Tha Easë Casi Kö

1-2. (a) Pine nemene matre tha easë casi kö la kola traqa la itre jol? (b) Nemene la hne së hna troa ce wang ngöne la tane mekun celë?

AME la easa cile kowe la itre jole ka tru, ke kösë easa cas hune la neköi botr, nyipine la hnagejë ka enije catr. Ngo tha easë casi kö. Öhne hi Iehova Keme së la itre jol hne së hna cile kow, nge tro kö Nyidrëti a xatua së. Öni Nyidrë kowe la itre hlue i Nyidrëti ka hape: “Tro ni a xatua eö.”—Isa. 41:10.

² Ame ngöne la tane mekune celë, tro sa ce wange la aqane xatua së hnei Iehova, Nyidrëti a (1) eatrongë së, (2) hamë së la ka nyipiewekë, (3) thupë së, me (4) akeukawanyi së. Tha tro kö Nyidrëti a thëthëhmi së me nuetriji së, ngacama traqa ju hë la nöjei pengöne jol. Matre tha easë casi kö.

IEHOVA A EATRONGË SË

3-4. Tune kaa la aqane eatrongë së hnei Iehova? (Salamo 48:14)

³ E jë la Salamo 48:14. Tha aja i Iehova kö tro sa ketre sipu mus. Tune kaa la aqane eatrongëne Nyidrë la itre hlue i Nyidrëti enehila? Jëne la Tusi Hmitrötr. (Sal. 119:105) Jëne la Tusi Hmitrötr, Iehova a xatua së troa axecië mekun me huliwane la itre thiina ka xatua së troa mele madrin enehila, me kapa la mele ka pë pun elany.a Nyidrëti a ini së troa thiina ka loi me ihnimikeu qa kuhu hni, nge tha tro kö a lapa fë trengehni. (Sal. 37:8; Heb. 13:18; 1 Pet. 1:22) Ame la easa ujë tun, ke kola xatua së troa xome hnyawane la hnëqa ne kem me thin, me lolo la mele ne trefëne së, me acatrene la imelekeu së me itre sinee.

⁴ Ketre, hnei Iehova hna amë e hnine la Tusi Hmitrötr, la hna melën hnene la itre hlue i Nyidrë ka hane fe cile kowe la itre jol me akötr tui easë. (1 Kor. 10:13; Iako. 5:17) Ame la easa e la itre hnei angatr hna melën me trongëne la itre ini qaathei angatr, ke easa kepe thangan. Tune kaa? Ame la hnapan, easa öhne laka, tha easë casi kö la hna ketr hnei itre jol. Hnene fe la itre xan hna cil kowe la itre jole cili, nge hnei angatr hna cile catr. (1 Pet. 5:9) Nge ame la hnaaluen, easa inine troa cile kowe la itre jol.—Roma 15:4.

5. Drei la hnei Iehova hna up matre eatrongë së ngöne la gojenyi ne mel?

⁵ Iehova mina fe a upe la itre trejin troa eatrongë së.b Itretre thupë sirkoskripsio a wange trongëne la itre ekalesia matre ithuecatre koi angatr. Angatr a cile fë la itre cainöj ka acatrene la lapaune së me ithuecatre koi së tro pala hi a cas. (It. Hu. 15:⁠40–16:5) Itre qatre thup fe a wangatrune la itre trejin ne la ekalesia. (1 Pet. 5:2, 3) Itre kem me thin a xatuane la itre nekö i angatr troa hnimi Iehova, me xom la itre mekune ka loi, me hetreny la itre hna majemin ka lolo. (It. Ed. 22:6) Nge itre trejine föe ka macaj a amamai tulu kowe la itre trejin föe ka co, me hamë eamo me itre ithuecatr ka lolo.—Tito 2:3-5.

6. Nemene la nyine tro sa kuca matre kepe thangane qa ngöne la itre eamo i Iehova?

⁶ Iehova a thele jëne matre, tro pala hi sa kapa la itre eamo nyine xatua së troa axeciëne la itre mekun ka loi, me mele madrin. Tro sa olene tune kaa kowe la itre hnei Nyidrëti hna kuca koi së? Öni Itre Edromë 3:5, 6: “Mejiune ju koi Iehova hnene la hni i ö ka pexej, nge the lapa qale kö kowe la sipu inamacane i ö.” Maine eje hi lai hne së hna kuca, tro“nyidrëti a amekötine la itre jë [së].” Eje hi troa trianyi së hnene la itre jol ka nyimutre nge tro sa madrin. Tru la ole së kowe la itre eamo i Iehova ka ihmeku memine la itre hne së hna melën!—Sal. 32:8.

IEHOVA A HAMË SË LA KA NYIPIEWEKË

7. Tune kaa la aqane hamëne Iehova la ka nyipiewekë koi së? (Filipi 4:19)

⁷ E jë la Filipi 4:19. Tha Iehova hmekuje kö a amanathithine la itre trengecatr hne së hna kuca matre easenyi Nyidrë. Nyidrëti fe a amanathithi së la easa thele troa hetre xen, me iheetr me uma. (Mat. 6:33; 2 Thes. 3:12) Tha ka ngazo kö troa hnehengazone la itre ewekë cili, ngo tha aja i Iehova kö tro sa hnehengazo menu pala ha. (Mat. 6:25.) Pine nemen? Ke tha tro jë kö Nyidrëti a nuetrij la itre hlue i Nyidrë la angatr a akötr. (Mat. 6:8; Heb. 13:5) Haawe, loi e tro sa mejiune koi Nyidrë la Nyidrëti a qaja ka hape, tro Nyidrëti a hamë së la ka nyipiewekë kowe la mele së.

8. Tune kaa la aqane xatua Dravita hnei Iehova?

⁸ Tro sa ce wange la aqane xatua Dravita hnei Iehova. Ame lo Dravita a kötre mel, hnei Iehova hna hamëne koi angeic me kowe la itre atre i angeic la ka ijij. Ame la Dravita a mekune hmaca la aqane thupë angeic hnei Iehova qane ekö, öni angeic: “Nekö trahmanyi ni ekö, nge qatr hë ni enehila, ngo tha ase kö ni öhne la kola nuetrije la atr ka meköt, me kola thele xen la itre nekö i angeic.” (Sal. 37:25) Ma öhne fe hi eö la aqane thupëne Iehova la itre hlue i Nyidrë ka cile kowe la itre jol.

9. Tune kaa la aqane xatuane i Iehova la itre hlue i Nyidrë ngöne la itre ijine hulö? (Wange ju fe la foto.)

⁹ Iehova fe a hamëne la ka nyipiewekë kowe la itre hlue i Nyidrë hna lep hnei hulö. Ame ngöne lo hneijine la itre pane keresiano, hna lep la götrane Iudra hnene la ketre jiin atraqatr. Hnene la itre keresiano qa ngöne la itre xaa nöj hna iupi fë ahnahna kowe la itre trejin ne Iudra. (It. Hu. 11:27-30; Roma 15:25, 26) Ame enehila mina fe, ka ham la itre hlue i Iehova. Tru la ihnimi Iehova, matre ame la kola lep la ketre nöj hnene la hulö, Nyidrëti a upe la itre hlue i Nyidrë troa iupi fë xen, me tim, me iheetr me itre drösinöe kowe la itre götrane cili. Nge itre ka xupi uma ne Baselaia a nyihnyawane la itre hnalapa me itre Uma Ne Baselaia hna thë. Nge itre xaa hlue i Iehova a akeukawan me acatren la lapaune la itre hna lep hnei hulö.c

10-11. Nemene la hna ini së hnene la hna melën hnei Borys?

¹⁰ Iehova mina fe a xatuane la itre atr ka tha nyihlue i Nyidrëti pala kö. Easa nyitipu Nyidrë la easë a thele jëne troa xatuane la itre atr ka tha hmi kö me easë. (Gal. 6:10) Ame la easë a ujë tun, easë hi lai a aijijëne la itre atr troa atrepengöi easë hnyawa me Iehova. Tro sa ce wange la hna melën hnei Borys, directeur ne la ketre uma ne ini e Ukraine. Tha ka Temoë Iehova kö nyidrë, ngo hnei nyidrëti pala hi hna hnim me metrötrëne la itre ka ini ka Temoë. Pine laka, kola isi ngöne la götran hnei nyidrëti hna lapan, matre hnei nyidrëti hna kötr kowe la ketre götran gaa tingeting, nge hna xatua nyidrë hnene la itre trejin. E thupen, hnei nyidrëti hna sine la Drai Ne Amekunëne la meci Keriso. Ame la nyidrëti hmaca mekune la hna kuca koi nyidrë hnene la itre Temoë Iehova, öni nyidrë: “Tru la hnei angatr hna hnimi ni me xatua ni. Eni a olene koi angatr.”

¹¹ Easa nyitipune la utipine i Iehova la easa hnime la itre atr ka aja ixatua, ngacama tha ka ce hmi kö së. (Luka 6:31, 36) Easa ajane tro la aqane ujë së a uku angatr troa hane pi atre drei Keriso. (1 Pet. 2:12) Ngacama tha kapa kö angatr la nyipici, ngo tro sa madrin, ke hnei easë hna ham.—It. Hu. 20:35.

IEHOVA A THUPË SË

12. Tune kaa la aqane tro Iehova a thupëne la itre hlue i Nyidrëti elany? (Salamo 91:1, 2, 14)

¹² E jë la Salamo 91:1, 2, 14. Ase hë Iehova a qaja ka hape, tro Nyidrëti a thupë së qa ngöne la itre ewekë ka troa thë la imelekeu së me Nyidrë. Tha tro jë kö Nyidrëti a nue Satana troa adrone la nyipi hmi. (Ioa. 17:15) Nge xecie koi së laka, ame elany ngöne la ijine “akötr atraqatr,” tro Nyidrëti a thupëne la mele së me lapaune së.—Hna Am. 7:9, 14.

13. Tune kaa la aqane thupë së isa ala cas hnei Iehova?

¹³ Tune kaa la aqane thupë së isa ala cas hnei Iehova? Jëne la Tusi Hmitrötr, Nyidrëti a ini së troa wangatrehmekune la loi qa ngöne la ngazo. (Heb. 5:14) Ame la easa trongëne la itre trepene meköt, easë hi lai a thupëne la imelekeu së me Iehova memine la mele së. (Sal. 91:4) Ketre, Iehova a thupë së jëne la ekalesia. (Isa. 32:1, 2) Ame la easa ce tro memine la itre atr ka hnimi Iehova, me ka mele thenge la itre trepene meköt, kola ithuecatre koi së me xatua së troa cile catr qëmekene la itre iajojezi.—It. Ed. 13:20.

14. (a) Hnauëne laka, tha Iehova kö a amele së qa ngöne la nöjei jol? (b) Nemene la ithuecatr hna hamëne hnei Salamo 9:10? (Wange ju la ithuemacany.)

¹⁴ Ame ekö, hnei Iehova hna thupën la mel ne la itre xaa hlue i Nyidrë, ngo tha angatr asë kö. Öni Tusi Hmitrötr, kola traqa koi së asë la “itre ewekë ka iasesëkötrë.” (A. Cai. 9:11) Ketre, hnei Iehova hna nue troa axösisine me humuth la itre xaa hlue i Nyidrë, matre troa amamane ka hape, ka thoi lae Satana. (Iobu 2:4-6; Mat. 23:34) Nge celë fe hi la ka traqa enehila. Ngo ame easë itre ka hnimi Iehova xecie koi së laka, ngacama tha apatrene kö Nyidrë la itre jole së, ngo tha tro jë kö Nyidrëti a nuetriji së.d—Sal. 9:10.

IEHOVA A AKEUKAWANYI SË

15. Tune kaa la aqane axapone Iehova la hni së? (2 Korinito 1:3, 4)

¹⁵ E jë la 2 Korinito 1:3, 4. Ame itre xaa ijin, easa seseu me hace me hleuhleu. Hapeu, eö kö a melëne la ketre jol me mekune ka hape, eö casi pe hi? Hetre atre kö ka atreine trotrohni eö? Öö Iehova. Atre hi Nyidrëti la hace ka ej e kuhu hni së, nge Nyidrëti fe a “akeukawanyi së ngöne la nöjei akötre së.” Tune kaa la aqane kuca i Nyidrë? Ame la easa fe la hni së koi Nyidrë, Nyidrëti a hamë së la “tingetinge hna thatreine trotrohnine hnei atr.” (Fil. 4:6, 7) Jëne la Tusi Hmitrötr, Nyidrëti a axapone la hni së hnene la itre trengewekë ka iakeukawany. Ej e kuhu hnine la itre trengewekë ne ihnim, nge ka inamacan, ka hamë mejiun, nge ka amadrinëne la hni së. Ketre, itre icasikeu a acatrene la lapaune së, ke easa itrony memine la itre trejin, nge easa kapa la itre ithuecatr qa hnine la Tusi Hmitrötr.

16. Nemene la ini hne së hna xom qa ngöne la hna melën hnei Nathan me Priscilla?

¹⁶ Easa öhne jëne la hna melën hnei Nathan me Priscilla, lue trefëne qa Etazini laka, Iehova a akeukawan la hni së, me ithuecatr koi së jëne la Tusi Hmitrötr. Hnei nyidroti hna fek kowe la ketre götran laka, co hi hnei ka cainöj. Öni Nathan “Xecie koi nyio laka, tro Iehova a amanathithine la mekune i nyio.” Ngo ame la nyidroti a traqa ngöne la götrane cili, hna tithi nyidro hnei mec, nge hna traqa koi nyidro la itre jol göi mani. Matre hnei nyidro hna bëeke hmaca kowe la nöje i nyidro, ngo pë pala hi manie nyidro. Öni Nathan “Eni pe kö lo a mekune ka hape, tro Iehova a amanathithi nyio. Ma hetre ewekë ka ngazo hnenge hna kuca.” Ngo ame e thupen, öhne hë Nathan me Priscilla laka, tha hnei Iehova kö hna nuetriji nyidro. Öni Nathan “Ame ngöne la itre ijine cili ka jol, ceitune hi la Tusi Hmitrötr memine la ketre sinee ka inamacan, ka ithuecatr nge ka hamë eamo ka loi. Hnei nyio hna inine troa goeëne catrëne la ixatua qaathei Iehova, hune la itre itupath. Ame enehila, ka catre la lapaune i nyio, matre tha xoue nyio kö la itre xaa jol ka troa traqa elany.”

17. Tune kaa la aqane akeukawanyi Helga? (Wange ju fe la foto.)

¹⁷ Kolo fe a akeukawanyi së hnene la itre trejin. Eje hi la hna öhne hnei Helga ka mele e Hongrie. Nyimu macatre hnei angeic hna melën la itre jol, matre tru la xou i angeic nge ame koi angeic, ka pë hnënyöngöne angeic. Ngo ame enehila, öhne hë angeic laka, hnei Iehova hna akeukawanyi angeic jëne la ekalesia. Öni angeic: “Kola xome la trengecatreng hnene la huliwang, memine la neköng ka wezipo, me itre xaa jol ju kö. Ngo öhne kö Iehova nge Nyidrëti a xatua ni. Ame ngöne la 30 lao macatre ka ase hë, e nöjei drai Iehova a akeukawanyi ni. Hnei Nyidrëti hna upe la itre xaa trejin troa hamë ni la itre trengewekë ka ithuecatr. Hnei angatr hna loi thiina koi ni, me qaja la itre trengewekë ka iakeukawany. Matre drenge hi ni ka hape, hetre ka hnimi ni. Ame itre xaa ijin, eni a kapa la itre message, itre kart maine itre ithuecatr ngöne la itre ijin eni a aja ixatua.”

18. Tune kaa la aqane tro sa akeukawane la itre xan?

¹⁸ Ketre madrine ka tru la troa nyitipu Iehova. Matre tune kaa la aqane tro sa nyitipune la tulu i Nyidrë, me akeukawane la itre xan? Loi e tro sa drei angatre hnyawa, me ithanata amenyiken me xatua angatr. (It. Ed. 3:27) Isine jë së troa akeukawane la itre ka akötr, ene mina fe la itre atr ka tha nyihlue i Iehova pala kö. E kola wezipo me akötr maine seseu la itre atr ka lapa easenyi së, loi e tro sa wai angatr, me drei angatr me hamë ixatua jëne la itre xötr ne la Tusi Hmitrötr. Nemene la itre thangane hne së hna troa kapa e tro sa nyitipu Iehova, “Akötresie ne iakeukawany?” Tro së lai a xatuane la itre trejin troa cile catr qëmekene la itre itupath. Nge tro fe së a thue aja kowe la itre ka tha nyihlue i Iehova troa hane pi atre Nyidrë.—Mat. 5:16.

CE IEHOVA PALA HI ME EASË

19. Nemene la hnei Iehova hna kuca koi së, nge tune kaa la aqane tro sa nyitipu Nyidrë?

¹⁹ Iehova a wangatrun la itre ka hnimi Nyidrë. Tha Nyidrëti kö a nuetriji së la easa cile kowe la itre jol. Tune la ketre kem ka sikusikune la nekö i nyidrë, Iehova fe a sikusikune la itre hlue i Nyidrë. Nyidrëti a eatrongë së me hamë së la ka nyipiewekë, me thupë së me akeukawanyi së. Easa nyitipune la Keme së ka tru ihnimin, la easa xatuan me ithuecatrene la itre atr ka cile kowe la itre jol. Ngacama kola traqa itrai la itre jole koi së, maine akötrë së, ngo xecie koi së laka, ce Iehova me easë. Ke öni Nyidrë: “The xou kö, ke ce eni me eö.” (Isa. 41:10) Kola acatren me akeukawanyi së hnene la hna thingehnaeane celë! Eje hi, tha easë casi kö.