TANE MEKUN 18
NYIMA 65 Catre Jë!
Itre Trejin Nekötrahmany—Nyitipu Mareko Jë Me Timoteo
“Ce traqa pi me Mareko, ke ixatua angeice koi ni thatraqane la huliwa.”—2 TIM. 4:11.
MEKUN KA TRU
Tro sa ce ithanatane la tulu i Mareko me Timoteo. Tro lai a ithuecatr kowe la itre trejin nekötrahmany troa huliwane la itre thiina ka nyipiewekë, matre xatua itre xan.
1-2. Maine ju nemene la itre jol ka troa sewe Mareko me Timoteo troa xatuane la itre xan?
ITRE trejin nekötrahmany, aja i epuni kö troa catre huliwa i Iehova me xatuane la ekalesia i epun? Öö. Easa madrine la easa öhne la itre trejin nekötrahmany a xatuane la itre trejin! (Sal. 110:3) Ngo maine jë hetre ka acilë angatr troa huliwa catr koi Iehova. Hapeu, epuni kö a xou troa akökötrene la huliwa ne cainöj, ke thatre kö epun la ka troa traqa elany? Hnei epuni kö hna thipëne la ketre hnëqa ngöne la ekalesia, ke wanga tha eatrëne ju epun? Maine eje hi lai, ke tha epuni casi kö.
2 Hnei Mareko fe me Timoteo hna hane cile kowe la itre jole cili. Lue ka xou fe nyidro, me ka thatrein, ngo tha cile kö nyidro troa xatua itre xan. Ame lo kola hë Mareko troa ce tro me Paulo aposetolo me Banaba ngöne la pane trongë i nyidro ne mesinare, ke angeic pala kö a lapa thene la thine i angeic, ngöne la ketre uma ka lolo. (It. Hu. 12:12, 13, 25) Ngo hnei angeic hna nue la mele cili, matre catre cainöj. Hnei angeic hna pane fek a tro Anetioka. E thupen, hnei angeic hna ce tro me Paulo me Banaba kowe la itre götrane gaa nany. (It. Hu. 13:1-5) Ketre tui Timoteo, ketre nekötrahmanyi angeic la kola hë angeic hnei Paulo troa ce cainöj me nyidrë. Angeic pala kö thei kem me thin, nge pëkö hnei angeic hna atre. Maine ju, tro hi angeic a thipëne la ihë i Paulo, ke tha ijiji angeic kö troa ce tro me nyidrë. (Wange ju la 1 Korinito 16:10, 11 me 1 Timoteo 4:12.) Ngo hnei angeic hna kapa, matre hna amanathithi angeic.—It. Hu. 16:3-5.
3. (a) Tune kaa la ihnimi Paulo koi Mareko me Timoteo? (2 Timoteo 4:6, 9, 11) (Wange ju fe la foto.) (b) Nemene la itre hnying hne së hna troa sa ngöne la tane mekun celë?
3 Ngacama jeune pala kö Mareko me Timoteo, ngo hnei nyidro hna catr huliwa matre troa macaj, me eatrëne hnyawa la itre hnëqa. Tru catre la ihnimi Paulo koi nyidro, matre aja i nyidrë tro nyidroti a ce me nyidrë qëmekene tro nyidrëti a mec. (E jë la 2 Timoteo 4:6, 9, 11.) Nemene la itre thiina hnei Paulo hna öhne thei Mareko me Timoteo? Tune kaa la aqane tro la itre trejin nekötrahmany a nyitipu nyidro? Nge tro angatr a kepe thangane tune kaa la itre eamo i Paulo?
Paulo a hnimi Mareko me Timoteo, ke hnei nyidroti hna canga xome la itre huliwa i Iehova, nge jeune pala kö nyidro (Wange ju la paragarafe 3)b
CATRE JË NYIHLUE I IEHOVA ME XATUANE LA ITRE TREJIN TUI MAREKO
4-5. Hnei Mareko hna amamane tune kaa ka hape, aja i angeic troa xatuan la itre trejin?
4 Önine la ketre zonal, ame la troa xatuane la itre xan, ke kola hape, troa “huliwa catr koi angatr me xatua angatr pala hi, ngacama jole koi së.” Mareko la ketre tulu koi së. Maine jë, hnei Mareko hna akötr me dekurag, lo Paulo a xele ma ce tro me angeic ngöne la hnaaluene tronge i nyidrë ne mesinare. (It. Hu. 15:37, 38) Ngo hnei angeic hna catre xatuane la itre trejin.
5 Hnei Mareko pena hna ce tro me Banaba, trejin me angeic, matre cainöj ngöne la ketre götran. Thupene la 11 lao macatre, ce angeic fe memine lo itre ka xatua Paulo lo kola pane akalabusi nyidrë e Roma. (Filem. 23, 24) Madrine catre Paulo kowe la ixatua hnei Mareko hna hamën, matre öni nyidrë göi Mareko ka hape, ketre ka “akeukawanyi ni.”—Kol. 4:10, 11.
6. Nemene la itre thangan hnei Mareko hna kapa qa ngöne la hna ce huliwa me itre trejin ka macaj? (Wange ju la ithuemacany.)
6 Hnei Mareko hna majemine ce tro me itre trejin ka macaj, matre tru la itre thangane hnei angeic hna kapa. Thupene la hnei angeic hna ce lapa me Paulo e Roma, hnei angeic hna tro koi Peteru e Babulona. Catrecatre la imelekeu i Peteru me Mareko, matre hnei Peteru hna hë angeic ka hape, “Mareko neköng.” (1 Pet. 5:13) Ame lo nyidroti a ce huliwa, hnei Peteru hna porotrikëne koi Mareko la mel me huliwa ne cainöje i Iesu. Matre hnei Mareko e thupen hna cinyianyin itre ej ngöne la Evangelia.a
7. Tune kaa la aqane nyitipu Mareko hnei Seung-Woo? (Wange ju fe la foto.)
7 Hnei Mareko hna catre huliwa i Akötresie me ce tro memine la itre trejin ka macaj. Tro eö a nyitipu angeic tune kaa? Maine tha hna acili eö pala kö ngöne la itre xaa hnëqa, ke pane itreqe hnyawa ju. Nge catre jë nyihlue i Iehova me xatuane la ekalesia. Tro sa ce wange la ka traqa koi Seung-Woo, ketre qatre thup. Ame lo angeic a jeune, hnei angeic hna öhne laka, ame la itre xaa trejin nekötrahmany, ke hetre hnëqa i angatr, ngo pë pala kö hnëqa i angeic. Angeic a mekune ka hape, hna thëthëhmi angeic, matre hnei angeic hna fe la hni angeic kowe la itre trejin trahmany ka macaj. Hnene la ketre qatre thup hna ithuecatre koi angeic troa xatuane la itre xan, ngacama pëkö ka öhne la itre huliwa i angeic. Matre hnei Seung-Woo hna xatuane la itre trejin ka qatr, me trotheng la itre xaa trejin kowe la itre icasikeu. E thupen, öni angeic: “Trotrohnine hë ni la alien troa xatua itre xan. Nge tru catr la madrineng la eni a xatua angatr.”
Nemene la itre thangane hna troa kapa hnene la itre trejin nekötrahmany, e tro angatr a ce tro lapa me itre trejin ka macaj? (Wange ju la paragarafe 7)
THELE JË TROA ATREPENGÖI ITRE XAN TUI TIMOTEO
8. Hnauëne la Paulo a ië Timoteo matre sinatronge i nyidrë? (Filipi 2:19-22)
8 Ame la Paulo a bëeke hmaca kowe lo itre traon ka akötrë nyidrëti ekö, ke nyipiewekë tro nyidrëti a hetre sinatro ka catr. Hnei nyidrë hna pane ië Sila, ketre trejin ka macaj matre ce tro me nyidrë. (It. Hu. 15:22, 40) E thupen, hnei nyidrëti fe hna hane ië Timoteo. Pine nemen? Pine laka, hna qaja aloinyi angeic. (It. Hu. 16:1, 2) Ketre, angeic fe a hnehengazo itre xan.—E jë la Filipi 2:19-22.
9. Tune kaa la aqane amamane Timoteo ka hape, ka tru koi angeic la itre trejin?
9 Ame la Timoteo a nyiqane ce huliwa me Paulo, ke tru kö la hnei angeic hna meku itre xan, nge pine pë hë la itre aja i angeic. Celë hi matre hnei Paulo hna nue angeic e Berea, matre ithuecatr kowe la itre trejin ka xötrei bapataiso. (It. Hu. 17:13, 14) Ame e cili, hnei angeic hna xomi tulu qaathei Sila, ka lapa fe e Berea. E thupen, hnei Paulo hna upi Timoteo cas a tro Thesalonika, matre acatrene la lapaune la itre trejin e cili. (1 Thes. 3:2.) Ame ngöne la 15 lao macatre thupen, hnei Timoteo hna inine troa ‘ce treije memine la itre ka treij,’ ene la troa trotrohnine la akötre ne la itre ka akötr. (Roma 12:15; 2 Tim. 1:4) Tro la itre trejin nekötrahmany a nyitipu Timoteo tune kaa?
10. Nemene la ka xatua Woo Jae troa meku itre xan?
10 Hnei Woo Jae ketre trejin trahmany hna inine troa mekune la itre xan. Ame lo angeic a jeune, jole koi angeic troa porotrik aqean memine la itre trejin ka qatr. Ame ngöne la Uma Ne Baselaia, angeic a ibozu me angatr me canga tro. Hnene la ketre qatre thup hna ithuecatr koi Woo Jae troa nyiqane ithanata me angatr, me qaja la itre ewekë ka lolo hnei angeic hna öhne thei angatr. Hnene fe lai qatre thup hna ithuecatre koi angeic troa mekune la itre ewekë hnei angatr hna pi ithanatan. Hnei Woo Jae hna trongëne la itre eamo cili, la angeic a porotrik me itre xan. Ame enehila ketre qatre thup hë angeic. Öni angeic: “Tha jole hë koi ni enehila troa porotrik memine la itre atr ka qatr maine ka jeune. Madrine catre ni, ke trotrohnine hë ni la itre jol ka traqa kowe la itre trejin. Matre atreine hë ni la aqane troa xatua angatr.”
11. Tune kaa la aqane tro la itre trejin nekötrahmany a atrepengöne hnyawa la itre trejin ne la ekalesia? (Wange ju fe la foto.)
11 Maine eö la ketre trejin nekötrahmany, thele jë troa atrepengöi itre xan hnyawa. Ame ngöne la itre icasikeu, tro jë kowe la itre trejin trahmany me föe, ka isa macatrene kö me isa nöj. Hnyinge jë ka hape, tune kaa angatr nge drei angatre hnyawa ju. Tro eö e cili a atre la aqane tro eö a xatua angatr. Maine jë, aja ne la lue trefën ka qatre hë, tro eö a amamai nyidro la aqane troa huliwane la application JW Library maine trothei nyidro troa cainöj. Hapeu, ijiji eö kö troa xatua nyidro troa huliwane la application? Maine ce cainöj me nyidro? Ame la eö a xomi ijine troa xatua itre xan, eö hi lai a amamai tulu koi itre xan.
Nyimu aqane tro la itre trejin nekötrahmany a ixatua ngöne la ekalesia (Wange ju la paragarafe 11)
XOMI INI JË QA NGÖNE LA ITRE EAMO I PAULO
12. Tune kaa la aqane tro la itre trejin nekötrahmany a kepe thangane qa ngöne la itre eamo i Paulo koi Timoteo?
12 Hnei Paulo hna hamë eamo koi Timoteo, matre troa tro loi la mele i angeic me hetre thangane la huliwa ne cainöj. (1 Tim. 1:18; 2 Tim. 4:5) Maine eö la ketre trejin nekötrahmany, ijiji eö fe troa kepe thangane qa ngöne la itre eamo cili. Tune kaa? E jë la lue tusi Paulo koi Timoteo, kösë hna cinyanyine thatraqai eö. Nge thele jë la itre eamo nyine tro eö a trongën. Tro sa ce wange la itre xaa eamo.
13. Kola hapeu la troa nyipici koi Akötresie?
13 “Isine jë matre atreine jë eö nyipici koi Akötresie.” (1 Tim. 4:7b) Kola qaja e celë la atr ka nyipici koi Iehova, me ka kuca la hnei Nyidrëti hna ajan. Loi e tro sa nue trengecatr, matre tro sa hetreny la aqane nyipici me ihnimi cili, ke tha hna hnaho së kö memin. Ame la hnaewekë “isine jë” ngöne la qene Geres, ke kola qaja la aqane hnëkë la atr ka kuci spor, qëmeken la ketre match ka tru. Loi e tro angeic a hetreny la itre hna majemin ka loi, me nuetrij la itre ewekë ka troa ajolëne la mekuna i angeic. Ketre tune mina fe, loi e tro sa hetre hna majemine ka loi ka troa xatua së troa easenyi Iehova.
14. Nemene la ka nyipiewekë la easa e Tusi Hmitrötr? Qaja jë la ketre ceitun.
14 Nyipiewekë troa e lapane la Tusi Hmitrötr, matre troa easeny koi Iehova. Nemene la ini hne së hna xome qa ngöne la porotrike i Iesu memine la thupëtresij ka trenamo? (Mar. 10:17-22) Xecie koi angeic laka, Iesu hi la Mesia, ngo tha hnei angeic kö hna xötrethenge nyidrë, ke tha ka catre kö la lapaune i angeic. Ngo hnei Iesu hna “utipi angeic.” Hapeu, tha hna ketri eö kö hnene la aqane ithanata i Iesu koi angeic? Aja i Iesu tro la thupëtresij a xomi mekune ka loi. Ketre ame la aqane hnimi angeic hnei Iesu, ke aqane hnimi angeice hi lai hnei Iehova. (Ioa. 14:9) Lapa mekune jë la hna melëne celë, nge isa hnyinge jë ka hape, ‘Nemene la nyine tro ni a kuca, matre troa easenyi Iehova me xatuane la itre xan?’
15. Hnauëne laka, nyipiewekë tro la trejin nekötrahmany a amamai tulu ka loi? Qaja jë la ketre ceitun. (1 Timoteo 4:12, 13)
15 “Nyi tulu jë thatraqane la itre ka mele nyipici.” (E jë la 1 Timoteo 4:12, 13.) Hnei Paulo hna ithuecatr koi Timoteo troa maca troa e tus me hamë ini. Nge tro fe a huliwane la itre thiina, tune la ihnim me acatrene la lapaune i angeic me lapa pë ethan. Pine nemen? Pine laka, ka mene catre kö la tulu hune la itre trengewekë. Pane mekune jë laka, kola upi eö troa cile fë la ketre cainöj, ka amamane la enyipiewekëne troa catre cainöj. Tro lai a hmaloi koi eö troa tro fë hnyawane la ini, e ka catre eö ngöne la huliwa cili. Eje hi, tro la itre trejin a trongëne la itre eamo hnei eö hna hamën, ke öhne hi angatr laka, eö la ketre tulu ngöne la huliwa ne cainöj.—1 Tim. 3:13.
16. (a) Qaja jë la 5 lao götran nyine huliwan hnene la trejin nekötrahmany matre amamai tulu? (b) Tune kaa la aqane tro la trejin nekötrahmany a amamai tulu “göi aqane ithanata”?
16 Ame ngöne 1 Timoteo 4:12, hnei Paulo hna qaja la 5 lao götran nyine huliwan hnene la trejin nekötrahmany, matre amamai tulu ka loi. Maine eö la ketre trejin nekötrahmany, sine ajuine jë itre ej la eö a ini Tusi cas. Maine eö a pi amamai tulu “göi aqane ithanata,” pane mekune jë la nyine tro eö a qaja, matre acatrene la lapaune itre xan. Maine eö pala hi thei kaka me nenë, olene jë koi nyidro la hnei nyidroti hna kuca koi eö. Nge thupen la itre icasikeu, qaja jë kowe la ketre trejin föe maine trahmany, la ka ketri eö ngöne la hnëqa hnei angeic hna cile fë. Nge hamë mekune jë ngöne la sipu aqane ithanata i eö. Ame la eö a nue trengecatr troa nyi tulu ngöne la aqane ithanata, ke eö hi lai a amamane ka hape, ka maca eö ngöne la huliwa i Iehova.—1 Tim. 4:15.
17. Nemene la ka troa xatuane la trejin nekötrahmany troa eatrëne la itre xaa huliwa i Iehova? (2 Timoteo 2:22)
17 “Kötrene pi la itre aja i thöth, nge catre jë thele la meköt.” (E jë la 2 Timoteo 2:22.) Hnei Paulo hna ithuecatre koi Timoteo troa nuetrij la itre ewekë ka troa ajeanyi angeic qa ngöne la huliwa i Iehova, me thë la imelekeu i angeic me Nyidrë. Hapeu la itre xaa huliwa ka lolo, itre eje kö a xome la traeme i eö göne la huliwa i Iehova? Isa hnyinge jë ka hape, ije hawa hnenge hna nu troa kuci spor, maine tro ngöne Ëternet, maine elo jeux video? Hapeu, ijiji eö kö troa xome la ijine cili, matre kuca la itre xaa huliwa i Iehova? Tune la troa nyidrawane la Uma Ne Baselaia, maine cile fë présentoire memine la ekalesia. Maine tro eö a kuca lai, tro hë eö lai a nyisineene la itre xaa trejin, ka troa uku eö me xatua eö troa eatrëne la itre xaa huliwa i Iehova.
HETRE THANGAN LA TROA XATUA ITRE XAN
18. Hnauëne la easa qaja ka hape, ka madrine catre Mareko me Timoteo ngöne la huliwa i Iehova?
18 Hnei Mareko me Timoteo hna hane nue trengecatr troa xatuane la itre xaa trejin. Celë hi matre, madrine catre nyidro. (It. Hu. 20:35) Hnei Mareko hna tro kowe la itre xaa götran ne la fen, matre xatuane la itre trejin. Hnei angeice fe hna cinyianyine ngöne la Evangelia la mel me huliwa ne cainöje i Iesu. Nge ame Timoteo, hnei angeic hna xatua Paulo troa acile la itre ekalesia, me acatrene la lapaun ne la itre trejin. Xecie koi së laka, madrine catre Iehova kowe la aqane nue trengecatre i Mareko me Timoteo kowe la huliwa i Nyidrë.
19. Hnauëne laka, loi e tro la itre trejin nekötrahmany a trongëne la itre eamo i Paulo koi Timoteo, nge nemene la itre thangan koi angatr?
19 Kola mama la ihnimi Paulo koi Timoteo ngöne la itre itus i nyidrë koi angeic. Nge kolo fe a mama la ihnimi Iehova koi epun itre trejin nekötrahmany ngöne la itre itusi cili. Aja i Nyidrë tro epuni a mele madrin. Haawe, trongëne jë la itre eamo i Paulo koi Timoteo, nge catre jë xatuane la itre xan. Maine celë hi hnei epun hna kuca, tro ha lolo la mele i epun enehila, nge tro epun a “xölehuje la nyipi mel” laka, calemi hë.—1 Tim. 6:18, 19.
NYIMA 80 “Demeju, Nge Atejë Laka Ate Ihnimi Iehova”
a Ame Peteru, ke ketre atr ka canga dreng la akötre itre xan, matre hnei angeic hna qaja hnyawane koi Mareko la aqane mel me aqane ujë i Iesu, lo nyidrëti e celë fen. Celë hi matre, ame la Mareko a cinyianyine la Evangelia i angeic, hnei angeic hna qaja atrun la aliene hni, me itre aqane ujë i Iesu.—Mar. 3:5; 7:34; 8:12.
b ITRE FOTO: Mareko a xatua Paulo me Banabe ngöne la tronge ne mesinare i nyidro. Madrine catre Timoteo troa wange la ketre ekalesia. Aja i angeic troa acatrene me ithuecatr kowe la itre trejin.