TANE MEKUN 15
NYIMA 30 Tretretrong, Akötresingö Nge Enehmung
Nyine Loi Koi Së “Troa Easenyi Akötresie”!
“Ame koi ni, ka loi kö la troa easenyi Akötresie.”—SAL. 73:28.
MEKUN KA TRU
Tro sa ce wang la aqane tro sa easenyi catr koi Iehova memine la itre eloin hne së hna troa kapa.
1-2. (a) Nemene la nyine tro sa kuca matre nyisinee i ketre? (b) Nemene la hne së hna troa ce wang ngöne la tane mekun celë?
HETRE sinee i eö kö hnei eö hna hnime catrën? Nemene la hnei eö hna kuca matre nyisinee i angeic? Maine jë, hnei eö hna xomi ijin troa atre la pengöi angeic, me itre jole hnei angeic hna melën, me itre hnei angeic hna ajan me xelen. E cili, hnei eö hna öhne la itre thiina i angeic ka lolo nyine tro eö a nyitipun. Matre tru hë la ihnimi eö koi angeic.
2 Nyipici laka, tru la traem me trengecatr hne së hna nu matre acatrene la aqane imelekeu së memine la sinee së. Ceitune hi lai memine la easa acatrene la imelekeu së me Iehova. Ame ngöne la tane mekun celë, tro sa ce wang la aqane troa easenyi catr koi Iehova, memine la itre eloin hne së hna troa kapa qa ngön. Tro sa pane ce wang la kepin matre nyine loi koi së troa easenyi catr koi Iehova, lo Nyipi Sinee së.
3. Hnauëne laka, loi e tro sa lapa mekun la itre eloine troa easenyi catr koi Iehova? Qaja jë la ketre ceitun.
3 Eje hi, xecie hnyawa koi së asë ka hape, ka loi la troa easeny koi Iehova. Ngo e tro eö a lapa mekun la itre eloine troa easenyi Nyidrë, tro pala hi eö lai a kuca tun. (Sal. 63:6-8) Tro sa xom la ketre ceitun: Atre hi easë ka hape, nyipiewekë tro sa xeni hnyawa, me kuci spor, me mano, me iji tim atrun. Nyine loi koi së la itre ewekë cili. Ngazo pe, alanyimu la ka wangacone la itre hna majemine cili, me angazon la ngönetrei i angatr. Matre nemene la ini koi së? Maine tro sa lapa mekun la eloine la itre ewekë cili kowe la mele së, ke tro hë lai a uku së troa thupën hnyawa la ngönetrei së. Ketre tun, atre hi së laka, nyine loi koi së la troa easenyi catr koi Iehova. Matre e tro sa lapa mekun la itre manathith hne së hna troa kapa qa ngön, ke tro hë lai a uku së troa easenyi catre koi Nyidrë.—Sal. 119:27-30.
4. Nemene la hna qaja hnene la atre cinyianyin la Salamo 73:28?
4 E jë la Salamo 73:28. Ame la atre cinyihane la Salamo 73, ke ketre atre Levi hna acile troa elo miuzik ngöne la uma ne hmi i Iehova. Ekö hë angeic nyihlue i Iehova. Ngo ame koi angeic, nyipiewekë tro angeic me itre xan a mekun lapane ka hape, ka loi koi angeic me itre xan la troa “easenyi Akötresie.” Matre nemene la itre eloin?
JËNE MADRIN LA TROA “EASENYI AKÖTRESIE”
5. (a) Pine nemene matre jëne madrin la troa easeny koi Iehova? (b) Thenge la Itre Edromë 2:6-16, qaja jë la itre aqane xatua eö hnene la inamacan qaathei Iehova.
5 Maine tro sa easenyi catr koi Iehova, tro hë së lai a madrin. (Sal. 65:4) Pine nemen? Pine laka, ame la easa e me trongëne la hna qaja hnei Tusi Hmitrötr, ke kola ainamacanë së. Nge tro la inamacan cili a thupë së qa ngöne la itre iajojezi ne la fen, me sewe së troa kuca la itre ngazo ka tru. (E jë la Itre Edromë 2:6-16.) Celë hi matre, öni Tusi Hmitrötr: “Madrine la atre öhne la inamacan, memine la atr ka atreine waiewekë.”—It. Ed. 3:13.
6. Hnauëne laka, tha madrine hë la atre cinyianyin la Salamo?
6 Eje hi laka, ka hane dekurag la itre hlue i Iehova. Celë hi la hna melën hnene la atre cinyianyin la Salamo 73. Hna traqa koi angeic la itre mekun ka jol, matre tha madrine hë angeic. Hnei angeic hna wesitr, me piine la itre atr ka ngazo ke, ame koi angeic, ka lolo la mele i angatr, ngacama tha ka hnimi Akötresieti kö angatr, me trongëne la itre trepene meköt. Angeice ha mekun menun ka hape, angatr pala hi a trenamo, nge pë fe kö sine meci angatr, nge kösë pë fe kö akötre i angatr. (Sal. 73:3-7, 12) Jole catre hë la mekuna ne la atre cinyianyin la Salamo, matre angeice ha hnying ka hape, nyine u hmaca kö la troa nyihlue i Iehova. Tru pala ha la akötre i angeic, matre öni angeic: “Ka gufa la hnenge hna awiëne la hning, memine lo eni a wasi wanakoim ngöne la pë ethan.”—Sal. 73:13.
7. Tune kaa la aqane tro sa xomihnine la akötr? (Wange ju fe icetrön.)
7 Eloine pe, tha hnei angeice kö hna nue la akötre troa ananazijë angeic. Hnei angeic hna “lö ngöne la uma ne hmi ka sisitria i Akötresie,” nge hnei Iehova hna amekötin la mekuna i angeic. (Sal. 73:17-19) Matre, öhne hi Iehova, ene lo nyipi Sinee së, la easa treije me akötr. Maine tro sa sipo ixatua koi Nyidrë ngöne la thith, me kapa la ixatua i Nyidrë jëne la Tusi Hmitrötr memine la ekalesia, ke tro hë së lai a hetre trengecatr troa xomihnine la akötr. Nge ame fe la kola thipahacen la hni së hnene la hnehengazo, tro kö Iehova a aupunyi së me akeukawanyi së.—Sal. 94:19.a
Ame la atre Levi ka cinyianyin la Salamo 73, ke angeic e hnine la “uma ne hmi ka sisitria i Akötresie” (Wange ju la paragarafe 7)
HETRE ELOIN KOI SË ENEHILA ME ELANY TROA “EASENYI AKÖTRESIE”
8. Nemene la lue xaa eloin troa easenyi catr koi Akötresie?
8 Hane hi la lue xaa kepin, matre nyine loi koi së troa easenyi catr koi Akötresie: kola xatua së troa hetre mele ka loi enehila, me thue mejiune së göi elany. (Iere. 29:11) Tro hë sa ce wang la lue ewekë cili.
9. Pine nemene matre jëne madrin la troa easenyi catr koi Iehova?
9 Maine tro sa easenyi catr koi Iehova, tro hë sa mele ka loi enehila. Ngazo pe, ala nyimu la itre atr ka mekun ka hape, pëkö Akötresie, matre ame koi angatr, pëkö aliene la mel, nge tro ha patr elanyi la itre atr qa celë fen. Ngo pine laka, hne së hna inin la Tusi Hmitrötr, matre xecie koi së laka, “ka mele [Akötresie], nge nyidrëti la atre nyithupen kowe la itre ka thele nyidrë.” (Heb. 11:6) Eje hi, hna xupi së troa nyihlue i Iehova. Celë hi matre easa madrin enehila.—Dreut. 10:12, 13.
10. Thenge la Salamo 37:29, troa tune kaa la mel elany ne la itre ka mejiun koi Iehova?
10 Tru la itre ka mekun laka, ame la nyipi mel, ke troa hetre huliwa, troa faipoipo, me hetru nekönatr, me hnëkën la reteret. Ngo tha nyipiewekë kö Akötresie koi angatr. Ame kö la itre hlue i Iehova, angatr a amë la mejiune i angatr koi Nyidrë. (Sal. 25:3-5; 1 Tim. 6:17) Easa mejiun kowe la Akötresie hne së hna atre hnyawa, nge easë fe a mejiun kowe la itre hnei Nyidrëti hna thingehnaean. Easa lapa treqene la ijine tro sa nyihlue i Iehova uti hë epine palua ngöne la paradraiso.—E jë la Salamo 37:29.
11. Nemene la itre manathith hne së hna kapa la easa easeny koi Akötresie, nge tune kaa fe Nyidrë?
11 Tru la itre manathith hne së hna troa kapa, e tro sa easenyi catr koi Akötresie. Ame la ketre, ke tro Iehova a nue la ngazo ne la itre ka ietra, nge ka easenyi koi Nyidrë. (Isa. 1:18) Matre tha tro hmaca kö a ahacenyi së hnene la itre ngazo së ekö. (Sal. 32:1-5) Nge ijiji së hë troa amadrinën la hni i Iehova. (It. Ed. 23:15) Ma hetre xaa manathithi kö hnei epuni hna kapa, la epuni a easenyi catr koi Akötresie. Ngo nemene la nyine tro sa kuca, matre tro pala hi a easenyi Nyidrë?
AQANE TRO PALA HI SA “EASENYI AKÖTRESIE”
12. Nemene la hnei eö hna kuca matre easeny koi Akötresie?
12 Maine ka bapataiso hë eö, ke kolo hi lai a amamane ka hape, hnei eö hna nue trengecatr troa nyisinee i Iehova. Hnei eö hna atrepengöi Iehova Akötresieti hnyawa me Iesu Keriso, me ietran la itre ngazo i eö, me acatren la lapaune i eö, me kuca asë la hnei eö hna atrein matre drengethenge Nyidrë. Ngo maine aja së troa easenyi catr koi Akötresie, nyipiewekë tro pala hi sa kuca la itre ewekë cili.—Kol. 2:6.
13. Nemene la köni ewekë nyine tro sa kuca, matre tro pala hi a easeny koi Iehova?
13 Nemene la nyine tro sa kuca, matre tro pala hi sa easenyi catr koi Iehova? (1) Loi e tro pala hi sa e me inin la Tusi Hmitrötr. Tha tro hmekuje kö sa thel troa atre la itre ini ka tru göi Akötresie. Ngo loi e tro fe sa atre la aja i Akötresieti koi së, me trongëne la itre trepene meköt i Nyidrë. (Efe. 5:15-17) (2) Loi e tro sa acatrene la lapaune së, me lapa mekun la itre hatrene ihnim i Nyidrëti koi së. (3) Loi e tro sa xelen la itre huliwa ka akötrëne la hni i Iehova, me ananyine la itre atr ka catre kuca la itre ewekë cili.—Sal. 1:1; 101:3.
14. Thenge la 1 Korinito 10:31, nemene la itre xaa ewekë nyine tro sa kuca e nöjei drai matre amadrinë Iehova? (Wange ju fe la foto.)
14 E jë la 1 Korinito 10:31. Emele së hi lai troa kuca la itre ewekë ka amadrinë Iehova. Tha tro hmekuje kö sa cainöje trootro me sine la itre icasikeu. Ngo ame e nöjei drai, loi e tro sa kuca la itre huliwa ka amadrinë Iehova, tune la troa huliwa nyipici, me ce thawa me itre xan la hne së hna hetreny. (2 Kor. 8:21; 9:7) Ketre, aja i Iehova fe tro sa wangatrun la mel. Ame la easa thupën la aqane xeni me iji kahaitr, me itre xaa ewekë ju kö, easë hi lai a easenyi koi Iehova, Atre hamë mel. Ame la Iehova a öhnyi së a kuca la itre ewekë ka amadrinë Nyidrë ngöne la gaa co, ke kola tru la ihnimi Nyidrëti koi së.—Luka 16:10.
Madrine catre Iehova la easa nyape hnyawa me loto, me thupën la mele së, me kuci spor, me xeni hnyawa, me ikep (Wange ju la paragarafe 14)
15. Tune kaa la aqane tro sa ujë koi itre xan matre amadrinë Iehova?
15 Iehova a hnim la itre atr ka meköt me ka tha meköti kö. (Mat. 5:45) Nge aja i Nyidrëti tro fe së a hane ujë tun. Xele Nyidrë tro sa “iqejegele, me iwesitrë lapa,” ngo loi e tro pe së a “menyike koi nöjei atr.” (Tito 3:2) Matre tha tro kö sa xele ma wang la itre atr ka isa hmi kö me easë. (2 Tim. 2:23-25) Maine tro pala hi sa hnime me wangatrune la itre xan, tro hë së lai a easenyi catr koi Iehova.
IJIJE HI TRO SA “EASENYI AKÖTRESIE” NGACAMA HNE SË HNA TRIA
16. Nemene la hna mekun hnene la atre cinyanyin la Salamo 73?
16 Ngo tune kaa e hnei eö hna tria, nge eö ha mekun ka hape, tha ijiji Iehova kö troa hane hnimi eö? Eje hi lo mekuna ne la atre cinyanyin la Salamo 73. Hnei angeic hna treij me hape: “Xönë hi tro ni a jea; maine ju, tro la lue cang a ucic.” (Sal. 73:2) Hnei angeic hna “lapa fë trenge hni” me “pë atrehmekun,” nge ‘kösë ketre öni’ angeic qëmekei Iehova. (Sal. 73:21, 22) Hapeu, angeice kö a mekun laka, ketre atr ka luzi hë angeic, nge tha ijiji Iehova hmaca kö troa hnimi angeic?
17. (a) Nemene la hna kuca hnene la atre cinyanyin la Salamo la angeic a dekurag? (b) Tro sa nyitipu angeic tune kaa? (Wange ju fe la itre foto.)
17 Hnene la atre cinyanyin la Salamo hna mekun laka, hnei Iehova hna nuetriji angeic. Ngo hnei angeic hna canga lepetrij la mekune cili. Ame lo angeic a pë trengecatr, ke hnei angeic hna atrehmekun e cili laka, ka nyipiewekë tro angeic a easenyi catr koi Akötresie. Celë hi ka mama ngöne la itre trengewekë i angeic. Öni angeic: “Ngo ame enehila, ce eni pala hi me nyipë [Iehova]; ke hnei nyipëti hna ea la ime macang. Nyipëti a e ni hnene la eamo i nyipë, nge tro kö nyipëti a xomi ni kowe la lolo.” (Sal. 73:23, 24) Ketre tu së fe, loi e tro sa qale koi Iehova, Giti së, ngöne la easa pë trengecatr me dekurag. (Sal. 73:26; 94:18) Nge e traqa ju së tria, ke ijije hi tro hmaca së a bëeke koi Iehova, ke aja i Nyidrë troa “nue la ngazo.” (Sal. 86:5) Ame hnyawa hi lo easa pë trengecatr, ke ijine hi lai tro sa easenyi catr koi Akötresie.—Sal. 103:13, 14.
Maine easa nyiqane nanazij, loi e tro sa easenyi catr koi Iehova me catre huliwa i Nyidrë (Wange ju la paragarafe 17)
‘EASENYI JË KOI AKÖTRESIE’ UTI HË EPINE PALUA
18. Pine nemene matre tro pala hi sa easenyi Iehova uti hë epine palua?
18 Tro sa easenyi catr koi Iehova uti hë epine palua, ke hetre nyine tro pala hi sa inin göi Nyidrë. Öni Tusi Hmitrötr, “pë fe kö ka hane öhn la etrune” la itre huliwa, me inamacan, me atrehmekune i Iehova.—Roma 11:33.
19. Nemene la ka xecie koi së ngöne la tusi Salamo?
19 Salamo 79:13 a hape: “Tro hun, lo nöje i nyipë memine la hnënge mamoe ne la zi i nyipë, a olene koi nyipë epine palua; nge tro huni a qaja trongëne la nyine atrunyi nyipë kowe la nöjei xötr.” E tro eö a easenyi catr koi Akötresie, atre ju hi eö laka, ijiji eö fe troa hane kapa la itre manathith ka epine palua, me qaja ka hape: “Akötresie la giti ne la hning, me edröng epine palua.”—Sal. 73:26.
NYIMA 32 Ië Iehova Jë Së!
a Maine ekö hë epuni dekurag, maine hnehengazo, maine treije lapa pena, ke loi e tro epuni a thele ixatua thene la ketre droketre. Maine epuni a aja itre xaa ithuemacany, wange ju la Ita Ne Thup Na. 1 2023.