i angeic me Iehova. Ketre, tro la itre atre ne fen a qaja angazo Iehova memine la nöje i Nyidrë. Ngacama jole koi së, ngo easa wange la itre qatre thup, ke tru la ihnimi easë koi Iehova me kowe la trejin ka kuca la ngazo.​—Sal. 27:14.

AQANE TRO LA ITRE QATRE THUP A XATUANE LA TREJIN KA KUCA LA NGAZO

4. Nemene la aja ne la itre qatre thup la angatr a ithanata memine la trejin ka kuca la ngazo?

⁴ Ame la kola kuca la ngazo hnene la ketre trejin ne la ekalesia, tro la lapa ne la itre qatre thup a iëne la köni qatre thup me acile la ketre komitea matre ithanata memine lai trejin. Loi e tro la köni qatre thup a ipië me atreine tulu ewekë. Ngacama angatr a thel troa xatuane la trejin troa ietra, ngo thatreine kö angatr musinë angeic troa saze. (Dreut. 30:19) Atre hi la itre qatre thup ka hape, tha nöjei atr asë kö la ka troa ietra tui Dravita Joxu. (2 Sam. 12:13) Tro la itre xan a nuetrij la ihaji qaathei Iehova. (Gen. 4:​6-8) Ngo ame la hnëqa ne la itre qatre thup, ke troa xatuane la trejin ka kuca la ngazo troa ietra. Nemene la itre trepene meköt ka xatuane la itre qatre thup la angatr a ithanata memine la trejin ka kuca la ngazo?

5. Nemene la itre thiina nyine tro la itre qatre thup a amaman la angatr a ithanata memine la trejin ka kuca la ngazo? (2 Timoteo 2:​24-​26) (Wange ju fe la iatr.)

⁵ Itre qatre thup a goeëne la trejin ka kuca la ngazo tune la ketre neköi mamoe ka patr, nge hna hnim hnei Iehova. (Luka 15:​4, 6) Matre, ame la itre qatre thup a ithanata me angeic, tha angatre kö a catrë angeic maine ngazo thiina koi angeic. Tha angatre kö a nyimenyimëne la icasikeu me hnyinge hi matre troa atre la itre ewekë ka traqa. Loi pe tro angatr a amamane la itre thiina ka ej ngöne 2 Timoteo 2:​24-​26. (E jë.) Loi e tro la itre qatre thup a menyik me loi thiina, matre ketr la hni ne la trejin ka kuca la ngazo, nge tro angeic a saze.

6. Tune kaa la aqane tro la itre qatre thup a hnëkëne la hni angatr qëmekene troa iöhnyi memine la trejin ka kuca la ngazo? (Roma 2:4)

⁶ Itre qatre thup a hnëkëne la hni angatr. Angatr a thele troa nyitipu Iehova, la angatr a ithanata memine la trejin ka kuca la ngazo, me mekune la hna qaja hnei Paulo ka hape: ‘Ka lolo Akötresie, nyidrëti a troxomi eö kowe la ietra.’ (E jë la Roma 2:4.) Tha tro kö la itre qatre thup a thëthëhmine ka hape, angatr la itretre thupë mamoe hna up hnei Keriso. (Isa. 11:​3, 4; Mat. 18:​18-​20) Qëmekene tro la komite a iöhnyi memine la trejin ka kuca la ngazo, loi e tro angatr a ce thith me mekune la pane hnëqa i angatr, ene la troa xatua angeic troa ietra. Loi e tro angatr a ithel ngöne la Tusi Hmitrötr me ngöne la itre itusi së, me sipo Iehova troa xatua angatr troa trotrohni angeic memine la ewekë ka traqa. Loi e tro angatr a thele troa atre hnyawa la mele ne la trejin me trotrohnine la kepine matre angeic a ujë tun, memine la aliene hni angeic.​—It. Ed. 20:5.

7-8. Tune kaa la aqane tro la itre qatre thup a nyitipune la aqane xomihni Iehova, la angatr a wange la trejin ka kuca la ngazo?

⁷ Itre qatre thup a nyitipune la aqane xomihni Iehova. Angatr a lapa mekune la aqane ujë i Iehova kowe la itre hlue i Nyidrëti ekö ka kuca la ngazo. Tui Kaina. Hnei Iehova hna ithanata hnyawa koi angeic. Hnei Nyidrë hna hmekë Kaina ka hape, troa hetre pun ka ngazo koi angeic e tha saze kö angeic. Ngo e tro angeic a idrengethenge, tro Nyidrë a kepe angeic. (Gen. 4:​6, 7) Hnei Iehova mina fe hna haji Dravita jëne Nathana perofeta. Hnei Nathana hna ketr la hni Dravita jëne la ketre ceitun. (2 Sam. 12:​1-7) Nge anyimua upe Iehova la itre “perofeta” kowe la nöje Isaraela ka tha idrei. (Iere. 7:​24, 25) Tha hnei Nyidrëti kö hna treqene tro la nöj a ietra matre xatua angatr. Ngacama angatre pala hi a kuca la ngazo, ngo hnei Nyidrëti a haji angatr me xatua angatr troa ietra.

⁸ Itre qatre thup a nyitipu Iehova, la angatr a xatuane la ketre trejin ka kuca la ngazo ka tru. Tune la hna qaja ngöne 2 Timoteo 4:​2, angatr a “xomihni” la angatr a ithanata me angeic. Matre loi e tro la qatre thup a xomehnöth la aliene hni nyidrë, matre xatuane la trejin ka kuca la ngazo troa bëeke hmaca. Maine tro nyidrëti a elëhni maine icatrë me angeic, tha tro kö angeice lai a kapa la ihaji me ietra.

9-10. Tune kaa la aqane tro la itre qatre thup a xatuane la trejin ka kuca la ngazo, troa trotrohnine la ngazo hnei angeic hna kuca?

⁹ Itre qatre thup a thele la kepine matre kei pi angeic kowe la ngazo. Hapeu, hnei angeic kö hna nyiqane nanazij, ke tha ini Tusi cas hmaca kö, maine cainöj trootro? Hapeu, tha thithi lapa ha angeic, maine ka tëtë hi la itre thithi angeic? Hapeu, hnei angeice kö hna nue la itre aja ka ngazo troa cia e kuhu hni angeic? Drei la itre sinatronge i angeic? Nge nemene la itre nyine iamadrinë hnei angeic hna iën? Hnene kö la itre ewekë cili hna akeine la hni angeic? Trotrohnine kö angeic ka hape, hna akötrë Iehova hnene la aqane ujë i angeic?

¹⁰ Tro la itre qatre thup a hnyinge koi angeic, matre xatua angeic troa öhne la itre ewekë ka thë la aqane imelekeu i angeic me Iehova, me troxomi angeic kowe la ngazo. Loi e tro angatr a ithanata amenyiken, nge tha tro kö a lö hnine la mele i angeic e tha ka ihmeku kö memine la ngazo hna kuca. (It. Ed. 20:5) Ketre, ijije hi tro angatr a xome la itre ceitun, matre xatua angeic troa trotrohnine la ngazo hnei angeic hna kuca, tune la aqane kuca i Nathana koi Dravita. Maine jë, ame ngöne la pane viziti angatr me angeic, tro angeic a hace fë la ngazo hnei angeic hna kuca me ietra.

11. Tune kaa la aqane ujë Iesu kowe la itre ka kuca la ngazo?

¹¹ Itre qatre thup a isine troa nyitipu Iesu. Ame lo kola amele Iesu hmaca, hnei nyidrëti hna ithanata koi Saulo atre Taraso me hnying ka hape: “Saulo, Saulo, hnauëne la eö a akötrë ni?” Hnei Iesu hna xatua angeic troa trotrohnine la ngazo hnei angeic hna kuca. (It. Hu. 9:​3-6) Nge öni Iesu kowe lo “föe Iezebela” ka hape, “Ase hë ni nue ijine koi angeic troa ietra.”​—Hna Am. 2:​20, 21.

12-13. Tune kaa la aqane tro la itre qatre thup a nue ijine kowe la trejin ka kuca la ngazo troa ietra? (Wange ju fe la iatr.)

¹² Tui Iesu, tha tro kö la itre qatre thup a canga qaja ka hape, tha tro kö la trejin ka kuca la ngazo a ietra. Nyipici laka ame itre xan, angatr a ietra ngöne la kola pane wai angatr. Ngo ame kö itre xan, loi e troa nue ijine koi angatr. Celë hi matre, tro la itre qatre thup a anyimua iöhny memine la trejin ka kuca la ngazo. Maine jë, thupene la pane iwai angeic memine la itre qatre thup, tro angeic a nyiqane lapa mekun la hnei angatr hna qaja. Nge tro angeic a ipië me sipo Iehova troa nue la ngazo i angeic. (Sal. 32:5; 38:18) Matre, ame hë la angeic a wange hmaca la itre qatre thup, saze hë la aqane waiewekë i angeic.

¹³ Loi e tro la itre qatre thup a utipin me thiina ka menyik, matre xatuane la trejin ka kuca la ngazo troa ietra. Angatr a mejiun me thith koi Iehova, matre tro Nyidrëti a amanathithine la itre trengecatre i angatr, nge tro la trejin a bëeke hmaca me ietra.​—2 Tim. 2:​25, 26.

14. Hnei drei matre bëeke jë la trejin ka kuca la ngazo, nge pine nemen?

¹⁴ Ketre madrine ka tru la kola ietra la atr ka kuca la ngazo! (Luka 15:​7, 10) Hnei drei matre bëeke jë angeic? Hnei itre qatre thup? Mekune jë lo hnei Paulo hna qaja göne la itre atr ka kuca la ngazo. Öni angeic: “Maine jë, tro Akötresie a aijijë angatre troa ietra.” (2 Tim. 2:​25) Haawe, Iehova ngo tha ketre atre kö la ka xatuane la keresiano troa saze la aqane waiewekë me aqane ujë i angeic. Paulo fe a qaja la itre thangane ka loi, la angeic a ietra. Eje hi, angeic a trotrohnine hnyawa la nyipici, me hetrenyi hmaca la aqane waiewekë Iehova, me utretr qa ngöne la hnö i Satana.

15. Tune kaa la aqane tro pala hi la itre qatre thup a xatuane la trejin ka ietra?

¹⁵ Ame la kola ietra la ketre trejin, loi e tro la komite ne qatre thup a thupëne matre tro pala hi la itre qatre thup vizitë angeic. Celë hi ka troa xatua angeic troa cile catre qëmekene la itre hnö i Satana me amekötine la itre jë i angeic. (Heb. 12:​12, 13) Eje hi laka, tha tro kö la itre qatre thup a qaja koi itre xan la itre ewekë ka ngazo hna kuca. Ngo, nemen la nyine troa ithuemacanyine la ekalesia?

“HAJI ANGATRE JË QËMEKEI NÖJEI ATR ASË”

16. Thenge la 1 Timoteo 5:​20, drei “la nöjei atr asë” hna qaja hnei Paulo?

¹⁶ E jë la 1 Timoteo 5:​20. Hnei Paulo hna cinyanyine lai koi Timoteo ketre qatre thup, matre troa qaja la aqane ujë kowe “la itre ka majemine kuca la ngazo.” Hapeu, Paulo kö a qaja ka hape, troa hajine la atre ka kuca la ngazo qëmekene la ekalesia? Waea. Paulo pe a qaja la itre xaa trejin ka atre la ngazo hna kuca. Maine jë hnei angatr hna öhn, maine hna qaja koi angatr hnene la trejin ka kuca la ngazo. Tro la itre qatre thup a qaja acony kowe la itre trejin cili ka hape, ase hë amekötine la jol me hajine la trejin.

17. Maine atre hë la ekalesia la ngazo hna kuca maine troa atre e thupen, nemene la ithuemacany hna hamën nge pine nemen?

¹⁷ Ame itre xaa ijin, atre hë la ekalesia la ngazo hna kuca maine tro pena a atre thupen. Ame “la nöjei atr asë” e celë ke, kola qaja la ekalesia asë. Matre ame e cili, tro la ketre qatre thup a thuemacanyine la ekalesia ka hape, ase hë hajine la trejin. Pine nemen? Öni Paulo: “Tro fe a hmekëne la itre ka dreng” matre tro angatr a hane xomi ini, nge tha tro kö a kei kowe la ngazo.

18. Tune kaa la aqane tro la itre qatre thup a nyinyine la jol, e ketre nekönatr ka bapataiso la ka kuca la ngazo? (Wange ju fe la iatr.)

¹⁸ Nge tune kaa e tro la ketre nekönatr ka bapataiso, nge ka tha 18 ans pala kö, a kuca la ketre ngazo ka tru? Tro la lapa ne la itre qatre thup a upe la lue qatre thup matre troa wange la nekönatr memine la kem me thine i nyën ka hmi.b Tro la lue qatre thup a atre la hna kuca hnene la kem me thine matre xatuane la nekö i nyidro troa ietra. Maine tro la nekönatr a saze la aqane ujë me aqane waiewekë i nyën, tro la lue qatre thup a nue kowe la kem me thin troa xatua nyën. Nge tha nyipiewekë kö troa acile la ketre komite. Eje hi, hnëqa i kem me thin qaathei Akötresie la troa hajin la itre nekö i nyidro. (Dreut. 6:​6, 7; It. Ed. 6:​20; 22:6; Efe. 6:​2-4) E thupen, tro la itre qatre thup a ithanata lapa me kem me thin, matre wange ka hape, nyidro kö a xatuane hnyawane la nekönatr. Ngo, tune kaa e tro la nekönatr a kuca catrëne la ngazo nge xele kö nyiën ma ietra? Ame cili, tro la ketre komite ne qatre thup a wai nyën memine la kem me thine i nyën ka hmi.

“KA NYIPI MENYIK LA IHNIMI IEHOVA NGE KA IUTIPI”

19. Tune kaa la aqane nyitipu Iehova hnene la itre qatre thup la angatr a ithanata memine la trejin ka kuca la ngazo?

¹⁹ Trotrohnine hi la itre qatre thup ka sine la ketre komite ne qatre thup laka, Iehova la ka upi angatr troa thupëne la ehmitrötrene la ekalesia. (1 Kor. 5:7) Ngo angatre fe a thel matre tro la trejin ka kuca la ngazo a ietra. Matre, ame koi angatr, ijije pala hi tro la atre cili a saze. Pine nemen? Pine laka, aja i angatr troa nyitipu Iehova, “ka nyipi menyike la ihnimi i [Nyidrë] nge ka iutipi.” (Iako. 5:​11) Celë fe hi ka mama thei Ioane aposetolo. Öni nyidrë: “Ha nekönge fe, eni a cinyihane la itre ewekë cili koi nyipunie, matre tha tro kö nyipunieti a kuca la ngazo. Ngo e traqa ju ketre kuca la ngazo, hetre ixatua thene la Kem. Iesu Keriso la ixatua, ene lo atre ka meköt.”​—1 Ioa. 2:1.

20. Nemene la hne së hna troa ce wang ngöne la tane mekun thupen?

²⁰ Ngazo pe, xele kö la itre xaa keresiano ma ietra. Matre loi e troa upi angatr qa ngöne la ekalesia. Nemene la nyine tro la itre qatre thup a kuca e cili? Tro sa ce wange lai ngöne la tane mekun tixenuë.