Trongëne Jë La Trengewekë i Akötresie

1-2. Pine nemene matre easë la ketre nöj ka madrin? (Iakobo 1:​22-​25)

AJA i Iehova memine la nekö i Nyidrë tro sa madrin. Önine la atre cinyihane la Salamo 119:2 ka hape: “Madrine la itre ka trongëne la itre hna amexej hnei nyidrë, lo itre ka thele nyidrë hnene la hni ka pexej.” Öni Iesu mina fe: “Madrine pe la atre drenge la itre trengewekë i Akötresie, me catre trongëne ej!”​—Luka 11:28.

² Nöje ka madrine la itre hlue i Iehova. Pine nemen? Nyimu kepin. Ngo ame la nyipi kepin matre easa madrin ke, hnene laka, easa e lapane la Tusi Hmitrötr, me isin troa trongëne la itre hne së hna inin.​—E jë la Iakobo 1:​22-​25.

3. Nemene la itre manathith hne së hna kapa qa ngöne la hna trongëne la Trengewekë i Iehova?

³ Tru catre la itre manathith hne së hna kapa qa ngöne la hna trongëne la Trengewekë i Iehova. Easa amadrinë Iehova, nge easë mina fe a madrin. (A. Cai. 12:13) Ketre, öhne hi së laka, kola lolo la aqane imelekeu së memine la fami, nge kolo fe a catre la imelekeu së memine la itre trejin. Nge trianyi së fe kö hnene la itre jol hna melën hnene la itre atr ka ena la itre wathebo i Iehova. Casi hi la mekuna së me Dravita joxu, la nyidrëti a qaja ka hape: “Manathithi ka tru la troa metrötrëne” la itre wathebo, me itre hna amekötin, me itre iameköti i Iehova.​—Sal. 19:​7-​11.

4. Pine nemene matre tha ka hmaloi kö troa trongëne la Trengewekë i Akötresie?

⁴ Ngo ame pe, tha ka hmaloi kö troa trongëne la Trengewekë i Iehova. Pine laka tru catr la itre jole së, loi e tro sa thele ijin troa e me inine la Tusi Hmitrötr, me trotrohnine la aja i Iehova koi së. Tro sa ce wang la itre xaa aqane troa kuca matre e lapane la Tusi Hmitrötr. Tro mina fe së a ce wang la aqane tro sa lapa mekun, me trongën la hne së hna inin.

XOMI IJINE JË TROA E LA TUSI HMITRÖTR

5. Nemene la itre huliwa ka xom la traeme së?

⁵ Nyipici, tru catr la itre huliwa së enehila. Nge hetre isa hnëqa së kö. Alanyimu the së la itre ka huliwa matre hetre nyine xen, me thupëne hnyawane la fami. (1 Tim. 5:8) Ame itre xan, angatr a thupën la itre sinee i angatr ka wezipo, maine ka qatre hë. Ketre, easë mina fe a thupëne la mele së, matre tha tro kö a wezipo. Tru catr mina fe la itre huliwa së ngöne la ekalesia. Nge mekune palakö lo hnëqa ka sisitria, ene la troa catre cainöjëne la maca ka loi. Matre eue pe kö la ijin tro sa e Tusi Hmitrötr lapa, me lapa mekun, me trongën la hne së hna inin?

6. Tune kaa la aqane tro ni a nyipiewekëne la ijine e Tusi Hmitrötr? (Wange ju fe la iatr.)

⁶ Ame la ketre hnëqa ka “nyipiewekë” kowe la keresiano ke, ene la troa e Tusi Hmitrötr. (Fil. 1:​10) Celë hi lai huliwa nyine tro sa amë panën. Hane hi la hna qaja ngöne Salamo mekene 1 göne la atr ka madrin: “Angeice pe a madrine la wathebo i Iehova, me e me lapa mekun ej e lai me jidr.” (Sal. 1:​1, 2) Kolo hi lai a hape, nyipiewekë tro sa xomi ijine troa e Tusi Hmitrötr. Eu la ijin ka loi? Isapengöne kö la itre ijine koi së. Ngo tha tro pe a triane la ijine cili. Öni Victor, ketre trejin ka hape: “Ka loi koi ni e hmakany troa e Tusi Hmitrötr. Ngacama ka meköl aqeanyi ni, ngo ijin ka loi hi lai ke, pëkö ka ajolë ni. Nge kola lualai hnyawa la mekunang.” Ma ka tui eö hi. Hnyinge jë ka hape, ‘Eue la ijin ka loi koi ni troa e Tusi Hmitrötr?’

LAPA MEKUNE JË LA HNEI EÖ HNA E

7-8. Nemene la ka troa sewe së troa kepe thangan qa ngöne la hne së hna e? Qaja jë la ketre ceitun.

⁷ Ame itre xaa ijin, tru palaha la itre mekene tus hne së hna e, matre pëkö hne së hna trotrohnin. Hapeu, hnei eö kö hna canga thëthëhmine la hnei eö hna hnyipi e? Öö! Hna hane traqa koi së asë hi lai, tune la easa e Tusi Hmitrötr. Maine jë, hnei easë hna mekun troa e la nyimu meken ngöne hi la ca drai. Ka lolo catre lai! Loi e tro sa hetre objectifs me isine troa eatrën itre ej. (1 Kor. 9:​26) Ngo tha tro hmekuje kö a e la Tusi Hmitrötr, hetre itre xaa nyine tro kö sa kuca matre kepe thangan.

⁸ Tro sa xom la ketre ceitun: Ame la kola trotro la mani, ke ka nyipiewekë hi lai kowe la mel. Ngo e tru palaha la hna mani, tha lö hë la tim e kuhu hnadro, nge kolo ha di. Matre pëkö thangane lai mani. Loi e tro hi a nango mani, matre tro la tim a lö hnine la ihnadro, me aciane la itre feja. Ketre tune mina fe, tha tro kö sa e nyimenyimëne la Tusi Hmitrötr, thatreine kö së lai trotrohnine hnyawane la hne së hna e, me mekune hmaca me trongën.​—Iako. 1:​24.

9. Nemene la nyine troa kuca e vitesi palaha la aqane e Tusi Hmitrötre së?

⁹ Hnei eö kö hna hane e vitesine la Tusi Hmitrötr? Maine eje hi, nemene la nyine tro eö a kuca? Acone ju hi la nyine troa e. Xomi ijine jë troa lapa mekun la hnei eö hna e. Tha ka jole kö la eamo celë. Ngo e tha nyipi mama kö koi eö la aqane troa kuca, ke kolo hi a qaja ka hape, troa mekun la hnei eö hna e. Maine jë tro eö a nango aqeane la ini Tusi Hmitrötre i eö, matre troa lapa mekun la hnei eö hna e. Maine pena, troa ahopatrene la itre xötr nyine e, matre hetre ijin troa lapa mekun. Öni Victor lo hne së hna qaja ha e caha ka hape, “Eni hi a e la ca mekene Tusi Hmitrötr. Pine laka eni a e e hmahmakany, matre eni a lapa mekun la hnenge hna e ngöne la drai ka pexej.” Isa kö la etrune la itre xötr hne së hna mekun troa e, ngo ame la ka nyipiewekë ke, loi e troa hetre thangane koi së.​—Sal. 119:97; wange ju la hna eköhagen, “Itre Hnying Ka Troa Xatua Së.”

10. Nemene la aqane tro eö a trongëne la hnei eö hna inin? Qaja jë la ketre ceitun. (1 Thesalonika 5:17, 18)

¹⁰ Ame la eö a e la Tusi Hmitrötr, loi e tro eö a thel la aqane tro eö a trongën la hnei eö hna e. Thupene la hnei eö hna e Tusi Hmitrötr, hnyinge jë ka hape, ‘Nemene la aqane tro ni a trongëne enehila me ngöne la itre drai elany la itre hnenge hna e?’ Pane mekune jë laka, hnei eö hna e la tusi 1 Thesalonika 5:​17, 18. (E jë.) Thupene la hnei eö hna e la lue xötre celë, loi e tro eö a hnying ka hape, “Eni kö a thithi lapa, me thith qa kuhu hni?” Loi e tro fe kö eö a mekun la itre ewekë nyine tro eö a olene koi Iehova, me mekun la köni ewekë hnei Nyidrëti hna hamëne koi eö. Maine tro eö a xome hi la itre hnepe menetr troa lapa mekun tune lai e nöjei drai, tro hë eö a ketre hlue i Iehova ka macaj. Ngo tune kaa e tru palaha la nyine tro eö a saze?

PANE EATRËNE JË LA ITRE OBJECTIF KA HMALOI HI

11. Pine nemene matre ame itre xaa ijin, easa dekurag? Qaja jë la ketre ceitun.

¹¹ Ijije hi tro eö a dekurag la eö a e la Tusi Hmitrötr, ke tru palaha la nyine tro eö a saze. Pane mekune jë laka, eö a e la ketre xötre ne Tusi Hmitrötr ka hmekë së göi ië hna hnim. (Iako. 2:​1-8) Eö a öhn e cili laka, loi e tro eö a saze la aqane ujë i eö koi itre xan. Ka lolo catr! Elanyi hmaca, eö a e la ketre xötr ka upi së troa xomehnöth la thineme së. (Iako. 3:​1-​12) Eö a öhne e cili laka, ka majemine eö qaja la itre trenge ithanata ka iakötrë. Matre eö a mekun troa qaja la itre trenge ithanata ka lolo, nge ka ithuecatr. Ame la hnaakönin drai, kola hmekë eö hnei Tusi Hmitrötr göne la troa nyisineene la fen. (Iako. 4:​4-​12) Eö a mekun laka, loi e tro eö a iëne hnyawan la itre nyine iamadrinë. Ame pë hë la hnaafoane drai, thupene la eö a e Tusi Hmitrötr, eö a öhne laka, tru palakö hnei ewekë nyine tro eö a saze.

12. Pine nemene matre tha tro kö eö a dekurag, la eö a öhne la itre ewekë nyine tro eö a saze?

¹² The dekurage kö la eö a öhn ka hape, nyimu ewekë nyine tro eö a saze. Kolo lai a amamane ka hape, atr ka ipië eö, nge ka lolo la itre aliene hni i eö. Ame la atr ka ipië, ke ka e la Tusi Hmitrötr, matre troa atre la nyine troa saze.a Nyipici laka, loi e troa nue trengecatr matre troa heetrëne la “itre thiina ka hnyipixe.” (Kol. 3:​10) Nemene la ka troa xatua eö tro palahi a trongëne la Trengewekë i Akötresie?

13. Nemene la aqane tro eö a trongëne hnyawan la itre hnei eö hna inin? (Wange ju fe la iatr.)

¹³ The thele kö troa trongëne asë la itre eamo hnei eö hna öhne ngöne la Tusi Hmitrötr. Ngo thele jë pe troa trongëne la cas maine luetre. (It. Ed. 11:2) Hane hi la nyine tro eö a kuca: cinyanyine jë la nyine tro eö a saze ngöne la ketre ipepa, nge iëne jë la cas maine luetre nyine tro eö a trongën, nge nue pi pë hë la itre xan koi itre xaa ijin. Ngo troa nyiqan qa kaa?

14. Tro eö a nyiqane saze qa kaa?

¹⁴ Maine jë, tro eö a nyiqan qa ngöne la ketre thiina ka hmaloi hi troa huliwan, maine ketre thiina ka ngazo nyine tro eö a canga saze. E ase hë eö iën, ke ithele jë ngöne la Index des publications des Témoins de Jéhovah maine ngöne la Nyine Thele Mekun Ne La Itretre Anyipici Iehova. Qaja jë koi Iehova la aja i eö, nge sipo Nyidrëti jë la “aja me trengecatre” troa kuca. (Fil. 2:​13) Thupene lai, trongëne jë la itre hnei eö hna inin. E ase hë eö saze la pane thiina, tro hë lai a hetre aja koi eö troa saze la hnaaluen. Maine eö a öhn laka, hnei eö hna saze la ketre thiina i eö, maine huliwane la ketre thiina i Iehova, tro hë lai a hmaloi koi eö troa saze la itre xaa thiina.

EPI TRO LA TRENGEWEKË I AKÖTRESIE A ‘HULIWA THEI EÖ’

15. Nemene la eisapengönene la itre hlue i Iehova memine la itre xan ka e Tusi Hmitrötr? (1 Thesalonika 2:​13)

¹⁵ Tru catr hnei atr ka selëne ka hape, anyimua e hë angatr la Tusi Hmitrötr. Ngo ka mejiune kö angatre kowe la itre hnei angatr hna e? Angatre kö a trongëne la itre ini qa hnine la Tusi Hmitrötr? Waea. Isapengöne catr memine la itre hlue i Iehova! Tune la itre pane keresiano, easa goeëne la Tusi Hmitrötr tune la “sipu trengewekë i Akötresie.” Nge easa isine troa trongëne la itre eamo hna hamën hnene ej.​—E jë la 1 Thesalonika 2:​13.

16. Nemene la nyine tro sa isine troa kuca?

¹⁶ Tha ka hmaloi kö troa e me trongëne la Trengewekë i Akötresie. Maine jë, pëkö traeme i easë troa e la Tusi Hmitrötr. Maine pena easa e vitesine la Tusi Hmitrötr, nge pëkö thangan hne së hna kapa. Maine jë easa dekurag ke, tru palaha la itre thiina nyine tro sa saze. Ngacama tru ju hë la itre jol hne së hna ixelë memin, ngo tro sa atreine elëhun jëne la ixatua i Iehova. Matre loi e tro sa isine troa kapa la ixatua i Nyidrë, me trongëne la Trengewekë i Nyidrë. Eje hi, e tro sa catre e me trongëne la Tusi Hmitrötr, tro hë së lai a madrin.​—Iako. 1:​25.