Atreine Kö Iehova Xatua Së

1. Tune kaa la aqane amamane Mose la mejiune i angeic koi Iehova, lo angeic a troxom la nöj qa Aigupito?

AME thene la itre tulu ne lapaun hna qaja ngöne Heberu, mama cile kö Mose. (Heb. 3:2-5; 11:23-25) Hnei angeic hna amamane la lapaune i angeic, lo angeic a troxom la angetre Isaraela qa Aigupito. Tha hnei angeice kö hna nue Farao me trongene isi i nyidrë troa axouenyi angeic. Ngo hnei angeice pe hna catre mejiun koi Iehova, la angeic a eatrongëne la nöj ngöne la Hnagejë Ka Palulu me ngöne la hnapapa. (Heb. 11:27-29) Ngacama ala nyimu la angetre Isaraela ka mekun laka, thëthëhmi angatre hë hnei Iehova, ngo tha celë kö mekuna i Mose. Nge nyipici angeice hi, ke hnei Akötresie hna axulun la xen me tim koi angatr ngöne la hnapapa gaa qaqacil.a—Eso. 15:22-25; Sal. 78:23-25.

2. Hnauëne la Iehova a qaja koi Mose ka hape: “Hapeu, tha ijijinge kö troa kuca la itre ewekë cili”? (Numera 11:21-23)

² Ngacama ka catrecatre la lapaune i Mose koi Iehova, ngo thupen la ca macatre, hnei angeic hna luelu kowe la atreine i Iehova troa thue miitrene la nöj asë. Thatreine kö Mose trotrohnine la aqane tro Iehova a thue miitrene la itre milio lao atr ngöne la hnapapa. Matre öni Iehova jë hi koi Mose: ‘Hapeu, tha ijijinge kö troa kuca la itre ewekë cili?’ (E jë la Numera 11:21-23.) Ame ngöne qene Heberu, hna ujëne lai trengewekë cili ka hape, “ime i Iehova.” Kola qaja la uati hmitrötr, ene la mene ka catre i Akötresie. Kösë Iehova hi lai a qaja koi Mose ka hape, ‘Ame la mekuna i ö, ke thatreine kö ni eatrën la hnenge hna qaja?’

3. Hnauëne laka, nyipiewekë tro sa lapa mekun la hna melën hnei Mose me angetre Isaraela?

³ Hnei eö kö hna hane hnying ka hape, ‘Tro kö Iehova a hamën koi ni me faming la ka nyipiewekë?’ Maine hnei eö hna hane hnyinge tun maine waea, ngo tro sa pane ce wang la ka traqa koi Mose me angetre Isaraela, lo angatr a luelu laka, tro Iehova a hamë angatr la ka ijij. Tro la itre trepene meköt hne së hna troa ce wang a acatrene la mejiune së laka, ijiji Iehova hi troa xatua së.

XOMI INI JË QAATHEI MOSE ME ANGETRE ISARAELA

4. Pine nemene matre kola mekun hnene la ka alanyim ka hape, tha ijiji Iehova kö troa hamë angatr la ka nyipiewekë?

⁴ Tro sa pane ce wang la mele i Mose me angetre Isaraela. Nyimutre la itre drai ne lapa hnapapa hnene la angetre Isaraela memine la “itre xaa atr ka hane xötrethenge angatr” qa Aigupito. (Eso. 12:38; Dreut. 8:15) Hnene la itre trenyiwa ka ce tro me angatr hna nyiqane eetr pine la mana, nge hnene la angetre Isaraela hna keithenge la mekuna i angatr. (Num. 11:4-6) Hnei angatre hna treije pine lo itre xen e Aigupito. Matre Mose a hnehengazo, ke ame koi angeic, hnëqa i angeic troa thua i angatr.—Num. 11:13, 14.

5-6. Nemene la ini hne së hna xom qa ngöne la aqane ajojezin la angetre Isaraela hnene la itre trenyiwa ka ce tro me angatr?

⁵ Pëkö hni ne ole ne la itre trenyiwa kowe la nöjei ewekë hnei Iehova hna hamë angatr. Nge hnene la angetre Isaraela hna nyitipu angatr. Ketre tune fe, ka pë hni ne ole la itre atr enehila. Matre ijije hi tro la aqane mekune i angatr a löthi së, nge tro sa nyiqane sixan la itre hnei Iehova hna hamën. Tro lai a traqa, e tro pala hi sa treije pine la itre hne së hna hetrenyi ekö, maine piine la hna hetrenyi hnei itre xan. Ngo, tro sa madrin, e tro sa mejihnin la hne së hna hetreny.

⁶ Maine ju, tro la angetre Isaraela a mekune lo hnei Iehova hna thingehnaean. Öni Nyidrë, tro Nyidrëti a hamën asë la hnei angatr hna ajan, e traqa ha angatr ngöne la Nöj Hna Thingehnaean. Ketre tune fe, tha tro kö sa mekun atrun la ka pë the së enehila ngöne la fene celë, ngo ene pe la hnei Iehova hna troa hamë së elany ngöne la fene ka hnyipixe. Nyipiewekë mina fe tro sa lapa mekun la itre xötr ka troa acatrene la mejiune së koi Iehova.

7. Pine nemene matre xecie koi së laka, atreine hi Iehova troa xatua së?

⁷ Ame lo Iehova a amejëne lo hnying ka mama ngöne Numera 11:23, ke Nyidrëti a ajan tro Mose a trotrohnine la lue ewekë. Ame la hnapan, ke ka pë ifegon la mene i Nyidrë. Nge ame la hnaaluen, ke ijiji Nyidrë troa huliwan la mene i Nyidrë ngöne la nöjei götran asë, uti fe hë la itre götran gaa nany. Matre ijiji Akötresieti hi troa thue miitrene la angetre Isaraela asë, ngacama angatre ju hë ngöne la hnapapa. Jëne la “ime hna saath me iwanakoime ka catre i nyidrë,” hnei Akötresie hna amamane la mene i Nyidrë. (Sal. 136:11, 12) Haawe, ngöne la itupath, the luelue pi kö së laka, atreine hi la ime i Iehova troa xatua së isa ala cas, ngacama easë ju hë ngöne la ketre götran gaa nany.—Sal. 138:6, 7.

8. Nemene la nyine tro sa kuca matre tha tro kö sa hane tria, tune la nöj ngöne la hnapapa? (Wange ju fe la foto.)

⁸ Tha hmitre ju kö, nge Iehova a thue miitr kowe la nöj. Nyimutre catr la itre neköi waco ka mala qa hnengödrai. Ngazo pe, pëkö hni ne ole i angatr kowe la iamamanyikeu i Akötresie. Ngo ala nyimu la itre ka pi hetreny. Hnei angatr hna nyape momo koi xen, me hlem atrun. Elëhni catre ju hi Iehova kowe la “itre ka meciun,” matre hnei Nyidrëti hna lep apatrene la nöj. (Num. 11:31-34) Hetre ini nyine tro sa xom qa ngöne la hna melën celë. Loi e tro sa hmek, wanga hane jë fe së meciun. Ngacama ka trene mani ju hë së maine waea, ngo nyipiewekë tro sa amë panëne “la itre trengamo e hnengödrai” ngöne la mele së, ene la troa acatren la imelekeu së me Iehova me Iesu. (Mat. 6:19, 20; Luka 16:9) Maine tro pala hi sa tun, tro kö Iehova lai a hamë së la ka ijij.

9. Nemene la ka xecie koi së?

⁹ Iehova a xatuane la nöje i Nyidrë enehila. Ngo kolo kö lai a hape, tro pala hi sa hetre xen me mani? Waea, hetre ijin laka, tro sa mel ngöne la pë.b Ame pe, tha tro jë kö Iehova lai a nuetriji së. Tro pala hi Iehova a xatua së ngöne la nöjei pengöne jol hne së hna ixelë memin. Tro sa ce wang enehila la lue ijine tro sa amaman la mejiune së koi Iehova: (1) ngöne la kola traqa koi së la itre jol göi mani, me (2) ngöne la easa hnehengazo koi elany, e qatre hë së.

ITRE JOL GÖI MANI

10. Nemene la itre jol hne së hna cile kow?

¹⁰ Pine laka, easenyi trootro hë la pune la fene celë, matre tha sesëkötre kö së laka, tru hnei atr ka cil kowe la itre jol göi mani. E cailo fen, kola isi pi mus, nge tru hnei isi, me itre hulö, me itre mec ka ixötrekeu, matre kola elë catr la itre thupene mo, nge itre atr a pë huliwa, me pë ewekë, me hnalapa. Celë hi matre itre xan a thele la ketre huliwa ezine la hnalapa i angatr, maine mekun troa fek kowe la ketre götran gaa nanyi matre thupën la fami angatr. E cili, nemene la ka troa xatua së troa axecië mekun me mejiun koi Iehova?

11. Nemene la ka troa xatua së troa elë hun la itre jol göi mani? (Luka 12:29-31)

¹¹ Ame la pane ewekë nyine troa kuca, ke troa qaja koi Iehova la jole së. (It. Ed. 16:3) Sipo Nyidrëti jë la inamacan ka troa xatua eö troa axecië mekune hnyawa, memine la hni ka tingeting matre tha tro kö a “hnehengazo menu.” (E jë la Luka 12:29-31.) Sipo iele Nyidrëti jë troa xatua eö troa atreine melën la ka ijij. (1 Tim. 6:7, 8) Nge ithele jë ngöne la itre itusi së ka qaja la aqane troa elë hun la itre jol göi mani. Eje hi, ala nyimu la itre ka kepe thangan qa ngöne la itre eamo hna hamën ngöne jw.org.

12. Nemene la itre hnying ka troa xatuane la itre keresiano troa axecië mekune hnyawa?

¹² Ala nyimu la itre ka kapa la ketre huliwa ka ananyi angatr qaathene la fami i angatr. Ngo ije macatre thupen, angatr a öhne laka, tha ka loi kö la mekun hnei angatr hna axeciën. Matre qëmeken tro eö a iën la ketre huliwa, the canga mekune kö la trenge mani hnei eö hna troa kapa. Ngo pane mekune jë la thangane la huliwa cili kowe la imelekeu i eö me Iehova. (Luka 14:28) Hnyinge jë ka hape: ‘Tune kaa elany la mele ne trefëneng, e tro ni a tro ananyin la föeng? Tro kö ni lai a sine lapane la itre icasikeu, me cainöj trootro, me hetre ijine troa ce lapa me itre trejin?’ Nge maine hetre nekö i eö, nyipiewekë tro eö a hnying ka hape: “Tro ni a hiane tune kaa la haneköng ‘ngöne la itre ihaji me itre ini qaathei Iehova,’ nge patre pe ni?” (Efe. 6:4) Thele jë la mekuna i Iehova, ngo the drenge kö la hna qaja hnene la itre fami i eö me itre sinee i eö ka tha metrötrëne kö la Tusi Hmitrötr.c Tony la ketre trejin ka lapa ngöne la götrane koië ne Asie. Anyimua hë angeic troa huliwa ngöne la ketre nöj. Ngacama huliwa hna nyithupene hnyawa, ngo hnei angeic hna pane thith me ce ithanatan memine la föi angeic. Matre hnei angeic hna thipëne la huliwa cili, me thele jëne troa acone la itre depas i fami. Ame la Tony hmaca a mekun, öni angeic: “Tru catre la madrineng, ke alanyimu la itre atr hnenge hna xatuan troa atre Iehova. Ketre, kola hnimi Iehova hnene la haneköng. Atre hë hun laka, maine tro pala hi huni a melën la hna qaja ngöne Mataio 6:33, ke tro kö Iehova a hamë hun la ka ijij.”

KOLA HNEHENGAZO GÖI ELANY

13. Tro sa hnëkën tune kaa la mele së elany, e qatre hë së?

¹³ Ijije hi troa tupath la mejiune së koi Iehova, ngöne la easa hnehengazone la mele së elany, e qatre hë së. Tusi Hmitrötr a ithuecatre koi së troa catre huliwa, matre hnëkën la itre drai elany. (It. Ed. 6:6-11) E ijiji easë hi, nyipiewekë tro sa ami mani acon. Eje hi laka, nyipiewekë la mani thatraqane la mel. (A. Cai. 7:12) Ngo ame pe, tha tro kö sa huliwane la mele së troa nyenyape thele mo.

14. Hnauëne laka, loi e tro sa mekun la Heberu 13:5 la easa ami mani acon kowe la drai elany?

¹⁴ Hnei Iesu hna hamën la ketre ceitun ka amaman ka hape, ka hmo la atr ka isine troa trene mani, ‘ngo ka pë pe ewekë koi Akötresie.’ (Luka 12:16-21) Pëkö ka atre la ka troa traqa elany. (It. Ed. 23:4, 5; Iako. 4:13-15) Nge ame pena së itre keresiano, hetre itre jol hne së hna cile kow. Hnei Iesu lo hna qaja ka hape, tha tro kö sa cil troa “nuetrij” asë la itre hne së hna hetrenyi matre xötrethenge nyidrë. (Luka 14:33, ith.) Celë hi lo hna kuca hnene la itre pane keresiano ne Iudra, nge madrine catr angatr. (Heb. 10:34) Ketre tun mina fe enehila, alanyimu la itre trejin ka nue la itre huliwa i angatr me itre mo i angatr, ke xele angatre troa sine la ketre parti politik. (Hna Am. 13:16, 17) Nemene la ka xatua angatr? Mejiune hi angatr kowe la hnei Iehova hna qaja ka hape: “Tha tro jë kö ni a triji eö, nge tha tro jë kö ni a nuaxöji eö.” (E jë la Heberu 13:5.) Ngacama easa isin troa ami mani acon kowe la drai elany, ngo e traqa ju la ketre jol, ke loi e tro sa mejiun kowe la ixatua i Iehova.

15. Tune kaa la aqane tro la itre kem me thin ka nyihlue i Iehova a goeëne la itre nekö i angatr? (Wange ju fe la foto.)

¹⁵ Ame ngöne la itre xaa nöj, itre trefën a hnaho, matre tro la itre nekö i angatr elany a huliwa koi angatr me thupë angatr, la angatr a qatr. Kösë hanekö i angatre pena la ka troa nyithupene la reteret i angatr. Ngo öni Tusi Hmitrötre lo, qanyin la itre kem me thin huliwa thatraqane la hanekö i angatr. (2 Kor. 12:14) Eje hi laka, tro la itre kem me thin elany a aja ixatua la angatr a utipië trootro, nge tro la itre nekö i angatr a madrin troa xatua angatr. (1 Tim. 5:4) Ngo ame la aja ne la itre kem me thin ka hmi, ke troa hiane la itre nekö i angatr matre nyihlue i Iehova, ngo tha göi nyithupei reteret kö.—3 Ioa. 4.

16. Tune kaa la aqane tro la itre kem me thin a xatuane la itre nekö i angatr troa öhnyi huliwa elany? (Efeso 4:28)

¹⁶ Jëne la tulu i epun, inine jë la hanekö i epun troa mejiun koi Iehova, me troa huliwa thatraqane la mele i angatr elany. Ame la angatr a tru trootro, ini angatre jë troa huliwa catr. (It. Ed. 29:21; e jë la Efeso 4:28.) Xatua angatre jë fe troa ini hnyawa. Loi e tro la itre kem me thin a ithel, me trongëne la itre trepene meköt la angatr a xatuan la itre nekö i angatr troa iëne hnyawa la itre ini hnei nyudren hna pi kuca. Nyipiewekë tro fe la keme me thin a xatuane la itre nekönatr troa isa debruie elany, me catre huliwa i Iehova.

17. Nemene la ka xecie koi së?

¹⁷ Loi e tro la itre hlue i Iehova a mejiun kowe la atrein me aja i Nyidrë troa thupë angatr. Ngo eje hi laka, kola easenyi trootro la pun, matre kola tupath la mejiune së koi Iehova. Ame pe, traqa ju hë la nöjei pengöne jol, ngo catre pi së mejiun kowe la atreine i Iehova troa hamë së la ka ijij. Epi troa xecie koi së laka, tro pala hi Iehova a xatua së isa ala cas.