Loi e Xecie Koi Eö Laka Ase Hë Iehova Nue La Ngazo i Eö

1-2. Tune kaa së la easa atre ka hape, ase hë Iehova nue la ngazo së? (Wange ju icetrön.)

TROTROHNINE hi Dravita joxu la atr ka hace fë la itre ngazo angeic. (Sal. 40:12; 51:3; ka qejepengöne la mekene cili) Hnei Dravita hna kuca la itre ngazo ka tru. Ngo hnei angeic hna ietra, matre hnei Iehova hna nue la ngazo i angeic. (2 Sam. 12:13) Celë hi matre, trotrohnine hi Dravita la madrin ka eje thene la atr hna nue ngazon.​—Sal. 32:1.

² Tui Dravita, tro së lai a uqa, la Iehova a nue la itre ngazo së. Kola akeukawanyi së la easa atre ka hape, aja i Iehova troa nue la itre ngazo së, memine fe la itre ngazo ka tru. Tro Nyidrëti lai a nue la itre ngazo së, e tro sa qaja amaman, me isine matre tha tro hmaca kö a kuca! (It. Ed. 28:13; It. Hu. 26:20; 1 Ioa. 1:9) Hapeu, tha kolo kö lai a akeukawanyi së la easa atre ka hape, Iehova a nue hnyawane la itre ngazo së, kösë pëkö ngazo së?​—Ezek. 33:16.

3-4. Tune kaa Jennifer thupene la angeic a xomi bapataiso, nge nemen la hne së hna troa wang ngöne la tane mekun celë?

³ Ngazo pe, ame koi itre xan, tha ase kö Iehova nue la itre ngazo i angatr. Celë hi hna melën hnei Jennifer, ka tru ngöne la nyipici. Ame lo angeic a jeune, hnei angeic hna kuca juetrën la itre ewekë ka ngazo. Itre macatre thupen, hnei angeic hna bëeke hmaca koi Iehova, me saze aqane ujë uti hë la xomi bapataiso. Öni angeic: “Ame ekö, eni a kuca la itre huliwa ka sis, me iji gorok, me elëhni lapa. Nge ame la ka nyipiewekë koi ni, ke ene la troa trene mani. Hnenge hna sipo iele Iehova troa nue la itre ngazong, nge hnenge hna ietra. Atre hi ni la hna qaja hnei Tusi Hmitrötr laka, huuje i Iesu a aijijë Iehova troa nue la itre ngazong. Ngo kösë ame koi ni, tha eje kö.”

⁴ Hapeu, eö kö a mekun e xaa ijin ka hape, tha hnei Iehova kö hna köletrij la itre ngazo i eö ekö? Ame la aja i Iehova, ke tro sa lapa tingeting ngöne la lue ime i Nyidrë ka tru trenge utipin, tui Dravita. Ame ngöne la tane mekune celë, tro sa ce wange la ka amamane ka hape, ase hë Iehova nue la itre ngazo së. Nge tro mina fe sa ce wange la nyine tro sa kuca, matre tro lai a xeci koi së.

TROA XECIE KOI SË LAKA ASE HË IEHOVA NUE LA NGAZO SË

5. Nemene la aja i Satana? Qaja jë la ketre ceitun.

⁵ E xecie koi së laka, ase hë Iehova nue la itre ngazo së, ke tha tro kö së lai a kei kowe la ketre hnö i Satana. The thëthëhmine kö laka, Satana a kuca asë la hnei angeic hna atrein, matre tha tro hmaca kö sa nyihlue i Iehova. Tro angeice lai a thelejëne matre tro sa mekun ka hape, tha tro jë kö Iehova a nue la itre ngazo së. Tro sa ce wang la ka traqa kowe la ketre keresiano ne Korinito. Hna upi angeic qa ngöne la ekalesia ke, hnei angeic hna kuca la ketre huliwa ka sis. (1 Kor. 5:​1, 5, 13) Ngacama ase hë angeic ietra, ngo aja i Satana tro la itre trejin a lapa fë trengehni me xele ma kepe angeice hmaca ngöne la ekalesia. Ketre, aja i Satana tro la keresiano cili a mekun ka hape, tha tro kö Iehova a nue la ngazo i angeic, matre troa ‘heti angeice hnei hleuhleu,’ nge tro angeic a nuetriji Iehova. Tha saze kö Satana, nge casi pala hi la itre nyinyithiina i angeic. Eloine pe, “atre hë së la hnei angeice hna thel.”​—2 Kor. 2:​5-​11.

6. Nemene la nyine tro sa kuca matre tingetinge la hni së?

⁶ E xecie koi së laka, ase hë Iehova nue la itre ngazo së, ke troa tingetinge la hni së. Ame la easa kuca la ketre ewekë ka ngazo, ke kola hace la hni së. (Sal. 51:17) Pine laka kola huliwa la mekuthetheu së, matre kola uku së troa saze. (2 Kor. 7:​10, 11) Ngo, e tro pala hi sa hace fë la itre ngazo së nge ase pe së ietra, ke tro lai a ahacenyi së ngöne la huliwa i Iehova. Ame pe, e xeci koi së laka, ase hë Iehova nue la itre ngazo së, ke tha tro kö a ajolë së hnei itre ej. Kösë easa trij itre ej e hutrö së. Tro hë së lai a nyihlue i Iehova thenge la aja i Nyidrë, cememine la madrine me mekuthetheu ka wië. (Kol. 1:​10, 11; 2 Tim. 1:3) Nemene la nyine tro sa kuca matre xecie koi së laka, ase hë Iehova nue hnyawane la itre ngazo së?

KA TROA XATUA SË LAKA ASE HË IEHOVA NUE LA NGAZO SË

7-8. Hnei Iehova hna qeje Nyidrë tune kaa koi Mose, nge kola akeukawanyi së tune kaa? (Esodro 34:​6, 7)

⁷ Mekune jë la aqane qejepengöne Iehova la pengö i Nyidrë. Goeën la aqane qejepengöne Iehova la pengö i Nyidrë koi Mose hune la Wetr e Sinai.a (E jë la Esodro 34:​6, 7.) Maine ju, tro hi Nyidrëti a qaja la itre xaa thiina i Nyidrë me itre aqane ujë i Nyidrë. Ngo öni Nyidrë, Nyidrë la “Akötresie ka utipin nge ka itrotrohni.” Hapeu, tro kö Nyidrë a xele ma nue la ngazo ne la hlue i Nyidrë ka nyipi ietra? Waea! Ka pë ihnim la atr ka ujë tun, nge tha thiina i Iehova kö lai.

⁸ E öni Iehova ka hape, Akötresie ka utipine Nyidrë, ke eje hi lai. Eje hi, tha ka thoi kö Nyidrë. (Sal. 31:5) Haawe, loi e tro sa mejiune kowe la hnei Nyidrëti hna qaja. Maine jole pala hi koi së troa mejiun laka, ase hë Iehova nue la itre ngazo së, ke isa hnyinge jë ka hape: ‘Xecie kö koi ni laka, ka utipine Iehova nge ka itrotrohni, nge Nyidrëti a nue la ngazo ne la nöjei atr ka ietra? Maine eje hi, hnauëne la eni a luelu laka, ase hë Nyidrëti nue la ngazong?’

9. Nemene la hnei Dravita hna qaja göne la aqane nue Iehova la ngazo së, nge nemene la aliene la hnëewekë hnei angeic hna huliwan? (Salamo 32:5)

⁹ Lapa mekune ju la hna qaja hnei Tusi Hmitrötr göne la aqane nue Iehova la itre ngazo së. Öni Dravita: “Hnei nyipëti hna nue la triang me itre ngazong.” (E jë la Salamo 32:5.) Ame la aliene la hnëewekë qene Heberu “nue” ke kola hape, “kapa draiën,” me “xometrij,” maine “hnatrij.” Ame la Iehova a nue la ngazo i Dravita, ke kösë hnei Nyidrëti hna kapa draiën la itre ngazo i angeic, me hnatrij e gaa nany. Matre uqa pi Dravita la Iehova nue la itre ngazo i angeic. (Sal. 32:​2-4) Tro fe së lai a hane tui Dravita. Maine ase hë së ietran la itre ngazo së, the hace fë hmaca kö, ke ase hë Iehova a kapa draiën itre ej, me hnatrij e gaa nany.

10-11. Kola amamane tune kaa la pengö i Iehova hnene la hnëewekë “treqen troa nue la ngazo”? (Salamo 86:5)

¹⁰ E jë la Salamo 86:5. Dravita a qaja ka hape, Iehova “a treqen troa nue la ngazo.” Önine la ketre itus göne la hnëewekë cili ka hape: “Ame [Akötresie,] ke ‘ka nue la ngazo’, nge ‘pengö i Nyidrëti kö lai.’ ” Hnauëne la easa qaja tun? Kola sa hnene la xötr ka hape: “Tru la ihnimi nyipici i nyipë kowe la itre ka hë nyipë.” Ame ngöne lo tane mekun hnapan, hne së hna ce wange ka hape, hnei Iehova hna amaman la ihnimi nyipici Nyidrë kowe la itre ka hnimi Nyidrë, nge tha tro kö Nyidrëti a nuetriji angatr. Nge kola uku Nyidrë troa “nue xanën” la itre ngazo ne la atr ka ietra. (Isa. 55:​7, ith.) Maine eö a luelu laka, ase hë Iehova nue la itre ngazo i eö, hnyinge jë ka hape: “Xecie kö koi ni laka, Iehova a treqen troa nue la ngazo ne la nöjei atr ka ietra, me utipine la ‘itre ka hë’ Nyidrë? Maine eje hi, hnauëne la eni a luelu laka, ase hë Nyidrëti nue la ngazong la eni a ‘hë’ Nyidrë troa utipi ni?”

¹¹ Kola mama ngöne la ketre salamo i Dravita ka hape, atre hnyawa hi Iehova la pengö së, itre atr ka ngazo. (Sal. 139:​1, 2) Tro la salamo cili a akeukawanyi së me acatrene la mejiune së laka, ase hë Iehova nue la itre ngazo së.

THE THËTHËHMINE KÖ LAKA ATREHMEKUNE HI IEHOVA LA PENGÖ SË

12-13. Thenge la Salamo 103:​14, nemene la hnei Iehova hna atrehmekun, nge tune kaa la aqane ujë i Nyidrëti koi së?

¹² E jë la Salamo 103:14. Öni Dravita, “atrehmekune hi [Iehova] laka, so ne dro së.” Kolo hi lai a amamane laka, aja i Iehova troa nue la ngazo ne la itre hlue i Nyidrë ka ietra. Atre hi Nyidrë la pengö së ka ngazo. Tro sa ce wange la hnei Dravita hna qaja, matre trotrohnine hnyawane la mekune cili.

¹³ Dravita a qaja ka hape, “atre hnyawa hi [Iehova] la aqane xupi së.” Hna xupi Adramu “jëne la xaxau ne la ihnadro,” matre atre hnyawa hi la Atre Xup laka, hetre ifegone la atr ka pexej. Loi e tro angeic a xen, me meköl me mano. (Gen. 2:7) Ngo hnei Adramu me Eva hna eni Wathebo. Matre ame enehila, ‘so ne dro hë së,’ ke itre atr ka tha pexeje kö së. Easë la itre matra i nyidro, matre canga tro hi sa kuca la itre ewekë ka ngazo. Atre hi Iehova la pengö së ka ngazo. Ngo, öni Dravita, “atrehmekune hi nyidrë laka, so ne dro së.” Kolo hi lai a hape, ngacama atre hi Iehova laka, itre atr ka ngazo së, ngo Nyidrëti pala hi a utipi së. Kösë Dravita a qaja ka hape, atre hi Iehova laka, tro së lai a tria e itre xaa ijin. Ngo ame la easa kei kowe la ngazo me ietra, ke tru la aja i Nyidrë troa utipi së, me nue la itre ngazo së.​—Sal. 78:​38, 39.

14. (a) Dravita a qaja tune kaa la aqane nue Iehova la itre ngazo së? (Salamo 103:12) (b) Tulu i Dravita a amamane tune kaa laka, Iehova a nue hnyawane la itre ngazo së? (Wange ju la hna eköhagen “Iehova a Nue La Ngazo Me Thëthëhmin Ej.”)

¹⁴ Tune kaa la aqane nue Iehova la itre ngazo së? (E jë la Salamo 103:12.) Öni Dravita ka hape, ame la Iehova a nue la itre ngazo së, ke Nyidrëti a ananyine qaathe së la itre tria së, tune “la enanyine la hna fetra [koië] me hna lö la jö [kuë].” Iananyi catr la götrane koië me kuë, matre tha ijiji lue ej kö troa itrony. Nemene la hna ini së göne la aqane nue Iehova la itre ngazo së? Kola qaja hnene la ketre itus ka hape: “Pine laka, hna hnatrij e gaa nany la itre ngazo së, matre patre palua ha itre ej, göi pë fe punepun, me wamine dro, maine itre mekun ekö ka troa fetra hmaca.” Nyipici, ame itre xaa ijin, easa dreng la punepune la ketre xen, nge kola amekunë së lo itre hne së hna melëne ekö. Ngo ame la Iehova a nue la itre ngazo së, göi pë fe ca ewekë ka troa amekunë Nyidrë la itre tria së, me uku Nyidrë troa upezö së.​—Ezek. 18:​21, 22; It. Hu. 3:​19.

15. Nemene la nyine tro sa kuca e easë pala hi a hace fë la itre ngazo së ekö?

¹⁵ Tro la hna qaja hnei Dravita ngöne Salamo 103 a xatua së tune kaa troa kapa laka, ase hë Iehova nue la itre ngazo së? Maine easë pala hi enehila a hace fë la itre ngazo së ekö, isa hnyinge jë ka hape: ‘Hapeu, eni kö a thëthëhmine ka hape, atre hnyawa hi Nyidrë laka, tha ka pexeje kö ni, nge ase hë Nyidrëti nue la ngazong, ke hnenge hna ietra? Eni kö a mekune hmaca lo itre ngazong hnei Nyidrëti hë hna nue?’ Thëthëhmine hë Iehova la itre ngazo së ekö. Haawe, loi e tro fe sa tui Nyidrë. (Sal. 130:3) E xecie koi së laka, ase hë Iehova nue la itre ngazo së, ke tro lai a xatua së troa thëthëhmine la itre ngazo së, me catre nyihlue i Nyidrë ngöne la madrin.

16. Qaja jë la ketre ceitun ka amaman ka hape, ka ngazo la troa mekun lapan la itre ngazo së ekö. (Wange ju fe la foto.)

¹⁶ Tro sa ce wange la ketre ceitun. Ame la easë a hace fë la itre ngazo së ekö, ke ceitune hi memine la easa xomi loto me goeëne lapane la retrovizör. Ka nyipiewekë troa goeën, matre neëne la itre jol. Ngo tro sa atreine nyiap hnyawa ngöne la gojeny, e tro sa goeëne qëmeke së. Ketre tun, ka loi e tro fe sa mekun e itre xaa ijin la itre tria së ekö, matre xomi ini qa ngön, me tha kuca hmaca. Ngo e tro sa mekun lapane itre ej, ke tro lai a ahacenyi së, me sewe së troa kuca la itre huliwa i Iehova. Goeëne jë pe së la gojeny qëmeke së. Eje hi, easa xötrëne la gojeny ka xomi së kowe la mel ngöne la fen ka hnyipixe hna thingehnaean hnei Akötresie laka, “tha tro hmaca kö a mekune la itre ewekë hnapan.”​—Isa. 65:17; It. Ed. 4:​25.

LOI E TROA AHMALAN LA HNI SË

17. Hnauëne laka, tro pala hi a ahmalan la hni së laka, Iehova a hnimi së, nge ase hë Nyidrëti nue la itre ngazo së?

¹⁷ Loi e tro pala hi a ahmalan la hni së laka, Iehova a hnimi së me nue la itre ngazo së. (1 Ioa. 3:​19, ith.) Pine nemen? Pine laka, aja i Satana tro sa mekun ka hape, tha Iehova kö a hnimi së maine tha tro kö Nyidrëti a nue la itre ngazo së. Ngo casi hi la aja i angeic, ene la troa sewe së troa nyihlue i Iehova. Matre tro angeic lai a nue trengecatr, ke atre hi angeic laka, hohopatre pe hi la ijine i angeic. (Hna Am. 12:12) The nue angeic pi kö troa hun!

18. Nemene la nyine tro eö a kuca matre xecie e kuhu hni eö laka, Iehova a hnimi eö, me nue la itre ngazo i eö?

¹⁸ Trongëne jë la itre mekun ne la tane mekun hnapan, matre acatrene la mejiune i eö laka, Iehova a hnimi eö. Lapa mekune jë la pengöi Iehova, matre troa xecie koi eö laka, ase hë Nyidrë nue la itre ngazo i eö. Ketre, mekun ajuine jë la hna qaja hnei Tusi Hmitrötr, göne la aqane nue Nyidrë la itre ngazo së. The thëthëhmine pi kö laka, Nyidrëti a utipi së, nge atre hnyawa hi Nyidrë la pengö së, itre atr ka tha pexeje kö. Eje hi, Nyidrëti a nue hnyawane la itre ngazo së. Haawe, tune la aqane mejiune i Dravita kowe la utipine i Iehova, tro fe eö a hane qaja ka hape, “Oleti Iehova la ‘hnei nyipëti hna nue la triang me itre ngazong’!”​—Sal. 32:5.