Itre Mekune Ka Troa Xatua Së Troa Ini Tus Lapa
HAPEU, ka jole kö koi eö troa ini Tusi cas e nöjei wiik me kepe madrine qa ngön? Ma eje hi lai ka traqa koi së asë. Ngo pane mekune jë la itre ewekë hnei eö hna kuca lapan, tune la troa si. Ame la easa si, ke kola xome la traeme së, nge easë fe a nue trengecatr. Ngo hapeu, tha madrine kö eö la eö a ase si? Ceitune hi lai memine la easa si “hnene la trengewekë i Akötresie” kola hamë madrine koi së. (Efe. 5:26) Hane hi la itre mekune ka troa xatua eö troa ini Tusi lapa:
Kuci porogarame jë. Ame la troa ini Tusi cas, ke celë hi “ka nyipiewekë,” nge tha nyine tro kö la keresiano a wangacon. (Fil. 1:10) Tro eö a trongëne hnyawa la porogarame i eö, e tro eö a afedrene ej ngöne la ketre götrane ka mama koi eö, tune la tableau maine ngöne réfrigérateur. Loi e tro fe eö a amë ngöne mobilis, maine tablet i eö la ketre alarme, matre amekunë eö la hawa ne ini Tus.
Iëne jë la aqane ini Tus ka loi koi eö. Nemene la ka lolo koi eö, troa ini Tus aqeany maine tro hi a acone la hawa ne ini Tus? Qanyi eö kö iën. Matre iëne jë la ijine ka loi koi eö. Ngo, tune kaa e pëkö aja i eö troa ini Tusi cas? Isine jë troa ini Tusi cas koi 10 hi lao neköi menetr. Ka loi kö troa ini Tus koi hnepe menetr hi, hune la troa tha ini Tus. Nge maine jë, ame hë la eö a nyiqane ini Tus, ke thatreine hë eö aret.—Fil. 2:13.
Canga iëne jë la nyine tro eö a inin. Maine qëmekene tro eö a ini Tus, eö a pane thele la nyine tro eö a inin, tha eö kö lai a “huliwane hnyawane la traeme i” eö. (Efe. 5:16) Matre thele jë tro pala hi a hetre mekune maine tane mekun hnei eö hna pi inin. Ame hë la eö a mekune la ketre hnying, canga makëne ju. Maine jë thupene la hnei eö hna ini Tus, hetre xaa mekune hnei eö hna pi amë ngöne la liste i eö nyine troa inin e thupen.
The cile kö troa saze la aqane ini. Tha ka ngazo kö troa saze la porogarame i eö, göne la traem me mekun nyine tro eö a inin. Ame la ka nyipiewekë, ke tha ene kö la traem, maine ijine maine mekune nyine tro eö a inin, ngo ene la troa kuca lapan.
Maine tro sa ini Tusi cas lapa, tro lai a easenyi së koi Iehova, me aegöcatrenyi së, me xatua së troa ujë cememine la inamacan.—Ios. 1:8.