TANE MEKUN 7
NYIMA 15 Qaja Madrine Jë Së La Hupuna i Iehova!
Iehova a Nue La Ngazo Së—Itre Thangan Koi Së
“Nyipëti la ka nyipi nue la ngazo.”—SAL. 130:4.
MEKUN KA TRU
Tro sa ce wang la itre ceitun qa hnine la Tusi Hmitrötr, ka troa akökötrene la hni ne ole së kowe la aqane nue Iehova la itre ngazo së isa ala cas.
1. Pine nemene matre tha ceitu kö la aqane qeje menu la itre atr?
MAINE hne së hna qaja maine kuca la ketre ewekë ka akötrëne la ketre sinee së, tro së lai a madrin e tro angeic a qaja ka hape, “Pëkö, eni a nue la menu i eö.” Ngo kola hapeue lai? Angeice kö lai a qaja ka hape, “Pëkö iwesitrë i nyiso, nge lue tremesineene pala hi nyiso.”? Maine angeic pena a qaja ka hape, “The jele hmaca kö la hna kelem.” Tha ceitu kö la aqane qeje menu la itre atr.
2. Tune kaa la aqane qejepengöne Tusi Hmitrötr la aqane nue Iehova la ngazo? (Wange ju la ithuemacany.)
2 Tha ceitu kö la aqane nue Iehova la ngazo, memine la aqane nue la ngazo hnene la itre atr. Hane hi la aqane qeje Iehova hnene la atre cinyihane la Salamo: “Nyipëti la ka nyipi nue la ngazo, matre tro huni a xoue nyipë.”a (Sal. 130:4) Eje hi, Iehova a “nyipi nue la ngazo.” Hnei Iehova hna amamane la nyipi alien la troa nue la ngazo. Ame la hnaewekë “nue la ngazo,” ngöne la Itre Hna Cinyihane Qene Heberu, ke thatraqai Iehova hmekuj, ngo tha itre atr fe kö.
3. Pine nemene matre isapengöne kö la aqane nue Iehova la ngazo, memine la itre atr? (Isaia 55:6, 7)
3 Ame la Iehova a nue la ngazo i ketre, ase fe hë Nyidrë köletrij la ngazo i angeic. Ijiji angeic hmaca troa imelekeu me Nyidrë tun ekö. Ka pexej, nge ka tru la aqane nue Iehova la itre ngazo.—E jë la Isaia 55:6, 7.
4. Iehova a xatua së tune kaa matre tro sa trotrohnine la aqane nue Nyidrëti la ngazo?
4 Isapengöne kö la aqane nue Iehova la ngazo me easë, itre atr ka tha pexeje kö. Nga tro sa trotrohnine tune kaa? Iehova a xatua së troa trotrohnine jëne la itre ceitun hnei Nyidrëti hna amë e hnine la Tusi Hmitrötr. Ame ngöne la tane mekun celë, tro sa ce wang la itre xaa ceitun. Tro itre ej a amamane laka, ame la easë a ietra, ke Nyidrëti a apatrene la itre ngazo së, me nyisinee së hmaca. Ketre, tro itre ej a acatrene la ole së kowe la Keme së ka tru ihnimin, ka ajan troa nue la itre ngazo së.
TRO IEHOVA A XOMETRIJ LA ITRE NGAZO SË
5. Nemene la hnei Iehova hna kuca la Nyidrëti a nue la itre ngazo së?
5 Ame ngöne la Tusi Hmitrötr, hna aceitunëne la itre ngazo së memine la itre ehnef ka hace. Öni Dravita joxu göne la itre ngazo i angeic ka hape: “Kola të hune la heng la itre ngazong; Kösë ketre ehnef ka hace hnenge hna thatreine thu.” (Sal. 38:4) Eloine pe, Iehova a nue la ngazo ne la itre ka ietra. (Sal. 25:18; 32:5) Ame la hnaewekë qene Heberu hna hape, “nue la ngazo” ke kola hape, “amejën” maine “kapa.” Ceitu Iehova memine la ketre atr ka tru trengecatr, ka xom qa ngöne la lue iape së la ehacene la itre ngazo së, me ananyine qaathe së.
“Hna nue la triang” (Sal. 32:5)
6. Nemene la aqane ananyine Iehova la itre ngazo së?
6 Ame ngöne Salamo 103:12, kola qaja la ketre ceitun ka amamane la aqane ananyine Iehova la itre ngazo së. Önine la xötr: “Tune la enanyine la hna fetra me hna lö la jö, ketre tune fe, nyidrëti a ananyine qaathe së la itre tria së.” Pëkö ewekë ka nanyi catr hune la koië me kuë. Tha tro kö lue ej a itrony. Ketre tune fe, Iehova a xom la itre ngazo së, me ananyine itre ej qaathe së. Easa madrin ke, Iehova a nue hnyawane la itre ngazo së!
“Tune la enanyine la hna fetra me hna lö la jö” (Sal. 103:12)
7. Nemene la itre ceitun ka qejepengöne la hnei Iehova hna kuca memine la itre ngazo së? (Mika 7:18, 19)
7 Hapeu, Iehova kö a lapa fë la itre ngazo së? Waea. Hnei Hezekia joxu hna qaja koi Iehova ka hape: “Hnei nyipëti hna trij asë la nöjei ngazong hutrö i nyipë.” (Isa. 38:9, 17) Ame ngöne la ceitune celë, Iehova a xom la ngazo ne la atr ka ietra, me trij matre tha tro hmaca kö a öhn. Kösë Hezekia a qaja ka hape: “Ame koi nyipë, pëkö ngazo hnenge hna kuca.” Celë hi hnei Tusi Hmitrötr hna amamane jëne la ketre ceitun hna qaja ngöne Mika 7:18, 19. (E jë.) Önine la itre xötr ka hape, Iehova a kuiëne la itre ngazo së ngöne la gaa jui ne la hnagejë. Ame ekö, ame la ewekë hna kuiën e kuhu hnagejë, ke tha tro hmaca kö sa öhn.
“Hnei nyipëti hna trij asë la nöjei ngazong hutrö i nyipë” (Isa. 38:17)
“Tro nyipëti a trij asë la itre ngazo i angatr ngöne la itre gaa jui ne la hnagejë” (Mika 7:19)
8. Nemene la hne së hna ce wang?
8 Kola amamane hnyawan hnene la itre ceitune cili laka, ame la Iehova a seng la itre ngazo së, ke Nyidrëti a ahmaloeë së, me xome qaathe së la ehacene la itre ngazo. Tune la hna qaja hnei Dravita, “Madrine la itre atr hna nue ngazon, me itre hna köletriji ngazon. Nge madrine la atre hnei Iehova hna thëthëhmi ngazon.” (Roma 4:7, 8) Hane hi la aqane nue Iehova la ngazo!
IEHOVA A KÖLETRIJ LA ITRE NGAZO SË
9. Nemene la ceitune hnei Iehova hna hamëne matre tro sa trotrohnine la aqane nue Nyidrëti la itre ngazo së?
9 Iehova a hamëne la itre xaa ceitune matre tro sa trotrohnine laka, jëne la thupene mel, Nyidrëti a köletrije la ngazo ne la itre ka ietra. Öni Tusi Hmitrötr, kösë Nyidrëti a siëne me wasine la itre ngazo i angatr, matre ahmitrötrëne la itre atr cili. (Sal. 51:7; Isa. 4:4; Iere. 33:8) Iehova a qejepengöne la thangane lai, ka hape: “Ngacama ka madra palulu ju hë la itre ngazo i epun, tro hë itre ej a wië tune la kiona; ngacama ka madra ju hë itre ej tune la imaano ka palulu, tro hë itre ej a tune la drela ka wië.” (Isa. 1:18) Jole catre troa wasine la iheetr hna xölane hnei hane ka madra. Iehova a amamane jëne la ceitune celë laka, ijiji Nyidrë troa wasine me apatren la itre ngazo së matre tha mama ha itre ej.
“Ngacama ka madra palulu ju hë la itre ngazo i epun, tro hë itre ej a wië tune la kiona” (Isa. 1:18)
10. Nemene la ketre ceitune hnei Iehova hna hamëne matre tro sa trotrohnine la aqane nue hnyawan Nyidrë la itre ngazo së?
10 Tune lo hne së hna ce wange ngöne lo tane mekune hnapan, hna aceitunëne la itre ngazo së me itre gufa. (Mat. 6:12; Luka 11:4) Ame la easa kuca la ngazo qëmekei Iehova, kösë easë hi lai a xomi gufa thei Nyidrë. Eje hi tru catre la gufa së! Ngo ame la Nyidrëti a nue la ngazo së, kösë Nyidrëti a apëne la gufa së. Tha Nyidrëti kö a musinë së troa të hmaca la itre ngazo hnei Nyidrëti hna nu. Easa trotrohnine jëne la ceitune celë laka, ame la Iehova a nue la itre ngazo së, ke Nyidrëti a xome la ketre ehnef qaathe së!
“Epi nue pi la itre gufa hun” (Mat. 6:12)
11. Kola hapeu la Tusi Hmitrötr a qaja ka hape, ase hë köletrij la itre ngazo së? (Itre Huliwa 3:19)
11 Tha Iehova hmekuje kö a apëne la itre gufa së maine itre ngazo së, Nyidrëti fe a köletrij itre ej. (E jë la Itre Huliwa 3:19.) Pane mekune jë laka, tro la atr hne së hna xomi gufa then, a apën la gufa së me sijatrij hnei pen la etrun. Ngacama ase hë angeic sijatrij, ngo ka mama pala hi la etrun. Tha ceitune kö lai memine la kola köletrij. Ame ekö, hna kuca la timi ne cinyany hnei carbone, gomme me tim, matre ame la kola köle hnei epoge ka hmuhmu, ke tha mama ha lo hna cinyany. Ame la kola köletrij la ketre gufa, ke tha mama ha la etrune ej, kösë pëkö gufa hne së hna xom. Kola ketri së la easa atre ka hape, ame la Iehova a nue la itre ngazo së, Nyidrëti fe a köletrije itre ej!—Sal. 51:9.
“Matre troa köletrije la itre ngazo i nyipunie” (It. Hu. 3:19)
12. Nemene la ceitune ka mama ngöne Isaia 44:22?
12 Iehova mina fe a hamëne la ketre ceitun, matre amamane la aqane köletrije Nyidrë la itre ngazo së. Öni Nyidrë: “Tro ni a apatrene la itre tria i ö, tune la kola thung hnene la iaw me itre ngazo i ö hnene la iaw atraqatr.” (Isa. 44:22) Ame la Iehova a nue la itre ngazo së, ke kösë Nyidrëti a xome la ketre iaw matre thung la itre ngazo së. Ame e cili, tha öhne hë Nyidrë, me easë fe.
“Tro ni a apatrene la itre tria i ö, tune la kola thung hnene la iaw” (Isa. 44:22)
13. E ase hë Iehova nue la itre ngazo së, nemen la nyine tha tro kö sa kuca?
13 Nemene la itre ini hne së hna xome qa ngone la itre ceitune celë? E ase hë Iehova nue la ngazo së, tha tro hmaca kö sa ahacenyi së, maine mekun ka hape, luzi hë la mele së. Jëne la madra i Iesu, pë hnyawa ha gufa së, göi tha öhnyi itre eje fe. Eje hi lai aqane nue Iehova la ngazo ne la itre ka ietra.
IEHOVA A ACATRENE HMACA LA IMELEKEU SË ME NYIDRË
Iehova a nue la itre ngazo së, matre ijiji easë hë troa imelekeu me Nyidrë (Wange ju la paragarafe 14)
14. Pine nemene matre loi e tro sa mejiune la Iehova a qaja ka hape, Nyidrëti a nue la itre ngazo së? (Wange ju fe la iatr.)
14 Pine laka Iehova a nue la itre ngazo së, ijiji së hë troa imelekeu me Nyidrë. Ketre, tha kolo kö a ahacenyi së hnene la itre ngazo së. Hapeu, Iehova kö a lapa fë trengehni me treqen troa tranyi së elany? Waea, thatreine kö Nyidrë kuca lai. Pine nemene matre loi e tro sa mejiune la Iehova a qaja ka hape, Nyidrëti a nue la itre ngazo së? Öni Nyidrë jëne Ieremia perofeta ka hape: “Tro ni a nue la ngazo i angatr, nge tha tro hmaca kö ni a mekun la itre tria i angatr.” (Iere. 31:34) Nge hnei Paulo aposetolo hna amexeje la trengewekë i Ieremia ngöne Heberu 8:12 ka hape: “Tha tro hmaca kö ni a mekune la itre ngazo i angatr.” Kola hapeue lai?
“Tha tro hmaca kö ni a mekun la itre tria i angatr” (Iere. 31:34)
15. Nemene la aliene la kola hape, tha tro hmaca kö Iehova a mekun la itre ngazo së?
15 Ame ngöne la Tusi Hmitrötr, ame la hnaewekë “mekun” ke, tha kolo hmekuje kö a qaja la troa mekun la ketre ewekë maine tha tro kö a thëthëhmin. Ngo kolo fe a qaja la troa kuca. Önine lo atrekënö ka ce thip me Iesu ka hape: “Iesu, the thëthëhmi ni kö e lö jë nyipë kowe la Baselaia i nyipë.” (Luka 23:42, 43) Tha angeice kö a sipo Iesu troa meku angeic. Eje hi, hnei Iesu hna sa ka hape, tro kö nyidrëti a amele angeic elany. Matre ame la Iehova a qaja ka hape, tha tro hmaca kö Nyidrëti a mekun la itre ngazo së, kolo hi lai a hape, tha tro kö Nyidrëti a ameköti easë elany pine la itre ngazo hnei Nyidrëti hë hna nu.
16. Nemene la ceitun hnei Tusi Hmitrötr hna xom matre amamane la pengö së la kola nue la ngazo së?
16 Tusi Hmitrötr a qaja la ketre ceitun ka amaman ka hape, ame la Iehova a nue la itre ngazo së, ke kösë pëhë ewekë ka hnöthi së. Pine laka, itre atr ka tha pexeje kö së, matre Tusi Hmitrötr a qaja ka hape, easë “la itre hlue ne la ngazo.” Ngo, hnei Iehova hna nue la ngazo së, matre ceitu easë me itre hlue hna ‘amelen qa ngöne la ngazo.’ (Roma 6:17, 18; Hna Am. 1:5) Ase hë Iehova nue la ngazo së, matre tha itre hlue ne la ngazo hmaca kö së. Madrine catre së ke, ase hë nuamele së.
“Tha nyipunieti hmaca kö la itre hlue ne la ngazo” (Roma 6:18)
17. Pine nemene matre ceitu së hi memine la ketre atr hna aloin? (Isaia 53:5)
17 E jë la Isaia 53:5. Tusi Hmitrötr a qaja ka hape, itre atr ka ngazo së, matre ceitu së me ketre atr hna tith hnene la ketre mec ka ngazo. Ngo ame la Iehova a upi Iesu troa meci pi së, ke kösë loi hmaca ha së. (1 Pet. 2:24) Ame la easa kuca la ngazo, kola angazone la imelekeu së me Iehova. Ngo jëne la thupene mel, Nyidrëti a nue la ngazo së, nge ijiji së hmaca troa imelekeu me Nyidrë. Tune la ketre atr hna aloin, easa madrin ke, easa iloi me Iehova, nge Nyidrëti a kepe së hmaca.
“Jëne la itre eatre i angeic, hna ameunyi së” (Isa. 53:5)
THANGAN LA IEHOVA A NUE LA ITRE NGAZO SË
18. Nemene la hna ini së hnene la itre ceitune qa hnine la Tusi Hmitrötr? (Wange ju la hna eköhagen, “Aqane Nue Iehova La Itre Ngazo Së.”)
18 Nemene la hna ini së hnene la itre ceitune celë? Hne së hna öhne laka, ka pexej nge ka epine palua la aqane nue Nyidrëti la itre ngazo së. Nge celë hi ka aijijë së troa imelekeu hnyawa me Nyidrë. The thëthëhmine pi kö së laka, ame la Iehova a nue la itre ngazo së, ke ahnahna lai qaathei Nyidrë. Nge ihnimi gufa i Nyidrëti lai kowe la itre atr ka ngazo ke, pëkö hnei easë hna kuca matre tro Nyidrëti a ujë tun.—Roma 3:24.
19. (a) Pine nemene matre loi e tro sa olen? (Roma 4:8) (b) Nemene la hne së hna troa ce wang ngöne la tane mekun ka troa xulu?
19 E jë la Roma 4:8. Loi e tro sa olene koi Iehova, ke Nyidrëti la atr “ka nyipi nue la ngazo”! (Sal. 130:4) Ngo e aja së tro Nyidrëti a nue la itre ngazo së, ke hetre ewekë nyine tro sa kuca. Öni Iesu: “Maine tha hnei nyipunieti kö hna nue la ngazo hna kuca koi nyipunie, ketre tha tro kö la Keme i nyipunie a nue la ngazo i nyipunie.” (Mat. 6:14, 15) Matre loi e tro sa nyitipu Iehova me nue la ngazo ne la itre xan. Ngo tro sa tune kaa? Celë hi hne së hna troa ce wang ngöne la tane mekun ka troa xulu.
NYIMA 46 Oleti Koi Iehova
a Ame ngöne la Itre Hna Cinyihan Qene Heberu, easa öhne la hnaewekë “troa nue la ngazo.” Kola qaja la aqane nue la ngazo hnei Akötresie, ngo tha hnei itre atre kö. Ame ngöne la itre xaa Tusi Hmitrötr, ke tha nyipi mama kö la eisapengönene la lue ewekë cili. Celë hi matre ketrepengöne kö la aqane ujën la Salamo 130:4 hnene la Tusi Hmitrötr Fene Ka Hnyipixe Hna Ujën.