Nyine Loi Koi Së Troa Easenyi Itre Xan!

1-2. Drei la hnei Iehova hna hnime catrën, nge nemene la hnei Nyidrëti hna upi së troa kuca?

IEHOVA a goeëne la aqane ujë së koi itre xan. Nge hnei Iesu hna upi së troa hnime la atr lapa easenyi së, tu së hi. (Mat. 22:37-39) Kolo lai a hape, troa loi thiina kowe la itre atr ka tha hmi kö me easë. Easë hi lai a nyitipu Iehova, lo Atre “axulune la jö kowe la itre atr ka ngazo me ka loi, me axulune la mani kowe la itre atr ka meköt me ka tha meköti kö.”—Mat. 5:45.

² Ngacama Iehova a hnime la nöjei atr asë, ngo ka tru kö koi Nyidrë la itre atr ka kuca la loi. (Ioa. 14:21) Aja i Nyidrë tro sa nyitipu Nyidrë. Celë hi matre Nyidrëti a upi së troa ‘catre hnime’ la itre trejin. (1 Pet. 4:8; Roma 12:10) Loi e troa ceitu la ihnimi së kowe la itre trejin, memine la ihnimi së kowe la itre atrene la fami me itre sinee së.

3. Nemene la nyine tro sa kuca matre troa kökötre la ihnim?

³ Ceitune hi la ihnim memine la ketre iengen hne së hna tran. Nyipiewekë tro sa nyihnyawane ej matre tro ej a cia lolo. Celë hi matre, Paulo aposetolo a qaja kowe la itre keresiano ka hape: “Loi e cile huti la ihnimi trejin.” (Heb. 13:1) Aja i Iehova tro sa acatrene la ihnimi së koi itre xan. Ame ngöne la tane mekune celë, tro sa ce wange la kepine matre nyipiewekë tro sa easeny kowe la itre trejin me aqane tro pala hi sa easenyi angatr.

KEPINE MATRE TROA EASENYI CATR KOWE LA ITRE TREJIN

4. Thenge la Salamo 133:1, tune kaa la aqane tro pala hi sa wangatrune la casi së me itre trejin e cailo fen? (Wange ju fe la foto.)

⁴ E jë la Salamo 133:1. Casi hi la mekuna së memine la atre cinyihane la Salamo la kola hape, “mingöminge me lolo pi hë” la troa nyisineene la itre ka hnimi Iehova. Ijije hi tro sa wangacone la ketre isinöe ka tru, e tro pala hi sa tro qëmeken ej. Ketre tune mina fe, ijije hi tro sa wangacone la casi së me itre trejin e cailo fen. Eje hi, easë pala hi a iöhnyi memine la itre trejin e nöjei wiik. Matre tune kaa la aqane tro pala hi sa wangatrune la aqane imelekeu së me angatr? Loi e tro sa mekune la ixatua hnei angatr hna isa hamëne kowe la ekalesia, me koi easë mina fe, matre troa kökötre la ihnimi së kowe la itre trejin.

5. Ame la itre xan a öhne la ihnimi së, nemene la thangan?

⁵ Ame la itre xan a xötrei sine la itre icasikeu, hna ketri angatr hnene la aqane ihnimikeu së. Nge ame la angatr a öhne lai, angatr a qaja ka hape, e cili hi la nyipici. Öni Iesu lo: “Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioa. 13:35) Tro sa ce wange la hna melëne hnei Chaithra, ka ini ngöne université nge ka ini Tus me itre Temoë Iehova. Hna hane hë angeic troa sine la ketre asabele ka tru. Ame la kola ase la pane drai, öni angeic kowe la ka ini Tus koi angeic ka hape: “Tha ase fe kö kaka me nenë hane haluthi ni. Ngo ame ngöne hi la ca drai, ke 52 lao atr ka haluthi ni. Ame koi ni, hnei Iehova hna upe la itre trejin troa amamane koi ni la ihnimi Nyidrë. Eni a ajane troa nyiatrene la fami Nyidrë.” Hnei Chaithra hna catre ini Tus me xomi bapataiso lo 2024. Ame la kola öhne hnene la itre ka xötrei traqa la aqane ujë së memine la ihnimi ka ej the së, ke kola thue aja koi angatr troa hane nyihlue i Iehova.—Mat. 5:16.

6. Pine nemen matre ka hetre thangane la troa easenyi catr kowe la itre trejin?

⁶ Hetre thangane la easa easenyi catr kowe la itre trejin. Öni Paulo kowe la itre keresiano: “E nöjei drai, catre pi ithuecatrekeu. . . Qa ngöne lai, the tro pi kö ketre a axetine la hni angeic hnene la mene ka iaö ne la ngazo.” (Heb. 3:13) Maine tro sa nyiqane dekurag, me jea qa ngöne la gojeny ne la meköt, tro Iehova lai a upe la ketre trejin troa xatua së. (Sal. 73:2, 17, 23) Nyine loi koi së troa kapa la itre ixatua qaathei angatr.

7. Pine nemene matre ka ce tro la ihnim me cas? (Kolose 3:13, 14)

⁷ Easa nyiatrene la ketre lapa ka ihnimikeu, nge tru la itre manathith hne së hna kapa. (1 Ioa. 4:11) Ihnim la ka upi së tro pala hi a “ixomihnikeu,” nge celë hi ka acatrene la casi së. (E jë la Kolose 3:13, 14; Efe. 4:2-6) Celë hi matre ka tingeting me lolo la itre icasikeu së, nge pëkö ketre lapa e cailo fen ka tun.

METRÖTRËNE JË LA ITRE XAN

8. Tune kaa la aqane acatrene Iehova la casi së?

⁸ Nyine haine la aqane casi së memine la itre trejin e cailo fen. Iehova a aijijëne lai ngacama itre atr ka tha pexeje kö së. (1 Kor. 12:25) Öni Tusi Hmitrötr, “Akötresie la atre ini [së] troa ihnimikeu.” (1 Thes. 4:9) Kolo lai a hape, jëne la Tusi Hmitrötr, Iehova a amamane koi së la nyine tro sa kuca matre easenyi catr koi itre xan. Maine tro sa lapa mekun me trongëne la itre ini qaathei Akötresie, easë hi lai a nue ‘Akötresie troa ini së’. (Heb. 4:12; Iako. 1:25) Celë hi lai hna kuca hnene la itre Temoë Iehova!

9. Thenge la Roma 12:9-13 nemene la aqane tro sa metrötrë itre xan?

⁹ Tune kaa la aqane ini së hnei Tusi Hmitrötr troa easeny koi itre xan? Tro sa ce wange la hnei Paulo hna qaja ngöne Roma 12:9-13. (E jë.) Öni Paulo, nyipiewekë troa “pa troa metrötrë ketre.” Kola hapeue lai? Pa i easë troa amamane la ‘ihnim’ koi itre xan, la easa nue la itre ngazo i angatr me ikep me ham. (Efe. 4:32) Tha tro kö sa treqene tro la itre trejin a tro koi së. Loi e tro sa tro koi angatr, e cili easa jelenyipicine lo hnei Iesu hna qaja ka hape: “Sisitria catre kö la madrine ne la atre ham, hune la atre kapa.”—It. Hu. 20:35.

10. Kola hapeu la troa catre huliwa la easa “metrötrë” itre xan? (Wange ju fe la foto.)

¹⁰ Thupene la hnei Paulo hna upi së troa pa troa metrötrë ketre, öni angeic, “huliwa jë, the genyi kö.” Ame la atr ka huliwa, ke ka nu asë la trengecatre i angeic kowe la huliwa. Ame la kola athipe koi angeic la ketre hnëqa, ke angeic a eatrëne hnyawan. Öni Itre Edromë 3:27, 28: “The cipane kö la loi kowe la itre ka aja ixatua e ijiji ö hi.” Matre e öhne hi easë la ketre atr ka aja ixatua, ke loi e tro sa kuca asë la hnei easë hna atrein matre xatua angeic. Tha tro kö a uthe koi elany, maine inuekeun.—1 Ioa. 3:17, 18.

11. Nemene la ka troa xatua së troa easenyi itre xan?

¹¹ Ame la ketre aqane tro sa metrötrë itre xan, ke ene la troa canga nue la itre ngazo i angatr. Öni Efeso 4:26: “The nue kö troa lö la jö nge ka elëhni pala hi nyipunie.” Pine nemene matre tha ka loi kö troa lapa fë trengehni? Önine la xötre 27, matre tha tro kö a “nue jë i Diabolo.” Ame ngöne la Tusi Hmitrötr, anyimua upi së hnei Iehova troa nue la ngazo itre xan. Kolose 3:13 a hape, “the mano kö . . . inualoinekeun.” Tro sa easeny koi itre xan, e tro sa elëhune la itre tria i angatr. Ame la easa ujë tun, easë hi lai a acatrene la cas “lo hnei [easë] hna kapa jëne la ua.” (Efe. 4:3) Eje hi, e tro sa nue la ngazo i itre xan, easë hi lai a acatrene la cas memine la tingeting.

12. Iehova a xatua së tune kaa troa nue la ngazo itre xan?

¹² Ame itre xaa ijin, jole koi së troa nue la ngazo ne la atr ka akötrë së. Ngo ijije hi jëne la ixatua ne la uati hmitrötr. Thupene la Paulo a upi së troa “ihnimikeu” me “huliwa,” öni angeic: “Nue pi la uati hmitrötre troa aegöcatrenyi nyipunie.” Kolo hi lai a hape, ijije hi tro la uati hmitrötr a hamë së la catr me madrin. (Roma 12:11.) Eje hi, tro la uati hmitrötr a xatua së troa ihnimikeu me nue la ngazo itre xan. Haawe, catre jë sipo ixatua koi Iehova.—Luka 11:13.

“THA TRO KÖ A THË LA LAPA I NYIPUNIE”

13. Nemene la ka troa thë la casi së?

¹³ Hetrenyi ngöne la ekalesia la “nöjei pengön atr” ka xulu qa ngöne la itre xaa nöj, nge ka isa aqane mele kö. (1 Tim. 2:3, 4) Matre, isa aqane ië ewekë së göi hnaheetr me aqane isej me aqane nyinyine la itre sine mec me nyine iamadrinë. E tha hmeke kö së, tro la aqane ië ewekë së a thë la cas ne la ekalesia. (Roma 14:4; 1 Kor. 1:10) Ngo pine laka hna ‘ini së hnei Akötresie troa ihnimikeu,’ haawe tha easë kö a selën laka, ka lolo kö la aqane ië ewekë së hu itre xan.—Fil. 2:3.

14. Tune kaa la aqane tro së a ujë koi itre xan, nge pine nemen?

¹⁴ Loi e tro pala hi sa ithuecatr, matre tha tro kö a thë la cas ne la ekalesia. (1 Thes. 5:11) Alanyimu la itre ka nanazij ka sine hmaca la itre icasikeu, nge alanyimu la itre hna upe ka bëeke hmaca koi Iehova. Aja së troa kepe angatre hnyawa! (2 Kor. 2:8) Hane hi la hna qaja hnene la ketre trejin föe ka bëeke hmaca kowe la itre icasikeu, nge 10 lao macatre ne nanazij angeic. Öni angeic, “Tru catre la itre trejin ka hnyimahnyima me ibozu me eni.” (It. Hu. 3:19) Nemene la thangane koi angeic? Öni angeic, “Kösë ime Iehova a abëekë ni kowe la mele ka loi.” E tro sa isine troa ithuecatr koi itre xan, tro Keriso a huliwa së matre akeukawane la itre “ka kucakuca me hace.”—Mat. 11:28, 29.

15. Nemene la ketre aqane tro sa acatrene la cas? (Wange ju fe la foto.)

¹⁵ Nemene la ketre aqane tro sa acatrene la cas? Hnene la aqane ithanata së. Iobu 12:11 a hape: “Hapeu, tha hnangenyë kö la ka waipengöne la itre trengewekë tune la kola tupathe la xen hnene la thinem?” Ame la easa kuci xen, easa pane tupath la hnei easë hna hnëkën matre wange ka hape, ka hnyapa kö, qëmekene troa tro fë koi itre xan. Ketre tun, easë a pane lapa mekune hnyawan la hne së hna troa qaja qëmekene troa ithanata. (Sal. 141:3) Qëmekene tro sa ithanata, loi e troa xecie koi së ka hape, ame la hne së hna qaja, ke ka xupe draiën nge ka ithuecatr, nge ka “hetre eloin kowe la atre dreng.”—Efe. 4:29.

16. Drei la itre ka troa qaja la itre trengewekë ka ithuecatr?

¹⁶ Nyipiewekë tro la itre trahmany me itre kem me thin a qaja la itre trengewekë ka ithuecatr. (Kol. 3:19, 21; Tito 2:4) Tune mina fe la itre qatre thup, ke angatr la itretre thupëne la hna axö mamoe i Iehova. (Isa. 32:1, 2; Gal. 6:1) Önine la ketre edromë: “Tha aqane lolo kö la trengewekë hna qaja ngöne la nyipi ijin!”—It. Ed. 15:23.

IHNIME JË “HNEI HULIWA ME NYIPICI”

17. Nemene la nyine tro sa kuca matre nyipici la ihnimi së kowe la itre trejin?

¹⁷ Ioane aposetolo a upi së troa ihnimikeu tha hnei “trengewekë me thinem, ngo hnei huliwa me nyipici.” (1 Ioa. 3:18) Loi e troa nyipici la ihnimi së kowe la itre trejin. Troa tune kaa? Loi e tro sa ce tro lapa me angatr. E cili easa easenyi catr koi angatr, nge kola kökötr la ihnimi së. Thele jë la itre ijine troa ce tro me angatr ngöne la itre icasikeu me ngöne la hna cainöj trootro. Xomi ijine jë troa wai angatr ngöne la hnalapa i angatr. Easë hi lai a amaman ka hape, hna ‘ini së hnei Akötresie troa ihnimikeu.’ (1 Thes. 4:9) Tro epuni lai a öhne ka hape, “mingöminge me lolo pi hë la itre trejin a cas me ce lapa!”—Sal. 133:1.