‘Loi e Troa Hëne La Itre Qatre Thup’

1. Tune kaa la aqane amamane Iehova laka, ka sisitria koi Nyidrë la itre neköi mamoe?

KA SISITRIA koi Iehova la itre mamoe i Nyidrë. Hnei Nyidrëti hna itö nyudren memine la madra i Iesu, me ahnithi nyudren kowe la itre qatre thup. (It. Hu. 20:28) Aja i Akötresie tro la itre qatre thup a loi thiina koi nyudren. Celë hi matre, angatr a xötrethenge la itre hna amekötine hnei Iesu. Angatr a akeukawane me thupëne la itre neköi mamoe.​—Isa. 32:​1, 2.

2. Drei la hnei Iehova hna wangatrun? (Ezekiela 34:​15, 16)

² Iehova a hnim la itre neköi mamoe i Nyidrë, ngo Nyidrëti a wangatrune la itre ka akötr. Jëne la itre qatre thup, Nyidrëti a xatuane la itre ka wezipo. (E jë la Ezekiela 34:​15, 16.) Ngo e drenge hi së ka hape, easa aja ixatua, ke aja i Nyidrë tro sa wai angatr. Madrine Nyidrë la easa thele ixatua jëne la thith, ngo loi e tro mina fe sa thele ixatua thene la “itre atre thup, me itretre hamë ini” ngöne la ekalesia.​—Efe. 4:​11, 12.

3. Nemene la hne së hna troa ce wang ngöne la tane mekune celë, nge nemene la thangane koi së?

³ Ame ngöne la tane mekune celë, tro sa ce wang la ketre ixatua hnei Iehova hna hnëkëne koi së, ene la itre qatre thup. Tro sa ce ithanatane la itre hnyinge celë: Eu la tro sa wang la itre qatre thup? Hnauëne la tro sa wai angatr? Nge angatr a xatua së tune kaa? Ngacama tha easë kö a cil kowe la ketre jol ka tru enehila, ngo tro la itre hnyinge celë a akökötrene la hni ne ole së kowe la ixatua hnei Iehova hna hamë së. Nge e traqa ju la jol koi së elany, ke atre hë së la nyine troa kuca.

EU LA TRO SA “HËNE LA ITRE QATRE THUP”?

4. Nemene la ka amamane laka, Iakobo 5:​14-​16, 19, 20 a qaja la ketre trejin ka thë la imelekeu i angeic me Iehova? (Goeëne ju fe la itre foto.)

⁴ Iakobo a qejepengöne la aqane xatua së hnei Iehova jëne la itre qatre thup ka hape: “Hetre ka wezipo kö thei nyipunie? Loi e tro angeice a hëne la itre qatre thup ne la ekalesia.” (E jë la Iakobo 5:​14-​16, 19, 20.) Ame e celë, Iakobo a qaja la ketre atr ka wezipo, maine ka nanyi qaathei Iehova. Matre kola upi angeic troa wang la itre qatre thup. Nge tro hmaca angeic a egöcatr thupene la hna nue la itre ngazo i angeic. Ceitune hi memine la atr ka wezipo. Loi e tro angeic a wai droketre, me qaja hnyawane la meci angeic, me trongëne la itre hna amekötine hnei droketre. Ketre tun, loi e tro la ketre trejin ka thë la imelekeu i angeic me Iehova a wang la itre qatre thup me qaja asë la jole i angeic, me trongëne la itre eamo i Tusi Hmitrötr hnei angatr hna hamën.

5. Nemene la ka troa amamane koi së laka, easa nyiqane iananyi me Iehova?

⁵ Ame ngöne la tusi Iakobo mekene 5, angeic a ithuecatre koi së troa wang la itre qatre thup e öhne hi së ka hape, easa nyiqane iananyi me Iehova. Nyipiewekë tro sa sipo ixatua koi angatr qëmekene tro sa kei kowe la ngazo, me thë la imelekeu së me Nyidrë! Tusi Hmitrötr a hmekë së ka hape, loi e tro sa thupëne wanga tro sa mekun laka, ka loi hi la imelekeu së me Iehova, ngo nanyi hë së qaathei Nyidrë. (Iako. 1:​22) Eje hi la ka traqa kowe la itre keresiano ne Saradi. Matre hnei Iesu hna qaja amamane la ngazo i angatr. (Hna Am. 3:​1, 2) Maine aja i easë troa waipengöne la imelekeu së me Iehova, loi e tro sa mekune hmaca lo ijine easa xötrei atre Nyidrë. (Hna Am. 2:​4, 5) Isa hnyinge jë së ka hape: ‘Ka e Tusi Hmitrötr kö ni tun ekö, me lapa mekun? Tune kaa koi itre icasikeu? Eni kö a hnëkën hnyawan me sine lapan? Eni pala kö a catre cainöj? Tune kaa kowe la itre nyine iamadrinë me itre mo ne fen? Itre eje kö ngöne la sipu göhnene ej?’ Maine tro sa sa ka hape, waea ngöne la ketre hnying e caha, ke kolo hi lai a amamane ka hape, easa nyiqane iananyi me Iehova. Nge ijije hi troa tru catre hmaca kö la jol e pëkö hne së hna kuca. Maine thatreine kö së elë hune la jol, maine ase hë së ena la ketre wathebo i Iehova, loi e tro sa canga wang la itre qatre thup.

6. Nemene la nyine troa kuca hnene la atr ka kuca la ketre ngazo ka tru?

⁶ Ijije hi troa upe qa ngöne la ekalesia la ketre trejin ka kuca la ketre ngazo ka tru, nge tha ka ietra kö. Matre nyipiewekë tro angeic a wang la ketre qatre thup. (1 Kor. 5:​11-​13) Nyipiewekë troa xatua angeic matre tro hmaca angeic a imelekeu me Iehova. Nge tro Iehova a köletrij la itre ngazo i angeic jëne la thupene mel, e tro angeic a kuca “la itre huliwa ne ietra.” (It. Hu. 26:20) Ame la ketre huliwa ne ietra, ke ene la troa ithanata memine la itre qatre thup.

7. Drei la itre xaa trejin ka aja ixatua qaathene la itre qatre thup?

⁷ Tha itre qatre thup hmekuje kö a xatuane la itre ka kei kowe la ngazo. Angatre fe a xatuane la itre trejin ka isi memine la itre aja ka ngazo. (It. Hu. 20:35) Maine jë, eö a isi memine la ketre aja ka ngazo, nge drenge hi eö ka hape, easenyi hë tro eö a kei. Nge ma jole catr, ke hnei eö ekö hna xomi dorog, maine goeë pornographie, maine kuca la itre huliwa ka sis. Ngo tha eö casi kö. Ijiji eö hi troa ithanata memine la ketre qatre thup. Tro nyidrëti a drei eö hnyawa, me hamë eamo koi eö. Tro fe nyidrëti a amekunë eö laka, Iehova a madrin la eö a cile catr qëmekene la itre aja ka ngazo. (A. Cai. 4:​12) Nge maine eö a dekurag, tro la itre qatre thup a ithuecatre koi eö ke, eö hi lai a amamane ka hape, ka nyipiewekë koi eö la imelekeu i eö me Iehova, nge eö la ketre atr ka ipië.​—1 Kor. 10:12.

8. Hapeu, tro kö sa wang la itre qatre thup kowe la nöjei tria hne së hna kuca? Qejepengöne jë.

⁸ Tha nyipiewekë kö troa wang la itre qatre thup kowe la nöjei tria hne së hna kuca. Pane mekune jë laka, eö a qaja la ketre ewekë ka akötrëne la ketre trejin, maine eö a elëhni. Hapeu, tro kö eö a wang la itre qatre thup? Waea, trongëne jë pe la eamo i Iesu, nge iloi jë memine la trejin. (Mat. 5:​23, 24) Loi e tro fe eö a ithel göne la itre thiina i Akötresie, tune la menyik, me atreine itreqe, me xomihni. Tro lai a xatua eö e traqa hmaca ju la ketre jol elany. Ngo e jole pala ha, ke ijije hi tro eö a thele ixatua thene la ketre qatre thup. Ame ngöne la tusi Filipi, hnei Paulo aposetolo hna up la ketre trejin trahmanyi troa xatua Euodia me Sunetuke troa iloi. Ijije hi tro la ketre qatre thup ne la ekalesia a hane ujë tun.​—Fil. 4:​2, 3.

HNAUËNE LA TRO SA “HËNE LA ITRE QATRE THUP”?

9. Pine nemene matre tha tro kö sa hmahma troa sipo ixatua kowe la itre qatre thup? (Itre Edromë 28:13)

⁹ Ame la easa kei kowe la ngazo, maine drenge hi së ka hape, easë hë a troa kei, nyipiewekë tro sa hetre lapaune me catr, matre sipo ixatua. Ngo tha tro kö sa hmahma troa sipo ixatua kowe la itre qatre thup. Pine nemen? Pine laka, easë hi lai a amamane la mejiune së koi Iehova, me kowe la ixatua hnei Nyidrëti hna hnëkën koi së. Nge maine easa sipo ixatua kowe la itre qatre thup, ke easë hë a troa kei, easë hi lai a amamane ka hape, easa aja ixatua qaathei Iehova. (Sal. 94:18) Maine hne së hna kei kowe la ngazo, me ietra, me saze la aqane ujë së, ke tro kö Iehova a nue la ngazo së.​—E jë la Itre Edromë 28:13.

10. Nemene la ka troa traqa e tro sa juetrëne la itre ngazo së?

¹⁰ Tro sa kapa la itre manathith e tro sa thele ixatua thene la itre qatre thup. Ngo e tro sa thel troa juetrëne la itre ngazo së, tro lai a hetre ethan kowe la mele së. Ame lo Dravita joxu a thel troa juetrëne la itre ngazo i nyidrë, nyidrëti a wezipo me hleuhleu, ke ka ngazo la imelekeu i nyidrë me Iehova. (Sal. 32:​3-5) Ka tune la ketre mec, maine ketre eatr, e tro sa nu, ke tro lai a ngazo catr. Atre hnyawa hi Iehova lai, matre Nyidrëti a hë së ka hape, “Trohemi matre tro sa iloi.” Troa lolo la mele së, e tro sa kapa la ixatua hnei Iehova hna hnëkën koi së.​—Isa. 1:​5, 6, 18.

11. Nemene la thangane koi itre xan e tro sa juetrëne la ketre ngazo ka tru?

¹¹ Maine hne së hna kei kowe la ngazo, me juetrëne ej, ke tro lai a hetre thangane ka ngazo koi itre xan. Eje hi, tro lai a sawa la huliwa ne la uati hmitrötr ngöne la ekalesia, me thë la tingeting thene la itre trejin. (Efe. 4:​30) Ketre, maine atre hi easë ka hape, hnene la ketre trejin hna kuca la ketre ngazo ka tru, loi e tro sa upi angeic troa wang la itre qatre thup.a Maine tro sa juetrëne la ngazo i angeic, easë hi lai a nyixöle i angeic. (Lev. 5:1) Ngo e tha qaja pala ha angeic, tro la ihnimi së koi Iehova a upi së troa wang la itre qatre thup. Ame la easa ujë tun, ke easë hi lai a thupëne matre tha tro kö a adrone la ekalesia, me xatuane lai trejin troa imelekeu hmaca me Iehova.

ITRE QATRE THUP A XATUA SË TUNE KAA?

12. Tune kaa la aqane xatuane la itre qatre thup la itre trejin ka iananyi me Iehova?

¹² Hnëqa ne la itre qatre thup troa xatuane la itre trejin ka iananyi me Iehova. (1 Thes. 5:​14) Maine hnei eö hna kei kowe la ngazo, tro angatre lai a hnyinge koi eö matre mama pi la itre mekuna i eö me itre aliene hni i eö. (It. Ed. 20:5) Maine jë, jole koi eö troa ithanatane lai, hnene la aqane mele i eö, maine pengöi eö, maine eö pena a hmahma. Ngo the cile kö troa fe la hni eö koi angatr! The xou kö troa “ewekë menu.” (Iobu 6:3) Tha tro kö la itre qatre thup a mekuhni eö. Tro pe angatre lai a drei eö hnyawa me trotrohnine la ewekë ka traqa koi eö, qëmekene troa hamë eamo. (It. Ed. 18:13) Atre hi angatr laka, loi e troa xomi ijine troa thupëne la itre neköi mamoe i Iehova. Nge loi e troa anyimua ithanatane la jol matre nyinyine ej.

13. Nemene la thangane la itre thith me itre eamo qaathene la itre qatre thup? (Goeëne ju fe la itre foto.)

¹³ Ketre, tha tro kö la itre qatre thup a ahacenyi eö. Tro pe angatr a thithi sai eö. Tro eö lai a sesëkötr la eö a dreng laka, “ka hetre thangane catre” la itre thithi angatr. Nge tro fe angatr a “nei oel hui [eö] ngöne la ëje i Iehova.” (Iako. 5:​14-​16) Ame la “oel” cili, ke kolo nyipici qa hnine la Tusi Hmitrötr. Jëne la itre xötr hna iëne hnyawan, tro la itre qatre thup a akeukawanyi eö me xatua eö troa imelekeu hmaca me Iehova. (Isa. 57:18) Tro la itre eamo qa hnine la Tusi Hmitrötr a xatua eö troa catr kuca la loi. Jëne la itre qatre thup, tro eö a drei Iehova a hape: “Hane hi la gojeny, trongëne jë.”​—Isa. 30:21.

14. Thenge la Galatia 6:​1, itre qatre thup a xatuane tune kaa la itre trejin ka “kei”? (Goeëne ju fe la itre foto.)

¹⁴ E jë la Galatia 6:1. Ame la trejin ka “kei” ke, tha angeice kö a metrötrëne la itre trepene meköti Iehova. Ame la atr ka “kei” ke, kola qaja la atr ka xom la ketre mekun ka ngazo, maine ka ena la ketre wathebo i Iehova. Tro la ihnim a ukune la itre qatre thup troa “wenë amekötine la atre [cili], ngo . . . cememine la hni ka menyik.” Ame la hnëewekë qene Geres hna hape, “wenë amekötine” ke, kola qaja la kola amekötin la ketre jun wanga tro la atr a adikape. Tro la droketre a hule hmidran, matre tha tro kö lai ka wezipo a akötr. Ketre tun, tro la itre qatre thup a xatuane la trejin ka kuca la ngazo, ngo tha tro kö a akötrë angeic. Atre hi la itre qatre thup ka hape, itre atr ka tha pexeje kö angatr, nge ijije hi tro angatr a hane kei. Matre tha angatre kö a pi draië, maine nyi ka meköt, maine ithanata akökötrene kowe la trejin. Angatre pe a thel troa trotrohni angeic.​—1 Pet. 3:8.

15. Nemene la nyine tha tro kö sa kuca?

¹⁵ Nyipiewekë tro sa mejiune kowe la itre qatre thup. Hna ini angatr matre tha tro kö a iqajakeune la jol ka traqa, me troa nyitrepene la itre eamo i angatr hnei Tusi Hmitrötr, ngo tha hnene kö la sipu inamacane i angatr. Ketre, atreine angatr ce thu me easë la itre hace së. (It. Ed. 11:13; Gal. 6:2) Isa thiina i angatre kö, me itre hnei angatr hna atrein, ngo ijije hi tro sa qaja la jole së kowe la ketre e angatr. Nyipici laka, tha tro kö sa wai angatr asë utihë la tro ketre a qaja la hne së hna pi dreng. Maine celë hi hne së hna kuca, ceitui easë memine la itre atr ka pi dreng la kola “qaloth la itre hnangenyë i angatr,” nge xele kö angatr ma dreng “la ini ka loi” qa hnine la Tusi Hmitrötr. (2 Tim. 4:3) Maine jë, tro la ketre qatre thup a hnyingë easë ka hape, ase hë së wang la ketre qatre thup, nge nemene la eamo hnei nyidrëti hna hamën. Nge pine laka, atre hi nyidrë la itre ifego i nyidrë, tro nyidrëti lai a thele ixatua thene la ketre qatre thup.​—It. Ed. 13:10.

NYINE TRO SA ISA KUCA

16. Nemene la nyine tro sa isa kuca?

¹⁶ Itre qatre thup pala hi a thupë së, ke easë la itre neköi mamoe i Akötresie, ngo tha angatre kö a musinë së. Isa qanyi së kö mel thenge la aja i Akötresie. Tro Akötresie a isa ameköti së thenge la hne së hna qaja me kuca. Jëne la ixatua i Nyidrë, ijije hi tro sa mele nyipici koi Nyidrë, ngacama tha ka hmaloi kö. (Roma 14:12) Celë hi matre, tha itre qatre thup kö a qaja la nyine tro sa kuca. Angatre pe a amamane koi së la mekuna i Iehova ngöne la Tusi Hmitrötr. Ame la easa trongëne la itre eamo i Tusi Hmitrötr, easë hi lai a huliwane la “atreine i [easë]” me axecië mekune ka loi.​—Heb. 5:​14.

17. Nemene la hnei Iehova hna ajan koi së?

¹⁷ Ketre manathith ka tru la troa sine la hna axö mamoe i Iehova! Hnei Iehova hna upi Iesu “atre thup ka lolo” troa nyi thupene mel, matre tro sa kapa la mele ka pë pun. (Ioa. 10:11) Nge jëne la itre qatre thup, Iehova a eatrëne la hna thingehnaeane celë: “Tro ni a hamë epuni la itre ka thupë mamoe ka kuca la ajang, nge tro angatr a thua i epun cememine la atrehmekun me inamacan.” (Iere. 3:​15) Ame la kola nanazij la lapaune së, maine hne së hna kei kowe la ngazo, the cile kö troa thele ixatua thei angatr. Catre jë së kapa la ixatua qaathene la itre atr hnei Iehova hna acil, ene la itre qatre thup.