Xatuane Jë La Itre Ka Ini Tusi Me Eö Troa Nyihlue i Iehova

1-2. (a) Pine nemene matre itre ka ini Tus a cile troa nyihlue i Iehova? (b) Nemene la hne së hna troa ce wang ngöne la tane mekun celë?

HNEI eö kö hna xou troa hane Temoë Iehova? Hnei eö kö hna xou tro la itre sinee huliwa i eö, me sinee i eö, maine fami i eö a icilekeu? Maine pena, hnei eö hna mekun ka hape, tha ijiji eö kö troa trongën la itre trepene meköti Akötresie. Maine eje hi, tro hi eö lai a trotrohnine la itre ka ini Tus ka cil troa nyihlue i Iehova.

² Atre hi Iesu laka, tro la itre ewekë cili a sewe ketre troa nyihlue i Iehova. (Mat. 13:​20-​22) Ngo tha hnei nyidrëti kö hna nuetrij la itre atr ka luelu. Hnei nyidrëti pe hna xatuane la itretre drei nyidrë (1) troa atre la ka sewe angatr troa nyihlue i Iehova, (2) troa acatren la ihnimi angatr koi Nyidrë, (3) troa atre la ka nyipiewekë ngöne la mel, nge (4) troa atreine cil kowe la icilekeu. Ame ngöne la tane mekune celë, tro sa ce wang la aqane tro sa xatuane la itre ka ini Tusi Hmitrötr troa nyihlue i Iehova. Tro sa pane ce wang la tulu hnei Iesu hna hamën kowe la itretre drei nyidrë, me aqane tro sa nyitipu nyidrë la easa hamë ini jëne la itus Gojenyi Kowe La Nyipi Mel!

XATUANE JË LA KA INI TUS TROA ÖHNE LA KA SEWE ANGEIC TROA NYIHLUE I IEHOVA

3. Nemene la ka sewe Nikodremo troa atre drei Iesu?

³ Aja i Nikodremo, ketre tane i angetre Iudra, troa atre drei Iesu, ngo hetre ewekë ka sewe angeic. Angeic a trotrohnine ka hape, hna upi Iesu hnei Akötresie 6 lao treu thupen la nyidrëti a nyiqane cainöj. (Ioa. 3:​1, 2) Ngo pine laka, ‘xou i angeic la angetre Iudra,’ matre hnei angeic hna tro juetrë koi Iesu. (Ioa. 7:​13; 12:42) Maine jë, angeic a mekun ka hape, e tro la itre atr a atre laka, aja i angeic troa xötrethenge Iesu, tro angatre lai a wangaconyi angeic.a

4. Tune kaa la aqane xatua Nikodremo hnei Iesu matre trotrohnin la aja i Iehova koi angeic?

⁴ Atre hi Nikodremo la Wathebo, ngo loi e tro angeic a trotrohnin la aja i Iehova koi angeic. Tune kaa la aqane xatua Nikodremo hnei Iesu? Hnei nyidrëti hna xomi ijin koi Nikodremo. Goi porotrik fe nyidrë me angeic e hnenyipajidr. Nge hnei nyidrë hna qejepengöne koi angeic ka hape, tro angeic a atre drei nyidrë, e tro angeic a ietran la itre ngazo i angeic, me bapataiso ngöne la tim, me lapaun koi nyidrë.​—Ioa. 3:​5, 14-​21.

5. Tro sa xatuane tune kaa la ka ini Tus troa öhne la ka sewe angeic troa nyihlue i Iehova?

⁵ Ngacama atre hi la ka ini Tus la itre nyipici qa hnine la Tusi Hmitrötr, ngo loi e tro sa xatua angeic troa öhne la ka sewe angeic troa nyihlue i Iehova. Maine jë, ame la ka ajolë angeic, ke huliwa i angeic, maine icilekeu i fami. Xomi ijine jë troa xatuane la ka ini Tus me eö. Hë angeice jë troa iji kofi maine ce tro me eö, matre aijijë angeic troa fe la hni i angeic koi eö. Maine hetre ewekë nyine tro angeic a saze, ithuecatre jë koi angeic, tha göne kö troa amadrinë eö, ngo göi troa amamane la ihnimi angeic koi Iehova.

6. Tro eö a xatuane tune kaa la ka ini Tus troa hetre trengecatr troa nyihlue i Iehova? (1 Korinito 16:13)

⁶ Maine xecie kowe la ka ini Tus laka, tro Iehova a xatua angeic troa trongën la itre trepene meköti Nyidrë, tro hë angeice lai a hetre trengecatr troa trongën la itre hnei angeic hna inin. (E jë la 1 Korinito 16:13.) Ceitune hi la hnëqa i eö memine la porofesör. Mekune hmaca jë lo ijin eö a ini. Drei la porofesör hnei eö hna hnim? Maine jë, eö a mekun la porofesör ka xatua eö ekö, troa öhne la ka loi thei eö. Aqane tro hi a kuca hnene la ka hamë ini qa hnine la Tusi Hmitrötr. Tha angeice hmekuje kö a amamane kowe la ka ini Tus, la aja i Iehova koi angeic. Angeice fe a ithuecatr kowe la ka ini Tus ka hape, tro kö Iehova a xatua angeice troa saze. Tune kaa la aqane tro sa ketre porofesör ka lolo?

XATUANE JË LA KA INI TUS TROA ACATRENE LA IHNIMI ANGEIC KOI IEHOVA

7. Nemene la hnei Iesu hna kuca matre akökötrene la ihnimi ne la itre atr koi Iehova?

⁷ Atre hi Iesu laka, ihnimi ne la itretre dreng koi Akötresie, la ka troa uku angatr troa trongën la itre hnei angatr hna inin. Celë hi matre, hnei nyidrëti hna ini angatr la itre nyipici ka akökötrene la ihnimi angatr koi Iehova. Hnei nyidrëti hna aceitunë Iehova me ketre kem ka hamën la itre ewekë ka lolo kowe la itre nekö i Nyidrë. (Mat. 7:​9-​11) Ame la itre xan ka drei Iesu, ke tha hna hane kö hnimi angatre hnene la keme i angatr. Pane mekune jë la kola ketri angatr hnene la ceitun ne la ketre kem ka utipin. Hnei nyidrëti hna kapa la nekö i nyidrëti trahmany ka bëeke hmaca koi hnalapa, thupene la hnei angeic hna tha idrei. Drenge hi angatr la utipine i Iehova kowe la itre atr.​—Luka 15:​20-​24.

8. Tune kaa la aqane tro eö a xatuane la ka ini Tus me eö troa acatrene la ihnimi angeic koi Iehova?

⁸ Ame la eö a qaja atrune la itre thiina i Iehova la eö a hamë ini, ke eö hi lai a xatuane la ka ini Tus troa acatrene la ihnimi angeic koi Iehova. Ame la epon a ini Tus, xatua angeice jë troa goeën la hnei angeic hna inin memine la ihnim i Iehova. Tune la thupene mel, qejepengöne jë koi angeic la itre kepin laka, thatraqai angeice fe. (Roma 5:8; 1 Ioa. 4:​10) E tro la ka ini Tus a lapa mekun la ihnim i Iehova koi angeic, ke tro lai a uku angeic troa hnimi Nyidrë.​—Gal. 2:​20.

9. Nemene la ka uku Michael troa saze aqane mel?

⁹ Tro sa ce wang la hna melën hnei Michael qa Indonésie. Hnei angeic hna ini Tusi Hmitrötr lo angeic a jeune, ngo tha xomi bapataiso ju kö. Nge ame lo angeic a 18 lao macatre, hnei angeic hna tro kowe la ketre nöj troa huliwa, ene la troa xom la itre kamio ka tru. E thupen, hnei angeic hna bëek troa faipoipo e Indonésie, me tro hmaca troa huliwa ananyine la fami. Hnene la föe i angeic me nekö i angeice jajiny hna nyiqaane ini Tusi Hmitrötr, me trongën la hnei nyidroti hna inin. Ngo hna mec la thine i angeic, matre hnei angeic hna bëeke hmaca a tro Indonésie, me thupën la keme i angeic, me nyiqaane ini Tusi Hmitrötr. Hna ketri angeic hnene la götran hna hape, “Troa Ce Ithanatan” ne la ini 27 ne la itus Gojenyi Kowe La Nyipi Mel! Kola xölaxöla la trenge timidra i angeic la angeic a trotrohnine la pengöi Iehova, la Nyidrëti a goeën la nekö i Nyidrëti a akötr. Hnene la hni ne ole i angeic kowe la thupene mel hna uku angeic troa saze la mele i angeic, me hane xomi bapataiso.

XATUANE JË LA KA INI TUS TROA WANGE HMACA LA KA NYIPIEWEKË NGÖNE LA MELE I ANGEIC

10. Hnei Iesu hna xatuane tune kaa la itre pane atre drei nyidrë troa wange hmaca la ka nyipiewekë ngöne la mele i angatr? (Luka 5:​5-​11) (Wange ju fe la foto.)

¹⁰ Hnene la itre pane atre drei Iesu hna canga wangatrehmekun ka hape, Iesu la Mesia. Ngo loi e troa xatua angatr troa amë panën ngöne la mele i angatr la huliwa ne cainöj. Ame lo Iesu a hë Peteru me Anederea troa xötrethenge nyidrëti o drai, ke ekö hë nyidro atre drei nyidrë. (Mat. 4:​18, 19) Nyidroti lo a ce huliwa me Iakobo me Ioane ngöne la ketre entreprise ne nyi ii. (Mar. 1:​16-​20) Ame la nyidroti a nuetrij “la itre ifile” i nyidro matre xötrethenge Iesu, hnei nyidroti pala hi hna thele jëne troa thupën la fami i nyidro. Nemene la ka xatua nyidro troa wange hmaca la ka nyipiewekë ngöne la mele i nyidro? Kola qaja ngöne la Evangelia i Luka ka hape, hnei Iesu hna kuca la ketre iamamanyikeu ka acatrene la lapaune i nyidro laka, atreine hi Iehova thupë nyidro.​—E jë la Luka 5:​5-​11.

11. Tro la hne së hna melën a acatrene tune kaa la lapaun ne la ka ini Tus?

¹¹ Thatreine kö së kuci iamamanyikeu tui Iesu. Ngo ijiji së hi troa ce thawa memine la ka ini Tusi me easë, la itre hne së hna melën me itre hna melën hnene la itre trejin. Tro la itre ewekë cili a amamane ka hape, Iehova a xatuane la itre ka amë panë Nyidrë ngöne la mele i angatr. Tune kaa la aqane xatua eö hnei Iehova, lo eö a xötrei sine la itre icasikeu? Hnei eö kö hna qaja kowe la maseta i eö la kepin, matre tha tro hmaca kö eö a huliwa tar ngöne la itre drai ne icasikeu? Ame la eö a qaja la mele i eö, qaja jë la aqane acatrene la lapaune i eö, me aqane xatua eö hnei Iehova la eö a amë panëne la hmi i Nyidrë.

12. (a) Pine nemene matre nyipiewekë tro sa hëne la itre trejin troa sine la ini Tus? (b) Nemene la nyine tro eö a huliwan matre xatuane la ka ini Tusi me eö troa trongën la hnei angeic hna inin? Qaja jë la ketre ceitun.

¹² Hetre thangan ka loi kowe la ka ini Tus troa atre la aqane wange hmaca la itre xaa trejin, la ka nyipiewekë ngöne la mele i angatr. Matre hëne jë la itre trejin troa hane sine la ini Tus i epon. Sipo angatre jë troa qaja la aqane atre angatre la nyipici, me aqane kuca i angatr matre amë panën la itre huliwa i Iehova ngöne la mele i angatr. Ketre, xomi ijine jë troa ce goeëne me angeic la itre video ngöne la götran hna hape, “Troa Ce Ithanatan” me “Itre Xaa Nyine Wang” ngöne la itus Gojenyi Kowe La Nyipi Mel! Ame la epon a ce wang la ini 37, amamane jë la itre trepene meköt ngöne la video hna hape, Tro Kö Iehova a Hamë Së La Ka Ijij.

XATUANE JË LA KA INI TUS TROA ELË HUNE LA ICILEKEU

13. Hnei Iesu hna xatuane tune kaa la itretre dreng troa elë hune la icilekeu?

¹³ Anyimua qaja Iesu kowe la itretre dreng ka hape, tro fe a icilekeu me angatr hnei fami. (Mat. 5:​11; 10:​22, 36) Ame hë la kola nyipune la huliwa ne cainöje i nyidrë, hnei nyidrëti hna qaja ka hape, tro fe a hane humuthi angatr. (Mat. 24:9; Ioa. 15:20; 16:2) Matre hnei nyidrëti hna upi angatre troa hmek la angatr a cainöje trootro. Hnei nyidrëti fe hna ithuecatre koi angatr ka hape, tha tro kö a icilekeu memine la itre ithupëjia, ngo tro pe a inamacan matre catre cainöj.

14. Tro sa hnëkën tune kaa la ka ini Tusi me easë troa elë hune la icilekeu? (2 Timoteo 3:​12)

¹⁴ Tro sa hnëkëne la ka ini Tusi me easë troa cil kowe la icilekeu, la easa qaja ka hape, ijije hi troa icilekeu me angeic hnei itre sine huliwa, itre sinee, me fami i angeic. (E jë la 2 Timoteo 3:​12.) Maine jë, tro la itre sine huliwa i angeic a hnyimasai angeic, ke saze hë la aqane mele i angeic. Ma tro jë fe la itre atr ka lapa xötreithi angeic me itre atrene la fami i angeic, a xöjetrij la itre ini hnei angeic hna kapa qa hnine la Tusi Hmitrötr. E tro sa canga hnëkën la ka ini Tusi me easë troa elë hune la icilekeu, ke canga tro hi angeic a atreine cile kow.

15. Nemene la ka troa xatuane la ka ini Tus troa loi thiina la kola icilekeu hnei fami?

¹⁵ Maine itre atrene la fami i angeic a icilekeu me angeic, xatua angeice jë troa thele la itre kepin, matre angatr a ujë tun. Maine jë, angatr a mekun ka hape, hna ajojezi angeic hnene la itre Temoë Iehova. Maine pena, angatr a mekun ka hape, ka ngazo la itre Temoë Iehova. Hnei Iesu fe hna cil kowe la aqane ujë ka ngazo ne la fami i nyidrë. (Mar. 3:​21; Ioa. 7:5) Ithuecatre jë kowe la ka ini Tusi me eö troa atreine itreqe me ithanata amenyiken kowe la itre atr, me itre sinee i angeic.

16. Tro sa inine tune kaa la ka ini Tusi me easë troa qaja hnyawan la hnei angeic hna inin kowe la itre xan?

¹⁶ Maine itre atrene la fami i angeic a pi atre la Tusi Hmitrötr, ke loi e tro hi angeic a qaja la ka ijij. Maine tro angeic a qaja asë, tro hë angatre lai a xel ma porotrikë Tusi Hmitrötr me easë. Ithuecatre jë kowe la ka ini Tusi me eö, troa ce thawa me itre xan la hnei angeic hna inin, matre aijijë angatr tro pala hi a porotrik me angeic. (Kol. 4:6) Ijije hi tro angeic a qaja kowe la itre atrene la fami i angeic troa tro kowe la site së jw.org, matre tro angatr a atre hnyawa la itre Temoë Iehova.

17. Tro eö a xatuane tune kaa la ka ini Tusi me eö troa sa kowe la itre ka qaja angazone la itre Temoë Iehova? (Wange ju fe la foto.)

¹⁷ Xatuane jë la ka ini Tusi me eö troa sa la hnyinge ne la itre sinee maine sine huliwa i angeic, jëne la götran hna hape, “Questions fréquentes” ngöne jw.org. (2 Tim. 2:​24, 25) Ame la epon a afenesine la ketre ini, ce wange jë me angeic la götran hna hape, “Hne Së Hna Majemine Dreng” ngöne la itus Gojenyi Kowe La Nyipi Mel! Ithuecatre jë koi angeic troa sa ngöne la sipu aqane ithanata i angeic. Qaja jë koi angeic la itre nyine troa kuca, matre sa hnyawa la itre hnying. Tro lai a xatua angeic matre tha tro kö a xou troa isigöline la lapaune i angeic.

18. Tune kaa la aqane tro eö a xatuane la ka ini Tusi me eö troa nyiqaane cainöj? (Mataio 10:27)

¹⁸ Hnei Iesu hna upe la itretre dreng troa cainöjën la maca ka loi koi nöjei atr. (E jë la Mataio 10:27.) Maine tro la ka ini Tus a canga qeje Iehova koi itre xan, ke canga tro hi angeice lai a mejiune koi Nyidrë. Tune kaa la aqane tro eö a thue aja kowe la ka ini Tusi me eö troa cainöj? Ame ngöne la ijine campagne, ithuecatre jë koi angeic troa wang ka hape, ijiji angeice kö troa cainöj. Qaja jë koi angeic la kepin, matre hmaloi hi koi itre xan troa nyiqaane cainöj ngöne la itre ijine campagne. Tro fe a xatua angeic hnene la itre ini hne së hna kapa ngöne la itre ijine icasikeu e nyipine wiik. Tro angeice lai a inine troa ithanata qëmekei nöjei atr, me atreine qejepengöne hnyawa la lapaune i angeic. Ithuecatre jë fe koi angeic troa hane kuci sujet ngöne la itre ijine icasikeu.

AMAMANE JË KOWE LA KA INI TUS LAKA, EÖ A MEJIUNE KOI ANGEIC

19. Tune kaa la aqane amamane Iesu la mejiune i nyidrë kowe la itretre dreng, nge tune kaa la aqane tro sa nyitipu nyidrë?

¹⁹ Qëmekene tro Iesu a elë hnengödrai eë, hnei nyidrëti hna qaja kowe la itretre dreng ka hape, tro hmaca angatr a cas. Tha trotrohnine kö angatr ka hape, tro fe angatr a elë e hnengödrai. Tha Iesu kö a goeën laka, itre atr ka luelu angatr, ngo la aqane mele nyipici i angatre pe. (Ioa. 14:​1-5, 8) Atre hi nyidrë laka, troa nue ijine koi angatr troa atre la itre xaa ini, tune la melehmaca e hnengödrai. (Ioa. 16:12) Ketre tun, amamane jë kowe la ka ini Tusi me eö ka hape, xecie koi eö laka, aja i angeic troa amadrinë Iehova.

20. Hna amamane tune kaa hnene la ketre trejin qa Malawi ka hape, ajane hi la ka ini Tus me angeic troa kuca la loi?

²⁰ Tha tro kö sa luelu laka, aja ne la ka ini Tusi me easë troa kuca la loi. Tro sa ce wang la hna melën hnei Chifundo ketre trejin qa Malawi. Hnei angeic hna nyiqaane ini Tusi me Alinafe, ka katolik, jëne la itus Gojenyi Kowe La Nyipi Mel! Thupene la nyidroti a ce wang la ini 14, hnei Chifundo hna hnyingën koi Alinafe la mekuna i angeic göne la troa huliwane la itre hnasaatr ngöne la hmi i Akötresie. Tha madrine kö Alinafe, matre öni angeic: “Ame kö lai, isa qanyi së kö iën!” Mekuna i Chifundo ka hape, tro hë Alinafe a xele ma ini Tus. Ngo hnei Chifundo hna catre ini Tus koi Alinafe, me mejiun laka, tro pë hë angeic a trotrohnin elanyi la mekuna i Iehova. Itre treu thupen, hnei angeic hna hnyingën la hnying ka mama ngöne la ini 34: “Qaane lo epuni a inine la Tusi Hmitrötr, me inine troa atre Iehova, hetre eloine kö hnei epuni hna kapa?” Tune kaa la aqane sa i Alinafe? Öni Chifundo: “Hnei angeic hna qaja la itre ini ka mingöming, me qaja ka hape, tha itre Temoë Iehova kö a kuca la itre ewekë hna wathebon hnei Tusi Hmitrötr.” E thupen, hnei Alinafe hna nuetrij la itre hnasaatr me xomi bapataiso.

21. Tune kaa la aqane tro sa thue aja kowe la ka ini Tusi me easë troa xomi bapataiso?

²¹ Nyipici laka, Akötresie la atre “acian,” ngo hetre ewekë nyine tro sa kuca, matre tro la ka ini Tusi me easë a kökötr. (1 Kor. 3:7) Tha easë hmekuje kö a qaja koi angeic la hnei Iehova hna ajan koi angeic. Easa xatua angeic troa akökötrene la ihnimi angeic koi Nyidrë. Easa ithuecatre koi angeic troa amamane la ihnimi angeic koi Nyidrë, me wange hmaca la ka nyipiewekë ngöne la mele i angeic. Nge easë fe a ini angeic troa mejiune koi Iehova la kola traqa la icilekeu. Nge ame la easa qaja koi angeic ka hape, easa mejiune koi angeic, ke easë hi lai a amaman ka hape, ijiji angeice hi troa trongëne la itre trepene meköti Iehova, me xomi bapataiso.